აკოწყორილი

From Wikisource
Jump to navigation Jump to search
please do not remove empty parameters (see the template documentation).
აკოწყორილი
by ზაალ ჯალაღონია

ჸათე სისმარი აწმავალუ თოლიშ მონიას,
როხო გებჯანუ მასქურჲ ვარ დო, მონკა ბორია.
ჸათე გორჩქინუს ვანოღვენო სოთინ დორია,
გურ მინძგერც ასე, გევორექჷ აკოკირილი.
სერდაშ ბორზალით გური მაფუ აკონწკირილი.
თუთას ქუვართი დო ცაშ იშო აკიპწყორია.

მოჟვეპურელი მუნაფა რე ჭვათო მოწენცჷ,
ოწმახ ვორდი დო თაქჷ კინე თოლც გინოჲლუა,
ართო ნოთელი უკმელა რე, ირო გორწყექჷ,
სკანი ძირაფა ქობჭარაფუ, სკანი გოლუა.

ოჭირხოლარო ნინა მუჩი, ქიანას მობდვი,
მუთ მიძირჷ დო მუთ ჩქიმო რდჷ ალაგორილი,
დიო აკოფშქვი, მოკოდ-ვამკოდჷ კინ ჩხორო გოფრთი,
გურიშ ლერსეფით გუვოტიბე დიხა ჭორილი.

ასე ოხვამეს ჩქიმი შური მოულამუანც,
ენკერიასჷ მუწოჭველე, მუწონკირელე,
ტანც ცირაცალო პეული რე მოუნარუანც,
ჸათე თელარა ირიათონც მუკორცვილი რე.

პირშალჲ პიორი დინმოჯინე, თოლჲ ვადომთხინუ
შურით შუშელი, გორჩქინაშე ქაწუდირთინი.
პოპორჲ ტობა რე ასე წოხლე აწმარხინუნი,
მოჟენთელერი ცა დო დიხა აკოდირთუნი.

ჟვატა ჩანარი გეგნუხანტუ ათე ხიმფორცჷ,
კოდმე ტკილიე გვალო რინა, ართო კაპანი.
ვაუჩქ ბორიას მუშენ ირქენცჷ, მუშენ იბორსუ,
ცაშ ორტყაფუსჷ აკა ართშა ქიმმოღაფანი.

ტანტალერიე ანი-განი, აკორჩხილიე,
არძა საგანი გურც მებგუ დო ზისხირჲ იზირუ,
ცა დოდირაკე დო გაჩქვენუ, ითამ შქვილიე,
შქვიდელჲ ჸოროფას გურიშ იშო სოთა მიძირუ.

შურიშ ნთქალუა ქუდმაცალი, ვამიკეკუა,
ჭიჭე ქაქინი ქიდიბჭყინი, თენათ ქოძირი.
აფხას გერდელი ცა მომიღუ, ქიმიფქექუა,
ა, ჩქიმ ლერსი დო ჩილამური თიშე დოწირი.

ტან მახუაფუ, ტანიშ იშო ხოლო ტანიე,
გილაბგორუნა სისმარეფი აბორჯებული,
ასა-გასა რე, მუხური რე, ხოლო განიე
დო თიშჲ იშოთჷ მიარე რე მიკოტებული.