კვარკვანტია
Jump to navigation
Jump to search
კვარკვანტია ტანი ქექე
თელო ორქოში კაკალი,
ნამუ ბაღჷს ინოჩანცჷ,
თქვანიცალი ტატალი.
ხურხიჩელა, თოლიგვირა,
ნერი–ფერი წყორილი,
ბროლიშ კიბირი მეჭუდათ,
ართიანც მეწკჷრწკოლირი...
დეჯერი კოჩი ცოდა ორე
მაძირაფუ თეცალიში, –
კჷდჷრ(ი) ოთანთალაია,
მეგვანაფილ(ი) ჩხეშაში:
თუმა ოშიალაია,
ჸვა გიღუნა ფიჩალი,
თელ სიცოცხლეშ ფასი ღირ,
თქვან სხეულიშ მირცხალი.
ეშმაკურო ვა გამგანი,
მითინქ ვაგმაფიჩხანი,
ქობწანდანი ართიანი,
ეგებ ღორონთქ მირსხანი!