ཪིག་པ་རང་གྲོལ་ཆེན་པོ་ཐམས་ཅད་འགྲོལ་བའི་རྒྱུད

4 Self-liberated Primordial Awareness ཪིག་པ་རང་གྲོལ་ཆེན་པོ་ཐམས་ཅད་འགྲོལ་བའི་རྒྱུད (Tib. rigpa rangdrol, རིག་པ་རང་གྲོལ་ , rig pa rang grol) 自解脫一切大自在密續

༄༡
༡
རིག་པ་རང་གྲོལ་ཆེན་པོ་ཐམས་ཅད་འགྲོལ་བའི་རྒྱུད་ཅེས་བྱ་བ་བཞུགས
༢
རྒྱ་གར་སྐད་དུ
བོད་སྐད་དུ
རིག་པ་རང་གྲོལ་ཆེན་པོ་ཐམས་ཅད་འགྲོལ་བའི་རྒྱུད་ཅེས་བྱ་བ
བཅོམ་ལྡན་འདས་སྟོབས་ཀྱིས་རྣམ་པར་བསྒྱིངས་པ་ལ་ཕྱག་འཚལ་ལོ
འདི་སྐད་བདག་གིས་བསྟན་པའི་དུས་གཅིག་ན
རིགས་ཀྱི་བུ་རྣམས་ལེགས་པར་དགེ་བའི་སེམས་ཀྱིས་ཉོན་ཅིག
རིག་པའི་སྒྲོན་མ་འབར་བ་ངས་བསྟན་ནས
འཁོར་རྣམས་ཀྱི་རྒྱུད་འགྲོལ་བར་བྱའོ
༣
སེམས་ཀྱི་རྣམ་རྟོག་གིས་གཞན་དུ་མ་ཡེངས་ཤིག
མ་རིག་པའི་མཐའ་རྣམ་པ་བཞི་ཕྲོ་ལ་ཅིག
དེ་སྐད་ཅེས་མཐའ་རྣམ་པ་བཞི་དང་བྲལ་བའི་རིག་པས་ཡུལ་ཆོས་ཀྱི་ཕོ་བྲང་ལ་གཟིགས་ནས
རིག་པ་རྣམ་པར་དག་པའི་ཀློང་འོད་ཀྱི་ཡུལ་སྐུའི་མཁའ
གསུང་གི་ཟེར
ཐུགས་ཀྱི་དཀྱིལ
ཆོས་ཉིད་ཀྱི་གནས
ཤེས་རབ་ཀྱི་རྒྱན
འོག་མིན་གྱི་གནས
ཕོ་བྲང་རྣམ་པར་དག་པ་ནས་དེ་སྐད་ཅེས་གསུངས་སོ
གསུང་ངོ
གསུང་བར་འགྱུར་རོ
འདི་སྐད་བདག་གིས་ཐོས་པའི་དུས་གཅིག་ན
༤
སྤྲུལ་པ་སྐུའི་ཞིང་ཁམས་རྣམ་པར་བཀོད་པ
དུར་ཁྲོད་མེ་རི་འབར་བ་ཞེས་བྱ་བར
བཅོམ་ལྡན་འདས་གཞོན་ནུ་དཔའ་བོ་སྟོབས་ལྡན་ཆེན་པོ་ཞེས་བྱ་བས
འཁོར་ནི་ལྷ་དང
མི་དང
ལྷ་མ་ཡིན་དང
བྱང་ཆུབ་སེམས་དཔའ་དཔག་ཏུ་མེད་པ་འདུས་ནས
བསྟན་པ་བཀའི་བགྲོ་བ་མཛད་པས
དེ་ནས་འཇམ་དཔལ་གཞོན་ནུར་གྱུར་པས་འདི་སྐད་ཅེས་གསོལ་ཏོ
ཀྱེ་ཀྱེ་བཅོམ་ལྡན་འདས་ཐུགས་རྗེ་ཆེན་པོ་དང་ལྡན་པ
རྒྱུད་ཆེན་པོ་ཡང་དག་པའི་འགྲོལ་ལུགས་གསུང་དུ་གསོལ
ཞེས་ཞུས་སོ
དེ་ནས་བཅོམ་ལྡན་འདས་ཀྱིས་བཀའ་སྩལ་པ
ཀྱེ་འདུས་པ་ཆེན་པོའི་ཚོགས་ཉོན་ཅིག
གསང་སྔགས་རང་བྱུང་གི་ཐབས་ཆེན་པོ་ངས་བསྟན་གྱིས་ལེགས་པར་ཉོན་ཅིག
གཏན་ཚིགས་རང་བྱུང་གིས་རྒྱུད་ཆེན་པོ་འདི་ཡིས
ཆོས་ཐམས་ཅད་ཀྱི་དོན་གསལ་བར་བྱེད་དོ
དེ་ནས་ཚིགས་སུ་བཅད་དེ་བཀའ་སྩལ་པ
ཀྱེ་མ་ཡེ་ཤེས་ཀློང་ཡངས་ཉིད
རྒྱ་ཆེ་ཀུན་གྱི་སྙིང་པོར་འདོད
རབ་ཏུ་བྲབ་པའི་ཐུགས་ཀྱི་དགོངས་པ་ཉིད
མ་ལུས་བཅུད་ཕྱུང་ཀུན་གྱི་དོན
འདི་བསྟན་རྟོག་པ་སེལ་བར་འགྱུར
༥
དབང་པོ་ཐ་མའི་གང་ཟག་རྣམས
འདི་ནས་ཤི་འཕོས་བར་དོ་ནས
ཕྱེད་སྣང་སྤྲུལ་པའི་ཞིང་ཁམས་སུ
སྐྱེས་ནས་འཁོར་བ་ཀུན་གྱི་ལམ་ལས་ཐར
དང་པོའི་མཚན་དང་གྲོལ་ལུགས་ཀྱང
གླིང་གཞི་དང་ནི་གླེང་སློང་ངོ
དང་པོ་གླེང་གཞིའི་རྒྱུ་བསྟན་ཏོ
སྟོན་པ་གནས་དང་འཁོར་དང་དུས
བསྟན་པ་དང་ནི་བཤད་ལུགས་སོ
རྒྱུད་ཆེན་རྒྱལ་པོ་འདི་ཉིད་ལ
བཤད་པའི་གནས་དང་ལོངས་སྤྱོད་རྣམས
ཕྱི་དང་ནང་དང་གསང་བ་དང
དེ་བཞིན་ཡོངས་སུ་རྫོགས་པའོ
དེ་ལྟར་ཀུན་ལ་ཤེས་པར་བྱའོ
གླེང་གཞི་བསྟན་པ་འདི་ལྟ་སྟེ
སྟོན་པའི་ཡུལ་དང་འཁོར་རྣམས་དང
ཡབ་ཀྱི་གླེང་བསླང་ཀུན་ཏུ་ཤེས
དེ་ཡང་མཚན་བཤད་འདི་ལྟ་སྟེ
མཚན་དང་ཕྱག་དང་དམ་བཅའོ
དེ་ཉིད་ཀླད་ཀྱི་ཚིག་ཏུ་བསྟན
གཞུང་ལ་བསྟན་པ་འདི་ལྟ་སྟེ
མདོ་དང་རྒྱས་པ་ཆེན་པོ་དང
ཤིན་ཏུའང་རྒྱས་པ་ཆེན་པོར་བཤད
དེ་ནི་གཞུང་གི་ཚིགས་སུ་བསྟན
མཇུག་གི་དོན་ནི་འདི་ལྟ་སྟེ
མན་ངག་དོན་གྱི་བཤད་འགྲེལ་གྱིས
༦
རྒྱུད་ཆེན་དེ་ལ་དེ་བསྟན་ནོ
གསང་སྔགས་ཀུན་གྱི་བཤད་ལུགས་ནི
དེ་བཞིན་ཀུན་ལ་ཤེས་པར་བྱའོ
ལེའུའི་མཚན་དང་དབྱེ་བ་རྣམས
རང་རང་མཚན་ལ་སྦྱར་ཏེ་བཤད
སྒྲ་དང་སྔགས་དང་སྦྱར་ལུགས་རྣམས
དེ་ཡང་བསྟན་པ་འདི་ལྟ་སྟེ
སྒྲ་ལ་རྣམ་པ་བཞི་ཡིས་བསྟན
རིང་དང་ཐུང་དང་ཆེ་བ་དང
དེ་བཞིན་སྒྲ་ཡི་སྒྲ་ཞེས་བྱའོ
གང་ནས་གང་དུ་སྒྲ་བྱུང་ཡང
འདི་ལྟར་ཀུན་ལ་ཤེས་པར་བྱ
ཡི་གེའི་སྔགས་ལ་འདི་ལྟ་སྟེ
ལོག་དང་འདོགས་དང་ཡན་ལག་རྣམས
གང་ཡིན་པ་ཡང་འདིར་བརྗོད་ཅིང
གང་ལ་གང་གིས་འཚམས་པར་འབོད
ལོག་པར་བཏགས་པ་མངོན་གྱུར་ཏེ
མ་ཉིད་སོ་ལ་བཞག་པ་སྟེ
ཡན་ལག་མྱ་ངན་འདས་ཡིག་ཡིན
འདོགས་ནི་འཁོར་བ་ཁོ་ན་འོ
དེ་བཞིན་སྔགས་དང་ཡི་གེ་རྣམས
གང་ལ་གང་འཚམས་དེ་འབོད་དེ
རྒྱུད་ལ་སོགས་པའི་བཤད་ལུགས་རྣམས
གོང་དུ་བཤད་པ་ཁོ་ནར་ཟད
ཐམས་ཅད་དེ་ཡིས་འགྲོལ་བར་འགྱུར
རང་གྲོལ་ཐབས་ཆེན་རྒྱུད་ཆེན་འདིས
ཐམས་ཅད་གྲོལ་བའི་ཤེས་རབ་མཆོག
འདི་ཡིས་བཤད་ཅིང་འདི་ཡིས་བགྲོལ
༧
རྒྱུད་རྣམས་ཀུན་གྱི་མདུད་པ་རྣམས
འདི་ཡིས་བཅིངས་པ་འགྲོལ་བའོ
དང་པོ་ལ་ཡང་འདིས་བསྟན་ཏོ
ཕྱི་ཡི་དོན་ཉིད་འདི་ལྟ་སྟེ
གནས་དང་དུས་ལ་སོགས་པ་རྣམས
གང་དུ་བསྟན་ཅིང་བཤད་པའོ
ནང་གི་དོན་ནི་འདི་ལྟ་སྟེ
དང་པོ་ལོ་རྒྱུས་དོན་བཤད་དང
རྩ་བ་དང་ནི་དགོས་ཆེད་དང
ཡི་གེ་དང་ནི་ཚིག་དོན་དང
དེ་བཞིན་ནང་དུ་བཤད་པར་བྱ
ལོ་རྒྱུས་རྣམས་པ་གསུམ་གྱིས་བསྟན
དགོངས་པས་བརྒྱུད་དང་བརྡའ་ཡིས་བརྒྱུད
སྙན་ཁུང་བརྒྱུད་པ་གསུམ་དུ་གྲགས
རྩ་བའི་དོན་ལ་འདི་ལྟ་སྟེ
གདམས་ངག་ཉི་ཤུ་རྩ་གཅིག་གིས
རིག་པའི་འཁོར་ལ་བསྟན་པར་བྱ
དགོས་ཆེད་དོན་ལ་འདི་ལྟ་སྟེ
