ბედინერი მაფასქირი
| ბედინერი მაფასქირი by |
| გინმათანგალი გიგა ქავთარაძე |
I
ნოღაშ ჟიმოლე, ართ მაღალ სჷმეტის ბედინერი მაფასქირიშ ნოჭახნაკუ გიმადგუდჷ. თინა გოქუნილი რდჷ წუწელი ორქოშ თხითხჷ ფურცელეფით, თოლეფიშ მანგიორო ჟირი ვარკალა საფირონი აფუდჷ დინოხუნაფილი დო მაღულარიშ ტარს დიდი ჭითა ქარწიბი ინოჭვიანდჷ.
ნოჭახნაკუშ ძირაფა, დასურო, ირკოც ძალამს ოჰამუდჷ.
- აფაქიცალო სქვამი რე, – თქუ ნოღაშ სხუნუშ ართ მაკათურქ, მისჷთ გურით ოკოდჷ მუშე უთქუალუდესკონი, არტისტული გემაშ მინჯე რენიავანი. – ხვალე ართი ქო რე, გვალო თიშნერი მორგე ხოლო ვა რე, – ხათეხოლაშო ქო გეუძინჷ შქურინაფილქ ნარაგადის, მიდგაქ იჸინ ვა ეკუმაბრალას პრაქტიკული ვა ჸოფენიავან, მუნერით ინა დასურო ვა რდჷ.
- მუშენი ვა გჷქ ბედინერ მაფასქირს სქუა? – ოკითხუდჷ სვენერი ნანა მუში ბოშის, მით მუთუნი ვარიშენი იჭიროთუდჷ დო ინგარდჷნ. – ბედინერი მაფასქირი ხომ მუში დღას ვ’ენგარს.
- მარდი ღორონც, თე ქიანას ართი მიდგარენი ვარა ქო რე ბედინერინ, – ქელირაგადუ რინაშე გურელაფირ კოჩიქ, მუჟამცჷთ ათე გოსოფურ ნოჭახნაკუს ქელაჯინუნ.
- გვალო ანგილოზის მოგენც – თქუეს ოჩეჟქიმინჯალე სკოლაშ ბაღანეფქ, ნამუეფქჷთ თე შვანს ხოჯიშ ზისხირშფერი გინაქუნალეფით დო ჩე აწაფორალეფით მონწყილეფქ ოკათედრე ოხიდაშე გჷმორთესჷნ.
- სოლეშე გიჩქუნა? – კითხჷ თინეფს მათემატიკაშ მაგურაფალქ, – მუჟამ გაფუნა ანგილოზი ნაძირეფი?
- ჸოჰ, მუჭო ვარი, თონწყუს გიმაძირეს, – უგამეს ბაღანეფქ. მათემატიკაშ მაგურაფალქ გოწკვირონდჷ დო კონწარო ქო გინულინუ თოლი ბაღანეფს, რახან ვა მეწონჷ, ნამდა თინეფი ლურს თონწყუეფს ორწყედესჷნ.
ართი სერს, ნოღაშა ჭიჭე მაჭირხოლქ ქო მოფურინჷ. თიში მაჸალეეფი ეგვიპტეშ შარას რდეს გერინელი თუთა დო გვერდიშ წოხოლე, მარა იქ ქო კინასქიდჷ თინეფც, რახან ართი უსქვამაში ლარჭემიშ ჸოროფა აფუდჷ გურშა ალალაფირინ.
მაჭირხოლქ ლარჭემს აფუნიშ დაჭყაფუს აკოხვადჷ, თიწკჷმა, მუჟამცჷთ წყარმალიშ პიც დიდი ჸვინთელი ფარფალიას გილათხოზუდჷ ოჭოფალონი, დო თეშ ქიმკიჭოფჷ თიში ოწიორაია ტანიშ სისქვამაქ, ნამდა გორაგადი ქო დოუჭყჷ.
- ქო გიჸოროფუავო? – მუშობურო, ბონას საქვარშა გინილჷ მაჭირხოლქ. ლარჭემქ მორიდებუანო ქო დოუჩანუ დუდი. თეში უკული მაჭირხოლი ვა მოჩილათჷ ლარჭემს, ირო დუც გალუაფუდჷ დო თიში ფსუალეფიშ მიკოფართხალაფათ წყარს ვარჩხილიშფერი ოსხვარსხვალაია რეღმა გინაჸუნუდჷ.
ათაშ ეთმოუნწყუნდჷ ჸოროფას ლარჭემს მაჭირხოლი დო ათაშ იგინძორებუდჷ თე ჸოროფა ედომუშამი ზარხულს.
II
- თოისერი რე თეშ ამბე, – ღურჭულანდეს შხვა მაჭირხოლეფი. – ფარა თე ლარჭემს ვა უღუ, თეწკჷმა ართო, ანაყუ მოჯგირე ჸუნც. – დო დასურო, თე წყარმალი გოფშა რდჷ ლარჭემეფით.
