ინდიელეფიშ ოფუტე

From Wikisource
Jump to navigation Jump to search
please do not remove empty parameters (see the template documentation).
ინდიელეფიშ ოფუტე
by ერნსტ ჰემინგუეი
გინმათანგალი არგო ჩიქვანი

ტობაშ ძგას მაჟრა ნიშიქ ხოლო გამკორჩქინდ. ნიშიწკუმა ჟირ ინდიელ გერდ დო მეშარეფც უჯინედ.

ნიკიქ დო მუამუშიქ ნიშის ქინოდოხოდეს. ინდიელეფქ ნიშის ქიმწუჯიკეს დო ართიქ ხოპეფც ქიმკუდოხოდ. ჯორჯი ჯიჯიქ მაჟრა ნიშიშა ინილ. ინდიელ ბოშიქ თე ნიშის ხოლო ქიმშანჩურაფუ, უკულ ვიშო ქენატურინ დო ხოპეფ მორხინ.

ჟირ ნიში მენჩურუნდ. უკმელას ნიკი წოხოლენ ნიშის ვარწყედ - ხვალე ხოპეფიშ ხონარი ასუმედ. ინდიელეფც ნიშეფი ნჭუაფილო მეჸუნდეს, ნიკიქ მუმას ქიმკარტყაპუ, მუმაქ ხე ქიგნუხუტოლუ ნიკის, ჩხურუ რდჷ, თენეფიშ მეხოპე ინდიელი დუდ გედინაფილო უსვანდ ხოპეფც, მარა წოხოლენ ნიშიშა იშენით ვეგიაჭიშუ. - სო მეურთ, ბაბა? - კითხ ნიკიქ მუმას.

- ინდიელეფიშ ოფუტეშა, ართი ინდიელი ოსური მანგარო დალახებე.

- ჸოხ, ჸოხ, - გეშაქეშუ ნიკიქ.

წოხოლენ ნიში ტობაშ პიც ეკორდ, ჯორჯი ჯიჯი სიგარას უპაპუანდ უკმელას. ინდიელ ბოშიქ თენეფიშ ნიში ხოლო წყარშე გეშაჩერჩელუ, ჯორჯი ჯიჯიქ ჟირხოლო ინდიელც სიგარეფი ქიმიოჭირინუ, თავრეშე არძაქ ცუნდელ ნდოლოშა გიშელეს, წოხოლე კოჭოფამი ინდიელი აწოჸუნდეს, უკულ ტყაშა მითილეს დო ცალფა ჭიფე შარას ქიგიაჸუნეს. ჭიფე შარა თარი შარაშე მიკმურთანდ. შარა გვალეფ შქას მიკმოდინუდ. შარაშ მელე-მოლე ჯალეფი ქიგეუკვათაფუნა დო თაქ უმოსი სინთე ქიძირედ, ინდიელი ბოშიქ გაჩენდ დო კოჭოფი დოშქირიტ. უკულ კინ მიდართეს.

ალამო მიკართაფშე ჯოღორქ ლალუათ გაგშასოფუ. გოხოლუას ფაცხებც სინთე იცანცალუდ. უკული ლალუათ შხვა ჯოღორეფქ ხოლო გაგშაცის, ინდიელქ გეუძახ დო უკახალე გამნორაჸ. შარაპიც ფაცხას სინთეს ონტუდ. ხიბაწკუმა კოჭოფი უკინებუდუნ ეფერ რჩინ ოსური გერდ.

ფაცხას მორდუ ოსური გილაჯანუდ ჯაშ დანჯირალს. მასმა დღა რდჷ მოლოგინუაშ დო ხანშამიშულირი ოსურეფი დუც გიორდესჷნი. ქომოლეფს შარაშა გიშულებუნა დო, უკმელას თუთუმს შუნდეს. მოშორებულო გილახედეს, ოსურიშ ბორჩხაფი ვაგეგონესკონი. ოსური თიმწკჷმა ხოლო კიჟინუნდ, ნიკი დო ჟირ ინდიელქ მუმას დო ჯორჯ ჯიჯის ფაცხაშა მინაჸუნესჷნი. მასქილადუ თუდონ დანჯირალს გილაჯანუდ დუდი ხუჯიშა აფუდ გილაჸათამილი, ჟინ დანჯირალს თიშ ქომონჯი გილაჯანუდ სუმ დღაშ ოწოხოლე არგუნი გეუშქუმალუდ კუჩხიშა დომანგარო დუჭკირ. კოჩი გილაჯანუდ დო სათმოს უმბალუანდ. ფაცხაშ მილახვილირ ჰავას შურიშ ღალა ჭირდ.