རིག་པའི་ཡེ་ཤེས་གཏན་ལ་འབེབས
དེ་ཡི་དགོས་ཆེན་བསྟན་པ་དང
རྒྱུད་ལུང་མན་ངག་ཐམས་ཅད་ཀུན
འདི་ཡིས་ཡང་དག་འགྲོལ་བའི་ཕྱིར
དགོས་ཆེད་གཉིས་སུ་བསྟན་པའོ
ཡི་གེའི་དོན་ལ་འདི་ལྟ་སྟེ
ཐམས་ཅད་སྡུད་ཕྱིར་བསྟན་པ་དང
ཐམས་ཅད་འབྱུང་ཕྱིར་བསྟན་པའོ
བཤད་ཐབས་ཚིག་དོན་འདི་ལྟ་སྟེ
༨
ཚིག་གི་སྒོ་ནས་ཡང་དག་བཤད
ཚིག་ལ་བཤད་ལུགས་གྲངས་མང་ཡང
འོག་ནས་རྒྱས་པར་འབྱུང་བའོ
ཀླད་ཚིག་རྒྱས་པར་བསྟན་བྱའི་ཕྱིར
དྲིས་པ་དག་དང་དྲིས་ལན་རྣམས
འཁོར་དང་སྟོན་པ་ཉིད་དུ་བསྟན
དེ་ཡང་མདོ་དང་རྒྱས་པའོ
བཤད་ཐབས་ལུགས་དང་མདོ་རྒྱས་རྣམས
ཡང་དག་ཚིག་དང་འབྲེལ་པར་བཤད
དེ་ཡང་དང་པོ་སྤྲུལ་པའི་གནས
ལོ་རྒྱུས་དོན་དང་བཅས་ཏེ་བཤད
སྤྲུལ་པ་རང་བཞིན་གནས་དང་ནི
ཤིན་ཏུ་འདས་པའི་གནས་སུ་བཤད
སྤྲུལ་པའི་རྒྱུ་དང་ངེས་ཚིག་དང
བཤད་ཐབས་རིམ་པ་འདི་ལྟ་སྟེ
དང་པོ་སྤྲུལ་པའི་རྒྱུད་བསྟན་པ
ཡང་དག་སྦྱངས་དང་དོན་ཆེན་མཐོང
གང་བྲག་ཆེན་པོ་དེ་རྣམས་ཀུན
བརྟེན་ཅིང་དབུགས་ཆེན་འབྱིན་གྱུར་པས
སྤྲུལ་པའི་རྒྱུ་ཞེས་ཀུན་ཏུ་གྲགས
སྤྲུལ་པའི་ངེས་ཚིག་འདི་ལྟ་སྟེ
ཕྱེད་སྣང་ཞེས་ཀྱང་འདི་ལ་བྱ
འཁོར་བ་ལོག་ཅིང་དག་པའི་ཞིང་ལ་སྣང
ཕྱེད་སྣང་དཀྱིལ་འཁོར་ཆེན་པོར་བཤད
གང་ལ་གང་འདུལ་དེར་སྟོན་ཅིང
མཛད་པའི་ཕྲིན་ལས་མཐར་ཕྱིན་གྱུར་པ་ན
སྤྲུལ་སྐུ་ཕྱེད་སྣང་ཞེས་ཀྱང་ཀུན་ཏུ་གྲགས
༩
རིམ་པ་བཞིན་དུ་ཀུན་ཏུ་བཤད
དེ་བཞིན་ཀླད་ཀྱི་ཚིག་རྣམས་ཀུན
རྒྱས་པར་ཡང་དག་བཤད་པའོ
ཡང་དག་ཚད་མའི་དོན་དེ་ཉིད
སུས་ཀྱང་ཤེས་པ་མེད་འགྱུར་ཞིང
ཡང་ན་གཏན་ཚིགས་བཤད་མི་དགོས
ཐེག་དམན་གཞན་དག་ཟིལ་མནན་ཕྱིར
ཚིག་ཆེན་དོན་ཆེན་བསྟན་པར་བྱ
ཚིག་ལ་ཡང་དག་དོན་ཆེན་མི་རྟོག་གིས
དེ་ནི་མདོར་བསྟན་གོང་ཚིག་གོ
རྒྱུད་ཆེན་རྒྱལ་པོ་བཤད་ལུགས་རྣམས
འདི་བཞིན་ཚིག་དོན་ལེགས་པར་བསྟན
རྒྱུད་ཆེན་རྒྱལ་པོ་འདི་ཉིད་ལ
ཤློ་ཀ་ནི་བདུན་བརྒྱ་ལྔ་བཅུའོ
ཚིག་ནི་བྱེ་བ་དང་ནི་བདུན་བརྒྱ་སྟེ
ཤད་ནི་འབུམ་དང་ཉིས་བརྒྱར་བཤད
ལེའུ་བརྒྱད་ཅུ་རྩ་དྲུག་ལས
འདུན་པའི་ཚིག་དང་བཤད་པའི་ཚིག
གབ་པའི་ཚིག་དང་སྦས་པའི་ཚིག
ཤེན་ཏུ་གསང་བའི་ཚིག་རྣམས་ཀུན
རང་རང་དོན་དང་འབྲུ་ལ་སྦྱར
ཡོད་མེད་སྟོང་པའི་ཚིག་རྣམས་ཀུན
དོན་དང་བསྟུན་ཏེ་བཤད་པར་བྱ
དབུ་ཞབས་དོན་ནི་བདུན་གྱིས་བསྟན
དོན་དུ་ཤེས་དང་ལན་ཚིག་དང
འདི་ལྟར་རྒྱུད་ལས་ཤེས་པར་བྱ
༡༠
ཕྱག་འཚལ་བ་དང་མཚན་སྨོས་དང
བཤད་པར་དམ་བཅའ་ཀླད་ཀྱི་ཚིག
མདོ་དང་རྒྱས་པ་ཆེན་པོ་དང
ཤིན་ཏུ་རྒྱས་པ་ཆེན་པོ་རྣམས
གཞུང་གི་ཚིག་ཏུ་བསྟན་པའོ
མན་ངག་རྟོགས་པའི་དོན་རྣམས་དང
རྣམ་པ་བདུན་དུ་གྲགས་པ་ཡིན
དེ་ནི་དབུ་ཞབས་དོན་དུ་ཡང་དག་བསྟན
ལེའུའི་དོན་རྣམས་སོ་སོ་ཡི
མཚན་དུ་ཡང་དག་བཤད་པར་བྱ
རྒྱུད་དང་ཡེ་ཤེས་བསྟན་པའི་ཕྱིར
རྒྱུད་རྒྱལ་འདི་ཉིད་ཉོན་ཅིང་ལྟོས
གཞན་དག་མ་ཁྲོལ་བ་རྣམས་ཀྱང
འདི་ལ་བསྟན་གྱིས་འགྲོལ་བར་གྱིས
མཐར་ཕྱིན་འགྲོལ་བའི་རྒྱུད་ཆེན་འདི
བཤད་ཅིང་དགྲོལ་བས་ཡིད་ཆེས་འགྱུར
ཐེ་ཚོམ་མེད་ཅིང་རང་དོན་རྙེད
མཐའ་ཡས་གཅིག་ཏུ་སྡུད་པའི་སེམས
ང་ཡིས་དོན་ཆེན་འབྱུང་བར་བཤད
མཇུག་གི་དོན་དང་ཡན་ལག་དོན
རབ་ཏུ་བཤད་པས་ཡིད་ཆེས་འགྱུར
བསྟན་པའི་རྒྱལ་པོའི་བཤད་ལུགས་ཀྱང
གནས་སྐབས་འདི་ལྟར་བསྟན་པའོ
ལུང་ལྟར་བཤད་དང་རྒྱུད་ལྟར་བཤད
མན་ངག་ལྟ་བུར་བཤད་པ་གསུམ
འཇུག་པའི་སྒོ་ལ་ཤེས་པར་བྱ
ལུང་ལ་རྣམ་པ་གསུམ་གྱིས་བསྟན
༡༡
བསྟན་པ་འཇུག་པའི་ལུང་དང་ནི
ཤིན་ཏུ་གནས་པ་དག་གི་ལུང
གཏན་ལ་ཕབ་པའི་ལུང་དུ་བསྟན
རྒྱུད་ལ་རྣམ་པ་ལྔ་རུ་བསྟན
ཕྱི་རྒྱུད་བཤད་པའི་རྒྱུད་དག་དང
ནང་རྒྱུད་གཏན་ལ་འབེབ་རྒྱུད་དང
གསང་རྒྱུད་མན་ངག་རྒྱུད་ཆེན་དང
ཡོངས་སུ་རྫོགས་པ་ཉམས་བླངས་རྒྱུད
སྙན་ཁུང་བརྒྱུད་པའི་རྒྱུད་དུ་བསྟན
མན་ངག་ལ་ཡང་རྣམ་གསུམ་སྟེ
ཉམས་སུ་བླང་བར་བསྟན་པ་དང
གཞན་དོན་བསྒྲུབ་ཕྱིར་བསྟན་པ་དང
བྱ་བ་བཏང་ཕྱིར་མན་ངག་གོ
དེ་བཞིན་བཤད་ལུགས་རྫོགས་པར་བཤད
ཀླད་ཚིག་བསྡུས་ཏེ་བསྟན་པའོ
ཞེས་རིག་པ་རང་གྲོལ་ཆེན་པོའི་རྒྱུད་ལས
ཀླད་ཚིག་གླེང་གཞིའི་ལེའུ་སྟེ་དང་པོའོ
༄༢
དེ་ནས་འཇམ་དཔལ་གཞོན་ནུར་གྱུར་པས་འདི་སྐད་ཅེས་གསོལ་ཏོ
ཀྱེ་ཀྱེ་བཅོམ་ལྡན་ཐམས་ཅད་མཁྱེན
བདག་ཅག་མོས་པའི་འཁོར་རྣམས་ལ
ཀླད་ཚིག་རྒྱས་བསྟན་དེ་ལྟར་ན
གཞུང་གི་ཚིག་རྣམས་གསུང་དུ་གསོལ
ཞེས་ཞུས་སོ
དེ་ནས་ཡང་བཀའ་སྩལ་པ
ཀྱེ་མ་གཞོན་ནུར་གྱུར་པ་ཉོན
༡༢
ངས་བསྟན་དགྱེས་པའི་ཚུལ་གྱིས་ཉོན
སྤྱིར་ནི་རྒྱུད་ཀྱི་བཤད་ལུགས་རྣམས
གཞུང་ལ་རྣམ་པ་གསུམ་གྱིས་བསྟན
མདོར་བསྟན་རྒྱས་པར་བཤད་པ་དང
ཤིན་ཏུ་རྒྱས་པར་བསྟན་པའོ
མདོ་ལ་རང་རང་ཚིག་གིས་བསྟན
རྒྱས་པ་གཞུང་དང་མཐུན་པའོ
ཤིན་ཏུ་རྒྱས་པ་དོན་གསུམ་མ
བཤད་བྱ་རིམ་པ་རྣམ་གསུམ་འདོད
བཤད་པར་བྱ་བ་འདི་ལྟ་སྟེ
རང་གི་གྲུབ་མཐའ་བསྐྱང་བ་དང
གཞན་གྱི་གྲུབ་མཐའ་སུན་འབྱིན་ཕྱིར
བཤད་བྱ་ཞེས་ནི་དེ་ལ་བྱ
བཤད་པ་དངོས་གཞི་འདི་ལྟ་སྟེ
དེ་ཡང་ཚིག་གི་དོན་གྱིས་བསྟན
རྣམ་པ་བཅུ་དང་ཉི་ཤུས་བསྟན་པའོ
