თირ-ატატია...
მარიკა ახალაია
თირ-ატატია...
თირ-ატატია,
ქუმმოდვ სკან მატატია,
ქუმმოდვ სკან მატატია!..
გოღა ბღურ დო ამდღა ქიდებაბდ,
წორო-წორო მოფურინნა ახალ მურიცხეფ,იფაჩუნა პეულცალო დო სოდგა მიკმიტენა შურს...
ქუმორთ,თირ,ქიგმოფაშკე ჩე-ჩე საფაჩი დო ქიგმოხუნე ცორცხალ ვორექი თინა.სკან მეტი ვამოკო შხვა ფერი...გოღანერ დინაბადის ბჟაშ მანგიორო,მეზობელიშ, ნავილა მუმულიშ ზისხირ ფჩეს...დიო უჩა რდუ,უკულ ჭითა.გოღანერ ჩქიჩქიქ სუმი ფერი ქიდიბგურე...მიბრდი უცბას დო თელ ქიანაშ ცოდაქ პუხუს ქუმმაბუნ...
თირ-ატატია,ქიგმოფაშკე მაქ,სკან საფაჩი,ვაგარჩქილენო,დუმაწიკ წყარიშ დიდაშ ნაბონა კუჩხეფქ,დუმაშოლ ბჟაშ ნასკირეფ კაბაქ,თხოლოცალო გინმართ გურქ(ბგურაფულენქ ახალ ფერენს,შხვა შარა ვარე)...გობწიმინდე,დოპილ დო კინე გუმორჩქინ,მარა თოლიშ გონჯამა დო ცოდა ვამმობუნუა...ცოდა ვორექ,მუზმაშა მობრთა...
თირ-ატატია...
თირ-ატატია,
ქუმმოდვ სკან მატატია,
ქუმმოდვ სკან მატატია!..