უკული მუჟამც დამორჩილქ ქო მორთჷნ, მაჭირხოლეფქ ქო ფურინეს. თინეფიშ ფურინუაშ უკული მაჭირხოლს ხვალახობაქ ქათახვილჷ გურშა. ჸოროფილქჷთ გეკოურთჷ ყორყელშა.
„შურო ვაუჩქჷ ჩიება, – თქუ თიქ. – ირფელწკჷმა ართო ჭე დუდძიკალი ხოლო ქო რდას ოკო, ირო მასქურს გახვანჯგალჷ“. დასურო, ქო დირქენდჷ დო ვარი მასქურინ, ლარჭემი ხათეხოლაშო კვაზალით ქო დოუკვანწუანდჷ მუშ წელს. „უდებუო, დიდი ფანიაშ მოჸოროფე ოსური რჩქჷ“, – გაგინძორჷ მაჭირხოლქ. – მარა მა შარალუაშ მოჸოროფე ვორექ, თაშინ, ჩქიმ ჩილსჷთ შარალუა უჸორდას ოკო“.
- მალურქო ჩქიმწკჷმა ართო? – მოჭკირილო ქო კითხჷ მაჭირხოლქ ლარჭემს. მარა ლარჭემს თეშ უჸორდჷ მუში ოჸურჩე, ნამდა დუც ქო კინუკანტუ ვარიაშ ჩინებაშ ღანკით.
- მუჭოთ ვორწყექჷნ, თაიშახ მოლაჸაფუდი ირიათო, ვარო? ჯგირო ქო რდა, მა პირამიდეფჸურე მევურქ. – ქო მიკაძახჷ მაჭირხოლქ დო ქო ფურინჷ.
თელი დღას მეფურინუნდჷ მაჭირხოლი დო სერით ათე ნოღაშა ქო მაჭირინუ.
„სო გიმავდოხოდა? მენდი ქო მიღჷ, ნოღა ხაზირი რე ჩქიმი დახვამილაფარონი“, – თქუ თიქ დო ხათე მაღალი სჷმეტის გიმადგჷმილი ნოჭახნაკუ დონაკჷ.
- ათაქ ქ’ამუოფურინანქ. გოსოფური აბანი რე, წკონდა ჰეერი ხოლო მირყას ქო რე, – ქო მიოძახჷ თიქ დო ბედინერი მაფასქირიშ კუჩხეფიშ შქას ქო გიჸურშჷ. – მა ორქოში ონჯირე ქო ნობღვე, – თქუ მაჭირხოლქ ხონარგიმაკინელო დო მუკი-მუკი ქო გიჯინჷ. უკული დარულაფარო მიხაზირჷ დო, თინა რდჷ, ფსუაშა ათმიდვანდჷ დუდისჷნ თეშ, ჟიშე წყარიშ დიდი ჭვათიქ ქო გიანთხჷ. – სარკო კოც გოკონდა! – ქო მიოძახჷ მაჭირხოლქ, – ცას ართი მუნაფა ხოლო ვა რე, მურიცხეფი ქ’ახვიჩინანა დო იშენით ჭვენს. ოორუე ევროპას ბონას ქო ფთქუენ, საჯოგარი კლიმატი რე. ლარჭემს ქო უჸორდჷ ჭვემა, მარა ენა თიშენი, ნამდა დიდი დუდიშია ქო ზოჯუნდჷ ინა მიდგა რდჷნი.
მალას მაჟირა ჭვათიქ გაგთოლჷ.
- მუშ მაქიმინჯე რე ნოჭახნაკუ, ჭვემაშე ვა დორფორუნსჷ-და.
ართი ჯგირი ოკუმოლი დობგორენი ოკო, თინა ქო უჯგჷ, – თქუ მაჭირხოლქ დო ფურინუა ქ’ილამუ.
III
მარა სოიშახ ფსუალეფს გოფაჩუნდჷნ, მასუმა ჭვათიქჷთ ქო გიანთხჷ. მაჭირხოლქ ჟიშე ქ’ელიჯინჷ დო ქო ძირჷ – ჸაჰ! მუ ძირჷ ქო გიჩქუნა და?
ბედინერ მაფასქირს თოლეფი ჩილამურეფით გოფშაფუდჷ დო ორქოქუნილ ღვალეფს ყვარყვალით გილაჸუნუდჷ. თუთარჩელას თიშნერი ოძირაფალი რდჷ, ნამდა ჭიჭე მაჭირხოლს გურქ ნარღით გეიაფშჷ.
- მი რექ? – ქო კითხჷ მაჭირხოლქ.
- მა ბედინერი მაფასქირი ვორექ.
- იმწკჷმა, მუ გონგარჷ? – გიჩაკვირუ მაჭირხოლქ. – ედომუშამო დოფშოლინ.
- მუჟამც მა შური მიდგუდჷ დო ადამიერიშ გური ალაბძუდჷნ, – უგამჷ მაფასქირქ, – ჩილამურიშ მუთა მიჩქუდჷ. ფსქიდუდი სან-სუსიშ დოხორეს, სოდეთ ჭიროთის მინულაშ ალობა ვა უღუდჷ: თეეთ ჩქიმ მაჸალეეფწკჷმა ართო ბაღის ვართუაფუდი, ოდო მაინჯეთ სხაპუას ბმანჯჷნდი პელეტის.