སྟག་མོའི་མཆོངས་སྟབས་ཤེས་རབ་ཀྱིས
དོན་གྱི་ས་ཆེན་བཅད་དེ་བཤད
ཁྱུང་ཆེན་མཁའ་ལྡིང་ལྟ་བུའི་བློས
དོན་གྱི་ཁོག་ནི་ཕུབ་སྟེ་བཤད
སེང་གེའི་གདངས་སྐད་ལྟ་བུའི་བློས
ཐེག་དམན་ཟིལ་གྱིས་མནན་ཏེ་བཤད
རུས་སྦལ་གོག་འགྲོས་ལྟ་བུའི་བློས
ཡི་གེའི་འབྲུ་རྣམས་ཆོམས་བར་བཤད
པོ་རོག་སོ་རྟོག་ལྟ་བུའི་བློས
གོལ་སྒྲིབ་གདར་ཤ་བཅད་དེ་བཤད
གྱད་ཀྱི་དོར་ཐབས་ལྟ་བུའི་བློས
རྒྱས་པ་དོན་ལ་སྡུས་ཏེ་བཤད
༡༣
གླང་ཆེན་ཉལ་བ་ལྟ་བུའི་བློས
ལྟ་བ་དམིགས་ལ་བཙུགས་ཏེ་བཤད
མཁའ་ལྡིང་རྒུ་མཐུན་ལྟ་བུའི་བློས
དོན་གྱི་དམིགས་ནི་བཙལ་ཏེ་བཤད
གླག་མོ་གཟན་འཛུམ་ལྟ་བུའི་བློས
དོན་ལ་ཐེ་ཚོམ་མེད་པར་བཤད
གནའ་ཕྲུལ་བྲག་འཇོགས་ལྟ་བུའི་བློས
མི་འཚམས་པ་དང་འཆམས་པར་བཤད
མུ་ཏིག་རྩར་བརྒྱུས་ལྟ་བུའི་བློས
མན་ངག་དོན་དུ་བསྡེབས་ཏེ་བཤད
དུས་ཀྱི་འབྲུག་ཆར་ལྟ་བུའི་བློས
ཕ་རོལ་སུན་རྣམས་ཕྱུང་སྟེ་བཤད
མཚན་མོའི་བུང་བ་ལྟ་བུའི་བློས
སྒོ་མོ་ཀུན་ནས་བསྡུས་ཏེ་བཤད
དཔག་བསམ་ལྗོན་ཤིང་ལྟ་བུའི་བློས
ཤིན་ཏུ་རྒྱས་པ་ཆེན་པོར་བཤད
མཁའ་གསལ་ཉི་མ་ལྟ་བུའི་བློས
ཐམས་ཅད་ཡོངས་ལ་ཁྱབ་པར་བཤད
གཏིང་གསལ་ཟླ་བ་ལྟ་བུའི་བློས
འཁོར་བ་མྱ་ངན་འདས་པར་བཤད
སེང་གེ་བཞུགས་ཚུལ་ལྟ་བུའི་བློས
བསྒོམ་པའི་དོན་དང་བསྟུན་ཏེ་བཤད
ངང་མོ་མཐུན་འགྲོས་ལྟ་བུའི་བློས
དོན་གྱི་ཁོག་ཕུབ་བསྡེབས་ཏེ་བཤད
བར་སྣང་འཇའ་ཚོན་ལྟ་བུའི་བློས
ཆོས་དབྱིངས་རྒྱན་དང་བཅས་པར་བཤད
༡༤
སྤུ་གྲི་སོ་འདེབས་ལྟ་བུའི་བློས
ལྟ་བ་ལ་ཤན་ཕྱེ་སྟེ་བཤད
མེ་ལོང་དཀྱིལ་འཁོར་ལྟ་བུའི་བློས
རྒྱུ་རྐྱེན་གཉིས་དང་བཅས་ཏེ་བཤད
བར་སྣང་གྲོལ་འགྱུ་ལྟ་བུའི་བློས
ཚིག་རེ་དོན་རེ་མྱུར་པར་བཤད
ནམ་མཁའ་སྟོང་པ་ལྟ་བུའི་བློས
རྒྱ་ཆེ་མཐར་ཐུག་མེད་པར་བཤད
ཟུག་པ་རྩ་བ་ལྟ་བུའི་བློས
རིག་པའི་དངོས་པོ་བསྟན་ཏེ་བཤད
འདྲིལ་བ་སྡེང་པོ་ལྟ་བུའི་བློས
ཆོས་རྣམས་དོན་ལ་དྲིལ་ཏེ་བཤད
གྱེས་པ་ཡལ་ག་ལྟ་བུའི་བློས
མན་ངག་དོན་གྱིས་བརྟགས་ཏེ་བཤད
རྒྱས་པ་ལོ་འདབ་ལྟ་བུའི་བློས
ཉི་ཤུ་རྩ་གཅིག་དོན་རྣམས་བཤད
གསལ་བ་མེ་ཏོག་ལྟ་བུའི་བློས
སྒྲོན་མ་རྣམ་པ་གཉིས་ལྟར་བཤད
སྨིན་པ་འབྲས་བུ་ལྟ་བུའི་བློས
འབྲས་བུ་རྒྱུར་མི་ལྡོག་པར་བཤད
དེ་ལ་སོགས་པའི་བཤད་ཐབས་རྣམས
རིམ་པ་བཞིན་དུ་ཤེས་པར་བྱ
བཤད་པའི་ཐབས་དང་འཇུག་སྒོ་རྣམས
དེ་བཞིན་ཉིད་དུ་ཤེས་པར་བྱའོ
དེ་ནས་ཡང་འཇམ་དཔལ་གྱིས་འདི་སྐད་ཅེས་གསོལ་ཏོ
ཀྱེ་ཀྱེ་སྟོན་པ་ཡེ་ཤེས་སྐུ
བཤད་པ་དངོས་ནི་ཇི་ལྟ་བུ
བཤད་བྱའི་རིམ་པ་གསུང་དུ་གསོལ
༡༥
ཞེས་ཞུས་སོ
དེ་ནས་ཡང་བཀའ་སྩལ་པ
ཀྱེ་མ་གཞོན་ནུ་སྟོབས་ལྡན་ཉིད
ངས་བསྟན་ལེགས་པར་དོན་གྱིས་ཉོན
ཡིད་ལ་སོགས་པའི་བྱ་བ་ཐོང
བཤད་བྱའི་རིམ་པ་འདི་ལྟ་སྟེ
ཡང་དག་དོན་གྱི་བཤད་བྱ་ནི
གསང་བའི་ཚིག་དང་གབ་པའི་ཚིག
སྦས་པའི་ཚིག་རྣམས་བསྟན་བྱའི་ཕྱིར
བཤད་བྱའི་རིམ་པའི་ངོ་བོ་ནི
རྒྱུད་མཚུངས་ལྡན་པའི་ངེས་ཚིག་ལས
གབ་དང་སྦས་པའི་བྱ་བ་རྣམས
མ་ལུས་བཤད་པས་བཤད་ཅེས་བྱའོ
རིམ་པའི་མདོ་ཉིད་གསལ་བར་སྟོན
དེ་ཡང་ཚིག་ཉིད་དོན་གྱིས་བསྟན
འཛིན་མེད་བཤད་པ་ཀུན་གྱི་དངོས
ཕྱི་ནང་ཀུན་གྱི་ཡེ་ཤེས་ལ
བྱས་པས་བཤད་པའི་ཚིག་རྣམས་རྙེད
བྱུང་བས་ཡེ་ཤེས་དོན་ལ་སྦྱོར
རིམ་པ་དངོས་མིན་བཤད་པར་བསྟན
བཤད་བྱའི་རིམ་པའི་མཚན་ཉིད་ནི
གང་ལ་འཛིན་པའི་བལྟ་བ་མེད
དངོས་པོ་མེད་དང་སྣང་ཕྱིར་དང
བཤད་པའི་སྒྲ་ནི་གྲགས་པས་སྟོང
བཤད་པའི་ཚིག་ནི་དོན་ལ་སྦྱོར
བཤད་པའི་དོན་ནི་དབྱིངས་སུ་སྡུད
བཤད་པའི་བལྟ་བ་ཐུག་པ་མེད
བཤད་པའི་བསྒོམ་པ་མི་གནས་ཤིང
༡༦
བཤད་པའི་རྟགས་ལ་དུས་མཚམས་མེད
བཤད་པའི་ཡུལ་ལ་དམིགས་པ་མེད
དེ་བཞིན་བཤད་པའི་རིམ་པ་རྣམས
ཀུན་ལ་དེ་བཞིན་ཤེས་པར་བྱའོ
ཨེ་མ་དོན་ཉིད་མཚོན་པའི་ཕྱིར
བཤད་པའི་རིམ་པ་བརྗོད་པའོ
བཤད་པའི་གཞུང་ལ་འདི་ལྟ་སྟེ
བལྟ་སྒོམ་སྤྱོད་པ་འབྲས་བུ་རྣམས
གནས་དང་དུས་དང་ཡང་དག་ཉིད
དོན་དམ་མཚོན་པའི་ངང་དུ་གསུངས
དབྱེ་བའི་བྱེ་བྲག་རྒྱས་པ་རྣམས
སྡོམ་བྱང་ནས་ཀྱང་དེ་བཞིན་ནོ
ཨེ་མ་གཞུང་ལུགས་རྒྱས་པར་བཤད་པ་རྣམས
དེ་ལ་དེ་ཡི་དོན་འབྱུང་བསྟན
ཡང་དག་དགོངས་པ་དགྲོལ་བའི་ཕྱིར
རང་གྲོལ་རང་གིས་དགྲོལ་བྱའི་ཕྱིར
རྒྱུད་ཀྱི་རྒྱལ་པོ་འདི་བཤད་དོ
གཞན་གྱི་བྱ་བ་རྫོགས་བྱའི་ཕྱིར
རྒྱུད་ཆེན་ལེའུ་འདི་གསུངས་སོ
གྲོལ་ལུགས་བཤད་ལུགས་རྣམ་པ་གཉིས
ཀུན་ལ་ཁྱབ་པ་ཤེས་པར་བྱ
དེ་ཡང་བསྟན་ལུགས་འདི་ལྟ་སྟེ
སྒྲ་ཡི་དོན་རྣམས་བཀྲོལ་བའི་ཕྱིར
ཚིག་གི་དོན་རྣམས་བཤད་པར་བྱ
སྒྲ་ལ་རིང་དང་ཐུང་བ་རྣམས
བསྟན་པ་འདི་ལྟར་ཡིན་པར་གསུངས
༡༧
ཨ་ལ་ཨ་བརྩེགས་རིང་བ་དང
ཀ་ལ་ཀ་བཏགས་རིང་བར་བཤད
བ་ལ་བ་བཏགས་ཆེ་བར་འབོད
རྫ་ལ་རྫ་བཏགས་འཐུག་པོར་འབོད
ཉ་ལ་ཉ་བཏགས་རིང་པོར་འབོད
ས་ལ་ས་བཏགས་ཐུང་དུར་འབོད
ཨ་ལ་ཨ་བཏགས་ཆེན་པོར་བཤད
མ་ལ་བཏགས་འཐུག་པོར་བཤད
ག་ལ་ག་བཏགས་རིང་བར་བཤད
ཚ་ལ་ཚ་བཏགས་ཐུང་དུར་བཤད
ཧ་ལ་ཧ་བཏགས་ཆེན་པོར་འབོད
ཙ་ལ་ཙ་བཏགས་མཐུག་པོར་འོང
