თვალები ისევ ენთება
Jump to navigation
Jump to search
| თვალები ისევ ენთება ავტორი: ტერენტი გრანელი |
თვალები ისევ ენთება
და გული გაიპო ორად.
ეს ღამე გაჰქრა, თენდება
და დილა მოადგა გორას.
მწუხარე დღეები ჰქრიან
და დროა, ეს ქალი ვიცნო.
მოვა შემოდგომა გვიან
და მე აღტაცებას ვიგრძნობ.
პირველ პოეტად ვითვლები,
ვხედავ ოცნების მოედანს.
და შემოდგომა ყვითელი
ალბათ სიხარულს მოიტანს.