დიალოგი წკვარამს
| დიალოგი წკვარამს by |
| გინმათანგალი გიგა ქავთარაძე |
თხობელუა
ხონარი. გვალო შხვა კოჩი ჸოფექ, ვინდარო მა მომორჩქჷდინ.
მა. თენაშენ გამამინჯე მა ვა ვორექ.
ხონარი. დო სი თვითან ვა მომირთეო დუდი?
მა. ვარი. მა დღას ვა მიჩილითუაფჷქ.
ხონარი. სოდგარენი, სისქვამა ხოლო ქოგიჸორდჷ . დო ვარი აწომიძირე, ნამუდა გიჸორდჷნ?
მა. იახა. მა მიჸორს სისქვამა.
ხონარი. მუვა? სისქვამავო? დო ვარი ოსური?
მა. ართით დო მაჟჷრათ.
ხონარი. (მონკა ირონიათ). დო თენა ართმაჟჷრაშ გჷშმაკოროცხალო ვა მიგორჩქჷნო?
მა. ნიტე მითინს ქომიორჩქჷნო?! ოსურიშ მოჸოროფეს ეგჷბა-და შურო ვა მოწონდას ჯვეშობური ფაიფური, მარა ენა ხვალე თიშენი, ნამუდა ვა გჷნაფულენს ჯვეშობური ფაიფურიშ ედომუშამი სისქვამასჷნ.
ხონარი. ესთეტიქ თე ჟირშე ართ-ართი ოკო გჷშეგორას.
მა. სანარღოთ, მა კორინსეჸუნელ კოჩი უმოსო ქოვორექ ბუნებათ, ვინდარო ესთეტი. მორო, მუმალს, მის უჩქჷ, შილებე ჯვეშობური ფაიფური ქიფსხუნუე ოსურშან.
ხონარი. წორომიმაჸვენჯალაშ სინორკე ქონორღვე.
მა. შილებე, მარა თაშ ქორენ-და, თიწკჷმა ინფლუენციათ ლეხი, რგილი ფორჩეფით სისტემატურო იზანს ტანსჷნ, არძოშე წორომიმაჸვენჯური კოჩი ჸოფე.
ხონარი. დუდი ვა მიღორა. ითამ ნძალიერი ორდენ თეშ. დაღარი რექ დინოხჷშე! დო ათაშ თიშენ იჩიებუქ, ნამუდა ჯარალუაშ მოკათინაფეფი დუდიშე გეიჩილითუენ.
მა. მუშო ოკო რაგადი, იში გოჭყოლიდაფა ვა შემილებჷ. გენთხაფეფი ვეიბჩილითე-და, ბოლო-ბოლო გიბსიროტუქ დო თინა იჸი. - ხონარი. ჸოჰ, მუ უონჯღორე რექ!
მა. შუროთ ვა ვორექ უონჯღორე. პიჯიქილე, აკაბუცხა ზეკი ხოლო თეშ გომირგილუანს მინშა გურს, ითამ ჸინუს მიკოვნჭაფუდიკონ. ხონარი. აბა, სქანი დუდი სიაბარათ ეფშა კოჩო მიგორჩქჷნო?
მა. მუ რაგადი ოკო. მარა არძოშე ნძალიერი იშენით ვა ვორექ. არძოშე ნძალიერი ქოპ-ჸოფედიკონ, ალბეთ გვალო გებჯაკონებუდი თი კოჩიშნერო, ჯოხოთ გოეთე გიოძჷდჷნ.
ხონარი. წირდე რდჷ ჸოროფა გოეთეშ.
მა. ენა ტყურა რე. ლიტერატურაშ ისტორიკოსეფიშ მოციორელ ტყურა. ეჩიდოვითოხუთი წანერი გოეთექ უნელო იტალიაშა იინტჷ. იახა, თენა შხვა მუთუნი ვა რდჷ, ნტინაშ მოხ. დო თე ონოფულე, გოეთეშ მოხ, მადამ შტაინს უჩქჷდჷ ხვალე.
ხონარი. სქანი ნათქუელი დუდიშ თხილუაშო გოღანკილს გჷ. დუდიშ თხილუაშე ლექინი მუთუნი ვა რე.
მა. დუდიშ თხილუა ვართ ფერი ლექინი საქვარი რე. ლექინი ქორდასჷნ, ვართ ადვოკატიშ პროფესია იჸუაფჷდჷ.
