ვალერიუს კატულუში

From Wikisource
Jump to navigation Jump to search
please do not remove empty parameters (see the template documentation).

by ვალერიუს კატულუში
გინმათანგალი რამინ შელია

I
ჸათე ჩქიმი ჭიჭე წიგნი
ახალობაში ნაცოდილა,
კორნელიუს - სქანდა მიბღი
წეკითხი დო ქომიწი და,
ჯგჷრი რენო, ფური რენო
მაჭყაფურიში ნაპოტიკა.
მიჩქჷ ხოლოს ველეზჷმე
სქანი ,,ისტორიაშა,,
მარა ეგებუ ღორონთიქჷ
ვაგშმოჸოთას თიაშე
ცქვაფილი დო საჸოროფო
პოტეფიში სიაშე
II
ჩქიმ ჸოროფილ ჩქიმ ცირას
ჭოფილ მარქვე ხეს უკებუ,
ზღვენდერია კითებითჷ
თისჷ ულაჸაფუანცჷ,
უძიცანც, ერთუაფუ
გურ ხიოლით ეფშა აფუ,
თაქ ხოლოსჷ ვორექჷდო
ჸოროფაშე გურ მაბათქჷ.
III
გურიმოჭუ ქორეთჷდა
ჩილამური ქჷდაბითჷ....
ჩიტიში მართვექ დოუღურუ
ჸოროფილი ჩქიმ ძღაბისჷ;
ბირგულიშა გეუხედჷ
მართვეს ულაჸაფუანდჷ
თოლ სინთეთჷ მიოჩქდჷ
თისჷ შურცუ ართუანდჷ.
მართვე ხოლო ჭჷრჭინჷნდჷ,
იშო - აშო გესხაპუნდუ,
დიდაცალო მიოჩქდჷ
მარდუალი თიცალ ჸუნდუ.
ანწი მართვე ღურელი რე
უჩა შარაში მაულარი,
თეურე მითინც ვადურთინჷ
ვაგუნჯამუ ჸუდეშ კარი.
ჩიტის ცოდა მუ უღუდუ
მუშენიდჷ ოღურალი
ასე გური ჭვილი აფუ,
ინგარც ჩიტიში მარდუალი,
თოლი ჩილამურიში ეფშა
ღურელ მართვეშ მარგუალი.
IV
ნჷში ვორდი ცქვაფილი
წყარცჷ ინოგაფილი,
ხოფი მოსუმაფილო,
აფრა ეშქუმალირო
ზღვასჷ მიფსარსალჷდი
შხვაში წოხოლე მაირო.
მარა დროქჷ მუკილჷ
ვარე მითინ უკილო -
ქაშმელუუ ძალაქჷ
ბრელი ვადომძალათჷ.
სირჩინუე ირ კოც მარე
ენა გასადღანი ვარე,
მიჩქ მუთუნი ვაგჷმალე
ქჷდოფსქჷდი გვალო ხვალე.
სორე აფრა, სორე ხოფი,
ზღვაშე ძიუთ ეკოფხოხი.
ასე ქვიშას ეკვოძჷქჷ
ხასლა ელართაფილო,
ირკოჩიში უკორნებუ -
მინჯეში გოჭყოლადირო.