არიკი ხენწფეში სქუა დო ნდემიში მორდილიში
მითაჟამცჷ ართი ქეჸანაშა ეკულებუ თურქისჷ დო ჸოფე დიდი ხირზუა. თე დროს ართი ყაზახიში ჸუდეშე სუმი ნოსალეფცჷ გაგმუურულუნა დო აშაჩილათჷრო სოჸურეშე თურქი მიიშჷნი, თეჸურეშე ურულუნანი, აშო ქაწოხვალამუნა შხვა კათა მარტინჯეფი, დუურთინუნა დო თი კათასჷ ქოჸუნაფუნა. ართისჷ ჩქჷჩქჷ მინოჸვე ხეთჷ, დოშულადენ დო ქეკჷნოსქჷლადე კჷნოხჷ. შხვა ნოსალეფცჷ ვეკნუჯინუნა, ისჷ ქჷდუტალებუ ჩქჷჩქჷ ტყასჷ დო მუსუ ურტინჷ.
თე ქეჸანას ჸოფე ხენწჷფე; ნოჸვე ართი ბოში, ნამუსჷთი მაჯინობა ნოჸოროფუე ძალამი. ართიშა ოჯინჷსჷ ჸოფე თე ბოშინი, ქუუძირჷ ტყასჷ ევერჩესჷ ნდემი ქაშახუნ დო ჟი კჷდჷრცჷ კოჩი ქჷმნალაჸაფუნი. გაკვირებუ ძალამი ბოშისჷ. ბრეი ხანიში უკული ხოლო ქუუძირჷ თაში. დუურთინჷ ჸუდეშა დო მუში მუმაშაქუუთხუუნჯარი, თითო კოჩიშა ქიმუჩამუ თითო კჷლი ჭა, თითო ღერი სანთელი, ქოჯღუნაფუნ დო მუკი-მუკი გოუსქუ თი აშამინდორია ტყასჷ, სოდეთჷ ხედჷ ნდემი. უნელო ქჷმუნტებაფუაფუ სანთელიშე ჭაშა დაჩხჷრი. ნდემქჷ გამწაარაგუ დო გოსოფუ ართი ჸურენი თია ნჯარიში; მუ ბორჯის ბოძორცჷ ქჷმანტუუ დაჩხჷრქჷ დო ინტჷ უკჷნუჯინუუო კოჩი, ნამუთი ნდემცჷ მუნალაჸაფუდუნი, ოჭოფესჷ ბრელი ცადაში თუდო დო მიდეჸუნესჷ დოხორეშა, ქჷმლაახუნესჷ ზოხ სადგჷმცჷ. ხენწჷფეში სქუა-ბოში ირო ალუურდჷ გატყარებული ბოშისჷ დო ოძირანდჷ მუკოქუნასჷ, ჭკუმუასჷ, ვართო გიოჭყაფუუკონი ჩქჷნობურა სქჷლადა დო რაგადი, მარა ტყარი კოჩქჷ მალას ვემიარჩქვანჷ: დიო ქჷდიგურუუ თოფურიში სირქუა კითითჷ, უკული მუკოქუნა. თაში დიდი ხანიში უკული ირიფელი ქჷდიგურუუ დო მეხვამილაფათჷ ვართი უფურაშიქჷ იჸუუ ხენწჷფეში ბოშიში.
ხენწჷფესჷ გეუდგჷდჷ ართი სადგჷმი, ნამუში კჷლა მუსუ უღუდუ დო კოცჷ ვემინააშქვანდჷ თი სადგჷმიშა. ხენწჷფეში დეეჩემუ თი სადგჷმიში მინუულა დო თხუუ მუმასჷ კჷლა, მარა მუმაქ უწუუ: "მედინჷქია", -- დო ვემეჩჷ.
ბოშიქჷ თე ანბე ნდემიში მორდილცჷ ქუუწუუ თაში. ნდემიში მორდილქჷ უწუუ:
-ნჷმჷგაშქურინე, მა თი სადგჷმცჷ გოპტახჷნქია.