ხონარი. ოღრაში ნინადარგალა! ეგჷბა-და მიგoჩქჷ მიდგა იჸინს მაკორინას სქანწკჷმა მაჸალუაქჷნ?!
მა. ვართ თის იბნარღენქ. მანგიორი, მაჸალუა მიღჷ ჯალეფწკჷმა დო მაფერეფწკჷმა, შურს ხილიოთ ეთმომიფშანანი. სუმოშიშახ წინგი ხოლო ქომიღჷ. ჩქიმო ოჸოროფული, იაპონური დო ჩინური, ბჟადალური დო ბჟაეიოლური.
ხონარი. გიჩქჷდას, მაკითხირალეფი ირიათონო ქოგირთინუანა ოჭიშის.
მა. მანგიორი, მუმალს ქოგეგენა ჩქიმი ძივთის.
ხონარი. მუმალიშ მაკითხირალეფი ამუდღარიშ ქობალს ქორჩანანო ნიტე?
მა. ვართ ამუდღარი მაკითხირალეფი ეთმოფშანა ორქოთ. ჩქიმი უმაღალაში ჰონორარი ხასჷლაშე ვითი იენი რე.
ხონარი. ითამუ მუდგარენი ღვალა ხოლო ქოგაპალუდჷ, ვარო?
მა. ედომუშამი ჩქიმი ღვალა კატუშ ჸვაზჷმა დიხა რე ჰონძიოს. ოდო ჩქიმი ირთუთალურ მუშნალს, არძოშე იღბალიერ ბორჯისჷთ, ვა გინუჩილითუაფჷ სუმოში იენშა.
ხონარი. ჸუდე გიღჷ ხოლონი? თაშნეშე, ქრესტომათია ახალი ლიტერატურაშ…
მა. თი ჸუდექ ზისხჷრი გომისქირუ, ოდო ქრესტომათიაშ მუშნალი სქანდა მემიჩამჷ. ოთხოში დო ვარი ხუთოში იენი მომიღალჷ გვალო, თენა რდჷ დო გეთუ.
ხონარი. დო თვითან მუნეფქ ვა აკადგინესო თი ქრესტომათია? შხვა ვარინ, თენა ხოლო გიბაღუდჷ ონჯღორეთ დო დუდიშ მოკვათუათ.
მა. მუშენი ითამი?
ხონარი. თიშენი, ნამუდა განათებაშ მოინალეეფს ქიმკაჭაბი.
მა. ტყურა რე! პიჯიქილე, განათებაშ მოინალეეფქ მუმანჭეს აშო ჩქი. მა ხვალე თინეფიშ ოქიმინალი საქვარი ებჭოფი დუდიშა.
ხონარი. ვა გჷგოჭყორდას, ნამუდა იშენით ნაცუმე-სენსეიშ ნარწაფა რექ.
მა. არგამა რე, ნაცუმე-სენსეიშ ნარწაფა ვორექჷნ. სი ალბეთ თი სოსეკი-სენსეი გიღჷ გურს, ჭარუ რდჷნ, მარა მუთინით ვა გარჩქვენუ მაჟჷრა, შხვანერი ნაცუმე-სენსეი, გენიალური, გინოლასირს გჷდჷნ.
ხონარი. სი იდეეფი ვა გაპალუ. დო მინშა გოირჩქინდჷ-და, თინეფი ხოლო ართმაჟჷრაშ გჷშმაკოროცხალი იჸუაფჷ.
მა. თენა ხვალე ჩქიმი წიმიულაშა მიოწურუანს. იდიოტი ქიჸუაფუნ-და ეგჷბა ბოლოშა დორწუმაფილი, ნამუდა ბჟა ქოლოშე მორჩილი რე ზჷმათჷნ.
ხონარი. თე დუდძიკალობა იჸუაფჷ, აკა დღას შურს გეშაიღანსჷნ.
მა. მინშა ათაშ მიმოჩქჷ: ეგჷბა-და ვა ვორექ ართ-ართი თინეფშეიანი, მიდგას მუში ონჯირეს უჭარჷ ღურან?
ხონარი. გიგოხე, ვა გოშქურჷ ღურაშან? ჰა?
