თოჭუშ გეძირაფილი
გეჸიონჷნა მუმულეფი ცეშ მათანგალო,
გურმენცარულო გიძახჷნა სერიშ პიჯიშე,
ფურე ნატყვაცეფჲ - ეციმილი თუთაშ ლინჯიშე -
მურიცხეფიში ბორბონჩია გჷგათანკარჷ.
მუშ მაგჷნძა რე ზოთონჯიში სერი, ხვამელი,
გოთანაფაშა ირფელ ფირქის კოჩი ქოჭიშჷ,
შურ მელიებუ, მუჭო ძაფიშ მორგვი კონჭიშე,
ცას ანჭუაფუ, მარა ვართ თექ მითინ ვამელჷ.
ვერგ უგურალა, შურდგჷმილი ქორექ არში და,
ჸათე ქიანა პეულერი აბა მიშო რე?
ბჟაშ ჩხორიათჷ ასაგასა ოკო გიშოლე,
ნარღიშ ტობასჷ, სი, გოკონდა, ორდე ნაშკვიდა...
გონწყი შქაპანი, აშ გეშაშქვი შური ტებული,
დუც მუთ იღორე, მუში გიღუ მენდი ტყურელი?
სუმშა მუმულიშ ჸიონიშა სუმშა ღურელი,
ვართ ჟჷნც აფუქ დო ვართ თუდონცჷ მონარტებული.
ზანთო მჷგალე კოსმოსიში ნინა ფულირი,
გოჸას მეფუფქილ მურიცხეფ რე თიში ზიტყვეფი...
უხტო ჭარასჷ მუჭო ატე ოწმეშჲ სი ტყები,
უჩა დინოხურც მუთ უძინი ბორჯი ულირი?!.
სო დორსქილადჷ დიადიხა - სქანი მასქერი,
სო მიკოიტებუ ადამიერჲ მურემურალა?!.
სქვისქვირეფიში აწგაძირე თოჭუს ღურალა
დო ირიათონს მითიქვანთჷ რუმე შქასერი...
გეჸიონჷნა მუმულეფი ცეშ მათანგალო,
გურმენცარულო გიძახჷნა ლურიშ პიჯიშე...
ფურე ნატყვაცეფჲ - ეციმილი თუთაშ ლინჯიშე -
ჭყელი ბონდღისჷ ბორბონჩიათ გჷმათანკარჷ.
ღურთუთაში (იანარიში) 17, 2016 წანა,
ქუთეში