დიდი თირაში ლერსი
| დიდი თირაში ლერსი by |
| მაკარ ხუბუა. მეგრული ტექსტები. ტფილისი 1937. |
დიდი თირაშ გაჭირებას მუგოშინანთ, ჯიმალეფი,
ჸუდეს ჯიხაქ ქეგმაჸუნეს, ვორეთ ძალამ მანგარეფი.
სიდნიკეფიშ თოფეფშორო ბერგეფი მიკებუნა ხეს,
თუდო თირს დიშვოხეთ დო ჟი ირზენს სილამეს.
მუორენი მისჷ უჩქუ, თეზმა გურგინი დო ტყვაცი?
ბუნებას ქეშეულებუ, ირფელ ართო გოჭყვიდას.
ორთვალიშა თირქ ეშელჷ, სინთე ვამთიძირე კარს.
ჯოღორი გიმაღირინუნს ჩქინ ჸუდეში ორგალარს.
ვართი ჯვეშენს გოუგუნებუ თენერ უბედური წანა.
ირო ინწყუ მითოჭვირი, შურო კილვეძირე ჩხანა,
შქირენსჷთ ქობჭყორდუთ, გურსჷთ ვა მიღუნა ჭყანა.
წისქვილიში პირდაპირო ჸუდშა გემიბუნა შარა.
ყამბარს გილებხარკულუთ, მუჭო ჭკადუშ ქულამური.
ქჲანაქ ოკო აკიწყვასო, ვარი, მუ რე ულამუნი?
მემიჩქ ზღვაშა ქიმეურსჷ ღარიბ კათაშ ჩილამური.
ძალამ საშვალება ჸოფე, გიჩქჷდანი, თხილამური;
გასაკვირი მუჭო ვა რე ჲანარს გურგინი დო ტყვაცი!
დიო ქარქ ქემორთუ დო ქობღოლეეს დიდი მარცხი.
ვიშო ქიმთოჭველედასჷ, თენერ უბედური, კვარჩხი!
ჭაშ გურიშენი გობობნეს, მუჭოთ საპონიში ნარჩხი.
ადრეხჷშე ქომიწურეს კუდელამი მურიცხიქ.
ქუმაღოლეს, ჯიმალეფი, ტერეფიში გურიშიქ,
შარეფიში ხეკუა დო თირიშ გილანთხირიშიქ.
შემაწუხეს უბედურო თირიშ ნაჭვი წყურიშიქ.
თეს ჯოხო, ჯიმალეფი, გიჩქჷდანი დიდი თირა.
არძა ართო გილამუფშენთ -- ბოში, დედიბი დო ცირა.
თესჷ გინოვსქიდითჷდა, უკულ მუთუნ ვამიჭირა.
ჭიჭე თირქჷ ქიდერკუ დო ვორეთ ირთ ხიოლის,
საშუალებაქ ქუმაშის ჸუდეშ კარი გიმოლის.
კჷნი შიშის ქიმშვოლით -- ინგჷრი გუხვილჷ სიმონის.
მარა ნიშის ვაკვთენთჷ, მელე ქიფშინთ მინოლის.
მაშო ჩიქვანი