მა. მოშქურჷ, მარა ვა მომონკჷ. ჩქიმი ხეთჷნე მუდაშა კილამირღვაფჷ დუდი ჸუროშა. დო ეჩი მერქაშ ჭიროთიშ უკული, თაშ ბთქუათჷნ, მუდგარენი ჰამო ღიაბი ხოლო ქათმაკათუდჷ მინშა. მა უჩაკვირეთ შემილებჷ დობღურე ხვალე თიწკჷმა ვარი, მუჟამც ღურას თოლეფს დინმუოჯინექჷნ, ვარინ თიწკჷმა ხოლო, მუჟამცჷთ მუდგაიჸინი საკონწარო შვანი რენ.
ხონარი. აშ ქორენ-და, მუშენი ვა ღურუქ? ვა გიჩქჷნო, ნამუდა კანონით თენა დაშებათ იკოროცხჷნ?
მა. გოალუქ. დჷმაშებელი ვორექ, მუჭოთ ვერლენი, ვაგნერი, ვარა დიდებუანი სტრინდბერგინ.
ხონარი. მარა სი შურო ვაცადუქ სქანი ცოდეფიშ გჷშარსხას.
მა. მუთუნი ვა რე ჭიროთუაშე უმოსი დიდი გჷშარსხა.
ხონარი. ურსხებუ აშხარა რექ!
მა. ბონიშ რაგადი გოკონ-და, ჩეჟიშ მოქიმინჯე უმოსო ქირაგადე ჩქიმდე. აშხარა ათაშ იწამენდუო დუც? იბრგებუანდი ოსურეფიშ ჸოროფას დო ფარას გეგთობტყურუნდი.
ხონარი. იმწკჷმა ბორო ჸოფექ.
მა. ქო. მუშა გიფულა დო, ვორექ. “შერიშ გურიშ გონწყუმა ” ჩქიმო შურით დიდო ხოლოშიან იდიოტიქ ჭარჷ.
ხონარი. თეწკჷმაშენო, შურო ვა ნორჩქვე რინაშ მუთუნი.
მა. რინაშ რჩქინა ეცალ უთარაში ქორდასჷნ, საქვარამეფი არძოშე გჷშაკერძაფილ აბანს ქომუ-წოდოხოდუდეს.
ხონარი. სი, მუჭოთ მიჩქუნ, ქორჯოგუდჷკონ ოკო ჸოროფა. ასე ვორწყექ, რთუმე ჸოროფას აღორონთენდი ხვალე.
მა. ვარი, შურო ვა ვაღორონთე ჸოროფას. მა პოეტი ვორექ, აკმაქიმინჯე.
ხონარი. ქო, მარა ჸოროფაშ გურიშენი ვა მიოტეო ნანა დო მუმა, ჩილი დო სქუალეფი?
მა. ტყურას რაგადანქ! მა ინეფი ხვალე ჩქიმი გურიშენი მივოტე.
ხონარი. აბა იმწკჷმა, ეგოისტი ჸოფექ.
მა. სანარღოთ, ვარი. ქომოკოდჷ ეში, ქობპჸოფედიკონ.
ხონარი. ალმახანური “ეგოშ” კულტით რექ მოწამალერი.
მა. გვალო ეთიშენით ვორექ ალმახანური ადამიერი.
ხონარი. მარა ამდღარ ადამიერს ვა ალაზიმინე ულირი ბორჯიშიშა.
მა. ართი ბორჯის ულირი ხანიშ ადამიერეფი ხოლო ალმახანურეფი რდეს.
ხონარი. ვა გოცოდჷნო სქანი ჩილი დო სქუა?
მა. მითინი დიგორუნო, მისჷთ ვა ოცოდჷ მუში ჩილი დო სქუან? წეკითხი გოგენიშ ჭარილეფი.
ხონარი. გჷშმურს, ირფელს ამართალენქ, მუთ გიქიმინუნ.
მა. ირფელს ქუამართალენდენ, ნირზისჷთ ვა დოგიჭყანდი.
ხონარი. აბა, პიჯიშ სქვამებას ვა მაჸუნუქო?
მა. მა აკუვერიგი დორხველი ჸვაშიჭარას!
ხონარი. ქო, მარა გამამინჯალაშა მუ გილამჷ?
მა. ართ ნანთხალს ჩქიმი კჷნოხონეფქ მეჩას გამა, მაჟჷრა ნანთხალს - მუკი-მუკი აკანიშ პიჯალეფქ, მასუმა ნანთხალს - მოხვამილაფაქ, ჩქიმი თიათ გამამინჯალაშ აკა კაკალია ნანთხალი სქიდუ.
