ირიათონი ნარზა

From Wikisource
Jump to navigation Jump to search
please do not remove empty parameters (see the template documentation).
ირიათონი ნარზა
by ზაალ ჯალაღონია

ჭვემაქ გინიღჷ, ართ ფერჲ ქიგნოდვალჷ
ტობას დო ცარგვალც.
თუთაშ ნიში მენჩურუნც.
გოღა თის ვარდუო დინვოხედინ,
ოჩხომშა იბდინ დო ოღვანდალია
კალმახა ეშეპონინ.
დიხას გევორქჷნ, ორზოლი მოკო,
მუკორჩქინელ თუთას ელვოყიყინა.
მასქურჲ შურშე ეშმოლჷ დო უკულჲ
გინმირთუ გარაგანო.
ჟი ხოლო მეურც ირიათო ჩხომუა დო
ჯინუა.
თაქ თიშ ნარზა რე ხვალე.
ორთა ირთაანც, პეულეფც ცა ინასოფუნა,
წყარეფც პეულეფიშ შური.
ირიათონ ამარჲ რე, ართ კუჩხიშ გობიჯგაფა დო
შხვა მუხურჲ აწკართუ, ხიბა მინაულარჲ რე,
გემნულინ უკულჲ აშო ვარე გიმალჷ.
ფურიალეს დო გექაქელც, აშექაქუ
ირფელი.

წყარმალს მეუღჷ თუთაშ ნიში.
ჩხომეფიშ ჸუდეშე ძარწუფაშფერჲ
წყარიშ მაფა მიჯინე,
ბჟაშ ჩხორია დო თუთაშ თე
ართო გალაჸაფუ.
ჩქიმ თოლეფშე დაბადებე
ღუმანერჲ მურიცხი,
თიშენ რე ასე სქუაცალო მიმოჩქუნი.
ბორბოლიაშ მოსას ქოგურაფჷ შარა,
ფურცელჲ დო ფა მინაფაფჷ,
ართშა დუდჲ გაკწუღი მა თის
ნახართა დო ხვიარელქ.
ასე ვემემტყურუასჷნ კინ შარა ვარე,
ათენა რე ორთა, მართაფუ დო შხვაშ
მარსიოლაფარჲ.
ტკილონაშე გაკლეძირუ დუდი
ხვილარქ, რწვანე ქუაცალო
ხახუტელჲ ოჭიშით.
ირფელჲ ნაჩინებ მაფ დო
ირფელც მოჩინებაფუანა.
დღას ვეთებუ თე მოთოლორაფა მემჩქუნ,
მაჸალეცალო ქიფხუტოლე გურშა
დიადიხა.
ასე გეგნოურთ ართო თოლოწონდეს
ჟირხოლო.
წანეფიშ უკულჲ შხვა კათა ქუდოფხვადუნა,
ჩქი ქუმოურთ
ართი ნამდგაინი,
გამკიბძურუანთ დუც.
დო ართიანიშ მუნაჩინას
ზვაიაშე გაქშებღანთ.