ကရကဋ်ရာသီ ဝါဆိုလဘွဲ့ လူးတား

From Wikisource
Jump to navigation Jump to search
ကရကဋ်ရာသီ ဝါဆိုလဘွဲ့ လူးတား  (1781) 
by ဦးယာ

အာပေါဓာတ်အိမ်[1]၊ ထက်တိမ်မိုးက[2]
သွန်းချသဲခန့် ရွဲခန့်လေ[3]။ ။
စက်နေနှစ်သိန်း၊ ကိန်းခန်းသင်္ချာ၊
တသိန်းသာ၍၊ စွန်းပါငါးသောင်း၊
ချင့်ပေါင်းအညီ၊ ရာသီစရ[4]
ဝါဆိုလဟု၊ မှိုင်းပြရီမှောင်၊
လျှပ်ရောင်ပြိုးပြက်၊ မည်းနက်ဖြူပြာ၊
ခိုးမိလ္လာနှင့်၊ (စိမ်းဝါနီပြော့၊
ရွာလှတော့သား၊ ကိုင်းဖော့လိုကြူ၊
ရေသယ်ယူ၍၊ သဲပူမြစ်ကမ်း၊
ပြည့်တင်းကျမ်းနှင့်[5])။ ။

လွမ်း၍မယ့်ဆီ[6]၊ သည်ရာသီတွင်၊
နာရီနေ့ကို၊ သုံးဆယ်ဆိုရှင့်၊
စွန်းပိုခြောက်ခု၊ ကြွင်းစုနာရီ၊
ညဉ့်ဘို့စီသော်၊ မညီအရေး၊
နှစ်ဆယ့်လေးတည့်၊ ပျံ့မွှေးဝတ်ဆံ၊
ရိုးတန်မြရွက်၊ ပုန်းညက်ရွှေလှော်၊
မွှေးပေါင်းဖျော်၍၊ တောင်တော်မြင့်ဖျား၊
မြင်းမိုရ်ခါးက၊ ပတ္တမြားဗိမာန်၊
ပြုပ္ပါသန်နှင့်၊ ယုဂန္ဓိုရ်မှ၊
လှည့်သွားကြသော်[7]၊ နောက်ကမကွာ၊
ဗျိုင်းတာရာဝယ်၊ ညီလာခံသ[8]
ရောင်ထွန်းပလျက်၊ ဖုသျှနက္ခတ်၊
ဖလ်နေနတ်နှင့်၊ လှည့်ပတ်ညီစွာ၊
သွားသောခါတွင်၊ မမြင်တဝါး၊
အသုဉ်းညား၍၊ ပန်းများလှိုင်ကြူ၊
မဉ္ဇူရွှေခက်၊ ပုန်းညက်ကြိုင်သင်း၊
ပဉ္ဇင်းတော်ပွဲ၊ သဲသဲအုပ်အော်၊
ရွှင်ပျော်လှည့်ပတ်၊ ကရကဋ်နှင့်၊
ပြာလတ်ကြန်ညီ[9]၊ ကုမ္မာရီတို့၊
ဆိတ်စီနုသေး၊ ငယ်ကွေးလေးသား[10]
မြသွေးစိမ်းလဲ့၊ နာဂသွဲ့သို့၊
ရွှေမှဲ့မစွန်း၊ သံချိုခွန်းနှင့်၊
ဆောင်းယွန်းခန်းလယ်၊ မောင်နှင့်မယ်သည်။ ။

ယှက်သွယ်ဇာကြိုးလိမ်သို့လေ[11]။ ။
လယ်ဗွေတည့်စက်ခန်း မှီအုံးဆန်း။ ။
ဆွတ်ဖျန်းလေသွေးယူ။ ။
မဉ္ဇူတည့်ကြိုင်သင်းရနံ့ကျင်း။ ။
ဝါတွင်းသည့်အခါ။ ။
အာကာက တိမ်ပန်း ချိပ်ရောင်သန်း[12]။ ။

မှတ်ချက်[edit]

  1. အာပေါဓာတ်ချိန် [ဟ]
  2. ထိန်ထိန်မိုးက [ဘ]
  3. သွန်းချပဇ္ဇုန် မြူးခုန်လေ [မ] [ဟ]
  4. ရာသီဇယ [ဟ]
  5. စိမ်းဝါနီပြောင် ရွာသွန်းဆောင်၍၊ သဲသောင်ရေသွယ်၊ ရှယ်၍မြစ်ကမ်း၊ ပြည့်တင်းကျမ်းနှင့် [မ] [ဟ] (ဤနေရာတွင် အတန်ငယ် ကွဲပြားသည်။)
  6. လွမ်း၍ဘယ်ဆီ [ဘ] လွမ်း၍မအီ [မ] [ဟ]
  7. ယုဂန်ထိပ်ဖျား လှည့်သွားကြသော် [ဘ] ယုဂန္ဓိုရ်ခါး လှည့်လည်သွားသော် [မ] [ဟ]
  8. ညီလာကုန်ကြ [မ] [ဟ]
  9. ရွှင်ပျော်လှည့်ပတ်၊ (ကရကဋ်နှင့်၊) ပြာလတ်ကြန်ညီ [မ] နှင့် [ဟ] မူတွင် ကွင်းပိုဒ်စကားများမပါ
  10. ငယ်ကလေးက [မ] ငယ်လှသေးရှင့် [ဟ]
  11. ရှုဘွယ်ဇာကြိုးလိမ်သို့လေး [မ] [ဟ]
  12. အာကာတည့်တိမ်ပန်း လျှပ်ရောင်သန်း [ဘ] အာသာတည့်တိမ်ပန်း ရှုတိုင်းဆန်း [မ] [ဟ]
  • မူရင်း - ရေနံချောင်း တွင်းစားကြီးဦးဘိုးဂုဏ် လက်ရေးမူ
  • [ဟ] - ဟံသာဝတီပုံနှိပ်တိုက်၊ ရန်ကုန်မြို့၊ ၁၉၀၇-ခုနှစ်ထုတ် စာအုပ်မူ
  • [မ] - မြန်မာစာညွန့်ပေါင်းကျမ်း၊ တတိယတွဲမူ
  • [ဘ] - ဘားနတ်ပိဋကတ်တိုက်ပေမူ၊ ရန်ကုန်မြို့


This work was published before January 1, 1929, and is in the public domain worldwide because the author died at least 100 years ago.