ელხე

From Wikisource
Jump to navigation Jump to search
please do not remove empty parameters (see the template documentation).
ელხე
by გური ოტობაია
ჰოუნანა, პოეზია, ერთტომეული, თბილისი, 2008 წ.


მა დო ჩქიმი ელხესუ
ნირსეფჷ მუმოგუძუნა,
ინგირჷ პიჯის ფურცელით
დოყურშილი თხუმწკუმა.

მართუს მეთხოზ მართუ დო
ხუმინუნსუ ფაფალა,
გასურებე სერწკჷმა
დღაში ეკონთხაფალა.

რცხონილჷ აფუ ზღოურსუ
რატიეფიშჷ ნაჭალი,
სამოხიოს მეჭყვადრე
ბაღანეფიშჷ ჭაჭალი.

ხერზელჷ ჸუჩა მინჭუაფ,
შუმილჷ მიონჩვალანსუ,
ხვალე თოლჷ რე ქვერსემელჷ
კინჷ თოლიში ჩალამსუ.