ხონარი. მუ წურმალი ადამიერი რექ!
მა. არძო ჩქიმშორო წურმალი რე.
ხონარი. სატანისტი ჸოფექ.
მა. სანარღოთ, ვა ვორექ სატანისტი. გჷშაკერძაფილ ჯოგინსჷთ მუთმომკათინუანდჷ უშქურანჯი ზონას მილარინელ სატანისტეფი.
ხონარი. (ართ ხანს ხონარს ვეკმიღანს.) არგამა რე, ნამუდა იჭიროთუქჷნ. ათეს ვარა გაგიმოტირხი.
მა. ვა გინამეტა! მის უჩქჷ, ეგჷბა მოპეკუდას გვალო ჩქიმი ჭიროთინ. ენა ხოლო ვა რდასჷნ, ნძალიერ კათას ვა ოშქურჷ, ნამუდა მიოდინუანა თის, მუთ ეჭოფესჷნ.
ხონარი. შილებე თინშურიშ ორდენ. მარა ვაი ახავაი, კოჲმანდი რექ დო მეტი მუთუნი ვარი.
მა. ის მა ხოლო ფირფქენქ: მი ვორექ, ბოლო ბოლო?
ხონარი. სი ირო რწანდჷ, ნამუდა რეალისტი რექჷნ.
მა. ჰოი, თიზჷმაშა იდეალისტი ვორდი, ნამუდა ბწანდჷ.
ხონარი. გიჩქჷდას, მედინუქ.
მა. შილებე. მარა მუდგაქჷთ მა გუმოჭყჷნ, გაჭყანს მაჟჷრა „მას“.
ხონარი. ოდა, რახან თაში რენ, იჭიროთი. მა ხელეფი გომიბონჷ.
მა. ქიცალი! დიო ათენა ქომიწი, უჩქი დო ხეუმუთხუმუ, ვა მოსვანჯუანქ ლამოსი ხონარეფითჷნ, მი რექ?
ხონარი. მაო? თი ანგილოზი ვორექ, იაკობის ოლიმუდჷ ქიანაშ გორჩქინუსჷნ.
II ხონარი. სი ქომოლკოჩი რექ მერეთი.
მა. ვარი, მა ვა მაპალუ ქომოლკოჩანა. გურამი ვორდიკონი, ჩქიმი ზალამით ვა მითუოლუდი ნჯილოს ნოჸორშა, ქომუცადუდი, მუჟამს გინობრყინტუნდჷ მუშითჷნ.
ხონარი. მარა სქანი ნაქიმინას მუდგარენი ადამიერული იშენით ქორე.
მა. მუდგარენი ადამიერული თეშვანსჷნე ხეცური ხოლო რე.
ხონარი. სი გასადღანი მუთუნი ვა გიქიმინჷ. ხვალე ათენა რე, იჭიროთუქ თეჟამიშიანი ჯარალუობური დონწყილობაშ გეშა.
მა. ჯარალუობური დონწყილობაქ დითირასჷნ ხოლო, ჩქიმი რჯება იშენით გაუბედურენდჷ მიდგა იჸინს.
ხონარი. მარა დუც იშენით ვეჸვილუნქ. გიგოხე, დასურო გაპალუ მუდგარენინერი ნძალა.
მა. მუდაშა იბლამე დუდიშ ჸვილუა. მოკოდჷ ჩქიმ ღურას ორთაშობური პიჯი უღუდჷკონ დო ათეშენი, ირდღას ვითით ჭანდის ბჭკომუნდი. ჭანდეფიშ გინორყინტუა, თინეფს ოწმახუშე დორცაფულანქჷ-და, ლექინი რე, მარა თინეფიშ ღანჭკუა საწკიწკარი რე.
ხონარი. მანგიორი, სი დიდებაშ ქართას ქომინიდგჷნქ.
მა. მუთუნიშა ვა მიღირჷ დიდება. მარა, შურიშ სირჩქალე დასურო მონარტჷ. წეკითხი ვაგნერიშ ჭარილეფი. თინა ჭარჷნს, ოჸოროფულ ოსურწკჷმა დო ჟირ-სუმ ბაღანაწკჷმა ართო რინაშო, დასაბაღჷ ფარა ქომუჩასჷნი, დიდო ბაღინაფილი იპჸუაფუდი თი ხელუანობაშ უმუშოთ, ნამუსჷთ ვორთუქიან. ათაშ მიორჩქ ვაგნერს, ათეშნერი არგამა ინდივიდუალისტის ხოლო, მუნერით თინა გოხოლუდესჷნ.