ბაღის მუკი-მუკი მაღალი ქართა აფუდჷ გოლუაფირი, მარა დღას ვა მიკითხირჷ მუ ორდჷ თე ქართაშ მინინ, თეშ მოხიოლუდჷ ირიფელი.
ჩქიმი კარიშკოჩეფი ბედინერ მაფასქირს მიძახჷდეს დო დასურო ბედინერი ვორდი, თე ჯგურა ჰამო რინას ქო ჯოხო ბედინერობა-და. ათაშ მიდგუდჷ შური დო ქოთ ათაშ დოვღური. დო ასე ღურელი ვორექჷნ, ათაქ ქ’ამმოპონეს ათე სიმაღალას, უჯგუშო ქო ბძირე ჩქიმი ნოღაშ უსქვამელობა დო საცოდალობანი. თიშ უმკუჯინუო, ნამდა გური დარჯაკიშ მიღუნჷ, ნგარაშ მოხ მუ დოფსქილადჷ.
- მუნერო, გური ხოლო ორქოშ ვაუღუნო? – ქ’ელირაგადუ მაჭირხოლქ მუშო, რახან ინა ართო რდილი გოხოლუდეს დო ვა თქუანდჷ თეცალი მუდგარენს ხონარეკინელო.
- ემერი, შორს, ჭიჭე შოშეს, – გაგინძორჷ მაფასქირქ დოკინელი, ჰამო ხონარით, – ართი გოღილონტირი ჸუდე გედგჷ. ოჭკორიე გონჯამილი აფუ დო მა ვორწყექ ცირას, მით ტაბაკის მუკოუხენ. თის ინოლაფირი, შულადირი ღვა დო ლიშით ძგვატილი, ჩიკალი, ჭითა კითეფი უღუ, თიშენ ნამდა თინა მაჭალი რე.
თინა ვარდეფს გიოქარგანს ანტლასიშ კაბას, მუთ დიაფალიშ სეფეცირეფშე უსქვამაშიქ მუკიქუნას ოკო მუმალ მეჯლისიშონ. ჸუდეშ თოლიშ კუნთხუს, გორჩაფილს, მუში ჭიჭე ლეხი ბოში გეჯანჷ. ბოშის სინჩხე უღჷ დო ფორთოხალს თხულენს; დიამუშის წყარმალიშ წყარიშ მოხ მუთუნ ვა აპალუ დო ბაღანა ინგარს. ვო მაჭირხოლი, ვო მაჭირხოლი, ვო ჭიჭე მაჭირხოლი, ხომ ვა მეუღანქ თი მაჭალს ჩქიმი მაღულარიშ ტარიშ ქარწიბის? მა კუჩხეფი მიკოკირილი მაფუ ჯინჯექუაშა დო დოქანცაფა ვა შემილებჷ.
IV
- მა ეგვიპტეს მელუნანი? – თქუ მაჭირხოლქ. – ჩქიმი მაჸალეეფი ნილოსიშ ძგაპიჯეფს გილაფურინუნა დო დიდი ლოტოსიშ პეულეფწკჷმა უღუნა გორაგადი. თინეფი მალას ქო დირულუანა დიდი მაფაშ აკარდამას. წამალერი მაფა ხოლო თექ ენოსვანჯჷ ხანტურელ ჭკუდის.
ჸვინთელ გაქუნალით გოქუნილს, კისერს დოლოშფერი ნეფრიტიშ ჯაჭვი აფუ გოლუაფირი დო ხელეფი ჭიროკილ ხიმფორეფშა მეუგჷ.
- ვო მაჭირხოლი, ვო მაჭირხოლი, ვო ჭიჭე მაჭირხოლი, – თქუ მაფასქირქ. – ვა დოსქიდუქო ჩქიმწკჷმა აკა სერს დო ჩქიმი ამბეშ გილმაღალარი ქო ორდენ? ბაღანას თეშ ჸუმენც დო დიამუში თეში იჭიროთჷ.
- მა ბოშეფი შურო ვა მოპწონს, – უგამჷ მაჭირხოლქ. – გოწოს ზარხულს, წყარმალიშ პიც იფსვანჯუდინ, თექ ჟირი ურდუ ბოში სქიდუდჷ – მესქიბუეშ ბოშეფი – ირო ქუალეფს მოჸოთანდეს. მართალი რე, ნამთინიშა ვა მახვამილეს ჩქიმდა, ჩქი, მაჭირხოლეფი ობაღინაფალო ნჭაფიერო გილაფუბრინჷნთ დო, თეწკჷმა ართო, ჩქიმი ფანია ჯოხოგოლაფირი რე მუში სიცხაცხამუტეთ, მარა ენა იშენი პატიუჩამუობაშ შანი რე.
მარა ბედინერი მაფასქირი თეშ ნარღიანო იჯინედჷ, ნამდა მაჭირხოლს გურქ ეჩქიჩქორჷ.
