ამაბორჯჷ თე ბორჯიქჷ
| მოძირაფა by [[Author:კოტე ნაჭყებია|]] |
| გაზეთი "ილორი" 27 ოქტომბერი -3 ნოემბერი 2015წ.ხ.5 |
ამაბორჯჷ თე ბორჯიქჷ
მუშობურა ბორჯალათჷ,
თოლსჷ სინთე დამითხინუ,
აკოპჭალჷ,მობჯალაგუ.
ასე შარას გილვოხექჷ,
მიკმალსჷ ფთხულე მუშჲ ფუჩხასჷ,
ღურუქჺ ვამორთ,ხვალე რცქინითჷ
მიშინანას დო მიფუჩანსჷ.
გურჲ კჷდჷრსჷ ალატყვაპუ
მუჭოთჷ მარქვალი , _ ტყვეპერია,
ჸვაშჭარათჷ დოშინაფე
ჩქიმი დუდი _ ტვეფერია.
უჩაშჲ შინსჷ იშენითჷ
ქიმეფრთი , ქიმშეჩეფერია,
ქობძირჲ,თურმე ვამქიმინჷ
საონჯღორო ეფერია.
ჩქიმი დუდი ლანძღასჷ დო
ირკოჩჲ აკომკათუასჷ,
წჷრი თირი ქიგემრღვასჷ
გოწონერი ნათუასჷ.
ათეშენი წჷმჲ ჯინათჷ
ავაბორჯე ბორჯალასჷ,
მუდგანერო მაბორჯას დო
მუდგანერო გომჭალასჷ.
ელვოჯინექჷ მელე _ გასჷ,
თიშჲ სიხოლას თოლით ბლოტკჷ,
ხოპწყარი , _ ჩქიმი ჩილამური,
ირო გიმე მიკილოთჷ.
ქიმშვოლჷქ თიშჲ პოპორსჷ,
გიპწილენი ტანშე ლეტა,
ჭყოლირჲ გური აკიბრდენი
უნდობარიშჲ გჷნაფეთა.
მელე პეულჲ ჯუმითი რე
ჩქიმი დჷმაბადე დიდა,
სოთინჲ კუჩხი ქეკიპტახენჲ
მუკმაჯინე თაქ რე მითა.
ბგინაფულე , გაქანდარჷ,
თიშჲ შურჲ ჩქიმი ელ-მოლჷსჷ,
თოლსჷ თით ვონჯა , თითჷ ბლურსუ,
სისმარსჷ თიშე ევოლჷქჷ.
სო ევორღვა თე წანეფი,
ქიგიბრგუე ონჭეთჷნი,
უჩა ჭკუდი დოფთირუე
ირო ჩქჷჩჷ ონწეთჷნი.
ჩქიმჲ აღუში ხურთქინითჷ
გობზინდენი თიშჲ სიხოლა,
ჩქიმჲ ოგვაჯეს ქიმკი პჭკადე
დოსქილადირი მაჭირხოლო.
ჩქიმჲ ჯუმითი , ჩქიმი რსხინი,
ჩქიმჲ შურიში პეული რე,
თაქ ვორექჷ ჯვეშჲ ნერჩიშე
ხელახალო ეულირი.
ელვოჯინექჷ მელე _ გასჷ,
თიშჲ სიხოლას თოლით ბლოტკჷ,
ხოპწყარი , _ ჩქიმი ჩილამური,
იშენჲ გიმე მიკილოთჷ.