პიჯის თუმა უჩანაფუ, ბოში იჭყანდჷ რაგადისჷ,
“ცა დო დიხას მობუმნაფუქ, თირს, ჭვემა დო ტაროზის.
გურ მიკაჟებ ჯინორუათ, მერჩქვანელ ვორექ თის,
მა ვეშემტყვებ შკურინ მუ რენ, დადარს თოფ დო ყამაშის.
შკა სერი რდუ, მუჟამსით ყილოს გივანთხ დონჯირელს,
გესხაპ(უ) თოლიშ რიჟინითი დო, მეტ მუს მაჭიშუანდ ბრელს?”...
გეკოხვადეს ართიანსჷ, უფუ დაბეს მუდა კილო,
კორუას მოწადინებულეფ, მინ ბოში რდუ ჟი დო მინ-ყილო...
ბოშიქ მეუხვადჷ- ბორჯ ვარდუნი, ხვალე ართი ორდუ შარა;
ყამა ტარშა ვაგუხუნუკონ, მერიებუდუ ყილო ვარა...
გამასკიდ ოჸვილარო, ყამა ყილოშ გურს გოთინჷ,
მუქ ტან- ეკოფითოლირქჷ, გოლაშ დუდს ქეგნინჯირჷ...
გოლაშ კართეს ყილო მობუდჷ, შურ ეშმალუდ ბედჭვილს გვალო,
ქვიშას ზისხირ მოღაფუნდჷ, დო მირულედჷ ღალუ-ცალო...
მიქ უწუას ბოშიშ დიდას, მუშ სქუაშ კვარჩხჷ ბედი?
ვეღირსებჷ ანწ ცოცხალო, ვაუღუდას თეშ იმენდი...
ბოშიშ დიდა ნგარა-ნგარათ, ეჩიებუდ ირკოჩს ამბეს,
მუჭო მუში სკუაქ დო ყილოქ ართიანს ეკოხვადეს...
მუჟამს ნამთინქ ვადათმუ დო, ართო მერთეს ღურაშ კარშა,
ნამთინს ონჯღორე ვაუძირაფჷ მუნეფიშ ჯიშ დო გვარშა...
დიდა ღურელ სკუას ინგარდჷ, ჯუდუნდჷ დო უფერუანდჷ,
ვაჯერდჷ, სკუა ვაჸუნდუნ დო” ლურენჯი -რე” - ათაშ თქუანდ.
ფუჩონუნდჷ დო ოკითხუდ- "ყილოქ ათაშ მუჭო რსოფუ?"
"მიჩქჷ სკანი ყამათ მუჭო მუსჷ ხოლო ღურა ჸოფუნ"
“მა მეტისჷ ვაინგარქია, თებულ გაფჷ დღა დო სერი,
ართი სკუა ხომ მომირდუქ - ყილოს ორკინუდინ ფერი”…
ანაბულო, ცხადო ორწყედჷ ყილოს დო მუშ სკუასია,
"მის უჩქჷ, ეგებ ყილოშ დიდა ჩქიმ უმოსო ინგარსია?"
მიდურქ დო დობგორუნქ, თი უჸვაიჭარეს, ბედ-ჭვილსია,
ვამიჩქუნო, სკუაშ ღურა,მუჭო მუნტენდჷ დაჩხირსია...
მა ჩქიმს უწინქჷ, ინა- მუშის, თაშ მიდებღანთ დღას ჩქინსია...”
თებერვალი 2011. ვაშინგტონი