მიდართესჷ დო გოტახესჷ სადგჷმინი, ქოძირესჷ: ქუმუკობუ კჷდალასჷ მოსარკაფალი ცირაში ამნახანტჷ. წეეკითხეს: "უჩა ნდემიში სქუა თე დო თე ქეჸანასჷ". ხენწჷფეში ბოშიქი თქუუ:
-ათე ცირასჷ ქიგებდინაფუდა მავა დო ოკო გეგჷნჷვოლე დო ქიბხვამილუევე.
ნდემიში მორდილქჷ თქუუ:
-სი სო დინჷქჷნი, თექჷ ბდინჷქჷ მათია.
გამეთხიისჷ ხენწჷფესჷ დიდი ჩილამურიში თუდო დო მიდართესჷ. იდესჷ, იდესჷ, იდესჷ დო შარასჷ ორზოლქჷ ქაშეელიისჷ. ქჷმაშქირენესჷ. მიოჯინესჷნი, ართი ნდემიში ჸუდეში ხოლოს ართი გოჭარვანეელი უშქური ქიგედგჷნი, ქოძირესჷ. ნდემიში მორდილქჷ ქიიხვამილუუ ტუკი, მიოგჷ უშქურცუ დო ჯინცჷქიგიოპირფოლჷ. გაგმაჯგვაჯგვუ ნდემქჷ დო მიომპოლუუ: "მიქ რე ენა ქიმინინი?" დო მოლართჷ გოსუმალირო ნდემიში მორდილიშა. იქჷ ქჷდუუხვამილუუ ჟირი კითი თოლეფცჷ დო გემწუუწურინუუ. ნდემქჷ ბრელი ეხვეწჷ, გვალო ვადოჸვილჷკონი, მარა ნდემიში მორდილქჷ შური გაჸოთინაფუუ ნდემცჷ.
უკული იდესჷ, იდესჷ, იდესჷნი, ართი მინდორცჷ აკა ხვალე ფაცხა ქოძირესჷ. მინიილესჷნი, ქჷმლახეილეეს ართი დედჷბი. კითხესჷ დედჷბისჷ გარამება ქეჸანაშინი, იჩუუ ნამდა:
-უჩა ნდემცჷ ჸუნცია ურაგადუუ სქვამი ოსურისქუა, ნამუში ხვამილაფას ოცადჷნია თუდონი ქეჸანაში ხენწჷფე, ჩე ნდემი, მარავა თი ცირასჷ ჸუნცია დიდა, ნამუშა ვითოჟირი ვერსიში უხოლაშისჷ მითინი ვემიოთინანცია: მუჭო ქოძირჷნციე, დუცუ მესოფუნცია.
მიირჩქილუუ ხენწჷფეში სქუაქჷ გარმოებანი, იმენდიქჷ მეუდინჷ ცირაში ხვამილაფაშიქჷ, მარა ნდემიში მორდილქჷ გური გაუმარგჷ. დედჷბიქჷ ქჷგეეგჷ, თე ჟირი ბოშეფი ცირაში ოხვამილაფუშა მიიშესჷნი, დაბეჯითებულო ქეეჩუუ გარამეება:
-თი ცირაში დიდასია დიდი ძუძუეფი კარიშა გეუძჷნია ობჟინაფუშა დო მითი ქიმიოტყობანციე დო ქააჯუნუუნი თი ძუძუეფციე, თინა იჸინია ღირსი თი ცირაში ქომონჯობაშია.