ཁ་ཀ་ལྷ་བཏགས་རིང་པོར་བསྟན
ང་ལ་ང་བཏགས་ཐུང་དུ་ཡིན
ས་ལ་ས་བཏགས་ཆེན་པོར་འབོད
ཐ་ལ་ཐ་བཏགས་མཐུག་པོ་ཡིན
དེ་ལ་སོགས་པའི་ཡི་གེ་རྣམས
འབྲུ་སྤྱར་དོན་ལ་ཤེས་པར་བྱ
དེ་ཡང་དཀྲུགས་པ་འདི་ལྟ་སྟེ
ཀ་ལ་ཙ་བཏགས་མཐུག་པོ་ཡིན
ཐ་ལ་ན་བཏགས་མཐུག་པོར་འབོད
རྫ་ལ་ཁ་བཏགས་མཐུག་པོ་བསྟན
མ་ལ་ཤ་བཏགས་མཐུག་པོར་བཤད
ས་ལ་ཨ་བཏགས་མཐུག་པོའི་དོན
ད་ལ་ན་བཏགས་མཐུག་པོར
བཤད་དེ་རྣམས་མཐུག་པོ་དག་ཏུ་འབོད
༡༨
རིང་བའི་ཡི་གེ་འདི་ལྟ་སྟེ
ཡ་ལ་ང་བཏགས་རིང་བར་བཤད
ག་ལ་ཧ་བཏགས་རིང་བ་ཉིད་དུ་འབོད
ཐ་ལ་ད་བཏགས་རིང་བ་ཉིད་དུ་བཤད
འ་ལ་ཁ་བཏགས་རིང་བ་ཉིད་དུ་འབོད
ཏ་ལ་ན་བཏགས་རིང་བར་བཤད
ཤ་ལ་ཞ་བཏགས་རིང་བའོ
དེ་རྣམས་རིང་བ་ཉིད་དུ་བཤད
འདི་རྣམས་ཆེ་བར་འབོད་པའོ
ས་ལ་ལ་བཏགས་ཆེ་བ་ཉིད
མ་ལ་དུ་བཏགས་ཆེ་བའོ
ཀ་ལ་སྐྲེ་བཏགས་ཆེ་བར་འབོད
ཧ་ལ་ཧ་བཏགས་ཆེ་བ་ཉིད་དུ་འབོད
ཉ་ལ་ར་བཏགས་ཆེ་པའོ
ང་ལ་དེ་བཏགས་ཆེ་བའོ
ཡ་ལ་ལ་བཏགས་ཆེ་བ་ཉིད
སྨ་ལ་ཁྲུ་བཏགས་ཆེ་བ་ཉིད
དེ་རྣམས་ཆེ་བའི་ཡི་གེར་བཤད
ཐུང་བའི་དོན་ནི་འདི་ལྟ་སྟེ
ད་ལ་ཡ་བཏགས་ཐུང་དུར་འབོད
ག་ལ་ང་བཏགས་ཐུང་དུར་བཤད
ད་ལ་ང་བཏགས་ཐུང་དུར་འབོད
ཀ་ལ་ཞ་བཏགས་ཐུང་བར་བཤད
རྫ་ལ་ད་བཏགས་ཐུང་བའོ
མ་ལ་ནི་བཏགས་ཐུང་བར་བཤད
ཁ་ལ་ཨུ་བཏགས་ཐུང་བའོ
ས་ལ་ཏ་བཏགས་ཐུང་བ་ཉིད
ད་ལ་ན་བཏགས་ཐུང་བ་དག་ཏུ་བཤད
༡༩
དེ་ལ་ཡན་ལག་གང་བྱུང་བ
དེད་པ་མཐུན་པར་འབོད་པའོ
དེ་བཞིན་གཞུང་གི་ཚིག་རྣམས་ཀུན
མདོ་དང་རྒྱས་པ་ཆེན་པོར་གསུངས
ཡང་དག་གཏན་ལ་འབེབས་པའི་རྒྱུད
ཀུན་གྱི་བཤད་ལུགས་མ་ནོར་བར
མཐོང་ཚད་རྟོགས་ཚད་རྣམས་སུ་བཤད
གོམས་པའི་རྒྱུད་ལ་ཤེས་རིག་གསལ
དེ་ཡང་རྒྱུད་ཀྱི་གཏན་ཚིགས་སོ
རྒྱུད་ཆེན་ངེས་ཚིག་གཏན་ཚིགས་དང
དང་པོ་ངེས་ཚིག་རྒྱུ་བསྟན་ཏེ
བྱ་བ་རྒྱུ་ཡི་ངེས་ཚིག་དང
བྱེད་པ་རྐྱེན་གྱི་ངེས་ཚིག་གོ
བྱ་བ་རྒྱུ་ཡི་ངེས་ཚིག་ནི
ཡན་ལག་བརྒྱད་དང་ལྡན་ཕྱིར་རྒྱུད
བྱེད་པ་རྐྱེན་གྱི་ངེས་ཚིག་ནི
རྒྱལ་བ་དགོངས་པས་བརྒྱུད་ཕྱིར་རྒྱུད
ཡང་ན་སྙན་ཁུང་བརྒྱུད་པའམ
དེ་ཡི་ཕྱིར་ན་རྒྱུད་དུ་གསུངས
དེ་ནི་གཞུང་ལུགས་རྒྱས་པའོ
ཞེས་རིག་པ་རང་གྲོལ་ཆེན་པོའི་རྒྱུད་ལས
གཞུང་དོན་བསྡུས་པའི་ལེའུ་སྟེ་གཉིས་པའོ
༄༣
དེ་ནས་ཡང་གསང་བའི་བདག་པོས་འདི་སྐད་གསོལ་ཏོ
ཀྱེ་ཀྱེ་བཅོམ་ལྡན་རྟོགས་ལྡན་དོན
གཞུང་གི་ཚིག་དོན་དེ་ལྟར་ན
༢༠
མཇུག་གི་ཚིག་དོན་གསུང་དུ་གསོལ
ཞེས་ཞུས་སོ
དེ་ནས་ཡང་བཀའ་སྩལ་བ
ཀྱེ་གསང་བའི་བདག་པོ་རྡོ་རྗེ་འཛིན
ལེགས་པར་བརྟན་པའི་ཡིད་བཅས་ནས
བསམ་པ་བརྟན་པོས་བཟུང་བར་གྱིས
ཆོས་ལ་སོགས་པའི་རྟོགས་པ་རྣམས
མི་འཇིགས་དད་པས་འཇུག་པའི་ཕྱིར
ཡང་དག་དོན་གྱི་ལུང་འདི་བཤད
འཇིགས་བཅས་ཡིད་རྣམས་སྤངས་ལ་ཉོན
ཀྱེ་མ་གསང་བདག་རྡོ་རྗེ་འཛིན
མཚན་མ་སྤང་བའི་གཞུང་ལུགས་ནི
གོང་དུ་བཤད་ཅིང་བཀྲོལ་བའོ
མཇུག་གི་དོན་བསྟན་འདི་ལྟ་སྟེ
མན་ངག་དོན་དང་གཏན་ཚིགས་དོན
མཐའ་སྡུད་རྣམ་པ་གསུམ་དང་ནི
རྫོགས་པའི་ཆོས་རྣམས་ཀུན་ཏུ་གྲགས
མཐའ་སྡུད་རྣམ་གསུམ་འདི་ལྟ་སྟེ
གཏི་མུག་རྨོངས་པའི་མདུད་པ་དང
ཞེ་སྡང་མངོན་སྣང་མདུད་པ་དང
འདོད་ཆགས་ལམ་གྱི་མདུད་པ་དང
རྣམ་པ་གསུམ་དུ་ཀུན་ཏུ་གྲགས
དེ་རྣམས་གསལ་ཕྱིར་གདམས་ངག་བསྟན
དེ་ཡང་ཉི་ཤུ་རྩ་གཅིག་གིས
བློ་ཡི་ཐེ་ཚོམ་བསལ་བྱའི་ཕྱིར
མནོར་ལེགས་པར་བསྟན་པར་བྱ
༢༡
བསྟན་པའི་ཡུལ་ནི་སེམས་ཅན་ནོ
བསྟན་པའི་རྒྱུ་ཉིད་ཀུན་ལ་ཁྱབ
དེ་ཡང་བསྟན་ལུགས་འདི་ལྟ་སྟེ
ཆོས་ཉིད་ཡུལ་ངོ་ཕར་སྤྲད་པས
དོན་གྱི་སྙིང་པོ་ཚུར་ལ་འཕྲོད
རང་གི་གདངས་ལ་ཕར་སྤྲད་པས
ཡེ་ཤེས་སྣང་བ་ཚུར་ལ་མཐོང
འབྱུང་བའི་གདངས་ལ་ཕར་སྤྲད་པས
དག་པའི་ཞིང་ཁམས་ཚུར་ལ་མཐོང
ནམ་མཁའི་ངང་ལ་ཕར་སྤྲད་པས
སྒྲོན་མའི་སྙིང་པོ་ཚུར་ལ་མཐོང
དབང་པོའི་ཡུལ་ལ་ཕར་སྤྲད་པས
བློ་ཡི་ཆོས་རྣམས་རང་སར་གྲོལ
མཐོང་བའི་ཡུལ་ལ་ཕར་སྤྲད་པས
གོམས་པའི་འབྲས་བུ་ཚུལ་ལ་མཐོང
འཛིན་པའི་ཡུལ་ལ་ཕར་སྤྲད་པས
འཛིན་མེད་རང་སྣང་ངོ་བོ་མཐོང
དག་པའི་ཡུལ་ལ་ཕར་སྤྲད་པས
རྣམ་དག་ཞིང་ཁམས་ལྟུག་པར་མཐོང
རང་སྣང་ཡུལ་ལ་ཕར་སྤྲད་པས
སྐྱེ་མེད་རང་སྣང་ངོ་བོ་མཐོང
གསང་སྔགས་རྒྱུད་ལ་ཕར་སྤྲད་པས
འགག་མེད་སྣང་བ་མཐོང་བའོ
ཡུལ་གྱི་སྙིང་པོ་ལྟོས་པའི་ཆོས
བྱ་རྩོལ་བྲལ་ཞིང་ཀ་ནས་དག
སྙིང་པོ་བགྲོད་མེད་ངོ་བོ་ཉིད
ལམ་ལ་འཛིན་པའི་གོལ་ས་མེད
༢༢
ཡོད་མེད་སྟོང་པའི་ཆོས་རྣམས་ལ
བྱ་རྒྱུའི་དྲི་མ་མེད་པའོ
ཀུན་སྡུད་ཡུལ་རྣམས་སྤང་བ་ལ
མཚན་མར་འཛིན་པའི་གོལ་ས་མེད
དེ་ལྟར་གདམས་ངག་ཐེབས་པ་དང
གོམས་པའི་སྟོབས་ཀྱིས་ཉམས་ལེན་བྱ
གདམས་པའི་ཡུལ་དང་བསྟན་ཐབས་ཀྱང
འདི་ལྟར་ཀུན་ལ་ཤེས་པར་བྱ
དང་པོ་དཔེ་ཡེ་དཀྱིལ་འཁོར་གྱིས
དོན་གྱི་སྙིང་པོ་བསྟན་པར་བྱ
དེ་ནས་རྟགས་ཀྱི་ངོ་སྤྲོད་ཀྱིས
ཡིད་ཆེས་བསྐྱེད་ཅིང་གཏན་ལ་དབབ
དེ་ནས་དོན་གྱི་ངོ་སྤྲོད་ཀྱིས
ཉམས་སུ་བླང་བའི་རིམ་པ་བྱ
ཉི་མའི་དཀྱིལ་འཁོར་ངོ་སྤྲོད་ཀྱིས
སྐུ་གསུམ་གཏན་ལ་དབབ་པར་བྱ
ཆུ་ཡི་ཟླ་བའི་ངོ་སྤྲོད་ཀྱིས
