დიდთირუას ნაღურა ლერსემს
Jump to navigation
Jump to search
ლებარდეშე მუნარქია
კვარჩხა-იხი იბურსანს,
მინდორ-ბარა ვირვილიას
ხილა-თირით ოქუნანს.
ხიხილერი ჯარგვალია
ღუმინუნს დო ზარზალანს,
გინოჟღიფილ ისირია
თირსუ წოლათ მიორჩანს.
ყებურიში ტყვაცირიას
მითნათუა გალაყაფ,
თოლიგვირა ნანაია
ლილუემსუ გალუაფ.
ჩელა გინი სამგარია
კურთხუს კინორაკვალანს,
ორკეეფშე ჭარკანტია
ნაძგაშურას გითმარღვანს.
ჭიჭე გურიშ მოსარია
ყინი მუთასარკალანს,
ყანჭიშ ქარღად უჩარიას
ლერსეფ მიშაცანცალანს.
უკლაშ ჯიმაშ კონკერიეფ
კიდირს მიკოყინილ მაფ.
შხვა ვაწურე მექარიეს -
ორკე გურით ვაკიფშაფ...
მუ შარა რე - ნასოფერას
ჭვიტე მიშეგაშუანს,
ჭიჭანობაშ ლაწკარეფი
ჩილამურო დოყუნს ღვას...
ჯარგვალიას ქიმკვოპონანქ
წირსფალიში მოჭვე ყვას...
გონთეს - სერიშ ნალიერა
ლილაშფერო გოპირანს...