ქჷგეეგონჷ ენანი, ხენწჷფეში სქუას აშქურინჷ, მარა ნდემიში მორდილქჷ დააიმენდჷ. ნდემიში მორდილქჷ მიდეჸუნუ ხენწჷფეში სქუა დო ხოხიხოხით ცირაში დიდაში ძუძუეფიში ხოლოსჷ ქჷდაახუნუუ. ბოშიქჷ ქააჯუნუნი, გაალჷ ცირაში დიდაქჷ. ქოძირჷ ჟირი ალმასიჯგურა ბოშეფინი, გუუკვირდჷ. უკული ცირაში დიდაქ უწუუ ხენწიფეში სქუასჷ:
-სი ვაგათხილეენია ჩქიმი ცირასქუავა.
მარა ჟირიხოლო ბოშეფქჷ ძალამი აიმენდესჷ, უმოსო ნდემიში მორდილქჷ მიიღჷ დუდიშა ცირაში თხილუა. უჩა ნდემქჷ ქჷმორთჷ მუში დოხორეშა დო გარამოება გეეგჷნი, ახიოლჷ ძალამქჷ, მეეწონჷ სინჯაქჷ დო თქუუ: "ჩქიმი ოსურისქუას ოსქვებური ქომოჯქჷ ქააშუა", მარა ბოშეფი ძალამი გაათხილჷ ცირაში ხვამილაფაშენი. იჸუუ დიარაქჷ, ნამუქჷ გეეთუუ ართი მარაში უკული. ხენწჷფეშისქუა-ბოშიქჷ უწუუ ნდემიში მორდილცჷ:
-მეუ დოხორეშა დო ჩქიმი მუმასჷ ქახარია ჩქიმი გარამოებავა, დაანწყიითჷ დიარავა, დჷმართითჷ სი უკულია დო ართო მიიბშათია.
ნდემიში მორდილქჷ მიდართჷ დოხორეშა. ცირა დო მუში ქომონჯი ართი ონჯუასჷ კჷლე მუკოდვალირო გილეეშესჷნი, ქჷმაასხაპუ თუდონი; ქეჸანაში ხენწჷფე, ჩე ნდემქჷ, დო ე ბოშისჷ ცირა ეშე გეიოსქირუუ. ბოშიქჷ დოღურუ, მარა მუ ქიმინჷკო? ენა ქუუწუუ ცირაში დიდასჷ. ცირაში დიდაქჷ:
-მა ვაგიწიავო, თენა თაში ქჷგაღოლენიე!
ოკოხალე გეთხოზაფუდესჷკო, მარა ე ბოშისჷ მუთა აქიმინედჷ დო ოკო უჯინესჷკონი ნდემიში მორდილიში მუულასჷ. მაჟირა დღასჷ ნდემიში მორდილქჷ ქჷმორთჷ დო ამბეგეეგჷნი, ეწყინჷ ძალამქჷ, მარა მუქიმინჷკო? ოკო გიაჸუნესჷკონი, გამაათხოზჷ ნდემიში ნაულერცჷ. იდჷ გვალა, იდჷ რზენი, იდჷ გვალა, იდჷ რზენი დო ნაულერი ნდემიში, ნამუთი ობირგულეშა მენწყუნდუნი, ქიმიიღჷ ართი ქუაშა. გამნართინუუ ქუანი, ქოძირჷ უქვინჯე რუმე ნთხორილი. ანწი ოკო ინორთასჷ, მარა მუთუ? დოღობუ გჷძღჷბია, გაკოშაყარუუ ნდემეფი, ნამუნეფითი თექჷ ოხორანდესჷნი, მინი ნებითჷ დო მინი ნძალითჷ, ვარიაქჷ აკა ნდემცჷთი ვაგააბედინჷ, ფერი შიშიოძირჷ. გაკოშაყარუუ მუთი თოკეფი ქოძჷდჷ ი ქეჸანას, ართი-მაჟირასჷ ქიმუსქუუ დო ბოლოსჷ გჷძღჷბია ქჷგმაკვეტელუუ. ქინოდოხოდჷ გჷძღჷბიასჷ დო დუუჩინჷ ნდემეფცჷ მუში დორთაშა უყარულესჷკონი დო უჯინესჷკონი თოკიში დოვალაფასჷ. ნდემეფქჷ შარა დუუხვამესჷ დო გუუტეესჷ გიმე ნდემიში მორდილი. გჷძღჷბიაქ იდჷ, იდჷ, იდჷ, იდჷ გიმე დო კჷლაჸოთჷ თდონი ქეჸანაშა. ნდემიში მორდილქჷ გჷძღჷბია დოჩუუ. იდჷ, იდჷ, იდჷნი, ართი მინდორცჷ ართი მეღეჯე ქოძირჷ: კითხჷ ამბე მეღეჯესჷნი, იქ უწუუ:
-თე ქეჸანაში ხენწჷფექჷ ჟინი ქეჸანაში ცირა ქიხვამილუუა დო ასე დიარა უღუნია ძალამი, ნამუქჷ ოკო ვეეთუასიე ართი წანასჷ დო მისჷთი ოკონი, მეურცუ, ჭკუმუნცუ დო შუნცუ.