ნიკიშ მუმაქ ჩხე წყარი მითხუ. ვინდარო წყარი იჩხიებუდუნ, ნიკის რაგადი ქუდუჭყ.

- ათე ოსურც ჩქიჩქიქ ოკო ეურჩქინდას, ნიკ, - თქუ თიქ.

- მიჩქ, - უგამ ნიკიქ.

- მუთუნ ვაიჩქ, - უწუ მუმაქ, - აშ მარჩქილი: ათეს მოლოგინუაშ ჭუეფც უძახჷნა. ჩქიჩქის ერჩქინა ოკო, დიდას - დოსქილადა. ათეშენ რკიანს თე ოსური.

- მარჩქილე, - თქუ ნიკიქ.

ათე ბორც ოსურქ კინ ქიმიორკიუ.

- ბაბა, მუთუნ ქოჩენ, ვეშეილებუნო, ჭუაქ მეუტუასჷნი?

- ჭუაშ დუმარჩქალებერი მუთუნ ვამაპალუ, - უგამ მუმაქ - ვაგაშქურინას, მუთუნ ვამკუოლუ, - მა ვართ მარჩქილე თიშ რკიაფი, თიშენ, ნამდა მიჩქ, მუთუნ უბადო ვაღოლენ.

ჟინ დანჯირალს ქომონჯიქ კიდალაშე გამნირთ. საგესქუოშე ხანშა მიშულირ ოსურქ ექემს ქაგინაფუ, წყარქ გეჩხიორუა. ნიკიშ მუმაქ საგეგესქოშა მინილ დო გვერდი ჩუანი წყარი ბარქაშიშა გაგნაბ, დოსქილადირ წყარს ქანარღვუსარწყეთ გოკირილი მუდგარენ ინსტრუმენტეფი.

- ოკო დუღას გაიშეხაშას, თქუ თიქ დო მუშ მუნაღელ საპონით ხეშ ბონუა ქიდიჭყ. ნიკი თოლს უჸუნუანდ. მუჭო ისვანდ მუმა საპონს ხელეფშანი, ექიმი გურგედვალირო იბონდ ხელეფც დო რაგადანდ:

- ქოიჩქუნო, ნიკ, მუჟამს ჩქიჩქი ერჩქინდჷნი, დიო დუც გითმარჩქინანს, ვარდა, შხვანერო ქიჸუდა, დიდათ დო შხვათ გეწვალებუ. შილებე, თე ოსურქ აპერაციას გიახვილასჷნი. ხელათ გუჩა გურს.

მუჟამ ვარენო დერწუმუ, ხელეფ ჯგირო აფუდ ბონილინი, ფაცხაშა გამნორთუ დო საქვარ ქიდიჭყ.

- ჯორჯ, ქიშილებენდა, შქართუნი გამნანწყი, - ქოთხუ ექიმქ ჯორჯ ჯიჯის.

- ვამოკო ხე მიკუწაწუენი.

უკულ, მუჟამს აპერაციაქ ქიდიჭყუნი, ჯორჯ ჯიჯიქ დო სუმ ინდიელქ ოსური ძიუთ დამარგეს. ოსურქ ჯორჯ ჯიჯის კილეს ქაჩ.

განწარებულქ ქიმიოღვარუ: „ჸუჰ, სი ჯოღორიშ კაწაბი!

“ჯორჯ ჯიჯიშ მენიშოლ ინდიელ ბოშის გაძიცინ. ნიკიქ მუმას ბარქაში ქუდუკინ. აპერაციაქ ბრელ ხანს გეგინძორ.

ნიკიშ მუმაქ ჩქიჩქი გეჭოფუ დო შურიშ ღალაშ დაჭყაფალო უკახალე ხე ქუმკუტატუ. უკული ართ ხანშა მიშულირ ოსურც ქუდაკინუ.

- ნიკ, უჯინი, ბოში რე, - თქუ მუმაქ, - მუჭო გოხუჯ ჩქიმ ასისტენტობა?

- ძალამს მოხუჯ, - უგამ ნიკიქ. განშე იჯინედ, ვაკოდ ძირუკონი, მუმა მუს ორთუდუნი.

- ასე ოკო გელეჭუას, - თქუ მუმაქ. - გოკონდა, ქუჯინი, ვაგოკონდა, ვაუჯინა;

მუჭოთ სი გოკონ თეში, ნიკ, ნაჭკირა ოკო გელაბჭუე. ნიკი ვა უჯინედ, ირფელიშ ღიაბი დინაფილ აფუდ.მუმაქ გუნაჭკირა გელაჭუ დო გამწოდირთ. ჯორჯ ჯიჯიქ დო სუმ ინდიელქხოლო გამწოდირთეს. ნიკიქ ბარქაში საგესქუოშა გამნიღ.ჯორჯ ჯიჯიქ კილეშა ქიგიჯინ. ინდიელ ბოშის ჩამინქ ქუგაშინუ დო გიძიცუ.