ხონარი. ვორწყექ, დასურო იჭიროთუქჷნ, ვართ ფერი უსვინდისე კოჩო რჩქუქჷ.
მა. მა ვა მაპალუ სვინდისი. მა ნერვეფი მიღჷ ხვალე.
ხონარი. სქანი ფანიურ რინაქ ვედჷ ბედინერო.
მა. თეშ უმკუჯინუო, ჩილი ირო ართგური რდჷ ჩქიმი.
ხონარი. სქანი ტრაგედიას რგილი ჰონიაქ უმოსი თია ქოდიტუ, ვინდარო თეს შხვეფიშ რინას ვორწყეთჷნ.
მა. ტყურას რაგადანქ. ჩქიმ დუც გინოხვალამირ კომედიას რინაშ რჩქინა თიშე ნორკე რდჷ, ვინდარო შხვა ადამიერეფს ახასიათენან.
ხონარი. სი თინშურიში რექ. სოიშახ მუდგა იჸინ გისიმუაფუდჷნ, სი თვითან ირფელს გაგიმუტირხი ოჸოროფლი ოსურიშ ქომონჯის.
მა. თენა ხოლო ტყურა რე. ხონარ ხოლო ვეკომიღალჷ, სოიშახ ნძალა მიბაღუდჷნ.
ხონარი. სი პოეტი რექ, აკმაქიმინჯე. ათეშენი ირფელი გეპატიებჷ.
მა. იახა. მა პოეტი ვორექ, აკმაქიმინჯე, მარა მაკათური ხოლო ვორექ ჯარალუაშ დო მუ საკვენი რე, ნამუდა მათ ჩქიმი ჯვარს ვუზინდუანდენ? თით უმოსო, მუჟამცჷთ თინა ვართ ფერი მონკა რენ.
ხონარი. სი გოჭყორდუ დორხველი „მა“. პატი ჩი სქანი ინდივიდუალობას, დო რჯოგუდას შურუბადო კათა.
მა. ზუკოლიშ უმუშოთ ვაფასენქ დორხველ ინდივიდუალობას, მარა კათა შურო ვა ბჯოგჷ. ართიშა ათაში ფთქვი: “ოჸოროფული მეკონი ლექინას ტირხუ, ოდო კრამეტი ვარი”. შექსპირი, გოეთე, ტიკამაცუ მონძაემონი მუდგა იჸინ ბორჯის დოჭყოლიდაფას ქიმიაჩამუნა, მარა თინეფიშ გუმარჩქინე ჯინჯი – კათა – უღურალე რე. ირინერი ხელუანობა, მუჭოდგათ ვეთირას თიში ფორმაქჷნ, კათაშ ქვარას ინისახუ.
ხონარი. სქანი ნაჭარეფს ორიგინალობაშ მარწკინდი გიოხე.
მა. ვარი, ჩქიმი ნაჭარეფი ვა გჷშმეგორუ ორიგინალობათ. ვარა მი რე ორიგინალური? ირფელი თის, მუთ შხვადოშხვა ბორჯიშ ტალანტეფქ ქიმინესჷნ, დასაბაღას დაგორუ პროტოტიპეფი. ოდო, მათ ბრელშა მირჩჷ მიდგა რენი.
ხონარი. მარა სი ხომ ქოთ უზუკოლანქ შხვეფს!
მა. მა ხვალე უშულებერს იბქადაქუდი ირო.
ხონარი. ვა დეორჩანა, ნამუდა ჟინორი კოჩი რექჷნ.
მა. ვარი, მა ვა ვორექ ჟინორი კოჩი. დო ვართ მითინი რე ჟინორი კოჩო მითინს მიორჩქუდასჷნ ეფერი. ჟინორი კოჩი ხვალე ზარატუსტრა რდჷ, მარა მუნერი ღურაქ აჭარჷ ზარატუსტრას, ენა თვითან ნიცშესჷთ ვა უჩქჷ.
ხონარი. სი ხოლო ქოგოშქურჷ ჯარალუაშა.
მა. ნიტე მითინ ქორენო ვა ოშქურუდასჷნ?
ხონარი. ქოგიშინი უაილდი. სუმი წანა მუკორთჷ ოხვილაშესჷნ. თინა რაგადანდჷ: “დუც ხვალე ჯარალუაშე მარცხებული კოჩი იჸვილუნსია”.
