კინომუშური ღორონთეფიში გჷნოძახინი
| კინომუშური ღორონთეფიში გჷნოძახინი by |
| დინმაჭარალი აკაკი ჭანტურია ოქროს კრავისა და ოქროს ვერძის ზღაპრები. 2003წ.ხ.152 |
ჭყონდური კოჩქ, ლჷნჯიში კოჩქ ამბე კითხ ხეთასია,
ხეთაქ უგამ: "ქობღურუქ, მეხვარი, დოუძახი ცხეთასია.
მუნაფილი რე, პელეტერი, სისონდი ვარე ცაში კიბულცუ,
ვამალინე, ვაგმარზინე, ღანძგი ვამიღუ შურ დო გურცუ.
ქიმმოტეს, კოჩი ვევალ, ვარე ჭყანა, ალა-მალა,
თელი ქეჸანა იკიონტ, იწპრებუ ზღვა დო გვალა."
იწჷკმა ჭყონდური ლჷნჯიში კოჩქ დოუძახ ცხეთაში ლჷნჯიში კოც:
"მუ ამბე რე, მუჭო რექ? ქოგიჸვილჷნანო აშო კოც?
მა ასე კოც ვამჸვილჷნა, მანგიორე ღეჯი მოჸუნა,
მიჯინენა ცაგანიათ, კუმინუნა, მოჩხუპუნა.
უთოლოსუ ღორონც ინეფი ჟი ცას გილეგორუუნა,
ითამ ხორცი ოვარჷნა, შურით ოქშიკორუუნა.
შიში, ზანთი ჯვეში ვარე, ქონდღულუ, ქოშკჷრტ, ქილიებუ,
მისჷთ ჰკითხინი, გოგიტჷრხჷქ, იმენც მითინი ვეჩიებუ."
ცხეთური კოჩქ, ლჷნჯიში კოჩქ ჭყონდურც უგამ კუსაფით,
დჷრხინით, ბურდღინით, შურიში კაშუა დჷრხაფით:
"სქანი საქმე ჯგჷრო ჸოფე, ვაგაფუ ღეჯი ოვარალი,
ჩქიმი ამბე ულირი რე, დუდი მაფ მისჷრ ონგარალი.
ქართი ქალაქი დარცხიის, მიღვარუუ არძო თექი,
ქჷდომიტეს უმინჯურო მა დო ჩქიმი უჩა ბედი.
მემიჩქ ჩქიმიშენი ქიმინეს, ექი შხვა ღორონთი გირჩქინესი.
გუგებული, ყვარილი, შანკილც მიხორხუანც თხა დო შხური,
კუჭის შქჷრენი ხჷრინკანც, ნჯარით ხორცქ ნჭყილი გური.
გოღვა ბწყუნდით თელი ქეჸანას, მიღუდეს ულიუ ნძალა,
მუქუ მაღოლეს ამდღა თე ჩქჷ, ვარე ღარჯალი, ალა-მალა;
გოღვა ტახთის, ამდღა ლეტას, დოჭყუ ღორონთქ კოჩისი ბაძღური,
თარსი, თარნაკი მარაფეთიში გილაშჷმოთი, გილაპაღური.
ქიგლეხჷრხოლ ართი ჟირი ამდღა ამსერი თევრენი ძალა,
მუჟამც თინეფი მიქონებუნი, იწკჷმა შურცუ მის უქალა?
მეხვარი, მეხვარი, ღეჯი ვევარა, ჯგჷრო ჸოფე სქანი საქმე,
ჩქიმდა მოულა ტყარი ღეჯეფი, თინეფი იჸუაფუ ჩქიმი მესაფლე."