ბულდოგი

From Wikisource
Jump to navigation Jump to search
please do not remove empty parameters (see the template documentation).
ბულდოგი
by ნარო კოლხარი (ნარიმან იაშაღაშვილი)

მახინწალქ ეჸარჷ.

გოთქვიშინაფილ ჯექერია ოსურქ ხე ქიგნუფუჩონუ დუდის ბულდოგის დო ჟირი კუჩხის ქიგიორინუ. ჯოღორქ ფათეფი ქიმკოდჷ სარკეს.

გიორენჯის შაყარელი ქომოლკოჩეფი აზარენდეს ოსურს, შორშე ხეთ ჯუნას უჯღონანდეს. ჯოღორს ხოლო აზარენდეს.

- ართ ჟირი დღაშა დიბრთუქ, აბა, თქვა გიჩქჷნა! – ოსურქ ხე ქოდოუვალუ მაზარაფალეფს დო მინილჷ კუპეშა. ჯოღორქ ხოლო მინილჷ კუპეშა.

კუპეს მითინ ვარდჷ, ოსურს ოთხოლო არდგილი გეუჭოფჷ, ართი მუშო, სუმი ჯოღორიშო.

ვაგონი ეფშა რდჷ უბილეთე კათათ, ინეფს დახუნალი ხოლო ვა უღუდეს დო მინაულარს გიფაფუდეს. მინი ჩემოდანს გეხედჷ, მინი საკის, მინს გერინელო ლურდჷ, მიკობუნაფილს სარკეშ ოკინალს.

ვაგონს შური ვეღინედჷ.

მახინწალი მეურდჷ.

ოსურქ ჯოღორს ნორჩალი ქოდოურჩჷ, მუქ ხოლო ქიდირჩჷ დო თინა რდჷ, ქიგლენჯირუკონინ, მუჭო ჭიჭე ბაღანაშ ნგარაქ ქელასიმჷ. ჭე ხანიშ უკული დიდაშ ხონარდოკინელი რაგადიქ. დიდა ორჩქალუანდჷ ბაღანას.

ოსურქ გალე გიმიჯინჷ, კარწკჷმა შქა ხანერი თუმა–დარჩიოლებური უჩათ გონწერილი დიდა გერედჷ. დიდას სუმ ჭიჭე ბაღანა ეკობუდჷ. ართ– ართ გურშა აფუდჷ მუკოხუტოლაფირი...

- არდგილი ვა გიღუნანო?.. ქოკითხჷ ოსურქ.

დიდაქ განშე დუქანცუ დუდის დო ცოდაცალო ქენაჯინჷ.

- მოზოჯით.. თქვა შორშა მეურთო?

- ვარ, ვარი ... თქვან შეწუხება...

- მუნერო, მუს იჩიებუთ, მოზოჯით პატჷნი, არძო დიმტირეთ.

გემნიჸონჷ კუპეშა.

ბაღანეფქ ართიანს ქიმკახუტოლეს დო კუნთხუს ქიმკანჯირეს დიდას. აშქურინეს ჯოღორშა.

- ვა გაშქურინან, ჩქიმ ლერის ჩამინი ვაუჩქ, ინა მა სქუაცალო მიჸორს. ლერის ხოლო უჸორს ბაღანეფი - ოსურქ გოქილონჷ დო ბაღანეფს გოუძიცუ.

ბაღანეფს სახეს ხიოლქ ქიგნადვეს.

ჭეხანს ქოურჩქილედეს მახინწალიშ ქშიშინს. უკული უნელო ჯოღორქ ქიმიოჸურუ. ბაღანეფს ქანგარინეს. ქიმკაბეს დიდას. დიდაქ სუმხოლო გურშა ქიხუტოლუ. ოსურქ ხოლო ქიხუტოლუ ჯოღორი გურშა.

- მუგაშქირენუო ჩქიმი ფეხვერია ბოშია, - ოსურქ ჩანთაშე "სასისკი" დო ქობალი გეშეღჷ.

- დედა, მა ხოლო მოკო "სასისკი" დო ქობალი, - ჸუჯის ქელაფურცქინჷ ართი ბაღანაქ დიდას დო ონჯღორუანო ქინაჯინჷ ოსურს.

