သိမ်မျိုးစုံမဟာဋီကာ/ပဋိညာဉ် ပြဆိုခန်း
| ←၂။ အဘိယာစက ပြဆိုခန်း | သိမ်မျိုးစုံမဟာဋီကာကျမ်း by ၃။ ပဋိညာဉ် ပြဆိုခန်း |
၄။ သိမ်အပြားကို ပြဆိုခန်း→ |
သိမ်မျိုးစုံမဟာဋီကာကျမ်း[edit]
နမော တဿ ဘဂဝတော အရဟတော သမ္မာသမ္ဗုဒ္ဓဿ။
ပဋိညာဥ် ပြဆိုခန်း[edit]
ပုသိမ်နယ် ငါးသိုင်းချောင်း ဆရာတော်ဘုရားကြီး အများတို့ လျှောက်လွှာအရသက်သက်ကို ဖြေဆိုခဲ့သော် ဒုတိယပါရာဇိကပါဠိတော်လာ ရာဇာဟူသော သရုပ်ပြမင်း (၇ ) ဦးကိုထုတ်၍ ယင်းမင်း (၇)ဦးတို့တွင်
ယမ္ပိ ဧကသ္မိံယေဝ ဂါမခေတ္တေ ဧကံ ပဒေသံ "အယံ
ဝိသုံ ဂါမော ဟောတူ" တိ ပရိစ္ဆိန္ဒိတွာ ရာဇာ ကဿစိ
ဒေတိ -
ဟူသောမဟာဝါ အဋ္ဌကထာဝါကျ၌ ရာဇာအရ ပါဠိ အဋ္ဌကထာ ဋီကာ ဂန္ထန္တရစုံ အာစရိယဝါဒစုံပြ၍ မည်သည့်မင်းသာ ယူသင့်သောမင်းဖြစ်သည်၊ မည်သည့်မင်း မယူထိုက်ဟု ခိုင်ခိုင်မြဲမြဲ ဖြေဆိုလျှင်ပင် ပြီးစီးသကဲ့သို့ထင်၏။ သို့သော်လည်း ၎င်းသိမ်အရာမည်သည် ဤနေရာတစ်ခုသာ ခဲယဉ်းသည်မဟုတ်၊ အရာရာမှာပင် ခဲယဉ်းကြလေသည်။ သာသနာတော်၏ မူလ,ဘူတ အခြေအမြစ်လည်း ဖြစ်သည်။ ရှေးရှေးကပင် သူတဖုံ,ငါတခြား ဝါဒလည်းများပြားခဲ့သည်။ ပါဠိ,အဋ္ဌကထာ,ဋီကာ,ဂန္ထန္တရစုံ အာစရိယဝါဒစုံ သာဓက ခိုင်ခိုင်မြဲမြဲပြ၍ သူတပါးတို့ မလှုပ်ချောက်ချားနိုင်အောင် အကျယ်တဝင့် ရေးသားအပ်သော ဝိနိစ္ဆယလည်း မရှိသေးသလောက်ရှိသည်။ သိမ်အရာမသေချာ၍ အမှန်အကန်မသိပဲ ရမ်းကာသမ်းကာသမုတ်ကြ ဝတ်ကြေတမ်းကြေလုပ်ကြလျှင် သာသနာတော် အမြန်ပျက်စီးရာသည်။ မြန်မာဘုရင် ဘွဲ့တံဆိပ်တော်ရ အင်္ဂလိပ်ဘုရင် ဘွဲ့တံဆိပ်တော်ရ တကယ်တန်း ကျမ်းဂန်တတ် ဆရာတော်ကြီးတို့၏ အာစရိယလဒ္ဓေါပဒေသကို မမီလိုက်ကြသဖြင့် မရလိုက်ကြ မတွေ့လိုက်ရ မဖူးလိုက်ရ စာမသင်ကြားလိုက်ရသော ပုဂ္ဂိုလ်ပေါင်းလည်း အများရှိခဲ့သည်။ ထိုသို့သောအကြောင်းများကြောင့် ပေသလ ဘိက္ခု ဖာသုဝိဟာရတ္ထ၊ သဒ္ဓမ္မဋ္ဌိတတ္ထ၊ ဝိနယာနုဂ္ဂဟတ္ထ စသောအကျိုးငှာ အမြစ်အခြေများစွာနှင့်တကွ သိမ်နှင့် ပြုပုံ,သမုတ်ပုံ စသည်တို့ပါသော သိမ်မျိုးစုံမဟာဋီကာကျမ်းကို ရေးသားဖော်ပြလိုက်ပေအံ့သတည်း။