აფუნი (გიორგი ხულორდავა)
Jump to navigation
Jump to search
დიკუნტარი კაბაშ ქობა,
დღა წყარცალო გოკო გეშვე,
ხიბას გერე აფუნობა,
გითიჯინექ ოსინთეშე.
გიჭანუანც დოლო ირო,
გაცხვანტალჷ ტანიშ ჩხვიჩხვი,
დემეჸანი, გოლვაფირო,
ჸათე ბორჯი ვარე ჩქინი.
აფუნჲ რექო, ჩქიმი ცირა
ცაშ კიდირშე გითნაცირა?
სო გილემგარქ ჩქიჩქჷცალო,
ქიმკვოსქიდი უჩა ჭალეს,
გუპეულუ ორთას გვალო,
ქუმორთი დო ქომიჭანე.
ქიწომზადე ია-ია,
ვედიტუა შურიშ ნართი,
აფუნჲ შვანიშ მაფშალია,
გეხანგი დო გესიმართი.
სონ ლაკადას ეკოთხოზუქ,
ირო ხვალე, ირო ცალო,
ეკოთანაშ ზისხირჲ გორდგუ,
ეშაღალირჲ ყამაცალო.
სო იდი დო მის აჸუნი,
მა ვავორდი სქანი ჭყიში,
გირქენდუო ტანც აფუნი,
ვარ გოშინა ზოთონჯიში.
მუ ჰამო რე ჸათე უღუ,
დეკუნტარი კაბაშ ქობა,
ეკოთანას ქუმურთუმუ,
მონჭაფილჲ რე აფუნობა.
2014 წანა, 28. ფურთუთა
ოფუტე სალხინო