დიხა
ჯიმალეფი! ბედნერება
ხოლოშა რე მონჭაფილი.
დიბრთინუათ ჩქი სამოთხე,
ანთასფერით მოქარგილი.
ქიანას დიხა მუთ ქორენი
უჭვარუ დო ეჭვარილი,
დიხა ირკოჩიში ორდას
ღორონთიში გოჭყაფილი.
დიხა ორე, ჯიმალეფი,
კეთილ ღორონთიში ძუძუ.
არძაქ თინა ბწუათინი,
ათე სამართალი უძუ.
თე ქიანას მით ქორენი,
დიხას მორდილეფო ჸუნცუ.
დიხა დიხაშ მუშაში რე,
მარა ვებჩინენთჷ დუცუ.
დიხა თიში ოკო ორდას,
მითი თის ამუშენცჷნი.
მითი მთელი კოჩანას
კეთილ ქობალც უწენცჷნი.
დიხა თიში ოკო ორდას,
მით თის უფით ბონუნცუნი.
მით თის ხონუნც, ხაჩქჷნცჷ დო
ბარით თისჷ თხორუნცუნი.
დიხა! დიხა! ჯიმა, დიხა
ირკოც ართო მიღუდანი!
ართობა დო ჯიმალობა
დო სიმართლე ჩქი ბჯღუნდანი.
დიხა ირკოჩქ იმუბშუათ,
მუშაობათ მიჩქჷდანი.
ნამუშერიში მეჯინათ
გური რძღელი მიღუდანი.
თე ქიანა დიდ ღორონთქ
საბედნეროთ ქომუჩეს.
მარა ნგერემქ გერჩქინდეს,
ლუკა გაიწომჸოთეს ხეს.
ირო დუცუ მუნობხენა,
უჩათ მოძირანა ჩეს.
ჯიმალეფი! გებდირთათ!
ნგერემც გეუჸოთანთ ფერც.
თავისუფლება დო დიხა
ჩქი მოკონა ათე ჟირი.
მთელ რუსეთიშ ხალხეფწკალა
ჯიმალობა გვალო ჯგირი.
დიხაქ ჩქი ვამაშის და,
ტუტას იპით ელახვილი.
დიხაშ მახაჩქალ მუშაშო
სამართალი იჸი ჭვილი.
დიო-დღარო სამართალი
ჩქინო ორე გოლოფირი.
ვამიღუნა ჩქი ცხოვრება
ჯიმალური, ჸოროფილი.
არძას ართო ემიძუნა
უჩა მონობაშ ბორკილი.
ანგელოზი ინგარცუ დო
ეშმაკი რე გომორძგვილი.
თავისუფლება დო დიხა
სამართალით მიბთხუათ.
ვამუჩეს და ჩქინი ლუკა
ჩქინი ხეთ გიბტუათ.
ანწი ვარა ვაარწყეთო,
ნტერეფ მუს მორთუნანი?!...
სიმართლეში გურიშენი
პიბლუნა დო ბთოკუნანი.
მობაღუნა, იბთვინითი,
ჩილამური ვობითინი.
დიბრთინუათ ართობულო
უფლება დო ლუკა ჩქინი.
კოჩქ კოჩო გინიირთას,
მონაქ მითინქ ვეჸუას.
მიდაღალა-აბრაგალაქ
დოღურას, გეთუას.
ჩქინ დუდიშო ჩქი ვარჩიათ
ჩქინი საქმე შინაური.
რუსეფწკალა მიღუდანი
ჩქი კავშირი ჯიმალური.
გისხუნუნო, კინი რჸუნდას
მაზოჯალი, აპეკუნი?!
ათეს ჯგირო დეეკვირი,
ათეს ჯგირო უჩი გური.
გობკურცხათ, ჯიმალეფი!
გოუმორძგვას ართობას.
გოუმორძგვას სიმართლეს
დო ჸოროფაშ მეფობას.
გოუმორძგვას სანატრელი
ძვირფას თავისუფლებას.
გოუმორძგვას მუშემც დო
კეთილ შრომაშ უფლებას.
ზუგდიდი, 1904