დია დიხა
ცჷმეფიშ ცას ცჷმუეფი
ჭითა პირეფს გაცვათანა,
მეჭედა დო რაწკა, რაწკა
იკვანწჷნა დო ჭვიანა.
ართი ცაში ოშჲ მურიცხი,
თენერი რე თე ქიანა;
ზესქვი ორე ჭირხინია,
მაჭირხოლი ჭირხოლია,
მაფშლიეფჲ ღურჭულანა
დო კვინჩეფი ჭურჭულანა.
ოში ხონარშა მობირე,
თენერი რე თე ქიანა;
ართ პეული ზესნახე რე,
ღორონთიში ნახელე რე,
ვარა მუჟამს ბრელი რენა
ირხინუნა დო ხარენა.
გოპეულერჲ დიხეფიში,
ქუჩუჩი რე თე ქიანა.
არძა კათა მუშუშჲ დიხას
პეულანსუ ფურინუნსუ,
არძას უღ მუშუშჲ მურიცხჲ,
ცასუ მუკოტურინუნსუ.
ჩქიმჲ მურიცხი- მარგალური,
შონიშ ირო შონურიე,
დუდი ნინათ მიღუნანი
გემუანი ქორთულიე.
მიჸორს სუმხოლოში რჩქილა
ობირეში გორთილჲ ვა რე,
ნოტე სუმხოლო ქოჸუას,
აკა არძა ართი ვა რე.
შხვა ნინეფი ძამს მოჰამუ
რუსულჲ, ოსურჲ, აფსუური,
ნინა არძა მოჯგირე რე
თური რდას, გოკონჲ უთური.
ნოტე პლანეტა გაჩქვას
ართი ედემიში ბაღო,
კოც კოჩიში გოჯოგალა
ქოჸოფუდას დასაბაღო,
ეთი ბაღის არძა კათა
მუშ ნინაშა იბირდას.
კაბეტჲ რენო- ჯგირი რდას,
ჭიჭე რენო- იქ ირდას,
გოჯოგელი კოს ვაძირა,
არძა მოჸოროფე რდას.