არჩევნები

არჩევნები ავტორი: გალაკტიონ ტაბიძე

არჩევნები

ნათელი დღე, სავსე გზნებით,

მზე, ყველასთვის ასე მუქთი;

დროშებით და ყვავილებით

შემოსილა აგიტპუნქტი.

თოვლი გადნა. იღვიძებს ტყე.

დილა ფართოდ აღებს კარებს,

რომლისკენაც მზიანი დღე

ამომრჩევლებს მიაჩქარებს.

ჩვენ ვამაყობთ ამ კარებით:

ხან ისე სწევს და ხან ასე,

იქ ცოლ-ქმარიც მიიჩქარის:

რიფსიმე და ათანასე.

არჩევნების გზა წყნარია,

თითქო ვარდისუბანია.

ათანასეს უხარია -

ცოლი რომ ჰყავს მსუქანია.

რიფსიმეს არ გაეკაროთ,

თუ გაბრაზდა ათანასე,

აფეთქდება და გახდება

უარესი სატანაზე.

ეხლა კი ის, როგორც ბეცი

შედგა - სადაც შარის სიგრძე

წარწერაა: „აირჩიეთ

ჯიბლაძე და ლეონიძე“.

სული სულს სცნობს, ღონეს ღონე.

ასე არის ქვეყანაზე.

ჯიბლაძეს - ხმას აძლევს რიფსო,

ლეონიძეს - ათანასე.

და გათავდა.. მახლობლადაც

კვლავ ვაშლების დუქანია...

ათანასეს უხარია -

ცოლი რომ ჰყავს მსუქანია!

თარიღი: 1955, 2 მარტი