- თაქ ძალამი ჩხურუ რე, – თქუ თიქ, – მარა, მუს ღოლანქ. ართი სერს ქო დოფსქიდუქ დო ამბეშ გილმაღალარო ქ’ალაიდირთუქ.
- მარდი, ჭიჭე მაჭირხოლი, – თქუ მაფასქირქ.
ჭიჭე მაჭირხოლქ მაფასქირიშ მაღულარშე ქარწიბი გეშეღჷ, ნინძგით ქო დეკინჷ დო ნოღაჸურე მიდაფურინჷ.
შარას მიკოულუ ოკათედრე ოხიდაშ ჸორშის, ნამუსჷთ ჩე მარმალიშ ანგილოზეფი რდჷ გეჭახნაკელი. მიკოულუ დოხორეს, სო ჸურეშეთ სხაპუაშ ხონარქ ალასიმჷნ. მაქჷდორშა ართი ზისნახეს გაგმოურთუმჷ მუში გოჸოროფიწკჷმა ართო.
- მუ მერეთეფი რენა თე მურიცხეფი, – უწუ ბოშიქ ცირას, – დო მუ მერეთი რე ჸოროფაშ ნძალა.
- მენდი მიღუ, ჩქიმი კაბას ქო მომიჭიშუანა მეჯლისიშონ, – უგამჷ თეშენი ცირაქ. – მა მოკო, ჟიშეშე ვარდეფი ქუმნომიქარგუანი თიშანი.
მარა მაჭალეფი თიშნერი ლანთირიეფი რენა …
უკული მაჭირხოლქ წყარმალს გეგნოუფურინ დო ქო ძირჷ, ნამდა ხვამარდეფიშ ანწეფშა ნოთეეფი ქო გითუბუნუაფუნა; ურიეფიშ საგანოს გეგნულუ დო ქო ძირჷ რჩინუ ურიეფი, მინეფით ჸიდირ-გუმოჩამაშ ართი ამბეს ქო რდესჷნი დო ფარას ლინჯიშ ლაღარიკონს გიოწონანდეს; ბოლოს თი გოღილონტირი ჸუდეწკჷმა ხოლო ქო მიოფურინ დო დინოხ ქო მილეჯინჷ. სინჩხეშ ეჸოთამილი ბაღანა ონჯირეს უმუსვანჯუო ირთანდჷ, ნანას ქო დორულაფუდჷ. მაჭირხოლქ ჸუდეშ თოლშა გემინოფურინჷ დო ქარწიბი ტაბაკის, ოკითურიშ ხასჷლას ქო გილადჷ.
უკული მერაას ქუგალუ მუკი-მუკი ონჯირეს დო ფსუალეფით ბაღანას ჸვაშა ქო მოურგილუ.
- მუჭო ქო მომირგილუ, ალბეთ მალას დოფსქიდუქ, – თქუ ბაღანაქ დო ჰამო ლურს ქიმშანთხჷ.
V
უკული დირთჷ მაჭირხოლქ მაფასქირშა დო ქეჩჲუ, მუთ ქიმინუნ.
- მუ სარიკო რე თე ღიაბი, – ქო გეუძინჷ თიქ, – ითამ სიტჷბაქ ქო მუმაკათჷ გურშა, მორო ნძალამ ჩხურუ ქო რე.
- ენა თიშენი, ნამუდა ჩეჟი ქიმინინ, – უწუ მაფასქირქ. ჭიჭე მაჭირხოლქ ქო გოუჩჷ გური ნარაგადის დო ჭიჭე ხანიშ უკული ქო მიარულჷ. ფირქი ლურს მუთმუკათინუანდჷ ირო.
გონათჷ დო ვარინ, მაჭირხოლქ წყარმალშა ქო მიოფურინჷ დო გიხვარჩალუ.
- მუ მერეთი ჸოფირება რე, – თქუ ორნიტოლოგიაშ პროფესორქ, მით თე ბორჯის თექინეშეს ხინჯის გინმიშუნ – მაჭირხოლი ზოთონჯის – თეშ გეშა პროფესორქ აბანობურ გაზეთის დიდი სტატია ბეშტუ. თე ნაჭარას მიარე ზიტყვა ქო რდჷ თიშნერი, ნამუდგაშით კათას ვა არჩქილედუნ, ათეშენ ირკოჩი იმაჟირანდჷ სტატიას მოჩამილ ნამთინე გურგაჩამალი აბანეფს.
- ამუსერი ეგვიპტეშა მეფუვრინუნქ, – თქუ მაჭირხოლქ დო გურქ ხიოლით ეიაფშჷ. ქიძირუ ნოღაშ არძო ნოჭახნაკუეფი, ბრელი ხანს გილახედჷ ოხვამეშ ორეკეშისჷთ. სოლეშეთ იდუნ, ბაღჷრეეფქ თიშ ძირაფაშვანს ართი ამბე დათანეს:
- ქო მუკაჯინით, მუ გიშარჩქინელი ურცხოარი რენ.
მაჭირხოლს თენა ძალამს ეთმირთუანდჷ.
