არდა
შხვეფქ დითირუ, მუ თირანსუ არდას,
ჯარგვალიას სერეფს ტახუნს ფართას,
ჸათე ტყა დო ჸათე დიხაშჷ ნარდას,
მუჭო შევლებ ჩალაია ვარდას?!
ოჭმარესუ ფსუალეფი არდუ,
მარა არდაშჷ ჯარგვალშა ვემნართუ,
მეფუნს ქიანა წყარიშორო მართუ,
არდაქ ირო მუშჷ ჯარგვალსუ დართას.
შვერთიშჷ თოკის დოგიროხუნს არდა,
თოფურიშფერჷ ხოჯეფს ეკოხართანს,
ცხვინშა გუმუძჷ დამორჩილიშჷ ხანდა,
არდაქ ირო მუშჷ ჯარგვალსუ დართას.
ტყას ორტყაფუთ გეკოკირუნს ხინკის,
ტყათ ოდეფი ქიგიბანჭუ მინქი,
მარაშჷ ოღალს ნთირუნს არდაშჷ ყვინგი,
არდაქ ირო მუშჷ ჯარგვალსუ დართას.
ყებურიშჷ დუს გეკოჭოფუნს ნორცხვას,
არდას ზესქვიშჷ მებირაფა ორძღანს,
არდაშჷ გური ჩილამურქუ გორჩხას,
არდაქ ირო მუშჷ ჯარგვალსუ დართას.
ქარღადისუ ქიმიოკირანს თუთუნს,
ნირსეფიშე ვეიშაჸუნე მუთუნს,
არდას გურსუ ზოთონჯეფი უთუნს,
არდაქ ირო მუშჷ ჯარგვალსუ დართას.
ვადუდვალუ მითინს არდაშჷ განთხი,
ჯიმა გაფუ გიკინდუ თუ დანთხი,
არდა, წიე, წკვარამეფი განთხი,
გეიოსქირე ოსურსქუა ქარდას!
უჸორქუ დო ვათქუალუ მორო,
ორთუმელშა მეუჩანს სქანი ორო,
არდა, ხვალე თიშო ვარექ ბორო,
ჯარგვალიაშჷ კარჷ გოუნჯი ფართას!