ბაბაშ ჸუჩა
მა დო ძურგა, ბაბაშ ჸუჩა
ბირგულჷშა თჷრც მებხარუნთჷ
დობშურდჷთჷნ ომათჷრეთ
ართიანცჷ აწოპუნთჷ.
ჭაკჷნდჷ ბორია იკვარკვანტ,
მუთუ გიანტჷრენ თჷნცჷ.
ჸუჩა მიმანჭუაფუნა,
ჯიმა, ჯიმას ეკოჸუნცჷ.
ირჲ კუჩხა დო ახალჲ წანას
თაქი მუოჸოთანთ შურცჷ,
ჩქჷნჲ გემუანჲ ოდაბადე
ხიოლით ობშანცჷ გურცჷ.
ა, მინიბლით ოზეშ კარცჷ,
ოულარი გუალეთჷ,
აბარწასჷ თჷრჲ გიფაფრთხით,
კუჩხეფც ქჷდოუბარხალეთჷ.
კარქჷ გინჯჷ, არძაქ ართო
აშო ჩქჷნდა ქჷგმოლესჷ
ხიოლითი მობშა თოლით
გობჯუნ – გეგნობღურჯოლესჷ.
ჩქჷნი დიდა, ჩქჷნი ბაბა,
ჩქჷნი და დო ჯიმალეფი.
ჩქჷნჲ ბორია, მუშ ოჯახით,
ბაბაშ ბიძისქუალეფი.
თეზმა ჯგჷრჲ დო თეზმა სქვამი
ნტერენცჷ გეუსვიტჷნც თოლცჷ,
შურჲ დო გურჲ დჷგარძღოუ –
მუ ვეგლაძჷ, მობშა სტოლცჷ –.
წუწელჲ ადესაში ღვინით
ორკოლჲ მოხვიხვინაფილი,
კვარჲ ხაშილჲ დო ხაჭაპური
ჸვალიშ გოთვითვინაფილი.
კვარწახი დო ჭითა ჯიმუ,
ჩჷხჷშ ხორც დო კუპატჲ ჭვილი,
ქობალჲ ანგურაში ნაჭვი,
ღუმუ ჩხე დო ღუმუ რგილი...
ჭვიშთარი დო ჩხე ელარჯი,
სელეგჷნჲ დო გუდაშ ჸვალი,
ნორღვაშ ნაჭვი ჩხვერეშ ჭკჷდი,
ვოჩიშ აფხა ოსვართალი...
ჩხომჲ, ჯვეში დო ჩხომჲ ახალი,
ბაჟა, საცივჲ, ნეძამჲ ხული,
კაჭაბე დო კობეშია,
ჯგჷრჲ კეთებულჲ მოხარკილი...
ტაბაკჲ წელცჷ გოდჷრაკე,
ირფელჲ თიზმა გილაზორთჷ,
ბუხარჲ იბირც ღუღინჷნცჷ,
დაჩხჷრჲ ეშე პოპორც ორთჷ.
ორკოლიში ყორყელიშე
ჭირქას ღვინი კარკალანს
დაჩხირიში კვარკვანტია
თექი ინოვარკალანცჷ.
ბაბა გედჷრთჷ, ღვინც გეჭოფუნც,
პიჯვარც დიწერც, დიხვამანც,
გურიშ ჸუჯით ურჩქილეთ,
სიტყვას თქუანც ირი სქვამცჷ.
– ახალჲ წანა დო კუჩხასჷ,
ირკოჩჲ ებშათ ქოპუნდასჷ,
ძიცა, სხაპუა, ლაჸაფითჷ
დოირინდანჲ გემუანასჷ.
ჩქიმჲ ხვამა დო ჩქიმჲ წირუა,
ხვეწა შემირსული ართი
ქიმკომჯინი დო დომთხილე
ჩქიმ ნახანდე, ჩქიმი ნარდი!
ღორონთჲ, გლახა ეუჩჷლითე,
ჭირი ვამღუდანჲ დო დარდი,
ჩქჷნჲ ქიანას გოუტჷბინე,
ჯგეგე წმინდანიში მარდი!
ბუხარც დაჩხჷრჲ იბარბანჩჷ,
გალე ომაღურეთ თჷნცჷ,
ავთო ნანადირჲ ზესქვეფცჷ
გჷთოჩხირკილჲ ნორღვას ჭუნცჷ.
წკჷრჲ ზესქვეფით მოჭაჭილი
ყებურც ირთანც, იჭვარკვანტჷ.
თიშ ნაჭვათა ქონშე ნორცხვას
ალ–დაჩხჷრი იბარბანჩჷ.
მუშო გოკო ოჭკუმალი,
შური თეში დჷგორძღანცჷ
ამდღა მიჩქჷ ბაბაშ ჸუდეს,
ვემმარკენა ჯგჷრჲ დო სქვამცჷ.
დავეხ მარანშე მირულე,
ღვინც ორკოლით ქჷმიღანცჷ.
დაია საცივც ამზადენცჷ,
დიდა ღუმუს მიშაზანცჷ.
არძა გილეკვარკვანტჷნა,
ოჭკუმალეთ ინწყუაფუ
ძურგა შქაფის მითიჭკუმუ,
წესი უღუ, გემუან აფუ.
ირფელჲ ხელათ იმზადებუ,
მალას ღუმუ ქჷდიგაფუ...
ახალჲ წანაშჲ მეხვამუა,
შუმა, ჭკუმუა ქჷდიჭყაფუ.