ანდერძი(დანიელ ფიფია)
თექი დომთხორით მუბორც დობღურენი,
პაპუ-ჩამადიში სოთი საფულე რენი,
სოთი ვეე პირეფით გოჭარჭულერი,
ჟი ცა - მურიცხით გოჭკაჭკუტელი
ონჯარუანა ართი მაჟიას,
თექ ვონთხორუდე მოკო ღურელი.
თექი, სოდეთი უჩა ზღვაშჷ ნირსი
გჷთმაქიტუნი სუკეფიშ წვანდემც,
მასქური ალჷნც ლაზუტიშ ჸვანემც,
ბინეხჷ ულუანცჷ კოთა-კონც ჯალემც.
თექ, სოდეთ ინგირჷ იძახ გურჷმულირი,
ხობი, ჭენ-წყარი ურაგად ბანემც
დო მუჭო კოჩი ხანმოჭკუმული
თეშჷ მიზაზნანი უჩა ზღვაშჷ ჭალემც.
დო დუდშულობას, მუჟამც თე წყარეფჷ
ახარენანი ნანა-ზღვა ფორონც,
გამუოხორცქჷქ მათ ოდაბადეს,
ქეშვეხვეწებუქ ჟი ცაში ღორონც
დო თიში კარცჷ მახვამერჷ ვაჸიქ
ამიორიშე ჟი ცა ღორონც
დო თიში კარცჷ მახვამერი ვაჸიქ
ამიორიშე ოჸოროფ ნანას,
ხვალე თიწკჷმა მაცქვაფურჷ ვაჸიქ,
ქუერწმუნებუქ ორთაში ჭყანას.
1923. აგვისტო. ობუჯი
- შევჩენკოსებური