მუჟამცჷთ თუთაქ ელელუნ, მაჭირხოლქ ქო მიოფურინჷ ბედინერი მაფასქირშა დო ქო დოუძახჷ:
- მუთუნს ხო ვა მოჩინა ეგვიპტეშა? მა უკვე მეფუვრინუნქ.
- ვო მაჭირხოლი, ვო მაჭირხოლი, ვო ჭიჭე მაჭირხოლი, – თქუ მაფასქირქ. – ქო დოსქიდჷ ხოლო აკა სერს.
- მა ეგვიპტეს მელუნანი? – უგამჷ მაჭირხოლქ. – ჭუმანი ჩქიმი მაჸალეეფი წყარგელაფუჸურე მიდულა. ექ, ჭილოუს ვეჰემი რე გორსიმინაფილი დო დიდი გრანიტიშ ხვისტას ღორონთი მემნონი გილახე. თელ სერს უთოლორანს თინა მურიცხეფს დო, მუჟამცჷთ გჷმათანე მურიცხი გეშეჩხორიანსჷნ, ღორონთის ხიოლიშ ხონარი გეკალუ დო უკული დერჩქალებუ. ონდღებორჯის ჸვინთელი ნჯილოეფი წყარიშ ოშუმალო გიმულა წყარპიჯიშა. თინეფს თოლეფი დოლოშფერი ბერილცალო ურწკინუნა დო წყარგელაფუს უმოსი ხონარეკინელო ღვარანა.
- ვო მაჭირხოლი, ვო მაჭირხოლი, ვო ჭიჭე მაჭირხოლი, – თქუ მაფასქირქ. – შორს, ნოღაშ დათებუს, ართი ჸუდეშ ცხვინს მა ვორწყექი ახალნორდი ბოშის.
თინა ქარღადეფით გოფშა ტაბაკის ქიგეპონუ, ხასჷლას, ჭირქაშა ჭირაკილი იაიაშ ქუჩუჩი დინუძჷ. მაბოშიას ჭუბურიშფერი, კიროკილი თუმა დო მონარტეშ ფირჩა თოლეფი უღუ, ლეჩქვეფი ბერწულშორო გოჭითორებჷ. მაბოშია ოცადჷ თეატრიშ დირექტორს პიესა მუსურასჷნ, მარა ჩხურუ აფუ დო ვა აჭარე. ბუხარს დაჩხირი ქიგეშქირატე დო მაბოშიას შქირენქ გური წაუჸონჷ.
VI
- ართ სერს ხოლო ქო დოფსქიდუქ სქანწკჷმა, – დეალჷ მაჭირხოლქ, მისჷთ, ჩქიჩქჷ გური უღუდჷნ, – მაჟირა ქარწიბი თე მაბოშიას მევუღაო?
- ვაი ახავაი ჩქიმ დუც, მეტი ვა მიღუნ, – უწუ მაჭირხოლს მაფასქირქ. – თოლეფიშ მოხ მუთუნქ ვა დომოსქიდჷ. თინეფი ძივთუმნუდვალუ საფირონიშ რენა; თე საფირონეფი ინდოეთიშე მიღეს ვითოში წანაშ წოხოლე. გელამიჸოთი ცალი დო თი მაბოშიას ქო მეუღი.
საფირონს თინა ორქოჭკადუს ქო მეჸიდენს დო თი ფარათ დიშქას ქიჸიდენს დო პიესასჷთ მასურენს.
- ოჸოროფული მაფასქირი, მა თენა ვა მაქიმინე, – თქუ მაჭირხოლქ დო ქაანგარინჷ.
- ვო მაჭირხოლი, ვო მაჭირხოლი, ვო ჭიჭე მაჭირხოლი, – თქუ მაფასქირქ, – თეში ქიმინი, მუჭოთ გიზოჯუნქჷნ.
მაჭირხოლქ გელუჸოთჷ ცალი თოლი დო სტუდენტიშ ცხვინიჸურე მიდაფურინჷ. თექიანი მინულა ძალამი ლექინი რდჷ იშო. ჭელი ართ აბანს კილაბურგონილი რდჷ დო მაჭირხოლქ თე კილარხვილშე გემუთოფურინჷ. ახალნორდი ბოშის დუდი ხელეფშა ქენუნწყუაფჷ დო მაჭირხოლიშ ფსუალეფიშ ფართხალი ვა გოუგებჷ. ხვალე, მუჟამცჷთ ქელეჯინუნ, ჭირაკილი იაიეფს სქვამი საფირონი ქო მიშახვილუ.
- ოჰო, კათაქ უკვე ქჷგეგჷ ჩქიმი ძივთი, – ქო მიოძახჷ თიქ. – თე საფირონი უორჩანეთ ნამდგია იჸინ ჩქიმი დიდი მოჸოროფექ მომიჯღონჷ. ანწი ჩქიმი პიესასჷთ მუასურე, – დო სახეს ბედინიერობაქ ქო გიოდოხოდჷ.
მასუმა დღას მაჭირხოლქ ონიშოლშა ქო მეფურინჷ დო თექ დიდი ხვამარდიშ ანწას ქო გილადოხოდჷ.