- სუ, ქიმურთ ჸუჩა დო ქორჩანთ, –– ქიდიფუცქინჷ დიდაქ.

ოსურქ ქიგეგჷ თინეფიშ რაგადი:

- გეჭოფით, ჩქიმ ლერი ესხეს ვა ჭკუმუნს, ვა რე მერჩქვანელ "სასისკიშ" ჭკუმუას, ირო ახალ–ახალი ხორცის ფჩანქ. უცაბ მაჸუ ულაქ, ვა მაჭიშუ, სადგურს თეშ მეტი მუთუნ ვა ძუდჷ, - ბაღანეფს ქომიარზუ "სასისკი" დო ქობალი.

ართ-ართი ბაღანაქ ხეს მეუკინ. მარა დიდაქ ვარია უწუ დო დუდის დუქანცუ.

ოსურს ონჯღორექ დაგურჷ, ასე თიქ ხოლო დუქანცუ დუდის. ჯოღორი ხოლო უქანცუანდჷ დუდის. მახინწალი ხოლო იქანცუდჷ, შქირ-შქირი მეუღუდჷ... ბაღანეფს, ბაღანეფს შქირენ აფუდეს.

- მალას ქიმურთ ჸუჩა, ქორჩანთ ოჭკუმალს დო ქიდგორულუანთ. - დარჩქალუ დიდაქ სქუალეფი.

მახინწალი მეურდჷ.

- თქვან ბაღანეფი რენო? –– ქოკითხჷ ოსურქ.

- ქო, ჩქიმი რე.

- სუმხოლოვო?

- ქო, სუმხოლო.

- მუ ბედინერი რექ?

- თქვა ვა რჸუნანო ბაღანეფი?

ოსურქ კიბირით ქიმიწკიტონუ ლერჩქვიშა დო ქიგიჯინჷ ხეშა. ბამბეცალი ჩე ხელეფშე ბრილიანტეფი ორზანდეს. დიდაქ ხოლო ქიგიჯინჷ გომაზოლელრი ჯერღვი გითომბარილ ხელეფშა.

მეურდჷ მახინწალი, მიქელენუდჷ.

ჭეხანს კინი ქიმირჩქილუეს, უკული ჯოღორქ ქიმიოჸურუ, კინ ქანგარინეს ბაღანეფს. კინ ორჩქალუანდჷ დიდა.

- ბედინერი რეთ, - ქიდირაგადუ ოსურქ, - ბედინერი რეთ... მა ვა პუნს სქუალეფი, ხვალე ჩქიმი ლერი... - ქინაჯინჷ ჯოღორს.

- სო მუშენთ? –– ქოკითხჷ დიდაქ ონჯღორიანო.

- სამინისტროს... ასე რევიზიაშა მეულჷ რაიონიშა.

- ჯგირი სამუშა გაღვენუნა, ვორწყედი მუჭო გაზარენდეს ქომოლკათან, ხეს გაჯუნუდეს, დუდის გიმუკინანდეს თქვანი წოხოლე... მითინ ვა რდუო?

- მითინი ვარდჷ, მითინქ ვეშეფხვადჷ თიცალქ...

დიდას გოუკვირდჷ დო კინ დუქანცუ დუდის.

მახინწალი მეურდჷ.

- სუმი ბაღანა... ვა გიჭირსო? ––~ თქუ ოსურქ.

- მუშენი? –– ქოკითხჷ დიდაქ.

- ამდღანერი დღას სუმ ბაღანაშ რდუალა?

- მა ამშვი ბაღანა პუნს, უნჩაშ ჯარს რე, ხოლო ჟირი ძღაბი სკოლას გურაფულენს. ართი მაშქვითას რე, მაჟია – მახუთას. ენეფი არძოშ უმოს ჭიჭელეფი რენა, მიჭირს, მარა ძღაბეფი მოხვარუნა... ართიანს რდუნა ბაღანეფი. რდუალა მუთუნ ვა რე, ხალა რე ვარა... ხოლო თესხე ქოპუნდასუნ, უჯგუში ვა რენო?.. მარა გოწოს ხოლო... - ქანგარინჷ.