მიდართჷ ნდემიში მორდილქჷ დიარაშა, მუკოქუნალი მეღეჯესჷ გუუთჷრუუ დო ქჷმკიქუნუ. იდჷ, იდჷ დო დიარაშა ქიმერთჷნი, ქოძირჷ ქეჸანაში კოჩი. ე ცირა ქჷმკოხე ხენწჷფეწკჷმა. ე ბოშიქჷ მიდაჩოჩჷ თუდო-თუდო ჩიჩიეცალო დო თე ხენწჷფეში, ცირაში თუდო ძვალიში ხვატუა დააჭყჷ. ფერი ბორჯისჷ ხენწჷფექჷ ქოძირ:
-მორთი აშო, სარალო! -- უწუუ თე ჩიჩიესჷ ხენწჷფეექჷ დო ქიმეჩჷ ხეს ოჭკუმალი.
ცირაქ ინაჯინჷ ბოშისჷნი, ქიიჩინჷ. შეეხვეწჷ ხენწჷფესჷ:
-თაქი ქჷდახუნეევა ჩქიმიწკჷმავა დო ოჭკუმალი ქოფჩათია.
ხენწჷფექჷ "ჯგირია" თქუუ დო ჩიჩიე ქჷდახუნესჷ ტაბაკისჷ.
დიისერჷნი, ხენწჷფექჷ ცირასჷ:
-მოლაზოჯია, -- უწუუ, -- ონჯირუუ ოთახჷშა. ცირაქ უწუუ:
-მა დიორდე ვაბრძღეექია ლაჸაფიში ჯინათია დო უკული გახოლუუქია.
-"ჯგირი", -- თქუუ ხენწჷფექჷ დო მიდართჷ.
ცირა დო ბოშიქჷ ხვალე ქჷდოსქჷდესჷ. შუმილი კათა მუნეფიში დუდიშო ილაჸაფუდესჷ დო ენეფი მუნეფიში ამბეესჷ სხუნუნდესჷ, მუჭო უჯგუ დო მუჭო ვარია. ბოშიქჷ დააჩემუ ცირასჷ:
-სი ქეშემიტყვია, სო უდგჷნიევე შური ხენწჷფეჷ.
-ჯგირია, -- უწუუ ცირაქჷ დო მიდართჷ.
იმი სერცჷ ხენწჷფესჷ მოუფერუუ ძალამი დო კითხჷ:
-მა ოკო მიჩქჷდასიე, სქანი შური მიშა გიბარჷნიე.
-- მუშო გოკონია? -- უწუუ ხენწჷფექჷ.
ცირაქჷ ვემეჩჷ დორთა დო ქიმკაახვილჷ: "იშენი დო იშენი ქომიწიია". ცირაქჷ მიიწყინჷ ძალამი. ხენწჷფექჷ, სოლე გური გამკურთინუკონი, თიშენი დააღორჷ დო უწუუ:
ჩქიმი შური ფინაშა მიბარჷნია.
