თანაფა
შოშეს გვალო ხვალე გეპუნდი. გვალო ხვალე თიშენ, ნამდა მა სოდგარენ გილაფუბრინუნდი არზეფით. ვარა ეშ, მუკი-მუკი დანტირუ ვა რდჷ. კათა გილესოფუდჷ. მიფში დო მეფირფქენდი ამდღანერ დღახუშე, თანაფაშე. მუს მოშინანს მა თინა? ბაღანობას, საფულაშა გილეფშით თელ ფანიან დო ჩქინ ღურელეფს იფშინანდით, ღაფილ მარქვალეფს გინუვოკერკელუანდით ჟიშენ. ჩქიჩქუეფი ართიანს ვუჩქვაჩქუნდით ჭითა-ჭითათ ღაფილ მარქვალეფსინ ეთის… ირო ჭვენდჷ თანაფა დღას. ირიშ უკულაში, ვა ჭვენდუ-და, ქიმიციზუანდჷ ვარა იშენ. ამდღარ თანაფას ვართ ართი რდჷ დო ვართ მაჟირა. ბჟა ჩქიჩქუშ გინაშქუმელ ბურთიშორო ეშმიკერკელუდჷ ჭიი-ჭიეთ ეშე, გვალეფიშ გინოხშე. ძალამო ხუმლა დღა იჸუაფუდჷნ, გიოხედჷ. ვა მიჩქჷ, ათე დღას, ოწმახუშე თაშ რდჷ მერჩქინელინ თიშენი დო ვარ მუშენინ, მარა მუდგარენნერი მატიბაფალი მარდიშ მონძალუას ბგინაფულენდი ირო. ირდიხას იგინაფუაფუდჷ მარდი, ორანი… ასე მუქ მაღოლჷ? ვართ ჭვემა რე, ვართ მარდი. მიფში შოშეს დო მიმნგარდი, “შხვა ნოღას მითუვორექ ხვალახეთ. ამდღა ვართ საფულაშა ეკმართინე, ჩქიმ ღურელეფს ღვინი ვარა ქოგინუვოჩხაპუენ” მაქ. ათე ფირქეფით, ზაგართუს ქავოდირთი. მაჟირა განშა გინაულარო, მანქანეფიშ უმუჭყვიდუ ყარაფიშ გაჩემება იბლამე ნოთეშანიშ წვანე ნოთეშ ემარზამალ კონჭიშ მიკონჭირათ, თექინეშეს, ზაპიჯის სვაიას მიკოკეთუდჷნ. კოჩიშ სქუაქ ვა გაჩენდჷ. ამდღა ხომ დღახუ რე, შილებე ირფელი. ეეჰ, გეშიბკაში შური, მუთუნ ვამოხვარა მაქ, ფთქვი გურს. მიკიბჯინი დო ჩქიმი უკახალე ართი რჩინუ ოსური ქუმიჩაკალჷ ძიუთ დო ღურათ. ცალ ხე ლუბაშა აფჷ ენოღალირი დო გურკიდირშა მიკუძჷ. მაჟირა ხეთ, ჭიჭე ნოკარაჩხიათ, ღაფილ მარქვალეფი, კანფეტეფი, ოთანაფე პასკა, სანთელეფი, ართ ბოთილი ღვინი დო ხოლო მუდგარენ-მუდგარენეფჷ ქომოუღჷ. გვალო ჩქიმი ბები მაქ, ფთქვი ხათე გურს. მოკოდჷ ვახუტოლიკონ, მარა ვა დუვოშქურინუა უჩინებჷ ოსური მაქ დო აკიბჭოფი დუდი ათეშენ. აკოჭიროთებულ სახე უღუდჷ ართო, ჭკვერი, ანდაჭუაგინნაღელ თოლეფით, დორშვილ ზისხირიშფერ, ჭითა-ჭითა ჯერღვეფით, ნამუნეფით ტომბას ინუხედჷ თოლიშ რობუეფშან. საფულაშა მიშჷ, მუშო ოკო რაგადი. მოქეთელანდჷ. შური ძიუთ მეუღუდჷ. ქენმოჯინჷ დო დიბჭვი. ცოდაშე. - ბები, საფულაშა მიშათინ იჸუაფჷ, მა შემილებჷ მიგაზარათინ,- ვუწი გოძიცელო. ალმარჩქილუაო, იფირქჷ ალბეთ დო კინ ქენმოჯინჷ. - ღორონთქ გოიტიბინუან ნანა ამდღარ დღაშ მარდი. მუჭო რშკიდუათ სქუა თქვა თენა, - მიწუ მორდებუანო. - ბები, გოზნახუთ, შხვანერო ვა ემიჭოფათ ნარაგადი, მა შემილებჷ მიგაზარათინ დო ქორთხიინთ, ვარია ვა მიწუათ, - ვუწი დო ღვანწკეფს ქუვაჯუნი. გეხარჷ ოსურქ. ხათე ჩილამურეფქ გელუსხაპჷ თოლეფშე, ლიშიშ ნარხვი თანგიშე კილაწუმილ, მარკვალია, მარკვალია საჭყორო საფაჩეფშორო. მა თიქ ფხვამუნ, თი ჯგირობუა დო ხვამა ჩქიმ მოჸოროფეს დო ჩქიმ მაჭყალსით ღოლუას გუმარჩქინექ. ულაშახ ფკითხჷ ბებიქ, - „ნანა სი ქორდიაო სქან ღურელეფიშ საფულას დიო?" მა ვუწი, - „მა აქიან ვა ვორექ ბები დო ჩქიმ ღურელეფქ ვა მაჩხონუ ამდღა მაქ“. მიწუ, - „ვა გაშქურინას სქუა, თექიანობას არძა ართი რე. სი ათაქ მა ჯგირს მირთუქინ თინა, თინეფს თექიან მეკითხაფაშ უმოსო ახიოლენანია. შურდგუმილს ოკო დიო მინჯე დო უკულ ღურელს, მა სქან დუდი ამდღა ღორონთქ მუჩუა." მახიოლჷ. გაგიწუღი ნოკარაჩხია დო გითუვაჸუნით შარას. საფულაშა იშენ-შენ ბრელი მუთა მეძუდჷ, მარა ვა მანჭუაფედეს, რახან ბების ულა ვალექინუდჷ, ონდე-ონდეთ მიშჷ დო ეთმუჸუნუანდი მა ხოლო კუჩხის თიშ ნობიჯგუეფს. ჭე შვანი მიდეღჷ ათენერ ნარას ულაქ…
ბორჯგიშაშქუმალირო ბებიჸურე მიკმიბჯინექ. ით თოლეფს ენმოყვიყვინანს. უკვენს დიო ხოლო ირფელი. მუჭო დორჩინე! დოჭირაკელე, ართ ბორჯის ალბეთ სქვამი, ზისხირით ეფშა, რინას მიახიოლუდჷნ ეფერი ოსური. მუთ ვუჯგუქ მა თის ასე? თითიო, ახალი ვორექ დო დიო ხოლო წიმი მიღჷ რინან? თისით უღუდჷ ენა მუში ბორჯის. მუშენ ბგინაფულენქ ათაშ არგამას დო მუშენ ვორწყექ ჩქიმ წანეფიშ მიკორულას თოლოწონი? თოლშა მუშენ აწომირე ჩქიმ შვენაშ დაჭყაფუშე მოჸუნაფილ, სირჩინუეშახ გაულარი ზალეფი? ქომარა, მოხიოლუნ? ჰო მოხიოლჷ, სირჩინუე მუმელუნ. ვა მიჩქჷ მუშენ, მარა ღურა ხოლო მაჸუნუ თის მუშ ბორჯისინ, თინათ მოხიოლჷ. მუშენიო? მუშენ-და, ირფელს ჩქიმ თოლით ქობძირუნქ დო მიკიბლენქ არძო თი შარას, მუსუთ მიკმურდჷ კოჩიშობა თე ოქიანუს, გორჩქინაშე მოჸუნაფილ დო ანწით აჸი მიკალინ. არძაქ ქიგინჷ თინა, მუთ მა დიო ვა მიგინაფუნ დო არძაქ გამუკორთჷ მუში მუკალჷ შარა, მიქით გინტირინუნ. ქო, მა ხოლო მიკობრთე ოკო თე შარეფი არძო! აბა თინა რენო ონჯარებელი, ჟარნეჩ წანაშა უმურთუმუქ, ამარ ჩქიმ მორდიაშ ბოშიქ, ახალქ დო ზისხირით ეფშაქ, დუდი ლაკვიცალო ქიმკიბუნუ მოღულა რკინაშა დო მიარე კათას გური დოჭყვიდუნ? მუშ შური მიდინუნ? ვარი, ვა შემილებჷ გებგე ათენა! სქან ხეთ მუჭო ოკო შქირიტე დო გიოწკურე, მუდგა ჭიროთიშა ვა გაფუდას გარზებელინ იშენი, ეთი ხიოლიშ მაგინაფალი რინა, მუჟამცჷთ შეგილებჷ ასე მა ხასჷლას ალაპუნს ბებინ, ათენერ დაღარი, უასაგასე დო უხიოლე ადამიერეფს გურშა ალუკინენ. მერქაშზჷმახანს რდასინ ხოლო, გაჭყოლიდაფუე ჭუა დო გახარე მუში აჩქიჩქორებულ გურინ? ალარნა! ართიანიშ მოქექაფა, ათენა რე თი ნინათ ეუჭარუ ხიოლი დო მენდი, მუთ რინას გოჸოროფაფუანსინ. ვა მიჸორს მორალიშ კითხირი დო აჸ! იშენით თაშ გიშმალე. თინათ წკანტილო მიჩქჷ, შხვაშ ლაკვატა ლექინ ოჸოთამალი რენ. ეგჷბა ასეთ ნწარას ფჩირთუქჷ-და. მის უჩქჷ…
