ვამოზარ ჭარუა
| ვამოზარ ჭარუა by [[Author:რინოს კვარაცხელია|]] |
| წყუ:რინოს კვარაცხელია „ტკივილის აფრა“ ხ.291 |
ბჭარუნქ, ფსოფუნქჷ, მინი ცას ვობუქჷ,
ძნელი რე ლერსიში ჭარუა,
ურაგადუში რაგადი დო
უხარ თჷრიში ხარუა.
ღორონთი მოჭარაფუანც,
შხვაქ მიქ მუმეხვარუა.
ფარათ, ორქოთ, ქონებათ
მითინქ ვამონჯარუა,
ჩქიმი ქონება სინდისი რე,
ღორონთქ მუმაბარუა.
რინაში დაჩხჷრქჷ ვაშქჷრტასნი,
შურც მეუბარუა.
ჯგჷრი საქმეში კეთებაშენი
ხანდას ვადებზარუა.
შხვაში ნარღი მანარღენც,
კუსაფი დო თვალუა,
შხვაში ხიოლი მახიოლე,
ბირას ელუბანუა,
ორგულემც ვოჩხუპუქ,
რინა გამიმწარუა,
ჩქჷნი ქიანაში მოჸოროფეს
გურც მოუჰამუა.
ლერსი იმენდო ალამირე,
შური გამისქვამუა.
ჩქჷმი დუც ბრელი რე გინნაულა
გურგინი დო ვალუა,
ცას მურიცხიში მოხარცქუა,
თუდო დიხაში ნწალუა,
მარა იშენი შური მიდგ,
დუღას ვუგვარგვალუა.
ჩქჷმი ნარგი რინაში ნერგის
პეულქ გამკოფალუა.
მოთალეფი რე ჩქჷმი წამალი
ღორონთქ დომიხვამუა,
ჩქჷმი გური, ჭყოლირი გური
თინემქ გამიხარუა.
ბჭარჷნქ, ფსოფუნქ, დო იფსოფუქ,
ვამოზარ ჭარუა,–
ურაგადუში რაგადი დო
უხარ თჷრიში ხარუა