- მალამას ქოისვა, ჯორჯ, - უწუ აქიმქ ჯორჯის დო ინდიელ ოსურც ქიგნაჯინ.

ოსური თოლწკურილო წყინარო გილაჯანუდ. დიო ხოლო თაქიანობას ვარდ, ვაუჩქუდ, ჩქიჩქი მუჭო რდჷნი.

- ჭუმან ოჭმარეს ქუმულ, - თქუ ექიმქ დო გედირთ. ონდღეს სან -იგნასიშე მუკმალუაფარ ოსური ქუმურს, მუდგას ოხვილუთუნი იფრელს ქიმიღანს.

ასე ექიმ აფოფორებული რდჷ დო რაგადი ოწვადილუდ. ათაშ ოჭირნა მობურთეფს გომორძგუაშ უკული.

- თე ამბექ მედიცინაშ ჟურნალს ოკო გიჭარას. ჯორჯ, - თქუ თიქ, - ოკიჩალ ხამუთ საკეისრო ჭკირუა დო ბჟაშ სიტიბათ გობჟინაფილი ჩხოროფუტიანი ჯერღვით ნაჭკირაშ ელაჭალა, მართალო, ვანაფერო მოხვალამე.

ჯორჯი ჯიჯი კიდალაწკუმა კინორდ დო კილეს გიოჯინედ.

- ნანდულო გოსოფური ქირურგი რექ, - თქუ თიქ.- მორთი, აკა, გაბედნიერებულ მუმას ქიმკვოჯინათ, თე ტყურა ამბეს არძაშ უმოსო მუმალეფი გინაფულენა, - თქუ ექიმქ. - მარა თენა მუდგარენ ძამ წყნარას ორდ!

ექიმქ ინდიელს შქართუნ გამნანწყ. ხეს სიშუე ქიგინ. თუდონ დანჯირალს ქიგედირთ დო კოც ქიგიოჯინ. გითონარქილი ინდიელი კიდალაშე რდჷ მინორთელი, გექუნალს ზისხირ გექვათუდ. ინდიელს დუდი კვარჩხან კილეშა გეუძუდ. გონწყუმილი ხამუ შქართუნიშა ორდ გეჸოთამილი.

- ჯორჯ, ნიკი გაგმიჸონი, თქუ ექიმქ.გვიან ბორჯი რდჷ, საგესქუოშ ხიბაშ ორკეშე ნიკი ირფელს ორწყედ, მუჟამს მუამუშიქ ინდიელს ლამპა ქიმეუჭოფუ დო დუდი გინუკინუნი.თანდუდ, არძაქ შარაშა გიშელეს დო თუდოლე ქიგიაჸუნეს.

- ძალამს მონარღ, შურო ვამომჸუნაფუდიკო ნიკ, - თქუ მუმაქ მოფირტვინაფილო, - იშენიშენ ასე მოხვადუო თე ამბექ.

- მოლოგინუა ირო თეფერი უგურზებუ რენო? - ქითხ ნიკიქ.

- ვარ, თეცალ ვანაფერო მოხვად.

- მუშენ იჸვილ დუდი თი კოჩიქ, ბაბა?

- ვა მიჩქ, ნიკ, ალბეთ ვაგარზინ თე ამბეშა.

- ბაბა, ფშხირას იჸვილნანო დუც ქომოლკათა?

- ვარ, ნიკ.

- ოსურეფი?

- ამიორც ვარ.

- ამიორცო?

- კანკალეშა, ქო.

- ბაბა!

- მუ რე?

- ჯორჯ ჯიჯიქ სო იდჷ?

- მალას დირთუ.

- ღურა ნწარე რენო, ბაბა?

- მა ფიფქრე, ძალამ ქექე რენი. გარჩქ, მუჭო ღურუქუნი.

თინეფქ ნიშის ქონოდოხოდეს. ნიკიქ - ნიჩვის, მუმაქ - ხოპეფწკუმა. გვალეფშებჟა დუც ეშმაჭოფუანდ. ტობას ჩხომქ ქიდიბათქუ დო წყარიშ ჟინ პიც კვარკვალია ღოზემქ ქიდილაჸაფუ. ნიკიქ წყარს ხე ქუნწყუ - მოგოთანეშ სირგილეს ტიბას მეთონ წყარქ. - ღიუღაუს, ნიშის მუმაშ ხასლას ელმახვენჯი ნიკი, ფიქრენდ ნამდა ირო გარზჷდ დო დღამუშის ვაღურუდუნი.