მუთ იჸუნ, ქიმუვანჭით დო მინიბლით საფულაშ ოზეშა. გოფშა რდჷ ღურელეფით თექიანობა. ბებიქ ართი ალუმინით ეშაკეთებულ საფულას ქომიოდირთჷ, სოდეთ ჟირი ფსილაშ კურზულიეფი თის გოჩინებაფუანდჷ, ნამდა თინეფიშ თუდო, თაქიანობაშე ბრელ ხანიშ წოხოლე მოხარცქილ კოჩიშ სქუალეფი ინოჯანუდეს, ირიათონს რდეს მერსხილეფინ. მინიბლით. ართ საფულაშ ქუაშე ხანერი კოჩიშ სურათი ინმოჯინედჷ. მაჟირა ქუას გოძიცელი სახეშ, ახალნორდი ბოშიშ ფერუან სურათი რდჷ მიკოხანტილი, ეჩიდოამშვი წანაშ ხანს გუსურებუდჷ რინან. მარქვალეფი გეშებღი დო საფულეფს მინორღვაფილ ფსილას ქიგნუვოკერკელე. ბებიქ სანთელეფს ქომუნტუ. თვალუნდჷ. ინგარდჷ, ზუღას ქაკათუდჷ თიშ ჩილამურეფიავან თეშ. იმნგარი მა ხოლო. ჭირქა გებჭოფი დო ვოჩხონე ღურელეფი, ბებიშ ოჸოროფულეფი, ათე დიხაშ თუდო მითოჯანუდესინ დო უკულ თელქიანაშ არძო ღურელეფსით ირიათონი ნათერი ქოვუზალი. გეგნოფშვი ჭიჭე დო დოსქილადირი ღვინი ღურელეფს ქიგნუვოჩხაპე. ქომონჯი ბრელ ხანიშ წოხოლე დინაფუდჷ ბების, სქუაშ ღურაშახ. აკა კაკალია ნოჸვე სქუა დო თინა ხოლო აფხაზეთიშ ლიმაშ ბორჯის დოუჸვილუდეს, ახალი დუნაჭყეფი ჸოფე ჩხუპინ თეშ. ქუგმაშინ ჩქიმ ბებისით ეჩდოხუთ წანაშა უმუნჭაფუ სქუა აფუდჷ ნადინეფინ. ჟირმანგო მოცოდუდჷ თე ბები. ჩქიმი ბები რდჷ თინა ამდღა. თე ბების აშო მალურთუმუდჷ ქართშა დო მუშ მოჯგირეეფი ხოლო თაქ უწონებუდჷნ, სქუა ხოლო თაქ დოუნთხორუდჷ, ჸუდეშ ხოლოს, სოდეთ მილურედეს მუში მოჯგირეეფსინ. ჭე ხანიშ უკული ქომონჯიშ საფულა ხოლო აშო გაგნუღალუდჷ დო თაქ ქალუნთხორაფუდჷ სქუაშ ხასჷლაშა. თაქიან მოკითხაფათ დო ჩილამურეფით რჩხუალას მუკმოჸუნდჷ ცოდას დღა დო სერი… გური დირძღჷ ბებიქ ნგარათ დო ვარინ, გამუწოდირთჷ. იბდათია ანწი ბები, გვალო დჷგოშქვიდევა სი ხოლოვა დო ხე დო დუდი გომილუ. ჩქიმ გოჩაშ ხანი ქოირსხუა სქუა ღორონთქ, ფხვამუ. მეცოდჷ, კინ კუჩხიშ მალუო ქაწიბრინე ბები თოლშან დო ტაქსი გაგმიბძახი. მილაჭკომაფუშ ოჸიდე ფარა ალამიძუდჷ მუდგაზმარდჷნ დო ათე ფარა ქიმეფჩი ტაქსისტის. გოხვიჩინაფილ, ხიოლით დო ჩილამურეფით ეფშა თოლეფით ქიდიბტე ბები მუში მილარენჯიშ გოხოლუს, მუთუნ ორქო-ვარჩხილით ემიფშაფუდჷკონ თეშ. მა ჩქიმი ჩინჩი ფარაშ მენდულს, ხვალე მეტროთ მალინედჷ ჸუდეშა-და ვარა, შხვა შარა ვართ მიღუდჷ. ქიპიდი ჟეტონი დო გურბაღინაფილო იმნჭე ჩქიმ ბინაშა…
ეთი თანაფამ დღას მა მარდი იბგინინ, ჩქიმი შურდგუმას ვა გუმოჭყორდუ. გურს უგურზებუ ხიოლი დო ბედინერობა ენმაგვარგვასუდჷ თელ მარას, რახან უკვე ჭირაკილ, ვართ ფერ ბრელხანდოდვალირ ბების, გურშა ელუკინი, ქუმუქექე, ქუმუტიბე დო გუვახარინ.
01.12. 2014 წ. ზუგდიდი