გჷმათანე მურიცხიშა
გჷმათანე მურიცხიშა ქჷმაცალით ელაჯინა,
მუთ გობრჩქინდინ, უბადოშე ოკო ვორდე გენარჯგინა,
პუხუ მუნორთელი მაფუ ჸურუ დო ბორიაშ გენანჭირა!
გაჭირებულჲ ვაგიჩქუდათ, კოჩი ვორექ ტვინით ეფშა,
ქურსჲ დო ტუნკიშ გენაშქუმა აკოციმილჲ მაფუ ჩხეშა,
იშენჲ ჩონგური მიკინებუ, თეჯგუა უჩა დღაში გეშა!
დიდა ვაგომიჯოგუაფ დიანთილიშ ჸოროფათჷ
ართი ნერო მოშქვიდუანს გოლოფათ დო ჭოროფათჷ,
ოჭიშ ელამბარელჲ მაფუ ქუაშ ეკნაკორობათჷ.
შქასერიშახ ბთვალუნქჷ დო გეთმუობირანქ ნაშქასერსჷ,
გჷმათანე მურიცხისჷ გითმუოჯინექ ხე დო ხესჷ,
ცაშახ კიბე ქიმიბდგენი ღორონთჲ მუთას მუჩანს ფერსჷ.
გაჭირებულჲ გურიშ ნგარა ტკვარუნს ცარიატაშ ჭერსჷ,
ლაგვანს წკური ჩიჩინაფე, ღორონთჲ სოლე მარძენს ხვესჷ,
მოჯგირეშე ჭყელჲ ვორექ დო ნტერეფჲ მიძახუნა ჭკვერსჷ.
მუაჩქიმი, მუჭო რჭყუა დიაჩქიმიშ ჩილათაშე,
ქიმკმარულუ, გემაძირუქ, დიდი მარდი ძირაფაშე,
მითინს მუთუნჲ ვაქიმინე ჩქიმცალ სქუაშ დინაფაშე.