བར་དོ་དང་པོ་ངོས་གཟུང་བྱ
ནམ་མཁའ་སྤྲིན་མེད་ངོ་སྤྲོད་ཀྱིས
ཆོས་ཀྱི་དབྱིངས་ལ་ངོས་གཟུང་བྱ
བར་སྣང་འཇའ་ཚོན་ངོ་སྤྲོད་ཀྱིས
མུ་ཁྱུད་ར་བའི་ངོས་གཟུང་བྱ
རྒྱ་མཚོ་དངས་བའི་ངོ་སྤྲོད་ཀྱིས
ཡེ་ཤེས་སྣང་བཞིའི་ངོས་གཟུང་བྱ
མེ་ལོང་དཀྱིལ་འཁོར་ངོ་སྤྲོད་ཀྱེས
ཡེ་ཤེས་བཞི་རྣམས་ངོས་གཟུང་བྱ
མར་མེའི་དཀྱིལ་འཁོར་དངས་པ་ཡིས
༢༣
རྟོག་མེད་གསལ་བ་ངོས་གཟུང་བྱ
མན་ཤེས་དཀྱིལ་འཁོར་ལྟ་བུ་ཡིས
དྲི་མེད་ཀ་དག་ངོས་གཟུང་བྱ
གཞོན་ནུ་བུམ་པའི་ངོ་སྤྲོད་ཀྱིས
ཀ་དག་ཆོས་སྐུ་ངོས་གཟུང་བྱ
གཟུགས་སྐུ་ཉམས་ཀྱི་ངོ་སྤྲོད་ཀྱིས
ཚོམ་བུའི་སྣང་བ་ངོས་གཟུང་བྱ
དཀྱིལ་འཁོར་མེ་ལོང་ངོ་སྤྲོད་ཀྱིས
ཞིང་ཁམས་གཉིས་པ་ངོས་གཟུང་བྱ
སྣང་བ་བུ་གའི་ངོ་སྤྲོད་ཀྱིས
ཐུགས་ཀའི་ཟིར་ཐག་ངོས་གཟུང་བྱ
ནམ་མཁའ་སྤྲིན་བཅས་ངོ་སྤྲོད་ཀྱིས
མ་རིག་རིག་པ་ངོས་གཟུང་བྱ
སྐུ་ཕྱེད་བསྟན་པའི་ངོ་སྤྲོད་ཀྱིས
སེམས་དཔའི་ཆོས་རྣམས་ངོས་གཟུང་བྱ
འཁར་གཞོང་བཅུད་ཀྱི་ངོ་སྤྲོད་ཀྱིས
ཡེ་ཤེས་ངོ་བོ་ངོས་གཟུང་བྱ
དཔའི་བོ་སྟོབས་ལྡན་ངོ་སྤྲོད་ཀྱིས
ཁྲོ་བོའི་ཞིང་ཁམས་ངོས་གཟུང་བྱ
འདྲ་འབག་ཕྱེད་སྐུའི་ངོ་སྤྲོད་ཀྱིས
རང་གི་གནས་ལུགས་ངོས་གཟུང་བྱ
སྒྲོན་མའི་བཞག་ཐབས་ཆེན་པོ་ཡིས
སྣང་བའི་འཆར་ལུགས་ངོས་གཟུང་བྱའོ
དེ་བཞིན་ཉི་ཤུ་རྩ་གཅིག་གིས
རང་རང་ཡེ་ཤེས་གཏན་ལ་དབབ
དེས་ནི་གཞུང་དོན་རྒྱས་པར་བསྟན
ཨེ་མ་རྫོགས་ལུགས་འདི་ལྟ་སྟེ
༢༤
གཞུང་ལ་རྫོགས་དང་ཀླད་ལ་རྫོགས
སྟོང་པ་རྫོགས་དང་ཡེ་ཤེས་རྫོགས
འོད་ལྔ་རྫོགས་དང་སྐུ་ལྔ་རྫོགས
མཐར་ཕྱིན་པ་ལ་དེ་བཞིན་གཤེགས
དབང་བསྐུར་དཀྱིལ་འཁོར་རྫོགས་ནས་ནི
གདམས་ངག་རྒྱས་པ་གདབ་པར་བྱ
དམ་ཚིག་ལ་ནི་ཅི་བཞིན་གནས
གསང་སྔགས་ཐབས་ལྡན་དག་ལ་ཡང
མ་ནོར་ལུང་ཆེན་བསྟན་པར་བྱ
གསང་སྔགས་གནད་ཀྱི་བཅུད་ཕྱུང་བའི
རབ་ཏུ་གསང་བའི་ཡེ་ཤེས་མཆོག
དགོངས་པ་ཚད་མེད་ཡུལ་གཞལ་བའི
ཡེ་ཤེས་གསང་བའི་བདུད་རྩི་འདི
ཀུན་གྱིས་གོ་བར་དཀའ་བའི་དོན
དགོངས་པ་ཡང་དག་ཆེན་པོར་འདོད
དཀྱིལ་འཁོར་གསང་བ་ཐམས་ཅད་ཀྱི
ལྷ་ཉིད་འདི་ལ་རྫོགས་པའོ
ཀླད་ཀྱི་ཚིག་ལ་གཞུང་དོན་རྫོགས
མཇུག་གི་ཚིག་ལ་ཀླད་དོན་རྫོགས
རྒྱུད་ཆེན་རྒྱལ་པོ་འདི་ཉིད་ལ
སྦས་པ་གསུམ་དང་གསང་བ་གསུམ
མན་ངག་དྲུག་ལྡན་དཀྱིལ་འཁོར་ནི
གཞུང་གི་ཁོངས་ནས་ཤེས་པར་བྱའོ
དེ་བཞིན་རྒྱུད་ཀྱི་རྒྱལ་པོ་ལས
འཕན་དང་འཁྲུལ་རྣམས་མེད་པར་གསུངས
ཀླད་དང་གཞུང་ལ་སོགས་པ་རྣམས
༢༥
རབ་ཏུ་གསལ་བ་ཉིད་ཡིན་པས
གཞན་དུ་མ་བསྟན་འདི་ཉིད་དོ
རྒྱུད་ཀྱི་རྒྱལ་པོ་བཤད་ཐབས་ནི
དོན་གསུམ་གྱིས་ནི་རྒྱས་པར་བསྟན
གཞུང་དོན་མན་ངག་རྒྱས་བསྟན་དང
དེ་བཞིན་སོ་སོའི་རིམ་པ་རྣམས
རབ་ཏུ་བཤད་ཅིང་བཀྲོལ་བའོ
རྒྱུད་འདི་བཤད་པའི་ཐབས་ལས་ཀྱང
རྒྱུད་ཀྱི་ཆེ་བ་བསྟན་པ་དང
རྒྱུད་ཀྱི་ལྡང་ཚད་མཚོན་དཔེ་དང
རྒྱུད་ཀྱི་གཏན་ཚིགས་བསྟན་པའོ
རབ་ཏུ་དབྱེ་བ་རྒྱས་པ་དང
གདམས་ངག་གསང་བ་རྒྱས་པ་དང
རྟོགས་ལྡན་ཐེག་པས་རྒྱས་པའོ
བསྡུ་བ་རྣམ་པ་གསུམ་གྱིས་བསྟན
ཐེག་པའི་དོན་བཀྲོལ་བསྡུ་བ་དང
བཞག་ཐབས་ཆེན་པོར་བསྡུ་བ་དང
རིག་པའི་ངང་དུ་བསྡུ་བའོ
དེ་ཡང་རྒྱས་བསྟན་འདི་ལྟ་སྟེ
དཔེར་ན་ནམ་མཁའ་སྟོང་པ་ཡི
ངང་དུ་ཉི་ཟླ་སྡུད་པ་བཞིན
ཆོས་ཀྱི་ཕོ་བྲང་ཡངས་པ་རུ
སྣ་ཚོགས་ཡེ་ཤེས་ཆེན་པོར་སྡུད
ཡང་དག་དོན་གྱི་ཀློང་ཡངས་སུ
རིག་པ་སྟོང་པའི་ཡེ་ཤེས་སྡུད
མཚན་མ་བྲལ་བའི་ནམ་མཁའ་ལས
སྒྲོན་མ་ཡེ་ཤེས་ངོ་བོ་སྡུད
༢༦
རྣམ་དག་དབྱིངས་ཀྱི་སྒྲོན་མ་རུ
ཕྱི་ནང་གསང་བའི་ཆོས་རྣམས་སྡུད
རྒྱས་པར་བསྟན་པ་དེ་བཞིན་ནོ
ཞུས་པའི་ཚིག་དང་བཀའ་སྩལ་པ
ཞུས་པའི་ཚིག་ལ་དོན་གསུམ་སྟེ
བདག་དོན་བསྡུས་ཏེ་ཞུས་པ་དང
གཞན་དོན་རྒྱས་པར་ཞུས་པ་དང
གཉིས་ཀའི་དོན་དུ་ཞུས་པའོ
བཀའ་སྩལ་པ་ལ་དོན་བདུན་བསྟན
གཉེན་པོའི་དོན་ལ་དགོངས་པ་དང
བསྡུ་བའི་དོན་ལ་དགོངས་པའོ
དྲང་བའི་དོན་ལ་བཀའ་སྩལ་དང
ལྡེམ་པོར་དགོངས་པ་བསྟན་པ་དང
རིམ་པའི་ཁྱད་པར་བཀའ་སྩལ་དང
ལམ་གྱི་བྱད་དུ་བསྟན་ཅིང་དགོངས
བློ་དང་བསྟུན་ཏེ་བཀའ་སྩལ་དང
ཞུས་པ་ཉིད་དང་ཞུས་ལན་དང
མདོ་དང་རྒྱས་པར་བསྟན་པ་སྟེ
དེ་རྣམས་དོན་བཀྲོལ་འདི་ལྟ་སྟེ
གཉེན་པོའི་དོན་དུ་དགོངས་པ་ནི
ཉོན་མོངས་སྟོང་ཕྲག་བརྒྱད་ཅུ་ལ
ཆོས་ཀྱི་སྒོ་ཡང་དེ་ཙམ་མོ
བསམ་གྱིས་མི་ཁྱབ་བརྗོད་མི་ལངས
གཞལ་དུ་མེད་པར་གསུངས་པའོ
བསྡུ་བའི་དོན་ཉིད་འདི་ལྟ་སྟེ
ཉོན་མོངས་སྟོང་ཕྲག་བརྒྱད་ཅུ་ཡང
རྩ་བ་རྣམ་པ་གསུམ་དུ་འདུས
བརྒྱད་ཁྲི་བཞི་སྟོང་སྒོ་མོ་ཡང
༢༧
བསྡུ་ན་རྣམ་པ་གསུམ་དུ་བཤད
དེ་ཡང་བསྡུ་ན་འདི་ལྟ་སྟེ
ཉོན་མོངས་སྟོང་ཕྲག་བརྒྱད་ཅུ་ཡང
རྩ་བ་མ་རིག་ཉིད་ལ་འདུས
དེ་བཞིན་ཆོས་ཀྱི་སྒོ་མོ་ཡང
རང་རིག་གཅིག་པུ་ཉིད་ལ་འདུས
དེ་ནི་བསྡུ་བའི་དོན་དུ་གསུངས
དྲང་བའི་དོན་ནི་འདི་ལྟ་སྟེ
འཁོར་བའི་སྐྱོན་རྣམས་བརྗོད་པ་དང
མྱ་ངན་འདས་པའི་ཡོན་ཏན་བརྗོད་པའོ
དྲང་ནས་ཁང་ཀྱིས་ཞུགས་པར་བྱ་བའི་ཕྱིར
བློ་དམན་རྣམས་ཀྱི་དོན་དུ་གསུངས
དེ་ནི་དྲང་བའི་དོན་དུ་བསྟན