- მუქ გაღოლეს?

დიდაქ ჩილამური გელეწიმინდუ.

- ქომონჯქ დომიღურჷ.

ოსურქ ქიმიოქელენუ.

ქიმიოქელენუ დიდაქ ხოლო.

კინ ქიმიოჸურუ ჯოღორქ. ბაღანეფს კინ აშქურინეს.

- ვა გაშქურინან, ხომ ქოთქუ დეიქ, ვეჩამინუნია?

ოსურს თოლეფქ ჩილამორით გეიაფშჷ.

მახინწალი მეურდჷ. მიქელენუდჷ შქირ–შქირით.

„მუ საინტერესო რე თე რინა?“

- ასე მალას გიმურთ, – კინ დარჩქალუ დიდაქ სქუალეფი, – ოჭკუმალს ქორჩანთ დო ქუდგორულუანთ.

ბაღანეფქ გუღიღინეს დიდას. დიდაქ სუმხოლო გურშა ქიხუტოლუ. ოსურქ ხოლო ქიხუტოლუ ჯოღორი გურშა, უკული ნორჩალს ქიმთანჯირუ დო ზენწარე ქიგნაფორჷ... ასე ვა ჸურანდჷ: ბაღანეფი ხიოლით იღაღანუდეს.

მახინწალქ ქიმიოდირთჷ გიორენჯის, დიდა დო სქუალეფქ მიხაზირეს გიმაულარო.

- ქუმორთითო? – ქოკითხჷ ოსურქ.

- ქო, გიმურთ, – უწუ დიდაქ.

- თქვა სო მუშენთ? –– უნცარო გეგშურთ კითხირქ ოსურს.

- ჩაიშ მაწილარი ვორექ, – უბრალედ უწუ დიდაქ.

- მეჩაიე, – ცოდაცალო ქიდირაგადუ ოსურქ დო ქიგიჯინჷ ბრილიანტამ ხელეფშა. დიდაქ ხოლო ქიგიჯინჷ...

ოსურს გაღიღინჷ. გაღიღინჷ დიდასუთ.

ბაღანეფი ხოლო იღიღინუნდეს.

წყარჩილამორამი თოლეფი.

- მუსხე წანერი რეთ? – მორიდებულო კითხჷ ოსურქ.

- ჟარნეჩი წანერი ვორექ, – მორდებულო უწუ დიდაქ.

- ჩქიმი უკლაშ ჸოფერექ დო შურო ვა გიგოხე, – გოუკვირდჷ ოსურს.

- მართალო ვეგმოხე, – ქიმიოქელენჷ დიდაქ დო კინ ქიგიჯინჷ ხელეფშა.

მახინწალქ გაჩენდჷ.

გეგმართეს.

- ნიტე მა ხოლო მეჩაიე ქუვორდენ, – ქიდირაგადუ ოსურქ, სარკე განჯჷ დო გალე გეგმიჯინჷ.

ბაღანეფქ ხე ქუდუვალუეს:

- ა, თი დეი!

- ჯგირო ორდათ, ბაღანეფი! – ოსურს ანგარინუაფუდჷ.

- ჯგირო! ჯგირო! დეი! –– ისიმედჷ გიორენჯიშე.

მახინწალქ ეყარჷ.

დიდა დო სქუალეფქ თოლს ქომიკაფორეს.

ოსური ბრელხანს გერედჷ სარკეწკჷმა დო ფირქენდჷ, ნიტე მა ხოლო მეჩაიე ქუვორდიკონია... ძიუთ აკმიკინენდჷ ნგარას.

ჯოღორქ კინ ქიმიოჸურუ, მარა მინჯე ჸუჯიშა ველმირჩქილუანდჷ თე ჸურუას, თეშ რდჷ ენოკილერი წოხოლიან დარდეფს.

ჸვა ქიმკოდჷ სარკეს.

- ნიტე მა ხოლო მეჩაიე ქუვორდე.. - ინგარდჷ ოსური.

მახინწალი მეურდჷ...


იანარი, 1981 წანა, ქართი.