ცირაქჷ გური ქუუჩჷ, მარა გარძახჷ ოჭოფუ ფინა დო ლაჸაფი დუუჭყჷ, ხეშე ვადეთხინუანდჷ. ხენწჷფექ იფირქჷ: ვაი! სარალოსჷ დასურო ქჷნობჸოროფექია. ეცოდჷ ცირაქჷ, ჯოღორცჷ ულაჸაფუდუ ტყურათჷნი, დო "ქიმიოტეევა!" უწუუ. ცირაქჷ ვაჩეერცხჷ ხენწჷფესჷ:
-სია ტყურა დჷმაღორია, ვარა, სქანი შური ინუდგჷნი, ფერცჷ მუჭო ჩევერცხავა მა?
ცირაქჷ მოწყინდჷ. კჷნი ხენწჷფექჷ უწუუ ცირასჷ:
-ჩქიმი შური ობარჷნია თე დო თე ტყას ირემცჷ:
ცირაქჷ ძალამი მიიეფუ.
ოჭუმარესჷ ხენწჷფე დო ცირაქჷ დიარაშა მიდართესჷ. ცირაქჷ ნდემიში მორდილი ქოძირჷ დიარასჷ დო ქეეჩუუ, მუთი ხენწჷფექ უწუუნი. -- "ჯგირია", თქუუ ბოშიქჷ დო მიდართჷ ტყაშა.
იდჷ, იდჷ, იდჷ ნი, ქოძირჷ ირემი. ქაჸოთჷ ქაშქვილი დო ქასაგანი; ქჷდაანთხჷ ირემქჷნი, გამულასხაპუ ყურდგელქჷ; ქაჸოთჷ ბოშიქჷ ქაშქვილი დო ქასაგანი ყურდგელცჷ; ქჷდაანთხჷ ყურდგელქჷნი, გამულასხაპუ კოლოფიაქჷ; გამაათხოზჷ კოლოფიასჷ, ოჭოფუ კოლოფია. ბოშიქჷ გაანჯჷ დო ქჷმლახვილუუ ჟირი ბაზეფი. ჟირიხოლოსჷ თოლი გამწუუჸოთჷ დო მოლეჸუნუ. მოლართჷ ბოშიქჷ ხენწჷფეში დოხორეშა, გეეგჷ ამბე, ნამდა ხენწჷფესჷ თოლეფც აჭუნია დო ლეხი რენია. მინილჷ დოხორეშა დო ხენწჷფეს უწუუ:
-სქანი შური მა მიკებუნია ხესჷ.
ხენწჷფექჷ ქიმეხვადჷ საქჷმესჷ, ეხვეწჷ ბოშისჷ: "ვაპილავა", მარა ბოშიქჷ დააშქვიდუუ ბაზეფი. ხენწჷფექჷ დოღურუ. ბოში დო ცირაქჷ გაგჷმიიჸუნესჷ რაშეფი, ქუუსქვეეს ურემცჷ, დოხარგეესჷ ხენწჷფეში საქონელი დო ორქოთჷ, ქიგედოხოდესჷ დო მიდართესჷ.