მეზუღურეფი ტრიუმეფშე დიდი ჭკუდეფს უზინდუანდეს დო ირი ჭკუდიშ გჷმორჩქინას ართიანს უღვარანდეს:
- აბა, კურცხას!
- მა ეგვიპტეშა მევურქ, – ქო მიოძახჷ მაჭირხოლქ, მარა იშა თოჸუჯი მითინს ვა უთხუაფჷ.
მუჟამცჷთ თუთაქ ელელუნ, მაჭირხოლქ ბედინერ მაფასქირშა ქო მიოფურინჷ.
- ჯგირობუაშ დაჩინუშა მოფრთი, – ქო დოუძახჷ თიქ მაფასქირს.
- ვო მაჭირხოლი, ვო მაჭირხოლი, ვო ჭიჭე მაჭირხოლი, – თქუ მაფასქირქ.
- ქო დოსქიდი ჩქიმწკჷმა ხოლო აკა სერს.
- ასე ზოთონჯი რე, – უგამჷ მაჭირხოლქ, მალას თირი ხოლო ქო მოურს ოდო ეგვიპტეს წვანე პალმეფს ბჟა თიშნერი ტჷბუ რე, ნიანგეფი ლეტას ენოლაჸაფენა დო ვიშო-აშო ზირტიკო იჯინენა. ჩქიმი მაჸალეეფი ბაალბეკიშ ოხიდას ოგვაჯეს გჷმიკეთენა; თინეფიშ საქვარუას ჩე დო ვარდიშფერი ტორონჯეფი უჯინენა დო მიოღუმინანა. ოჸოროფული მაფასქირი, ოკო ქო დოგიტუე; მარა დღას ვა დოგიჭყოლიდუნაქ: გეჸვენჯი აფუნს ჟირი ირიშ უჯგუშ ქუას ქო მოგიღანქ, თიშ მანგიორო მუთ სი გოჩინი, ჭითა ვარდიშე უჭითაში ქარწიბის ქო მოგიჯუმანქ დო დიდი ზუღაცალი ლენი საფირონსჷთ.
VII
- თუდოლე, მოედანს, – თქუ ბედინერი მაფასქირქ, – ჭიჭე ცირა ჩხაჩხის გიმიჩანს. ცირას კოლოფი თხორილს ქენოლაფჷ დო ჩხაჩხი გვალო გილალუაფჷ. ცირა ინგარს, რახან ჸუჩა ფარა ვა მინიღუ-და, მუმა გოლახუნს.
თის კუჩხმოდვალუ ვა მააძჷ დო დუდშუშელიე. გელამიჸოთი მაჟირა თოლი დო ქო მეუღი თი მაცირიას. თიწკჷმა თის მუმა ვა გოლახუნს.
- ართი სერს ხოლო ქო დოფსქიდუქ სქანწკჷმა, – თქუ მაჭირხოლქ. – მარა თოლი ვა ელმაჸოთინე სქანდა, გვალო ხომ დეჸვერებუქ.
- ვო მაჭირხოლი, ვო მაჭირხოლი, ვო ჭიჭე მაჭირხოლი, – თქუ მაფასქირქ. – თეშ ქიმინი, მუჭოთ გიზოჯუნქჷნ.
მაჭირხოლქ მაფასქირს მაჟირა თოლი ხოლო გელუნთხორჷ დო ნოღაჸურე ისინდიშორო ქოლჷ; თექ მაცირიას ხასჷლას ქელოურქუ დო საფირონი ხეშქაგურშა ქაშუსიონტუ.
- მუშ მასქვამა შუშაშ ნოჭკერი რე – ქო მიოძახჷ მაცირიაქ დო გოკარკაცელო ჸუდეშა ინჭუ.
მაჭირხოლქ მუკირთჷ კჷნე მაფასქირშა დო უწუ:
- ასე სი ჸვერე რექ დო ვა დუმატებექ.
- ვარი, ჭიჭე მაჭირხოლი, – თქუ სარალო მაფასქირქ. – სი ეგვიპტეშა ოკო ფურინე – მა სი ვა მუგოჩირთუქ.
- უწუ მაჭირხოლქ დო თიშ ოკუჩხალეს ქო გირულუ.
მაჟირა დღას მაჭირხოლი მაფასქირიშ ხუჯის გილახედჷ ირიათო. თელი დღას უთხობელანდჷ უჩინებჷ ქიანეფიშ ნაძირეფუს. თინა იჩიებუდჷ ამბეს ჭითა ყაჯირეფიშენ, ნამუეფით ნილოსიშ ძგაპიჯეფწკჷმა ქელახუნენა დო ნინძგით ორქოშ ჩხომეფს ჭოფუნან; სფინქსიშის, ნამუთ დიხაუჩაცალო ჯვეში რე, ჩხეტიოზის გედგჷ დო ირიფელი უჩქჷ; ვაჭარეფიშ ამბეს, მინეფით ქრავაშ კირიალესას უხარჭუანა დო თინჩას მეჸუნა არქემეფიშ სქერესქენეფს; თუთაშ გვალეფიშ მაფაშ ამბეს, მით აბანოზიშორო დოუჩარებე დო დუც გიმე დუჩანუანს ბროლსჷნ; დიდი წვანე გვერიშ ამბეს, მით პალმაშ ნოჸოეფს გილახენ დო მისჷთ ეჩი ქურუმი თოფურიშ ნამცხვარით ოდიარუანს; პულიცანა კოჩეფიშ ამბეს, ნამნეფით ქვერსემი ხიმფორეფს გეხუნელეფი დიდი ტობას გილანჩურუნა დო ართწორო ოლიმჷნა ფარფალეფს.