ལྡེམ་པོའི་དགོངས་པ་འདི་ལྟ་སྟེ
བློ་དམན་རྣམས་ལ་གསང་བའི་ཕྱིར
གཅུས་དང་གབ་སྟེ་བསྟན་པ་དང
གཞན་དག་ཟིལ་གྱིས་མནན་པའི་ཕྱིར
དགོངས་པ་ལྡེམ་པོར་བསྟན་པའོ
ཚིག་ལ་ལྡེམ་དང་དོན་ལ་དྲང
ལྡེམ་དགོངས་མན་ངག་ཚིག་ཏི་བསྟན
རིམ་པའི་ཁྱད་ཀྱི་དགོངས་པ་ནི
རྫོགས་ཆེན་དགོངས་པའི་ངར་སྐང་ངོ
ལམ་གྱི་དུས་ན་དགོངས་པ་ནི
གསུམ་མམ་མན་ངག་ཉི་ཤུ་གཅིག
བློ་དང་བསྟུན་ཏེ་དགོངས་པ་ནི
ཐེག་པ་ཉི་ཤུ་རྩ་གཅིག་གོ
ངེས་པའི་ཚིག་ཆོད་བཀའ་སྩལ་ནི
གསང་བའི་ཐེག་པ་ཉིད་ཀྱི་དོན
༢༨
བསམ་གྱིས་མི་ཁྱབ་དོན་རྣམས་ཀྱང
གསང་བའི་ཐེག་པ་འདི་ཉིད་དོ
དགོངས་པའི་ཐེག་པ་གྲངས་མང་ཡང
འདི་ཉིད་དོན་ནི་རྟོགས་པ་མེད
དེ་ཕྱིར་ཐེག་ཆེན་གསལ་བར་གྲགས
འདི་ནི་རབ་ཏུ་གསང་ཞིང་སྤྱད་པར་བྱ
གསང་སྔགས་གནད་ཀྱི་ལོངས་སྤྱོད་རྣམས
ཡང་དག་བདེ་ཆེན་མཁའ་ལ་རོལ
དེ་ཕྱིར་ཐེག་པའི་བཅུད་ཕྱུང་བའི
རྒྱུད་ཆེན་འདི་ལ་གོམས་པར་བྱ
གསང་སྔགས་ཐེག་པའི་རྒྱུད་ཆེན་འདི
བདེ་བ་ཉིད་ལ་རྒྱ་ཆེར་རོལ
གསང་སྔགས་རྒྱུད་རྒྱལ་ཐེག་པར་བཤད
ཀླད་དང་གཞུང་དང་མཇུག་དག་ལས
མདོ་དོན་བསྡུས་ཏེ་བསྟན་པ་ཡིན
དེ་བཞིན་རྒྱུད་ཆེན་གང་བཤད་པ
དེ་ལྟར་ཀུན་ལ་ཤེས་པར་བྱ
ཚིག་དོན་རྒྱས་པ་ཆེན་པོ་དང
ཤིན་ཏུའང་རྒྱས་པ་ཆེན་པོར་བཤད
ངེས་པའི་དོན་ཆེན་འདི་བསྟན་པས
ཐེག་པ་དམན་པའི་རིགས་རྣམས་ཀུན
ཤིན་ཏུ་བློ་དམན་སྐྲག་པར་འགྱུར
ཡང་དག་ངེས་པའི་ལུང་ཆེན་འདི
ཀུན་དང་མི་མཉམ་གོང་མའོ
གཏན་ཚིགས་བརྒྱད་དང་འབྲེལ་བར་བཤད
གཏན་ཚིགས་བརྒྱད་པོ་འདི་ལྟ་སྟེ
ཡང་དག་ངེས་པའི་གཏན་ཚིགས་དང
༢༩
གཞན་དོན་འབྲེལ་བའི་གཏན་ཚིགས་དང
རང་དོན་བསྒྲུབ་པའི་གཏན་ཚིགས་དང
མཚན་མ་མིང་གི་གཏན་ཚིགས་དང
འཇུག་པ་ལམ་གྱི་གཏན་ཚིགས་དང
བདེན་པ་རྒྱུད་ཀྱི་གཏན་ཚིགས་དང
ངེས་པ་ལུང་གི་གཏན་ཚིགས་དང
སུན་འབྱིན་རིག་པའི་གཏན་ཚིགས་སོ
གཏན་ཚིགས་ཆེན་པོ་རྣམ་པ་བརྒྱད
དེ་བཞིན་ཀུན་ལ་ཤེས་པར་བྱ
རྣལ་འབྱོར་ལམ་གྱི་གཏན་ཚིགས་རྣམས
རིམ་ནས་རིམ་དུ་སྐྱེ་དང་འགག
ས་དང་ལམ་ལ་ཤེས་པར་བྱ
ཆོས་ལ་འཛིན་མེད་མཚན་མའི་བློ་དང་བྲལ
སྟོང་པ་ཡང་དག་རྙེད་པའི་དོན་དང་ཉེ
གསང་སྔགས་སྦས་བའི་མན་ངག་རྣམས
གཞུང་གི་ཚིག་ལས་ཤེས་པར་བྱ
དེ་བཞིན་དོན་གྱིས་རྒྱས་པར་བསྟན
བགྲོད་མེད་ལམ་ལ་དེ་བཞིན་གཤེགས
དེ་ལ་སོགས་ཏེ་མཇུག་གི་དོན
ཤིན་ཏུ་རྒྱས་པར་བསྟན་པའོ
ཞེས་རིག་པ་རང་གྲོལ་ཆེན་པོའི་རྒྱུད་ལས
མཇུག་དོན་རྒྱས་པར་བསྟན་པའི་ལེའུ་སྟེ་གསུམ་པའོ
༄༤
དེ་ནས་ཡང་འཇམ་དཔལ་གཞོན་ནུར་གྱུར་པས་འདི་སྐད་ཅེས་གསོལ་ཏོ
༣༠
ཀྱེ་བཅོམ་ལྡན་འདས་ཐུགས་རྗེ་ཆེན་པོ་དང་ལྡན་པ
རྒྱུད་ཀྱི་གྲོལ་ལུགས་དེ་ལྟར་ལགས་ན
མན་ངག་གི་དོན་བཤད་ལུགས་གསུང་དུ་གསོལ
ཞེས་ཞུས་སོ
དེ་ནས་རྡོ་རྗེ་འཆང་ཆེན་པོ་དེས
གཞི་ལ་མན་ངག་གིས་བཤད་ལུགས་བསྟན
བཀའ་སྩལ་པ
ཀྱེ་གྲོགས་པོ་དག་ཉོན་ཅིག
ངས་དོན་མ་ནོར་བར་བསྟན་གྱིས་ལེགས་པར་ཉོན་ཅིག
ཡང་དག་པར་རྫོགས་པའི་སངས་རྒྱས་ཀྱི་འབྲས་བུ་ལ་ཐོབ་པ་མི་མངའ་བའི་ཕྱིར་ཡེ་ཤེས་ལ་གསལ་འགྲིབ་མེད
ལྟ་བ་ལ་རྩིས་གདབ་མེད
དགོངས་པ་ལ་བར་མཚམས་མེད
འོད་ལ་གཟུང་འཛིན་མེད
སྐུ་ལ་གཟུགས་མེད
དབྱིངས་ལ་རྒྱ་ཆད་མེད
ཡུལ་ལ་བདག་འཛིན་མེད
ཞིང་ཁམས་ལ་བལྟར་མེད
དེ་ནི་ཡང་དག་པར་རྫོགས་པའི་སངས་རྒྱས་ཀྱི་མཛད་པའོ
ད་ནི་རིག་པའི་ལོངས་སྤྱོད་སྟོན་ཏེ
མན་ངག་གསལ་བའི་དོན་རབ་ཏུ་འབྱེད་དེ
ངོ་བོ་ཀ་དག
རང་བཞིན་ལྷུན་གྲུབ
ཐུགས་རྗེ་ཕྱེད་སྣང
ཞིང་ཁམས་ཚོམ་བུ་ལ་རྒྱ་ཆད་མེད
སྣང་བ་ལྔ
འབྱུང་བ་གཉིས
ཡེ་ཤེས་ཀྱི་ངོ་བོ་དྲུག
ཡེ་ཤེས་ཀྱི་གནས་གསུམ
ཡེ་ཤེས་འབྱུང་བའི་ཚད་གཅིག་ཡེ་ཤེས་ཀྱི་ལམ་བཞི
༣༡
ཡེ་ཤེས་ཀྱི་འགྲོས་གཅིག
འདས་པའི་ཚིག་གསུམ་གྱིས
འཁོར་འདས་ཀྱི་རྒྱ་མི་བཅད
གཅོད་པའི་ཚིག་དྲུག་གྲགས་ཤེས་རབ་ཡུལ་ལ་བསྐྱལ
བསྟན་པའི་ཚིག་གསུམ་གྱིས་ཡེ་ཤེས་མ་བུ་སྤྲད
དང་པོའི་བྱུང་ས་གཅིག་གིས་ཡེ་ཤེས་ཀྱི་གནས་བཙལ
རིག་པའི་བཞགས་གཅིག་གིས་ཉམས་སུ་བླངས་པའི་ཐབས་བསྟན
སྐུ་ཡི་གནས་ལུགས་གསུམ་གྱིས་དོན་གཅིག་ཏུ་སྡུད
རིག་པའི་ཡུལ་གཉིས་ཀྱིས་འོད་ཀྱི་མདངས་གསལ་དཔེ་རེག་པའི་ལོངས་སྤྱོད་རྒྱས་པར་བསྟན་ཏེ
ལམ་གྱི་ཡེ་ཤེས་ངོས་བཟུང་བར་བསྟན་པའོ
དེ་ནས་ཡང་འཇམ་དཔལ་གྱིས་འདི་སྐད་ཅེས་གསོལ་ཏོ
ཀྱེ་ཐུགས་རྗེའི་བདག་པོ
གཞི་ལམ་གྱི་མཚན་ཉེ་བར་གསུང་དུ་གསོལ
ཞེས་ཞུས་སོ
དེ་ནས་ཡང་བཀའ་སྩལ་པ
ཀྱེ་མ་ཧོ
སྐྱེས་བུ་དམ་པ་ཁྱོད་ཉོན་ཅིག
ངས་ལེགས་པར་བསྟན་ཀྱིས
ཁྱོད་ཀྱི་ཡིད་ལ་མ་ཡེངས་པར་ཟུང་ཞིག
དེ་རྣམས་ཐམས་ཅད་ཀྱི་དོན་གསལ་བ་འདི་ཡིན་ནོ
གཞི་བསམ་པ་ལས་འདས་པ
རྟོག་པ་ལས་འདས་པ
ངོ་བོ་ཐ་དད་ལས་འདས་པ
༣༢
རང་བཞིན་དངོས་པོ་ལས་འདས་པ
ཐུགས་རྗེ་མཛད་པ་ལས་འདས་པ
འབྲས་བུ་རྩོལ་བསྒྲུབ་ལས་འདས་པ
ཡེ་ཤེས་ཡིན་མིན་ལས་འདས་པའོ
སྤྱོད་པ་ཆོས་དང་འབྲེལ་བ
དམ་ཚིག་ལྟ་བ་དང་འབྲེལ་བ
བསྒྲུབ་པ་ལྷ་དང་འབྲེལ་བ
དབང་གདམས་ངག་དང་འབྲེལ་པ
དགོངས་པ་གཉིས་མེད་དང་འབྲེལ་པ
སྒོམ་པ་འཛིན་མེད་དང་འབྲེལ་བ