იდესჷ, იდესჷ, იდესჷ დო ქიმერთესჷ თი არდგილიშა, სოდეთჷ ბოშიქჷ გიმართჷ ჟინი ქეჸანაშე. ბოშიქჷ ქოძირჷ გჷძღჷბია, ნამუთჷ აშო გიმართჷნი. დუვალუუ თოკისჷ, ქააჩინებაფუუ მუში მუულა ჟინ დემეფცჷ, ნამუნეფი ვაგაბედჷდესჷ თოკიში დუდიშიწკჷმაიანი ჩარცხასჷ. ქინოდვესჷ საქონელი გჷძღჷბიასჷ დო გუუტეს ეშე; კინი დიირთჷ გჷძღჷბიაქჷნი, ქინოდოხოდჷ ცირაქჷ, მიდართჷ; დიირთჷ კინი გჷძღჷბიაქჷ, ქინოდოხოდჷ ბოშიქჷ. ჭიჭე ურკჷდჷ ეშულანი, თეში ქიმიოწვათესჷ ნდემეფქჷ თოკი დო ბოშიქჷ მიდართჷ გიმე, მარა ქჷმურაჸუუ ართი დიხასჷ ქუასჷ ხე დო გაჩენდჷ. ნდემეფქჷ ცირა მიდეჸუნესჷ დო მონინალეთჷ ქჷდეკჷნესჷ, საქონელი გიირთესჷ. ბოშიქჷ ხოხჷ, ხოხჷ დო გეშახოხჷ ჟინი ქეჸანაშა, გაკოშაყარუუ არძო ნდემეფი დო არძოსჷ ჸუჯი ქიმიოკვათჷ, საქონელი მუში დო ცირა მოლეჸუნუ.
იდჷ, იდჷ დო ქჷმორთჷ ცირაში ჸუდეშა. ცირაში დიდაქჷ ქოძირჷ სქუანი, გეეხარჷ დო ბოშისჷ მუუწონუუ ძალამი. ხენწჷფეში სქუა დო ცირაქჷ გაადურჯოლეს ართიანცჷ, იჸუუ დიდი ხარებაქჷ. ბრელი ხანქჷ მიდართჷნი ხენწჷფეში სქუა, ცირა დო ბოშიქჷ მიდართესჷ ხენწჷფეში დოხორეშა. იდესჷ, იდესჷ, იდესჷნი, ქაშაასერესჷ დო შარასჷ ქჷდიიბარგეს ართი დიდი ჯასი თუდო. არძოქჷ ქჷდირულეესჷ, მარა ნდემიში მორდილცჷ ვალურდუ. თე დროსჷ ქჷმორთესჷ სუმი ანგილოზეფქჷ, ქიგმადოხოდესჷ ჯასჷ დო ართიქჷ თქუუ:
-მუ გუურჩქინათია თე თუდო გჷთოჯანუნანი თე კათასია?
მაჟირაქჷ თქუუ:
-ჭუმანი მახარებელი ქიმუურცუ ხენწჷფეში დოხორეშავე, ხენწჷფექჷ მააზადასია მუში სქუაშო ართი ორქოში თოფი დო ნოსაშო აბრეშუმიში კაბა; მუჭო ბოშიხჷ თოფი ქიგნაბუნუანიე, თოფიქჷ გოლასია დო ბოში დოჸვილასია; მუჭო კაბა ცირახჷ ქჷმკაქუნანიე, დაჩხჷრქჷ ქჷმანტუახია დო ცირაქჷ დიიჭვასია, მასუმაქჷ თქუუ:
-თენა მიქჷთი გააცხადასიე, ქუა რგილო გინიირთასია.
ნდემიში მორდილქჷ მოწყინდჷ ძალამი დო ნარღიხჷ ქინაალჷ, მუჭო მუკატუუკონი ცირა დო ბოში. ოჭუმარესჷ გეედჷრთხჷ დო მიდართესჷ. იდესჷ, იდესჷ დო დოხორეშა მიანჭესჷნი, თქვიიხჷ: "მახარებელქჷ ნამუქჷ იჸუასია?"
ნდემიში მორდილქჷ "მა მიდუურქია" თქუუ დო მიდართჷ.
ხენწჷფეში ჩილი დო ხენწჷფექჷ გეეხარესჷ. ხენწჷფექ ორქოში თოფი გაგმიიღჷ, ხენწჷფეში ჩილქჷ კაბა აბრეშუმიში. ბოშიქჷ თქუუ: "ე საჩუქარი ვარენია საჭირო, ინეფცჷ ღალა ბრელი უღუნია დო ენა მონინალე ძღაბი დო ბოშისჷ ქააჩუქითია".