VIII
- ჩქიმი ოჸოროფული, ჩქიმი ჭიჭე მაჭირხოლი, – თქუ მაფასქირქ, – საჩემარი ამბეეფს მირაგადუქ. მარა ირიშენ საჩემარი იშენით ადამიერეფიშ გაჭირება რე. თე ქიანას გაჭირებაშენ უმოსი დიდი სალამუსობა ვა რე მუთუნი … მიდაფურინი ნოღაშა, ჭიჭე მაჭირხოლი დო მუსჷთ თექ ძირუნქჷნ, თინა ქო მეჩი.
მაჭირხოლქ მიდაფურინჷ ნოღაშა დო ქო ძირჷ, ნამდა გოსოფური ჸუდეეფს დიარა უღუდეს, ოდო მათხირეფი კარ-მინალწკჷმა გეხედესჷნ. მაჭირხოლქ ასე უკუმელა შოშეეფჸურე მიკოურთუ დო ქო ძირჷ შქირენშე ფერწაულირი ბაღანეფი, მინეფით უკუმელა შოშეს უმუსვანჯუო გინმაჯინედეს.
ხინჯიშ თაღგიმე ჟირი ჭიჭე ბოში ართიანს ქოხუტოლუ, ეგებადა მუდგათ იჸინ გობტიბათია.
- მუჭო ფშქირენა, – კუსანდეს თინეფი.
- მიქ მერჩეს თაქ ნჯირაშ ნება: – ქო დოუღვარუ თინეფს სერიშ ყარულქ დო ბაღანეფი ჭვემაშა გაგმარაჸჷ.
თიწკჷმა მაჭირხოლქ უკოხოლე გამკირთჷ დო, დო მუთ ქო ძირჷნ, ირიფელი მაფასქირს ქო უთხობელუ.
- მა წუწელი ორქოშ ფირფიტეფით ვორექ დოფორილი, – თქუ მაფასქირქ, – ქუგმოტყაბარე წიაკალო დო უღვენჯეფს გაკურიგი. შურდგჷმილეფს ირო ოგონუნა, ნამდა ორქო თინეფს ბედინერობას ქო მოუღანსჷნ.
გვალო წიაკალო გეტყაბარუ მაჭირხოლქ ნოჭახნაკუს ორქოშ ფურცელეფი, სოიშახ საცოდალი მაფასქირს ტუტაშფერქ ვა გინადჷნ. გვალო წიაკალო გაკურიგჷ მაჭირხოლქ ორქოეფი უღვენჯეფს: ბაღანეფს ღვანწკეფქ გოუხვიჩონდეს.
- ჩქი ასე ქობალი ქო მიღუნა, – გილეძახუდეს თინეფი დო ართი ძიცა-ლაჸაფი უღუდეს შოშეეფს.
ეშობას თირქჷთ ქო მორთჷ, თირს ჸინქ ქო მაჸუნჷ. შოშეეფი თეშ გეიორწკინუ ჸინქ, ითამ ვარჩხილით მოუჭკადუდესკონი. ჸინიშ ლასარეფი ბროლიშ მაღულარიშორო მიკობუდჷ ორთვალს.. ირკოჩი ქუნჩის გოქუნელედჷ: ჭიჭე ბოშეფს ჭითა ქუდეფი ქო გეურთუმალუდეს დო ციგურეფით ჸინუეფს გილესიონტუდეს.
სარალო მაჭირხოლს ხოლო უმოსო დო უმოსო ქო მოუნჭირჷ ჩხურუქ, მარა მაფასქირს იშენით ვა ოთხუუდჷ, გინოლასირშორო უჸორდჷ თინა. მექობალე სოთინ ქოუწონებუდჷ-და, ქო მიოფურინანდჷ ფურნეშა დო თექ დორღვაფილი დჷნაცჷმეფს ეთმოკიკონუნდჷ, დო ფსუას ფსუაშა უფათქუანდჷ გატიბაფალო.
ბოლოს მაჭირხოლქ ქიგინჷ, ნამდა თიში დათებუ მონჭაფილი რდჷნ.
მაფასქირიშ ხუჯიშა ძიუთ დო ღურათ გეშაფურინჷ დო ჸუც ქელაფუცქინჷ:
- ბედინერო ჸოფედა, ჩქიმი ოჸოროფული მაფასქირი, ალობას ქომუჩანქო, ხეს ქო გაჯუნენ?
