ბორო დო ჭკვერი
| ბორო დო ჭკვერი by |
| http://www.kolkhoba.org/margtksk.htm |
ჸოფე ვა ჸოფე. ჟირ ჯიმა ქოჸოფე. ართ ძალამ ჭკვერი, მაჟირა ბორო ჸოფე. ართო ნოხანდებუენა. თხას ნოდიარაფუენა.
ართ დღას ჭკვერს სხულიშ ჯაშა გეშურთუმუ. ოკორობალო მუთუ ვა ნოღვე დო ნოფართხუე. ჭკვერს ბორო ჯიმაშა უთქუალუ, “მა დოფართხუნქ, სი დოკორობი”ია.
თელ სხულეფ დუფართხუ. უკულ გეგმურთუმ დო მუს ორწყე; ბოროს თხალეფ არძო დოუყ’ვილუ დო ართ თხა ქოდოუტებუ. ჭკვერ ჯიმა გახანგებე.
მუ ქიმინი? ათენეფ მუშენ ყ’ვილი? იადო უკითხირუ. ბოროსით უთქუალუ, “სი დოფართხი, ათენეფქ ოჭკომეს. ხვალა ეთი თხაქ ვა ჭკომუ. ოჭოფუ დო ქაშა ქიმიციკუ. ათეშენ თენა ვა პილი დო შხვეფ არძო დოპილი”ია.
ინჯუას დირთან ოკო, მითიქ ვა გეგასია დო მთელ თხალეფ მიდუნთირუნა დო გვიმარაშ თუდო დოუფულუნა.
ირკოჩიქ ქოდინჯირუნ, თხალეფიშ მინჯეშ ჸუდეშა მიდართუმუნა. ჭკვერს თხალეფიშ მინჯეშა უთქუალუ, “ჩქი ჩქინ ჸუდეშა დიფრთათ ოკო. მეტ ვა გიმაცადინენა. ჩქინ ფარა ქომუჩით.”
თხალეფიშ მინჯესით ფარაშ გვერდი ჭკვერშა ქომუეჩამუ, გვერდი ბოროშა. ბოროს გური ქომორთუმუ. ჩქიმ ჯიმას ჩქიმისხი ფარას მუშენ მეჩანთია დო უღვარუ.
უკულ უთქუალუ, “მა გვიმარაშ თუდო თითო-ჟირი ფნთირი, ექ თითო ნთირუ. ჩქიმისხი ფარას მუშენ არზენქ? მა თიშე უმოს ფარა ქომომჩე ოკო”ვა.
კოჩის უკითხირუ, “მუ ნთირით, მუ ოტყობინით? ია. ჭკვერს უთქუალუ, “მუთუნ ვარ, მუთუნ ვარ, ჩქიმ ბორო ჯიმა ბუდინუნს”ია. ქიმეხვალამენა. კოჩის ჸუდეშა გემნოურთუმუ ლივერიშ ეიჭოფუშა. თე ბორჯის ჯიმალეფს უნტებუნა.
ბორო დო ჭკვერს ჸუდეშა მიდურთუმუნა. თენეფიშ ნანა მანგარ ლეხი ყ’ოფე. ჭკვერ ჯიმას ფითქი გუხაზირებუ. ჸუდეს წყარ დო ქვირიშ მეტ მუთუნ ვა ჸოფე. თეშენ გუხაზირებუ ფითქი. ნანას ქოჩას იადო ბოროშა ქიმუჩამუ ფითქი.
ბოროსით კიზით ჩხე-ჩხეთ მუშ ნანაშა პიჯიშა ქეგთუბუნუ. მანგარ ჩხე რდუნ თიშენ ნანა დოღურე დო გოძგიძგინაფე. ჭკვერ ჯუმას ქუმოურთუმუ. “ნანას მუ აღოლუ” ვადო უღვარუ. ბოროსით უთქუალუ, “ძალამს მეწონუ ფითქი ფჩინ, თიშენ იძიცანს”ია.