သိမ်မျိုးစုံမဟာဋီကာ/သိမ်သမုတ်ခန်း နည်းမျိုးစုံ
| ←၁၀၂။ ကံ ၇-ပါး ဝစနတ္ထ အရကောက်ပြခန်း | သိမ်မျိုးစုံမဟာဋီကာကျမ်း by ၁၀၃။ သိမ်သမုတ်ခန်း နည်းမျိုးစုံ |
၁၀၄။ သိမ်နိမိတ်ကြားပုံ→ |
အကြိမ်ကြိမ် အထပ်ထပ် အနီးအပါးရှိ မိမိသမဂ္ဂသံဃာများနှင့် နုတ်ပြီးနောက် သီမာဗန္ဓနခန်းကို ဆောင်ရွက်လိုသောပညာရှိသူတော်ကောင်းများသည် ကျမ်းဂန်လည်းတတ် အာစရိယ လဒ္ဓေါပဒေသလည်း ကောင်းမွန်စွာရ၊ ဝိနည်းဓိုရ်ပုဂ္ဂိုလ်ကျော်ကြီးများ ပြုလုပ်သည်ကို ကိုယ်တိုင်တွေဖူး ကြုံဖူးသော ဆရာတော်ကြီးများကို ရွေးချယ်၍ ပင့်ဖိတ်ရာ၏။ ပင့်ဖိတ်သော သံဃာများလည်း အထက်ပါ အင်္ဂါများနှင့် ပြည့်စုံသောပုဂ္ဂိုလ်ကျော်ကြီးတွေ အများပါစေရာ၏။ တစ်ကျိပ်ငါး နှစ်ကျိပ်အောက် မနည်းပင့်ဖိတ်ရ၏။ ထိုပုဂ္ဂိုလ်ကျော်ကြီးတွေ ရောက်သောအခါလည်း ထိုသိမ်နုတ်ပြီးနေရာကို အနည်းဆုံး ကိုးကြိမ်၊ ဆယ်ကြိမ်အောက်မနည်း ထပ်၍နုတ်ရာ၏။ ထိုသို့ နုတ်ပြီးမှ ဒိသာစာရိကဘိက္ခူနံ နိဿဉ္စာရသမယေ -ဟု အဋ္ဌကထာ လာတိုင်း ညဉ့် (ဂ) နာရီ (၉) နာရီတွင် ရဟန်းတို့ အသွား အလာနည်းပါး၍ သမုတ်ခြင်း ကောင်းလှ၏။
ဝိသုံဂါမရပြီးသော်လည်း နယ်ကိုစောင့်၍ သမုတ်လျှင် သာ၍ ကောင်း၏။
ထိုဆရာတော်ကြီးတို့သည် ဝိသုံဂါမ မြေစားရပြီးသော နေရာ၌ မိမိမရောက်မီ သံဃာလေးငါးခြောက်ပါး ဟတ္ထပါသ် မစွန့်ပဲ ထိုင်စေပြီးလျှင် အနီးအနားရှိ ဂိလာန ကိစ္စပသုတ စသော ကာယသာမဂ္ဂီ ပေးခွင့်မရသော ရဟန်းတော်များထံ ဆန္ဒတောင်းလွှတ်ခြင်း၊ နယ်နိမိတ်စောင့် ပုဂ္ဂိုလ်များကိုလွှတ်ခြင်း စသောကိစ္စတို့ကို ပြုပြီးနောက် ဆန္ဒဆောင်ယူသော ရဟန်းများပြန်လာချိန်ကို ထောက်ဆ၍ ထိုသီမာမဏ္ဍလသို့ ကြွသွားရာ၏။
ဤသို့ သံဃာစည်းဝေးပြီးမှ ဆန္ဒကိုယူစေခြင်းသည် ဂရုဖြစ်ပေ သတည်း။ ဆန္ဒဟူသည် သံဃာကံနှင့်လည်း ဆိုင်သတည်း။ သို့သော် ဆန္ဒယူသွားသောအခါ သိမ်သမုတ်မည့်နေရာ၌ ဟတ္ထပါသ်ကိုမစွန့်ပဲ အနည်းဆုံး လေးပါး ငါးပါး ရှိရာ၏။ တစ်ပါးပုဂ္ဂိုလ်ကြွလာ၍ လေးပါး ငါးပါး ဟတ္ထပါသ်တွင် ရှိမှပင် ကြွင်းသောရဟန်းတို့ ကြွသွားခွင့်ရသည်ကို သတိပြုရာ၏။ ထိုနောင်ဆန္ဒဆောင်ယူသွားသော ရဟန်းတို့ ပြန်ရောက်လျှင် ထိုဆန္ဒကို ထိုသီမာမဏ္ဍလတွင် ရှိနေသော သံဃာထံ ပြောဆိုရာ၏။ တပါးသော ပုဂ္ဂိုလ်တိုထံ မပြောဆိုရာ။ ထိုဆန္ဒယူသော ရဟန်းတို့က သံဃာ့ထံ ဆန္ဒမပြောကြားမီ တပါးသောပုဂ္ဂိုလ်ထံ မသွားရာ။
ယင်းသို့ ဆန္ဒဆောင်ယူခြင်း၊ သံဃာစည်းဝေးခြင်း၊ ကိစ္စပြီးပြီး နောက် သိမ်သမုတ်လုကာနီးလျှင် ယခုအခါ သိမ်သမုတ်တော့မည်ကိုသိရန်၊ အားစိုက်၍ နယ်စောင့်ရန်၊ သိမ်တွင်းနေ ရဟန်းတို့ကြားရန် အမြောက် သေနတ် ကြေးစည် ခေါင်းလောင်း ကုလားတက် ဗျောက် စသည် တစ်ခုခုကို အမှတ်ပြုထားရင်းအတိုင်း ပစ်ဖောက် တီးခေါက်ရ၏။