დღას ვადინუ სქან სახელი
| დღას ვადინუ სქან სახელი by [[Author:ნიკოლოზ ადამია|]] |
| ნიკოლოზ ადამია "გომორძგუა სამარგალო სქანი" 2006წ.ხ.65 |
სქანი სქვამი საქმეწკუმა
მა ხოლოსი თეშ ქუორდი.
ჩქიმ პოემას სქან ხათრიშა
სქან სახელი ქეგუოდვი.
სი ღორონთქი გაკურთხუ დო
მი მურენი ქოგორჩქინუ.
თე ქიანას ვაჭარაფუ
მენცარკოჩი სქანიჯგუა.
ნიტე არძას ქომუჩანი
სქან ჭყანა დო სქანი ჭკუა.
ჩქიმოთ ირო ჯგირი ორდი,
ამდღა ხოლო ჯგირი რექი,
ჩქიმოთ ირო გმირი ორდი
ამდღა ხოლო გმირი რექი.
სქან უკული საქორთუო
დორანგვესი გირინეფქი,
ქომორთ დო ქოძირენი,
ხომ ჭკუაშე გინილენქი.
ხექ მუშენი ველარტიხუ
სი რთხოზუდუ თი ხალხისი,
ართკაკალი ვარე თინა
საქორთუოშ დიხაშ ღირსი.
დღას ვაშკირტუ სქან ყოროფა-
ცაშ მურიცხი სქანსაწილო,
ღურელირექ თეშ ქუჯგუქი
ათას ცოცხალს, ათასწილო.
მუჭო თიწკმა, სი ჩქინ გურსი
ამდღა ხოლო ახარენქი,
თიცალ მუმაშ სქუა რექი,
თიცალ დიდაშ ნახა რექი.
სქანი ჯგირი კოჩანათი
საქორთუო ასახელი...
ანდა წანაქ მიკილასი,
დღას ვადინუ სქან სახელი.