IX
- მუჭო მოხიოლჷ, ნამდა ეგვიპტეშა მეფურინჷნქჷნ, – თქუ მაფასქირქ. – სი აქ თეშით ხოლო ბრელი ხანს დოსქიდი. ხვალე ხეს ვარინ, ლეჩქვეფსჷთ ქო მაჯუნი, თიშენ ნამდა მა სი მიჸორქ.
- ეგვიპტეშა ვა მევურქ, – თქუ მაჭირხოლქ, – ღურუშ ორენჯიშა მევურქ. ღურა ლურიშ ჯიმა ხომ ქო რე? – დო მაჭირხოლქ ბედინერ მაფასქირს ლეჩქვეფს ქაჯუნჷ დო თიშ ოკუჩხალეს უშურეთ ქო დანთხჷ. თე ბორჯის, ნოჭახნაკუშ დინოხოლე მუდგა რენი სარიკო ხონარქ გისიმჷ, ითამ მუდგარენქ გოტირხუან ეფერო. მოხვადჷ თიქ ნამდა, ნოჭახნაკუშ დარჯაკიშ გურქ ჟირო გაკინწკირჷ. დასურო, სარიკო ჸინუა რდჷ თიწკჷმა.
მაჟირა ოჭუმარეს, ორდო ნოღაშ დუდქ სხუნუშ მაკათურეფწკჷმა ართო ბაღის ოფელურუშა გჷმილჷ.
მუჟამცჷთ სჷმეტის ალულესჷნ, ნოღაშ დუდქ ნოჭახნაკუს ქელაჯინჷ დო ქო მიოძახჷ:
- დია ღორონთი! მუ საცოდალო კილეძირე ბედინერი მაფასქირი!
- დასურო, მუ საცოდალო კილეძირე, – ართპიჯო ქო მიოძახეს სხუნუშ მაკათურეფქ, მინეფით ირფელშე დუც უკინანდეს ნოღაშ დუდისჷნ: არძოქ ნოჭახნაკუშ ოძირაფუშა ეშელეს.
- ქარწიბი მაღულარშე გეშალაფე, თოლეფი ხოლო მედინაფჷ, ორქო ხოლო სოთინ ვეპალუ. – თქუ ნოღაშ დუდქ. – გვალო მათხირს ქო გურაფჷ!
- გვალო მათხირს ქო გურაფჷ, – დუდი ქო დოუჩანეს სხუნუშ მაკათურეფქ.
- ოკუჩხალეს ქიმკაჯინით, ღურელი მაჭირხოლი აწუძჷ, – გაგინძორჷ ნოღაშ დუდქ, – ოფიციალურო ოკო გაგმუაცხადათ, ნამდა ჩიტეფს თაქ ღურაშ ნება ვა უღუნან. – სხუნუშ მაკათურეფქ ქენიჭარეს თე გეწურაფა.
ბედინერი მაფასქირიშ ნოჭახნაკუ გეგლანწყეს.
- თიშ გეშა ნამდა თე ნოჭახნაკუ ანწი სქვამი ვა რენი, თის ვართ მუთუნი ჯგირიშ მოღალა შეულებჷ, – გჷმაცხადჷ უნივერსიტეტის ხელუანობაშ პროფესორქ.
თეში უკულნეშის ნოჭახნაკუ ოფურაშეს გეგნანდღულეს დო ნოღაშ დუდქ თიწკჷმაშენო სხუნუშ მაკათურეფი ქო მიჭანუ ოსხუნუშა, მუ ბღოლუათია დოსქილადირი ნაჭახას.
- მუ რაგადი ოკო, ჩქი მაჟირა ნოჭახნაკუ ოკო გეგმუობათ, – თქუ თიქ, – დო თენა ჩქიმი ნოჭახნაკუ იჸუაფჷ.
X
- ჩქიმი ნოჭახნაკუ იჸი, – თქუეს ზოხ-ზოხო სხუნუშ მაკათურეფქ დო უკული ჩხუპიქ ქო მოურთეს.
მა თინეფი ეკონიათ ბძირინ, ხოლო ჩხუპენდეს.
- მუ სარიკო რე! – თქუ მოხანდეფიშ გესაძინექ ოგითობუნაშე ქარხანას, – ათე გოტახილი დარჯაკიშ გური მუთინით ვა ნდღულუ ოფურაშეს. მორთი, ქო ვოჸოთათ. – დო გური თექინეშეს ოგვამეშა ქაბურინეს. ღურელი მაჭირხოლი ხოლო თექინე გეძუდჷ.
- ჟირი, ირიშენი უჯგუში მუდგა იჸინ ქო მომიჯღონით ნოღაშე, – უზოჯჷ ღორონთიქ მუში ანგილოზეფს.
ანგილოზეფქ თის დარჯაკიშ გური დო ღურელი ჩიტი ქო მოუღეს.
- თქვანი სხვენა თინი რე, – თქუ ღორონთიქ, – თიშენ ნამდა ათე ჭიჭე ფსუამი ჩქიმი სამჷთხეს იღურჭულანს ანწიანი წიმი ირიათონო, ოდო ბედინერი მაფასქირი ცქვაფას ვა დჷმარკენს ჩქიმი ორქოშ ნოღას.