გუთუ აფაქიაში ლერსი
| გუთუ აფაქიაში ლერსი by |
| იოსებ ყიფშიძე "რჩეული თხზულებანი" თბ.1994წ. ხ.356--357 |
ჩქიმი დუდი მა ბჯოგჷ ნი,
თეში მუშე გამანწარი?
თე დღა თაში მობძჷდჷ და,
დღაშა მუშე ვა გამწილი?
სამართალი ვა მიკითხეს,
ვა მიგორეს განჩინება.
ნანა, მუშე გჷმაშინე
ჩქიმი დუდიში განჭირება?
გაჭირება თესჷ ჯოხო,
ასე მემეხვარი, ჯიმა!
ხასილასჷ კანი ვე გებძჷ
ფიცარიში გენანჯირა.
ძალით მორუუნა, ვარა
სამართალით ვა რე რჯგინა.
ართი შარას დაბაბღჷდი
კურტანიში საცალოთ.
უსამართობაქ გომოჩქუ
ნტერეფიში სანწყალოთ.
კუჩხი რკინათ დომიჭკადეს
ხე ვა მიღუ სანძალოთ. *
ცუდი ნასხუნათ მუთა მერგჷ,
მუთი რე ნი ჯგჷრიშ მეტქ.
თუდოქ მუთა მუმეხვარჷ,
სამართალი ჟინიში მეტქ.
ჯოჯოხეთი მიქი ძირჷ
ხორციელო ჩქიმი მეტქ?
ხორცის ჯოღორს ქოჩანან დო
შურს ღორონთი ადიდენს.
ეშჷმაკეფი მაწუხენსჷ,
ღორონთი ვა წიმაწყჷნდენს.
ხე დო კუჩხის თეში ბკჷრჷნა,
კოჩი მუთუნს ვა ბკითხენს.
მითას ნოფცოდუექო
საწყალი ჩქიმი ჩილიში მეტს.
-- "გუთუქ ჯიხას ინტჷ, მარა
ქომორთუ დო ხეს ქოპუნა".
ვამუურს, -- ის მუ უჭირს,
ქომუურსი, ოჭოფუნა *
ეშელენა, დოჭარჷნა,
გიმელენა, დოსოფუნა.
ხოლო ღორონთქ ნუ მოლასასჷ
გჷმარჩქინეთ როსთო ქულა.
მა ჭოფუა ვა ფხვადჷდჷ,
ჩქიმით ვორდი მონდებული.
"მორჩილება უჯგუნია",
მიშეთ გამიგონებუ ნი.
შხვასჷ მუსუ ვონდურუქჷ,
დუდი დამიღორებუ ნი.
თავადობას ოსქუდუო
ობორკალიში ითოხუნა?
როსთოქ გრიგოლს მა̄შინჷ:
-- "აფაქიაში სამართალი
ჭე ღულასჷ ქოპოფუნა".