მა. უაილდის ბრელშა მულამუაფჷ დუდიშ ჸვილუა ოხვილაშეს დო ვეჸვილუ-და, ხვალე თიშენი, ნამუდა ვა მახუჯინჷ.
ხონარი. დოთანთი ჩეჟიერი დო უბადოშური!
მა. მა წორას ასე მოკო ჯგირობუაშ მათასალი ვორდენი.
ხონარი. ძალამი უკაჭული რექ.
მა. ვარი, ძალამი კვაჭილი.
ხონარი. მარა შეგილებჷ გურდარჩქალებურო რდენ, მაკითხირალი ირო გაჸვენუ.
მა. ქო, ოავტორე ნებაქ გეუქვუ-და.
ხონარი. სი ასე ხოლო რჭიროთჷნს ჸოროფა.
მა. ჸოროფავო? ე ოკიკონალი პიჯტაცალე ლიტერატორეფს ქოდოურღვი. მა ხვალე ეკუახაბარკი ჸოროფას.
ხონარი. ჸოროფაშ ეკოხაბარკინიშე მითინი ვა რე დაზღვიული.
მა. ენა ხვალე თის შანენს, ნამუდა ირკოჩი შილებე ლექინას მიოჩილითუას ფარაქჷნ.
ხონარი. სი მუკოჭკადილი რექ რინაშ ჯვარიშა.
მა. ენა შურო ვა მოპეკჷ. ოჸოროფულიშ მაჸვილარი დო შხვეფიშ ფარაშ მახვამილაფარეფი ხოლო მუკოჭკადილეფი რენა ჯვარს.
ხონარი. რინა ვართ ფერი უბადო რე, მუნერსჷთ სი ეთმოხანტჷნქჷნ.
მა. ჩინებული რე, ნამუდა რინა ირკოჩიშო უბადო რე, ხვალე “გჷშნაგორა ართი დო ჟირი კაკალია” რე გჷმნარკებჷ, ოდო თე „გჷშნაგორა ჟირი კაკალია“ კათას, შხვანერო, იდიოტეფს დო აშხარეფს უძახჷნა.
ხონარი. ოდა, იჭიროთი, მუსხი გოკონი. ქომიჩინიო? თენა მა ვორექ, მიქჷთ ითამ დო თიშენი აწკაძირი, ნამუდა შურიშ სირჩქალე ქოგოძირუენ. ჯოღორი რექ სი! მაზაკვალი რექ, ართი ბორჯის ფაუსტის ჯოღორიშ სახეთ გჷმეცხადჷნ.
III ხონარი. მუს ისაქვარუქ?
მა. პჭარჷნქ.
ხონარი. მუშენი ჭარჷნქ?
მა. ხვალე თიშენი, ნამუდა ვა შემილებჷ ვა პჭარენი.
ხონარი. ოდა, ჭარი. ჭარი ღურაშახ.
მა. მუშო ოკო რაგადი. შხვა მუ დოფსქილადჷ.
ხონარი. ძალამი რჩქალას რექ.
მა. შუროთ ვა ვორექ რჩქალას. ჯგირო ქომიჩინენდენი, ქოგეგენდი ჩქიმი ჭიროთის.
ხონარი. სო დინჷ სქან გოძიცაქ?
მა. ღორონთეფს დაართჷ ცაშა. რინას გოძიცა ქაჩუქენი, ოხვილური რე, მიღუდას დიო ართი, გერინელი ხასიათი, მაჟჷრა - ფარა, მასუმა - უმოსი ნძალიერი ნერვეფი, ვინდარო მა მიღუნ.
ხონარი. მარა სი ასე, მიმოჩქჷ, გურს მუგაშქვჷ.
მა. ქო, გურს მუმაშქვჷ, მარა მანგიორი ტაცალე ხუჯეფით მიკებჷ ხარგა ედომუშამი რინაშ.
ხონარი. მუთუნი ვა დორსქილადჷ თიშ მოხ, ნამუდა სქან ჭკუაშა დოდირთენი. ვარდა, სქან ჭკუაშა...
მა. ჰო, მუთუნი ვა დოფსქილადჷ თიშ მოხ, ნამუდა ჩქიმ ჭკუაშა ბღურენ.
ხონარი. დო სი ახალ ადამიერო გეგნიქიმინუქ, ედომუშამო შხვა ადამიერო, ვინდარო ორდინ.
