ზისხერამ ფარა
– გვალო ჭიჭე, ოში – ოშიჟარნეჩდოვითი გრამი ზისხერი.
– ობარებელი რენია.
– მუშენია.
– მუშენია დო თიშენია!
– გეგმა ენონთხაფილი რენია!
– გეგმა მუ შქას რენია?
– დონორი რენია. დონორი ოსაჭირუნა დო თიშენია!
– ჩქი ვარი, ინტერნატიშ ბაღანეფს ხოლო ეუჭოფუნანია ზისხერს.
– ორკუნანია ზისხერი.
– ზისხერი ვარი, ინეფს დუდს ორკუნანია!
– თინეფს ხოლო უღუნანია გეგმა.
– უკული ჩქი მუ შქას ვორეთია?
– დონორი რენია, ბაბა, დონორი!
– კანონი რენია.
– აბა, გობაღუნა ლაი–ლაი! ქიდინწკარით დო ქიდიბჭყათ! – ქიმიოღვარუ უნჩაშიქ დო ხეფურჩა ქიკნიკართუ, – მა იპიქია პირველი, მა ეშებღანქია ზისხერს, მუჭო უნჩაშ პატრიოტია!
თელი წარმებაქ ქიდინწკარჷ.
კინი ქიდიჭყეს ლაი–ლაი, ებჭოფათ ზისხერი დო ვარ ვებჭოფათია!
ჩილამორამი თოლეფი. ნამთინს ვაკოდჷ ზისხერიშ ეჭოფუა, მარა...
დოხტურქ გეჭოფჷ მუშ ინსტრუმენტეფი, ფერშალი ოსურს ქელაჯინჷ, გუძიცუ დო არშიყულო თოლი ქიდუჸოთჷ.
– ვენერაჩკა, პრიბორი!
ვერენაჩკაქ გახაზირჷ პრიბორი.
–ოსაჭირუნანია ზისხერი.
– ეგებჷ ვემჭოფანია.
– დონორი რენია.
– კანონი რენია, ბაბა, კანონი.
– სო ჭარუნია უკული თეცალი კანონსია?
– ხვალე ჩქი ვარი, ინტერნატიშ ბაღანეფს ხოლო ეუჭოფნანია ზისხერს.
– დირექტორს ხოლო...
მითინს ვაკოდჷ ზისხერიშ ეჭოფუა.
ართი ოსურქ ქიმიოკიჟინჷ, მა იშენთ გოსქირაფილი მიღუნია ზისხერი დო მუს ემჭოფუნთია?!
ართიშ კიჟინს მაჟიაშიქ ქიმიაჸუნჷ, მაჟიაშის მასმაქ... დო გეგნოკიჟინეს თექიანობა.
- სო მიღუნანია თქვანი მიოჩამალი ზისხერი?!
მარა საჭირო რდუნ?
დოხტურს ხეს უკინებუდჷ მუშ ინსტრუმენტეფი დო ელუდჷ.
– ვერენოჩკა, პრიბორი, მალას!.. დიბჭყათ!
არძო ცოდაცალო ენაჯინედჷ ვერერაჩკას.
დირექტორი პირველი გერედჷ, მარა დოხტური ვეჭყანდჷ თიშე, მუდგარენს უჯინედჷ...
– ეგებჷ გეგშართასია მუდგაინქ?
– ქუდურაგადუათია.
პატი ქოფცათია დო ვემჭოფნანია ზისხერს.
– ფაცხაშა მიდეპონათია.
მარა ვა.
– თის ხოლო უღუნია მუშ გეგმა, აბა ჩხოუშ ზისხერს ხო ვეღანსია?
– ინეფს ხვალე კოჩიშ ზისხერი ოკონანია.
– ვართ ჩხოუშ ზისხერი რენია კოჩიშ ზისხერშე უფურაში.
– ვებჭოფათ!
– მუთ იჸინ, თინა იჸინია!
– ხო ვაპილუნანია!
– უნჩაშუ ტყების გეგმონწყუნანია!
– ტყებიშ მიკონწყუმა უჯგუნია ზისხერიშ გოსქირაფას.
– კუჩხეფი ვამომჭკუმანია.
– კანონი რენია.
– დონორი რენია.
– უკული მურენია?
– სორენია ზისხერი?
– სორენია კანონი?
- დოპილანინ იშენთ ვებჭოფუნქია, ბაღანეფს გიფუჩუანთია, თეშით გოსქირაფილ მაფუნია...
კინი ღაჭალი დო კიჟინი.
დოხტურქ ქიმიოქიონჷ დო წარმებაშ დირექტორი ხასჷლაშა გემკიჭანუ. ჭეხანს ქიჩიებუდეს, უკული გიძიცეს დო ართიანს ხე გეგწუღეს.
– ქენანწყუ საქმე ჩქინი უნჩაშიქ, ვემჭოფუნა ზისხერს.
დეწყნარეს.
დირექტორქ ხეფურჩას დუკინჷ, ოშმეშეფშა ქელეძიცუ დო თქუ:
– ქო პატჷნი, ვაგოკონა ზისხერიშ ეჭოფუა, ვართ დონორი გიჩქუნა მუ რენი, ვართ კანონი, იწკჷმა, ჩქიმი პატჷნსქუა, ფარა ქიმეჩითია.
– ფარაო?! – ქიმიოძახჷ არძოქ ართო.
