იბჭუქი დო იბხალუქი
რუში დუს ალმუარჩქილექ მაფშალიაშ ნაბირას,
ჩილამური მუმანტებ, მითმიაკათუ წყარი მალს,
იბჭუქი დო იბხალუქი, ჟიშე ველუქ წყალობას,
ცას ღორონთის მოსაშველეს მევუჩინანქ მადლობას...
გური მუჭო ელეღინე, მაძირექი ქოძირას?!
მერძიებულ ეფი ღირ, ვეგმიჩინე დღას ძვირას,
დღაშ დო სერით გილაბგორუნქ ალმასეფიში ძიას...
თამარ მაფა ამდღა ხოლო იხვამანსი ვარძიას.
ჩქინ ამბროსი ხელაია ჯვარს გინმაწერს ქიანას,
საქორთუოშ გაჭირება ქუჯ დო ცოტნეს ქაძირას,
ნტერ ბორქომით მიკილანს ენგური დო რუხიშ კარს,
ჩონგურ თვალუნს ჯვეშობურო ჩელასი დო ნანინას...
უკოჩობაშ კოჩი ამდღა ქიანას ეწოჸუნს,
სამართალს კირიბწკუმა ნგერი მუშოთ იწონუნს,
უმინჯურო ცოდა შხური ჸვერე თხას ეკოჸუნს,
ბარდის დო ოძიგირეს ვარდი დღას ვეფალუნს...
გუმოჩამილ კოლხი ვორექ, ვობუნქ ჩხე-ჩხე ჩილამურს,
ოდაბადემიდაღალირს მუ მუკომრდუნს ჭყოლირ გურს?
თხოზუნა დო მიწონენა ნანინასი მარგალურს,
ღორონთიში ჭყოლოფუა, ჩე დღა ხოლო ქუმოურს...
ირემ მიდგას უჭვალუნი, კინი თინა გეჭვალუნს,
კალმახაში მაჭოფალი ორაგულსუთ ოჭოფუნს,
მაჸალეში მაგორალ, ზჷნთხი ზღვასი გენჩურუნს,
მუმულ ქილორ კოდორ პიჯშე დუს იჸვილაფ, ჸიონუნს...