მა. მა კინ თინათ დოფსქიდჷქ ირიათონო. ხვალე ოსარეს გჷმიბთირანთ მუჭოთ გვერინ...
ხონარი. სი ირფელი გიჩქჷ.
მა. ვარი, ირფელი ვა მიჩქჷ, ინა, მუთ მიჩქჷნ, ხვალე ნორთი რე ჩქიმი შურიშ. ოდო მუთ ვა მიჩქჷნ, ინა ჩქიმი შურიშ ტიოზი რე, გინოფაჩილი ასმანცხვარო. მა მოშქურჷ თიშა. სინთეს ორჩხოლეფს ვა გიაქიმინენა ოგვაჯე, მარა უხურგე წკვარამს ირო ლურს მუდგარენ უგშუჩინებუს. ხონარი. ჩქიმი ბაღანა რექ სი ხოლო.
მა. ნამ რექ? ასე მაჯუნინ? მარა ჰო, მიჩქჷ.
ხონარი. იშენი მით მიგორჩქჷქ?
მა. სი ეთინა რექ მიქჷთ ირიათონო მიდამიღჷ შურიშ სირჩქალენ. მიქჷთ აკონქილჷ ხიოლი ჩქიმი. მარა ხვალე ჩქიმიო? სი ეთინა ზოჯუნქ, მიდგაშ ჭყოლაფათ მემიდინეს შურიელი რინაშ ღიაბიქ, თაშნე აჩემებათ მოგურუანდეს ჯვეში მესიაკონინ. ირფელს ქიმკანჭჷ სქანი მარგინჯალ ხექ: ლიტერატურაშ ისტორიასჷთ, ოგაზეთე სტატიასჷთ.
ხონარი. იშენი მუ ჯოხოს გჷმოდვანდი?
მა. მა… ვა მიჩქჷ, მუ გიგოდვენი. მარა შხვეფსჷთ ქოდეჯერებუნან-და სი თი ნძალა რექ, ჩქი გიმორჯგინითჷნ. სი დემონი რექ, ჩქინ გამაგე. ხონარი. შეგილებჷ ქომიახვამე სქან დუცჷნ. მა მითინიშა ვა გილურქ გაჩიებინშა.
მა. მა ძალამს ვეცადებუქ გეიბჩილითუე სქანწკჷმა აკოხვალამან. თექ, სოდეთ სი გჷმორჩქინდჷქჷნ, თექ აკმილანდღუ შურიშ სირჩქალე. სი რენტგენიშ ჩხორიეფშორო ირფელს ინმანჭუქ.
ხონარი. ოდა, ოწმახჷშე მოთხილაფირო ორდა.
მა. მუშო ოკო რაგადი, მოთხილაფირო იპჸუაფჷქ. მარა, მუჟამცჷთ ხეს ოჭარალი მიკებჷნ...
ხონარი. მუჟამცჷთ ხეს ოჭარალი გაღვენუნ, მინარტენქ, ნიტე ქომორთასიან!
მა. მი? მაო? მა ხომ ართი წულუ ჭარუ ვორექ დო მოკო დოფსქიდე წულუ ჭარუთჷნ. თეშ უმუშო ვა მუმაპალინნე შურიშ სირჩქალე. მარა ოჭარალი ქოდებკინი ხესჷ-და, შილებე უკორინებუო ქაშაგიოლე ჭკორონ.
ხონარი. ათეშენი თოჸუჯიერო ქორდა. ეგჷბა-და ირი სქანი ზიტყვა საქვარო გინვოშქვენი. აბა, ჯგირო ორდა! გიჩქჷდას, მა კჷნე ქოგიძირუანქ.
ხონარი. (ხვალე) აკუტაგავა რიუნოსკე! აკუტაგავა რიუნოსკე! უმოსი ტომბას ქენარდი დიხას ჩხვიჩხვეფით. სი ლარჭემი რექ, ბორიათ განგალერი.
სქანი დუც აკოშაყარელი ოტაროზუბადე მუნაფეფქ გიფაჩას გვალო ეგჷბა-და. ათეშენი მეკენჯას ოკო გერდე კუჩხეფს. სქანი დუდიშო! სქანი სქუალეფშო! ვართ დუდპეკიქ იჸუა დო ვართ ერდა დუდი. დო სი გამუწოდირთუქ.ქირსეთუთა, 1926 წ.