ལྟ་བ་མིང་དང་འབྲེལ་པ
མིང་དོན་སྙིང་དང་འབྲེལ་པ
དཔེ་འཇའ་ཚོན་དང་འབྲེལ་བ
རྟགས་སྒྲོན་མ་དང་འབྲེལ་བ
དབྱིངས་ནམ་མཁའ་དང་འབྲེལ་བ
སངས་རྒྱས་དང་སེམས་ཅན་དུ་འབྲེལ་བའོ
ངོ་བོ་ལ་ཆོས་མེད
སངས་རྒྱས་ལ་སེམས་མེད
སེམས་ལ་འབྲས་བུ་སྨིན
ཆོས་ལ་བསྒྲུབ་ཏུ་མེད
འབྲས་བུ་ལ་ཐོབ་ཏུ་མེད
དགོངས་པ་ལ་བར་མཚམས་མེད
ཐུགས་རྗེ་ལ་དབྲི་བཀོལ་མེད
ལྟ་བ་ལ་ཡིན་མིན་མེད་པའོ
གཞི་ལས་འདས་པའི་བྱུང་ས
ཅི་སྟེ་དང་པོ་རྐྱེན་གྱིས་འཁྲུལ་པའི་ཕྱིར་རོ
ལམ་ལ་འདས་པའི་སྣང་བ
ཅི་སྟེ་ཉམས་སུ་བླང་དགོས་པའི་ཕྱིར་རོ
འབྲས་བུ་ལས་འདས་པའི་སྣང་བ
ཅི་སྟེ་འབྲས་བུ་རྒྱུར་མི་ལྡོག་པའི་ཕྱིར་རོ
༣༣
ཨེ་མ་ཧོ
སངས་རྒྱས་ཀྱི་ལམ་ལྔ་ངོ་ཤེས་ན
སྣང་བ་ལ་དགག་བསྒྲུབ་མེད་པར་འཆར་རོ
སངས་རྒྱས་ཀྱི་བདེན་པ་མཐོང་བའི་དུས་ན
རང་གི་ཤེས་པ་སྟོབས་སུ་གྱུར་ནས
ཡེ་ཤེས་མཁའ་ལ་བརྡལ་བའོ
སངས་རྒྱས་ཀྱི་དགོངས་པ་རྙེད་པ་ནི
ཡུལ་ལ་ཤེས་པ་འཇུག་པ་མེད་པའོ
སངས་རྒྱས་ཀྱི་དགོངས་པ་ཉམས་སུ་ལེན་པའི་དུས་སུ
ཡེ་ཤེས་མཁའ་ལ་གསལ་བ་འདི་ལྟ་སྟེ
སྣང་བ་ཡུལ་ལ་ཤར་ན་སྐུ་དང་བཅས་པའོ
ཡེ་ཤེས་ཀྱི་སྣང་བ་རང་ལ་སྐྱེ་བའི་དུས་ནི
ནམ་མཁའ་ལ་འོད་ཀྱི་ཐིག་ལེ་ཤར་བའོ
རིག་པ་ལ་ཉོན་མོངས་པས་མ་གོས་པའི་དུས་ནི
རྐྱེན་དབང་དུ་མི་འགྲོ་བའོ
བདུད་བཞི་ཆོམས་པའི་དུས་ནི
སྣང་བ་ཉོན་མོངས་པའི་དབང་དུ་མ་སོང་བའོ
རྫོགས་ཆེན་མཐའ་ལ་སྐྱིལ་བའི་དུས་ནི
ཤེས་པ་བྱིང་རྒོད་དུ་མ་སོང་བའོ
ཡེ་ཤེས་ཁོངས་ནས་གསལ་བའི་དུས་ནི
གཉིད་ལོག་པའི་དུས་ལྟ་བུ་ལ་ཤེས་པར་བྱའོ
རིག་པ་མཁའ་ལ་གསལ་བའི་དུས་ནི
ནམ་ལངས་པ་ལྟ་བུ་ཤེས་པར་བྱའོ
ཡེ་ཤེས་དངོས་དང་བྲལ་བའི་དུས་ནི
༣༤
ཆད་གིས་ར་རོ་བ་ལྟ་བུར་ཤེས་པར་བྱའོ
ཀྱེ་མ
རིགས་ཀྱི་བུ་ཡེ་ཤེས་ཀྱི་སྣང་བ་གསལ་བའི་དུས་ན
བར་དུ་གཅོད་པའི་བདུད་གྱི་སྣང་བ་འདི་ལྟ་བུ་དག་ཀྱང་འབྱུང་ངོ
ཀྱེ་མ
རིགས་ཀྱི་བུ་ཁྱོད་ལ་སྣང་བ་དེས་ཅི་ཞིག་བྱ
སྣང་བ་དེ་ནི་ཡང་དག་པ་མ་ཡིན་ནོ
དེ་ནི་འཁོར་བའི་རྒྱུ་ཁོ་ནའོ
ཟེར་ཞིང་རང་གི་སྣང་བ་དང་འཐད་པའི་ཚིག་བརྗོད་པ་དེ་ནི་བདུད་ཀྱི་བསླུ་བ་དང་པོའོ
དེ་ནས་མཁའ་འགྲོ་མའི་ཆ་བྱད་དུ་ཞུགས་ནས
རིགས་ཀྱི་བུ་ངས་ཁྱོད་ལ་ལུང་བསྟན་གྱིས
དེ་ནི་ཡང་དག་པ་མ་ཡིན་ནོ
དེ་ནི་ལོག་པ་ཁོ་ནའོ
འདི་ལྟར་བྱས་ན་རིགས་ཀྱི་བུ་ཁྱོད་གྲོལ་བར་འགྱུར
ཞེས་ལུང་སྟོན་པ་འདི་ནི་བདུད་ཡིན་པར་ཤེས་པར་བྱའོ
དེ་ཡི་དུས་སུ་རང་གི་དེ་ཉིད་ལས་མ་ཡེངས་བར་བྱའོ
གླང་པོ་ཆེའི་ལྟ་སྟངས་ཀྱིས་བལྟ་བར་བྱའོ
དེ་ནས་བཅོམ་ལྡན་འདས་གཞོན་ནུ་དཔའ་བོ་སྟོབས་ལྡན་ཉིད་ཀྱིས་ཚིགས་སུ་བཅད་དེ་བཀའ་སྩལ་པ
ཨ་ཨ་ཀྱེ་མ་ཧོ
རྟོགས་པ་མཚན་མས་བཅིངས་པའི་བདུད
བསམ་གྱིས་མི་ཁྱབ་གྲངས་མང་ཞིང
བརྗོད་དུ་མེད་པས་བསམ་མི་ཁྱབ
རྣམ་རྟོག་མཚན་མ་ཅི་འགྱུས་ལ
༣༥
ཐམས་ཅད་བདུད་ཀྱི་རང་བཞིན་ཏེ
དེ་ཡང་མདོར་བསྟན་འདི་ལྟ་སྟེ
གཟུང་འཛིན་ཡུལ་ལ་ཆགས་ན་ཕྱི་ཡི་བདུད
རྣམ་རྟོག་འཁྲུལ་པར་སྤྱོད་ན་ནང་གི་བདུད
རྟོགས་པ་ཁ་འབྱམས་བདུད་ཀྱི་སླི་བ་ཡིན
ལུས་ལ་རྒྱན་བཟང་བདུད་ཀྱི་སླི་བ་ཡིན
གཉེན་གྱི་བྱ་བ་བདུད་ཀྱི་སླུ་བ་ཡིན
དགྲ་ལ་ཆགས་པ་བདུད་ཀྱི་སླི་བ་ཡིན
བདག་ཏུ་རྟོག་ན་བདུད་ཀྱི་སླུ་བ་ཡིན
ལུས་ལ་ཆགས་པ་སྐྱེས་ན་དེ་ཡང་བདུད
འཛིན་པ་ཡུལ་ལ་ཆགས་ན་ཕྱི་ཡི་བདུད
ཏིང་འཛིན་རོ་ལ་ཆགས་ན་ནང་གི་བདུད
སྣང་བ་ཡུལ་ལ་ཆགས་ན་ཡུལ་གྱི་བདུད
ཡིན་མིན་ཐེ་ཚོམ་ཞུགས་ན་རྟོགས་པའི་བདུད
བྱ་བྱེད་གཡེངས་བས་ཁྱེར་ན་འཁོར་བའི་བདུད
རྟོག་པ་ཁོང་དུ་ཞུགས་ན་སེམས་ཀྱི་བདུད
གཟུང་འཛིན་ཆོས་ལ་ཆགས་ན་ཡིད་ཀྱི་བདུད
ལོངས་སྤྱོད་འཁོར་ལ་ཆགས་ན་གཡེངས་པའི་བདུད
འཁོར་བའི་ཆོས་ལ་ཆགས་ན་ཕུང་པོའི་བདུད
རྩོད་པའི་འདམ་ལ་ཆགས་ན་ཉོན་མོངས་བདུད
དགའ་སྡུག་གྲོགས་ལ་ཆགས་ན་ལྷ་ཡི་བདུད
ཁྲོ་གཏུམ་དཔའ་རྔམ་ཆེ་ན་འཆི་བདག་བདུད
༣༦
བསྒོམ་པའི་ལྷ་ལ་ཆགས་ན་འཆིང་བའི་བདུད
ཆགས་སྡང་ལྔ་ལ་ཆགས་ན་ངང་སོང་བདུད
ཆོས་སྤྱོད་བཅུ་ལ་ཆགས་ན་སྐྱེ་གནས་བདུད
འཁོར་བའི་ལམ་ལ་ཆགས་ན་མ་རིག་རྨོངས་པའི་བདུད
ཡུལ་ལ་རྔམ་སེམས་བྱེད་ན་ཆགས་པའི་བདུད
ཆོས་ལ་སྨོད་པ་འདོར་ན་ཕྲག་དོག་བདུད
གཞན་ལ་སྐྱོན་འཛིན་བྱས་ན་ང་རྒྱལ་བདུད
ཕ་རོལ་སྤོང་བར་བྱེད་ན་སྐྱོན་གྱི་བདུད
དེ་བཞིན་བདུད་ཀྱི་བསླུ་བ་བསམ་མི་ཁྱབ
བརྗོད་ཀྱིས་མི་ལངས་གྲངས་མང་ཡང
རྩ་བ་བདུད་བཞི་ཆོམ་གྱུར་ན
བདུད་རྣམས་གཞན་གྱིས་གླགས་མི་རྙེད
བདུད་ཀྱི་བྱེ་བྲག་དི་ལྟར་འདོད
དེ་རྣམས་དབང་དུ་མ་གྱུར་པའི
རིག་པ་ཡེ་ཤེས་ཆེན་པོ་ནི
ནམ་མཁའི་ངང་ལ་ཤེས་པར་བྱ
རིག་པ་ཡེ་ཤེས་ཆེན་པོ་ཉིད
གང་གི་ཕྱོགས་སུ་ཤོར་བ་མེད
རང་ཉིད་ཆོས་སྐུར་རྟོགས་གྱུར་ན
བདུད་ཅེས་བྱ་བ་ལོགས་ན་མེད
ཆོས་སྐུ་གཟུང་འཛིན་བྲལ་བ་ལ
མཚན་མའི་བདུད་ཀྱི་ཕྱོགས་དང་བྲལ
སྤྱད་པས་ངེས་པའི་ལུང་ཉིད་ལས
༣༧
བདུད་ལས་ཐར་པའི་མན་ངག་བསྟན
ཡེ་ཤེས་སྣང་བ་འཛིན་མེད་དུ
ཕྱོགས་ལ་གནས་པ་མེད་པར་ཤར
ལམ་ལ་ཞུགས་པ་མེད་པར་གྲོལ
འབྲས་བུ་དེ་བཞིན་མཁའ་ལ་རོལ
