თეთრი წამები ისევ მიჰქრიან
Jump to navigation
Jump to search
| თეთრი წამები ისევ მიჰქრიან ავტორი: ტერენტი გრანელი |
თეთრი წამები ისევ მიჰქრიან,
დაო, შენ მაინც რომ მიშველიდე.
ჩემთვის სიცოცხლე მხოლოდ ფიქრია
და მხოლოდ ფიქრში მიდის მთელი დღე.
და ბაღში ბინდი ისევ შემოვა,
ქარმა ფოთლები ჩემს წინ დაყარა.
ვფიქრობ: ეს ქალი რა საჩემოა,
ვფიქრობ: ეს ქალი რამ შემაყვარა.
სადღაც შორს ცისფერ ოცნებას ძინავს,
ახლა მეც მინდა, რომ მივიძინო.
არა მაქვს სახლი, არა მაქვს ბინა,
არა მაქვს ფული, არა მაქვს ღვინო.