გაჭირება
ჯიმალეფი, ჩქი მაფუნა
ირ ღირსება დინაფილი.
ჩიებაში ნება ვარე,
ჩქინი დუდი გებგათინი:
ჩქინი ნტერი ქიბჩინათ,
მუთ ხვადუნი, მებჩათინი;
დიბრთინუათ უფლება დო
გაჭირებას ვენტათინი.
ოჭვალარი ჩხოულემც,
ჩქი ბჯოხონა ყაზაყეფი.
ჩქინ ზისხირიშ მაშუმალემც:
მდიდარეფი, თავადეფი.
კოჩ ვორეთი, ქობთქუათი,
ქიგმოცენა კაზაკეფი.
ჩქინ ოჭიშის ქიგნახორცქ
ანთასობით მათრახეფქ.
მუშენი რე თენა თაში?!
გებძუნანო შხვაში ვალი?!
ჩქითი კოჩი ვავორეთო,
შხვანერ მიღუნანო კანი?
ცაშე გითნალეფი რენო
მდიდარ თავადიში გვარი,
ღორონთქ დომიკილეესო
კოჩანაში ფართო კარი?!
ღორონთქ ცალკე დაბადუო
მდიდარეფი, თავადობა?!
თავრე ჩქი ქიდმახვამესო
ჭიჭანობა, ყაზახობა?!
ნოტე მუთუ ეინწყინე
დიდეფიში მაღალობა,
ჩქინ სისუსტე, დამონება,
სიჩიჩიე, დაბალობა?!...
ღარიბ ჸოფე ჩქინი ჯვეში,
ვართი ჩქი ვორეთ მდიდარი.
ბაბუ-პაპუშ სიღარიბექ
ჩქითი ქიგმოხუნეს კვალი.
ღარიბ ვორეთ დო ყაზახი,
კილერი რე აქი კარი
ვაი! ყაზახიში ცოდა,
ვაი! ღარიბ საცოდალი.
ანწი დრო რე, სიღარიბეშ
დუდ მიზეზი ქიკითხანი.
მუშენი რე განსხვაება
კოჩეფწკალა ათეცალი?!
მუშენი რე ოში მონა,
ართ პატონი მაზოჯალი?!
მუშენი რე ჯიმაკოჩი,
კოჩ ჯიმაში მატანჯალი?!
მუშენი რე ჩქინი ლუკა
შხვას უმართოთ მეუღუნი?!
მუთუნც ვაართუნ, თინემც
ცაშა კიბე მეუდგუნი?!
მუშენი რე მუშა ხალხი
დასაბამით შქირენული?!
ტვერ დო ლეტაშ მოწიკვილი,
გროშეფიშა ქირებული?!
მუშენი და ვამიჩქუნა
ჩქი მხეცური მიდაღალა.
ვამიჩქუნა ჯგირ ხირუა,
ხერხიანი აბრაგალა,
ვამიღუნა ლომიცალი
უსვინდისე ყაზაყალა.
დო ბჭკუმუნა უმოწყალეთ
უსაქვარე ნგერი ლალა.
ართი ღორონთიშე ვორეთ
არძა ჩქი დაბადებული.
მარა ჩქინი ურჩქინდობით
დუდ მაფუნა არდებული.
ჩქინი ფასი, ჩქინ უფლება
ვამაფუნა გაგებული.
არძა ვორეთ ჸუნგა, ჸვერე,
ქოთ მიღუნა მართებული.
დაბადებათ, ჯიმალეფი,
იბჩიებუთ ჩილათირო.
მითინქ მართალ თქუასინი,
გინვორთინუანთთი ვირო.
მუთი ჯვეშო ქოჸოფენი,
ვორთინუანთ თისჷ ირო.
მა ყაზახი, სი თავადი…
დევეკვირათ თესჷ ჯგირო.
დევეკვირათ! ქობძირუნთ
ქიჸანა მუჭო ირთუუნი:
მუჭო მუშაში ნახანდით
ლალა კათა ირძღუუნი,
ირ სიავე ფალუნცუ დო
სამართალი იჭუუნი,
საცოდალი მუშა ხალხი
ტომბა ლეტას ინწყუუნი.
უსამართლობა ოცადუ
სამართალიშ ჸოთამას.
ადამიანქ დეესუსტუ,
ვეშეხვადუქ კოჩანას.
მარა ანწი იმენდი რე
ღარიბ ვარდიქ გოფალას.
არძა ქიმიმნდომენდათი,
ქობძირუნთუ გოთანას.
ხემწიფეში უჩა ტახტის
ამარგენა გვერშაპეფი.
გენერლეფი, მინისტრეფი,
ჟინოსქუა, თავადეფი.
კანონიერ მახინჯეფი
მდიდარეფი, ვაჭარეფი.
ქრისტეშ მცნებაშ მოღალატე
მეტნაწილი ჩქინ პაპეფი.
ხალხიშ მაშქვიდაფალეფი,
თხობელეფი, ჯალათეფი,
ქირებული პოლიცია,
ნგერიშ ჯარი კაზაკეფი.
თენეფ მუთუნც ვაართუნა,
შხვაში ქობალც ოსხუპუნა.
სვინდისწაულირ კათეფი
ჯიმაშ ზისხირც ქოხუპუნა.
ქიანას მუთუნც ვაარგუნა,
მუშა ხალხის ქოღუმპუნა.
მარა ხალხიქ გოკურცხუდა,
ნგერემც ბედის ოკუჭუნა.
გობკურცხათ, ჯიმალეფი,
ნტერი მივორთინუათი.
დატანჯულემქ, ჩაგრულემქ
ანწი ჩე დღა ქობძირათი.
თე ცხოვრება უკუღმართი,
მორძგვშე გამკუორთინუათი.
ათე ჩქინი ყაზახალა
ქიანას მუორჩქილუათი.
ზუგდიდი, 1904