ქჷმორთესჷ ცირაქჷ, ბოშიქჷ. იჸუუ ჯუნა დო დიდი მხიარულებაქჷ. თოფი ქიგნააბუნუესჷ მონინალე ბოშისჷნი, გოლჷ თოფიქჷ დო ინა დოჸვილჷ; კაბა ქჷმკაქუნესჷ მონინალე ძღაბისჷნი, ქჷმაანტუუ დაჩხჷრქჷ ძღაბისჷ დო დიიჭუ. ირი კოჩქჷ გაჩენდჷ დო გუუკვირდჷ. უკული იჸუუ დიარაქჷ. უკული სქჷდჷდესჷ ბედნიერო ხენწჷფე დო მუში ოჯახი.
ხენწჷფეში სქუაში ჩილცჷ ბოშიქჷ ქჷდეებადჷ. ართიშა ხენწჷფეში სქუასჷ ლურდუ. ნდემიში მორდილქჷ ლეკური გელანწყჷ დო გაჯინედჷ. უნელო ბოშისჷ გააკურცხინჷ დო მიოღვარუუ: "მუშენი პილჷნდი მა სია?" ნდემიში მორდილქჷ უფუჩუ, უხჷნტკჷ, მარა ბოშიქჷ ვადეეჯერჷ დო ხენწჷფეს ქუწუუ. არძოქ ეჭვი ქიმეჩჷ ნდემიში მორდილცჷ: ცირაშა გური აფუდუა. ნდემიში მორდილქჷ გაკოშაყარუუ არძო დო თქუუ:
-მა ვამირჩქილეთია-და, იშენი თქვანი ღორონცჷ ქუურჩქილითია!
ირი კოჩქჷ შურიში ქალი მეჭყვიდჷ. ნდემიში მორდილქჷ დააჭყჷ ჩიება დო ირიფელი ქიიჩუუ, მუთი ქოღოლამუნ დო მუთი უქიმინჷ ხენწჷფეში სქუაშენი. უკული თქუუ:
-ანგილოზენქჷ თაში თქვიისჷ, თაში თქვიისჷ დო დოჭყეესია, მიქჷთი თენა გააცხა-დასიე.
ათე რაგადი გაათუუ ბოშიქჷ დო ქუა რგილო გინიირთჷ. ხენწჷფეში სქუაქჷ დოღურუ, მარა მუ ქიმინჷკო? უკული ვაგუჯინუუნი, თეში გეგნაალჷ: "ოკო ქეშიბტყვავე, მუ ოსქილიდუანციე ნდემიში მორდილცჷ".
იდჷ, იდჷ, იდჷნი, ართი ვეს ართი ფაცხა ქოძირჷ. მინიილჷ ფაცხაშანი, დედჷბი ქჷმლახვილუუ. დედჷბიქჷ:
-მუნერო მორთი სქუა, აქია?
ბოშიქჷ დუდი დო ბოლო შქასჷ მუში ამბე ქიიჩუუ. დედჷბიქჷ:
-იში წამალი მა მიჩქჷ ძალამი, მარა ჭე ძვირი ქორენია. ქიიშია ოში ნდემიში ჸუჯი დო სქანი ქომოლისქუა დოხაშია, იდომუშამო ქუასჷ ქიგნაახურჩინეევა დო დოსქჷდჷნია.
ბოშის ახიოლჷ ძალამქჷ დო დოხორეშა ქჷმორჷთნი, დოხაშჷ ნდემიში ჸუჯეფი დო მუში სქუა. ქუასჷ ქიგნაახურჩინუუ ჟი. ნდემიში მორდილქჷ გეეთელჷ, ხენწჷფეში სქუაში ქომოლისქუაქჷთი გეეთელჷ.
იჸუუ ხარებაქჷ.
გოღა თექი ვორდი, ამუდღა აშო ქჷმობრთი. სუმი უშქური, სუმი ბერწული ღორონთქჷ ნჷმჷმოგილასესჷ თქვანი ხეში მოწიული.