ზღვას ვით გააშრობს ვარსკვლავის სხივი
Jump to navigation
Jump to search
| ზღვას ვით გააშრობს ვარსკვლავის სხივი ავტორი: საიათნოვა |
ზღვას ვით გააშრობს ვარსკვლავის სხივი!
მტკვარი ცხრილით როგორ უნდა აირწყოს?
ქარი რას დააკლებს ქვითკირის კლდესა,
თუ გინდ წლის-წლობამდის ქროლვა დაიწყოს!
თუ გინდ გაათეთრო სპილენძის თასი,
სპილენძი ერთია, ვერცხლი - ათასი!
ჭიქას არ ედება ალმასის ფასი,
თუ გინდ ოქროს ბეჭედშიაც გაიწყოს!
ზოგზოგი კაცია ეშმაკის მუშა;
ეშმაკის ნაშენი ღმერთმან დაფუშა...
გოგრა არ გახდება შირაზის შუშა,
რა გინდა მაღლა თახჩაშიაც შაიწყოს!
თუ გინდ თევზი დაჰკლა, - არ დაიყვირებს.
ფეხთ ჰინის დადება რათ უნდათ ვირებს?
ქვიშა ბამბის ალაგს ვერ დაიჭირებს,
თუ გინდ ყუთნის საბანშიაც ჩაიწყოს.
ნურვინ იტყვით - ეს ყმაწვილი ვინა ვარ!
ანა-ბანა ვიცი, სიტყვით წინა ვარ.
საიათნოვა მქვიან არუთინა ვარ.
სიტყვას ვიტყვი, ცამ ქუხილი დაიწყოს.