ისევ შორეულ საგანს ვითვისებ
Jump to navigation
Jump to search
| ისევ შორეულ საგანს ვითვისებ ავტორი: ტერენტი გრანელი |
ისევ შორეულ საგანს ვითვისებ,
ახლა ჩემს გულში ბევრი ლექსია.
განმარტოებით ვფიქრობ სიკვდილზე,
განმარტოებით დგას ეკლესია.
შორს დაქრის სული დაუცხრომელი,
საით წავიდა სხეული - ლეში.
ჩანს წერტილივით ქორი, რომელიც
ნელა დაფრინავს მაღალ სივრცეში.
მიდის ეს ქალი და ბავშვი მიჰყავს
და ქარი დასდევს წამების მორევს.
ახლა ჩემს ლექსებს კითხულობს ვიღაც,
კითხულობს ვიღაც და იმეორებს.