ეკონია ფურცელი
| ეკონია ფურცელი by |
| გინმათანგალი გიგა ქავთარაძე |
ნიუ-იორკის, დიდი ჸუდეშჲ ართჲ ჭიჭე თოლს ჟირი ხანტუ მაჸალე მილარედჷ. ართის სიუ ჯოხოდჷ, მაჟირას – ჯონსი. დალეფცალო ართო ოხორანდეს დო ხანდენდეს. კლიენტეფი ვანაფერო მალედეს დო ათეშენი შხირას ოჭკომალიშ ფარა ხოლო ვა უღუდეს. რინა იშენით უჸორდეს, ოხიოლუდეს მუჟამცჷთ მუნეფიშ ნახანტეფი ადამიერეფს მოწონდესჷნ დო დუც ირო ბედინერო გინაფულენდეს.
ქოდოდირთჷ გჷმათუთაქ. გალე ძალამი ჩხურუქ ქოდანთხჷ დო ირდღას ჭვენდჷ.
ართ დღას ჯონსიქ დელახჷ. დუც ძალამჲ გლახათ გინაფულენდჷ. დიდი სინჩხე უღუდჷ, მარა იშენით ჩხურუ აფუდჷ. პიჯი უსქირუდჷ დო დუც ძალამს აჭუდჷ.
თინა თელჲ მარას ილეხუანდჷ.
ართჲ დღას ექიმქ თქუ: „სიუ, მოკო მუდგარენჲ გიწუენჲ, ქომორთი, აბარწაშა აწიბლათ.“
„სიუ, სქანი მაჸალე სერიოზულჲ ლეხი რე. წამალეფი მუთუნს ვახვარჷ, თიშენი ნამუდა სქილადას ვა ზალამენს. მიწუ, ნამუდა უსხუნჷ დოღურასჷნ. რინა მოძვილაფირჲ კათაშო წამალეფჲ მუთუნიშჲ მოღე ვა რე.
სიუს ექიმი ვა უზარებჷ. აბარწას ქაწოსქიდჷ დო ნწარას ქაანგარინ.
- სიუ, ქომორთი აშო“ – ქოდოუძახჷ ჯონსიქ.
- ხელათჲ ჯონსი, უკვე მოვული – უგამჷ სიუქ.
ოთახიშა მინულირჲ სიუ უკვე ვენგარდჷ, თინა იბირდჷ.
- ექიმქ მუ გიწუ, სიუ?“ – ქოკითხჷ ჯონსიქ.
- მიწუ, ნამუდა მუსხირენჲ დღაშა ირფელჲ მუკილენს.
- ვარი, მუსხირენჲ დღაშა ბღურუქ.
- თეშე ვეფირქა დო ჯგირო იჸუაფუქ. ასე ჭე ქიმლეჭკომუე ოკო. გემუანჲ ოჭკომალს ქოგიღოლა.
სიუქ ოჭკომალიშ ხაზირაფა ქოდიჭყჷნ, ქოგეგონჷ, ნამუდა ჯონსი მუდგარენს კოროცხჷნდჷნჲ.
ონჯირეშა მეულირჲ სიუქ ქოძირჷ, ჯონსი ოსინთეჸურე იჯინედჷ დო კოროცხუას აგინძორენდჷნჲ.
„ვითოჟირ, ვითოართი, ,,ვითი, ჩხორო… ბრუო დო შკვითი“. სიუქ ოსინთეშე გაგმიჯინჷ. ოკოდჷ ქოგუგებუდჷკო მუს კოროცხჷნდჷ ჯონსინჲ. გალე ხვალე ოზე დო ქუაშ კიდალა რჩქჷდჷ, ნამუსჷთ ხილონძჲ ცურუ ოგვერდაშეთ ქომოდვალჷდჷ. ჯას გვალო მუსხირენჲ დაჸვინთელებურჲ ფურცელი ქასქილადჷდჷ.
- ჯონს, მუს კოროცხჷნქ?
- ფურცელეფს ბკოროცხჷნქ. გოღა ვითოჩხორო ფურცელი მებუდჷ, ამუდღა ხვალე შკვით კაკალია ქასქილადჷ. ეჰე! ხოლო ართიქ გამუკოლჷ. ამშვიქ დოსქიდჷ!
- ქო მარა, მუშენი კოროცხჷნქ?
- თიშენჲ ბკოროცხჷნქ, ნამუდა მუჭოთ ეკონია ფურცელი ქოგიანთხუ დიხასჷნ, მათ დობღურუქ.
- ჯონს, ჩქიმჲ ოჸოროფულჲ, ვა რაგადუა ათაშჲ.
- თაში რე, სიუ, მიჩქჷ, მუჭოთ ეკონია ფურცელი გამუკოლუნჲ, მათ დობღურუქ.
