დამწვა საკუთარ ალმა
Jump to navigation
Jump to search
| დამწვა საკუთარ ალმა ავტორი: ტერენტი გრანელი |
დამწვა საკუთარ ალმა,
ვატყობ, თანდათან ვქრები.
სადღაც ხარობენ ალბათ
ჩემი პატარა მტრები.
რა ვქნა, ციხეა, ვშფოთავ,
ცისკენ მივყავარ სურვილს.
და ემსგავსება ფოთოლს
ჩემი მწუხარე სული.
მოდის შაბათი, კვირა,
საშინელ სურათს ვხედავ;
და მესიზმრება ხშირად
მიცვალებული დედა.
ღუნავს ქარები ალვას,
ელავს მუსიკის ხმები.
დამწვა საკუთარ ალმა,
ვატყობ, თანდათან ვქრები.