– ო, პატჷნი ფარა! ნამუთ ჯოჯოხეთის ანათენსია.
– ანათენს ვარი, უმოსო უკმელათ გინართინუანსია. მინჯე ვაჸუნს თე ქიჸანას ვარა..
კინი დიჭყჷ ართი ამბექ:
– მუსხე ოკონანია ქო მარა, ფარა?
– ქომოლეფქ ეჩდოვით–ეჩდოვითი, ოსურემქ ეჩ–ეჩი.
– აბა, ქიდინწკარითია!
ქიდინწკარეს.
მინქ ქიგედირთჷ, მინქ ვარი. მინს უღუდჷ ფარა, მინს ვაუღუდჷ... ზისხერიშ ეჭოფუა მითინს ვაკოდჷ.
დიჭყეს ვაჭრუა, ჭიჭე ქიდამირკითია.
ქომოლემქ ეჩ–ეჩი მანათშა ქიმიჸონეს დოხტურიშ ოსურებელი „ვალი,“ ოსურეფქ ვითოხუთ–ვითოხუთშა.
ჯგირო უვაჭრებუნა.
დიჭყეს ბარება... ფარაში.
დოხტურქ კინ გეჭოფჷ მუშ ინსტრუმენტეფი დო ასე ჩანთას ქენოდჷ, ფერშალ ოსურს კინ ქენაძიცუ დო თოლი ქიდუჸოთჷ (მუშო ოკო რაგადი, არშიყულო).
– ვენერაჩკა, პრიბორი!?
ვენერაჩკაქ დატყობინუ მუშ პრიბორი.
თინეფს, მისუთ ვართ ფარა მეუჩამჷ დო ვართ ზისხერინ, დირექტორქ უჩა დღა დუთანუ: დიო სო რეთია, გოძირანთია თოისერს წარმოწანაშ ბოლოსია... მარა მითინს ვაშქურინჷ, წარმოწანაშ ბოლოშა ბრელი დრო რდჷ დო თიშახ კინი ქუმურდეს ზისხერიშ ეიოჭოფუშა, ვარა დირექტორს დაჭყორდუდჷ... მისუთ ვაფუდჷ ბარებული ზისხერი, ვარა ფარან, უკული ჩაბარენდჷ...
– დონორი რენია.
– კანონი რენია.
– ოსაჭირუნანია.
– არძო აბარენს დო ჩქი ხოლო ოკო ჩავაბარათია.
– ენა ვარენია ვართ მანდარნაშ ჩაბარება დო ვართ ჸურზენიშ.
– მანდარნა დო ჸურზენი ხოლო ზისხერი რენია.
– ფარა ხოლო ზისხერი რენია.
– ჩქინ რინა ხოლო...
– დიხა.
ჩაბარეს... ზისხერი.
– მუს ღოლანქია, ოსაჭირუნანია... დოშაყარეს....
– მუნეფშენ ვაკონანია ზისხერი... ქიანას ჩხუპი ვარენიაო?
ზისხერი დო ფარა რდჷ ენაჭარალი на фонд мира, ბრეჟნევქ თქუა.
სამუშა დღაქ გეთუ.
თაშ რენო თეშ რენო, იშენთ ოხიოლდეს, ზისხერქ ქუდმოსქიდესია... ფარას, იფხანდენთ დო ქიმაშინანია.
დოხტური დო წარმებაშ დირექტორქ კინი გეგწუღეს ართიანს ხელეფი.
– დონორი რენია.
– კანონი რენია.
– ოსაჭირუნანია.
დოხტურქ კინ ქიდუჸოთჷ თოლი ვენერაჩკას (კინ არშიყულო) დო მიდართეს.
არძოქ მიდართჷ ჸუჩა.
ონჯუაბორჯის ართი დედიბი ოსური მუშ მოთაწკჷმა ართო ზღვაპიჯის ეკოჸუნდჷ, რესტორანიშ წოხლე მიკილესუნ, ბაღანაქ უწუ ბების, ქომიჸიდია ლიმონათი.
მინილეს რესტორანშა. უცები ბაღანაქ ნაჩინებუ კოჩის თოლი ქუკინდუ, ნამუთ სუფრაშ დუდის გეხედჷ დო ტოლბაშენდჷ. თელი რესტორანი დო მინმაულარი – გინმაულარი, არძო დუდდოკინელო მიკურდეს თინეფიშ წოხოლე... ონჯღორე უჩქუდეს „დიდი კათაშა,“ ნამ კათასუთ თელი რაიონი იჩინენდუნ.
– ბები, ბები, ა, ი ბიძია, მა ის იფჩინენქ! – უწუ მოთაქ ბების დო ხეთ ქაძირუ.
ბები ხოლო იჩინენდჷ ინეფს: წარმებაშ დირექტორს, დოხტურს, მილიციაშ უნჩაშის, რაიკომიშ მდივანს, აღმასკომიშ დუდმახვენჯის... არძოს იჩინენდჷ, მით თექ ხედუნ... მარა სოურეშე თე ბაღანაქ?...
– ჩქინწკჷმა რდჷ, ბები, თი ბიძი დო ზისხერი ეშამღეს, ასე ღვინს შუნს.
ბების თოლეფქ ჩილამურით გეიაფშჷ:
– ეჰ, სქუა, ღვინს ვარი, ზისხერს შუნს, ზისხერს, – დო ბაღანა ქიხუტოლუ.
კვირკე 1983 წანა, სენაკი.