სიუს მუთუნჲ გამა ვა მეუჩამჷ. თინა ინგარდჷ.
აბარწაშა გჷმილჷ, თინა დიო ხოლო ინგარდჷ მუ შვანსჷთ ბადიდჲ ბერმანი ძირუნჲ.
ბერმანი ხოლო ხანტუ რდჷ. თინა ხოლო თი ჸუდეს მილარდჷ, სოდეთ თენეფინჲ. სუმონეჩიშახ ქომეუჭირინუაფუდჷ. ვართ ფერი ჯგირი ხანტუ გოხოლჷდეს, მორო ირო იჩიებუდჷ, „ბერმანს ირკოჩი გიაძიცანს, მარა იშენით დიდი ხანტუ რე, ართი დღა ხოლო ქიჸუაფჷ დო უსქვამაშჲ ნახანტას დოხანტჷნს – მოსოფელს ირიშ უჯგუშის.“
ბერმანი კათას ვა უჸორდჷ, თიშენჲ ნამუდა ვართ ბერმანს გიოხანტუდჷ გურს თინეფი. რდილობათ ხოლო ვა გჷშმეგორუდჷ დო ირკოც გიაძიცანდჷ. ადამიერეფი თის ეგოისტო კოროცხჷნდეს.
–მუ გონგარჷ, ცირა – ძირაფაშვანსჷნე ქოკითხჷ სიუს.
– ეჰ, ჯონსი დიდო ლეხი რე, ექიმქ თქუ, ნამუდა წამალეფი მუთუნს ვა მეხვარებჷ, რახანჲ რინა ვაკო დო ხილონძჲ ცურუშ ფურცელეფს კოროცხჷნს.
– მუშენი ვაკო რინა დო ფურცელეფს მუშენჲ კოროცხჷნს?
– ჯონსის მიორჩქჷ, ნამუდა მუჭოთ ჯას ეკონია ფურცელი გამუკოლჷნ, თიშვანსჷნე დოღურუ.
– დო მუსხი ფურცელქ ასქიდჷ ჯას, ასე?
– ხვალე ართიქ. დო მემიჩქჷნ, თინა ხოლო გამუკოლუ ამუსერი.
– მუ ბოროია რე სქანჲ ჯონსი – თქუ ბერმანქ დო მიდართჷ.
გოთანდჷ. ჯონსიქ ოსინთეშე გაგმიჯინჷ, ცურუს ეკონია ფურცელი დიო ხოლო ქასქილადჷდჷ.
აკისერჷ. ცურუს ეკონია ფურცელი კჷნე ქომუკობუდჷ.
– ო, სიუ, ეკონია ფურცელი ხოლო ქომუკობჷ, მუ ბოროია ვორდი, თელჲ სერს მერეთი ბორია რდჷ დო ხელერდი მიშჷ, ოდო ინას იშენით შური უდგჷ. ანწი ვა ბღურუქ მათ!”
მუსხირენჲ დღაშ უკული ჯონსი ექიმქ ქიძირუ. ქომოურჩქილუ დო უწუ: ”ჩქიმი მაჸალე, უკვე ჯგირო რეთ დო უმოსი ბედინერი – ვინდარო ბერმანინ”.
– ბერმანიო? მუქ აღოლჷ? – ართბორჯულო ქიკითხეს ცირეფქ.
– ვა გიჩქჷნანო? ბერმანქ ღუმენჯი სერს დოღურჷ.
– ბერმანქ ღურუო?! ქო მარა მუშენი?
– მუსხირენი დღაშ წოხოლე ოჭუმარეს, მეძობელეფქ ოზეს ქომუწახვილეს. ედომუშამო შოლირი რდჷ დო გოჸინილი. ხასჷლას ტკვა გეძჷდჷ, თექინეშეს– დინცხიშფერი დო ჸვინთელი ოღაფულა. მითინს ვა უჩქჷ მუს ორთჷდჷ თინა სერითჷნ. მითინს ვა უკითხირჷ. კათას ვა უჸორდჷ თინა. ბადიდი ბერმანი ეგოისტი რდჷ.
– სიუქ ნჭუაფილო გამუწოსხაპჷ დო ოსინთეშე გაგმიჯინჷ. ქუაშ კიდალას ხიროკილჲ ცურუ გოკარკატუდჷ, ნამუსჷთ აკა კაკალია ჸვინთელი ფურცელი ქასქილადჷდჷ. ეკონია ფურცელი. სიუქ ფურცელს ქოდეკვირჷ, მარა მუთ ძირუნჲ ფურცელი ვა რდჷ ინა. ნახანტა გოხოლჷდეს, უსქვამაში ნახანტა. მოსოფელს ირიშ უჯგუშჲ ნახანტა, ნამუდგაშჲ ხანტუათ რჩინჲ ბერმანს თოლშა ხოლო ვა აწარინედჷნჲ.