དེ་བཞིན་ཉིད་ཀྱི་དཀྱིལ་འཁོར་དུ
གསང་བ་ཡེ་ཤེས་ཕོ་བྲང་བསྟན
ཡེ་ཤེས་འཕྲོ་ཞིང་ཟེར་ལ་རོལ
རྣམ་དག་དབྱིངས་ཀྱི་ཕོ་བྲང་དུ
སྟོང་པའི་ཡེ་ཤེས་མཁའ་ལ་རོལ
རྟོག་པ་ཉིད་ལ་ཡེ་ཤེས་སྐྱེ
དྲན་པ་ཉིད་ལ་དྲན་མེད་རྙེད
མ་རིག་དཀྱིལ་ནས་རིག་པ་རྙེད
རྣམ་རྟོག་ཉིད་ལས་ཡེ་ཤེས་སྐྱེ
སྟོང་པའི་ངང་ལས་གསལ་བ་རྙེད
བློ་ཡི་དཀྱིལ་ན་ངོ་བོ་རྙེད
དེ་བཞིན་བློ་དངོས་ཆོས་རྣམས་ཀུན
ངོ་བོ་ཉིད་དུ་གྲོལ་བའོ
གསང་སྔགས་ལམ་ལ་ཤེས་རབ་གསལ
ཐབས་ཀྱི་ལམ་ལ་གོམས་པ་གསལ
དེ་བཞིན་མཚན་མའི་ཆོས་རྣམས་ཀུན
མཚན་མ་མེད་པའི་ངང་དུ་གྲོལ
བྱས་པ་དངོས་པོའི་ཆོས་རྣམས་ཀུན
བྱར་མེད་སྟོང་པའི་ངང་དུ་གྲོལ
འཛིན་མེད་རང་སྣང་ཆོས་རྣམས་ཀུན
རྣམ་དག་སྟོང་པའི་མཁའ་ལ་གྲོལ
དགོངས་པ་དཔེ་མེད་དོན་རྣམས་ཀུན
ཡང་དག་གསང་བའི་དབྱིངས་སུ་གྲོལ
༣༨
སྣ་ཚོགས་བསྐྱེད་པའི་ངོ་བོ་ཉིད
འདུ་ཤེས་མེད་པའི་ངང་དུ་གྲོལ
གསང་སྔགས་གསང་བའི་རོལ་པ་ཉིད
ཡེ་ཤེས་བཞི་སྦྱོར་དབྱིངས་སུ་གྲོལ
གཉིས་སྣང་སེམས་ཀྱི་ཆོ་འཕྲུལ་རྣམས
ཐིག་ལེ་ཉག་གཅིག་ངང་དུ་གྲོལ
ཡེ་ཤེས་ཀུན་སྣང་གྲོང་ཁྱེར་ཉིད
ཚོམ་བུ་ལྔ་ཡི་ཀློང་དུ་གྲོལ
ཡང་དག་ཡེ་ཤེས་ས་བོན་ཉིད
ཀ་དག་ཆེན་པོའི་དབྱིངས་སུ་གྲོལ
དེ་ཕྱིར་རྣམ་རྟོག་འཁོར་བའི་བདུད
མེད་ཅིང་སྟོང་ལ་གཟུང་དུ་མེད
བདུད་ཀྱང་རང་གི་ངང་དུ་རྟོགས
ཡེ་ཤེས་ཆེན་པོའི་སྣང་བ་ལ
བདུད་མེད་བདུད་དུ་བྱ་བ་མེད
རང་བྱུང་གཅིག་པ་གཅིག་པུ་ཉིད
དེ་ལས་མ་གཏོགས་བདུད་མེད་དོ
བདུད་ཉིད་རང་གི་རིག་པར་ལྟོས
དེ་མ་གཏོགས་པའི་བདུད་རྣམས་ཀུན
ངང་གིས་མེད་ཅིང་རང་གིས་བཅོམ
ང་མེད་པ་ཡི་སྔོན་རོལ་དུ
བདུད་ཅེས་བྱ་བའི་མིང་ཡང་མེད
བདུད་ཉིད་ང་ལས་བྱུང་བའི་ཕྱིར
བདུད་ཅེས་བྱ་བ་ལོགས་ན་མེད
རྣམ་རྟོག་བདག་ཏུ་འཛིན་པ་ཡི
བདུད་ཀྱི་རྩ་བ་ཆེན་པོ་གཅིག
ང་ཉིད་རྟོགས་ན་བདུད་རྣམས་སངས
རྣམ་རྟོག་འཛིན་པའི་བདུད་རྣམས་ཀུན
༣༩
ཐབས་ཀྱིས་ང་ཡི་ངང་དུ་ཞི
དེ་ཕྱིར་རྣམ་རྟོག་འཛིན་པའི་བདུད་རྣམས་ཀུན
ཀ་ནས་མེད་ཅིང་ཀ་ནས་དག
བདུད་རྣམས་ཡེ་ཤེས་རོལ་པ་སྟེ
ང་ལས་བྱུང་ཞིང་ང་ལས་འཁྲུལ
དེ་ཕྱིར་ང་ཡི་ཆོ་འཕྲུལ་ཡིན
ང་ཡི་རོལ་པ་བསམ་མི་ཁྱབ
ང་ཡི་ཆོ་འཕྲུལ་དཀའ་བ་མེད
ཐམས་ཅད་ང་ཡི་རོལ་བའོ
ཞེས་རིག་པ་རང་གྲོལ་ཆེན་པོའི་རྒྱུད་ལས
མན་ངག་གི་དོན་བཤད་པའི་ལེའུ་སྟེ་བཞི་པའོ
༄༥
དེ་ནས་ཡང་འཇམ་དཔལ་གཞོན་ནུར་གྱུར་པ་སྐྱེས་བུ་དམ་པ་དེས
འདི་སྐད་ཅེས་གསོལ་ཏོ
ཀྱེ་ཀྱེ་བཅོམ་ལྡན་ཁྲོ་བོའི་སྐུ
མན་ངག་བཤད་ལུགས་དེ་ལྟར་ན
བདག་ཅག་མོས་པའི་འཁོར་རྣམས་ལ
དངོས་པོའི་ཆོས་ལ་གྲོལ་ལུགས་གསུང
ཞེས་ཞུས་སོ
དེ་ནས་ཡང་བཀའ་སྩལ་པ
ཀྱེ་མ་ཧོ
འཇམ་དཔལ་གཞོན་ནུར་གྱུར་པ་ཉོན
རྡོ་རྗེའི་དོན་ཉིད་ངས་བསྟན་གྱིས
ཁྱེད་ཀྱིས་ལེགས་པའི་སེམས་ཀྱིས་ཉོན
མཚན་མ་དངོས་པོའི་ཆོས་ཉིད་ནི
བྱ་བྱེད་འཛིན་པའི་ཆོས་དང་བྲལ
འབྲས་བུ་རྒྱུར་མི་ལྡོག་པའི་ཆོས
༤༠
མ་ནོར་ལམ་གྱི་བདེན་པ་ཉིད
མངོན་སྣང་སེམས་ལས་གྲོལ་བའི་ཕྱིར
ལམ་གྱི་བྱ་བ་ཉིད་ལས་ཐར
ཡེ་ཤེས་སྣང་བ་དངོས་པོར་མེད
དག་པའི་ཡེ་ཤེས་ཡོད་པའི་ཕྱིར
དག་པའི་དངོས་པོ་ཡུལ་ལས་འདས
མཐའ་དང་དྲི་མའི་ཆོས་ལས་འདས
མཐའ་བཞིའི་དྲི་མ་རང་སངས་སྙིད
འཛིན་པའི་ཕྱོགས་ཆ་ཉིད་དང་བྲལ
གསང་སྔགས་དགོངས་པ་དངོས་མེད་ནི
འཛིན་པའི་ཡུལ་དང་བྲལ་བའི་ཕྱིར
དངོས་པོའི་དྲི་མའི་ཆོས་དང་བྲལ
འདོད་པའི་སེམས་ཀྱིས་དྲི་མ་ཉིད
རང་བྱུང་ཐབས་ཀྱི་ཡེ་ཤེས་ལས
ཐམས་ཅད་འབྱུང་ཞིང་ཐོན་པར་གསུངས
ལམ་དང་དྲི་མའི་ཆོས་ཉིད་རྣམས
ཀ་ནས་དག་ཅིང་བྱང་བ་ཉིད
རྒྱལ་བ་ཀུན་གྱིས་རབ་བསྔགས་པས
ཡེ་ཤེས་གསང་བའི་མཁའ་ལ་རོལ
མཉམ་ཉིད་ཡེ་ཤེས་ཆེན་པོ་ཉིད
སྣང་བའི་ཡེ་ཤེས་མངོན་པར་སྣང
རྒྱལ་བ་རྟགས་ཀྱི་ཕྱག་རྒྱ་ཉིད
ཡང་དག་ཉིད་དུ་གནས་པའི་ཕྱིར
གསང་བའི་ཡུམ་དང་གཉིས་མེད་སྦྱོར
ཀུན་ཏུ་བཟང་པོའི་རོལ་པ་ཉིད
ཅིར་ཡང་མཛད་ཅིང་ཅིར་ཡང་སྤྲུལ
ཡེ་ཤེས་རྟོགས་པའི་ཀློང་དཀྱིལ་དུ
༤༡
ཐུགས་རྗེའི་ཉི་མ་མ་འགགས་ཤར
སྣང་བ་རྣམ་པ་ལྔ་ཉིད་ལས
ཡེ་ཤེས་སྤྲུལ་པ་ཕྱོགས་བཅུར་ཤར
ཀུན་ཏུ་བཟང་མོའི་བྷ་ག་ལས
ཐམས་ཅད་ཡེ་ཤེས་བསྐྱེད་པའི་རྒྱུ
ཀུན་ནས་འབྱུང་ཞིང་ཀུན་ཏུ་ཤར
ཀུན་བཟང་ཉིད་ཀྱི་ཤེས་རབ་ལས
ཐམས་ཅད་རྫོགས་པར་ང་ཡིས་བཤད
ཀུན་ཏུ་བཟང་པོའི་ཡེ་ཤེས་ནི
ནམ་མཁའི་མཐའ་བཞིན་ཐུག་པ་མེད
དབྱིངས་ཀྱི་དཀྱིལ་འཁོར་ཟད་པ་མེད
ཡེ་ཤེས་དཀྱིལ་འཁོར་འགག་མེད་ཉིད
ཀུན་ལ་རོལ་ཅིང་སྤྱོད་པའོ
ཨེ་མ་དངོས་པོའི་ཆོས་རྣམས་ཀུན
རང་དག་རྐྱེན་གྱིས་ཀ་ནས་མེད
དྲི་མའི་ཆོས་ལ་གནས་པ་མེད
སྣང་བའི་ཆོས་ལ་ཐེ་ཚོམ་མེད
ཡང་དག་ལམ་ལ་མཐར་ཐུག་མེད
དངོས་པོའི་ཡུལ་ལ་བསྒྲུབ་མི་དགོས
དྲན་པ་མེད་པའི་བསམ་གཏན་ལ
བརྗོད་མེད་ཏིང་འཛིན་ངོ་བོར་ཞོག
ལམ་དང་འཛིན་པའི་ཡུལ་མེད་པས
དྲི་མ་བཞི་ཡིས་བཅིངས་པ་ཁྲོལ
སངས་རྒྱས་ཡེ་ཤེས་བསྟན་བྱའི་ཕྱིར
རྒྱུ་རྐྱེན་ལྟོས་པའི་ཚིག་རྣམས་སྤང
སངས་རྒྱས་ཡེ་ཤེས་རང་ལ་གྲུབ
༤༢
ཡེ་ཤེས་ཆེན་པོའི་སྣང་བ་རྣམས
འགག་མེད་ཀུན་ལ་རོལ་ཅིང་སྤྱོད
མཚན་མའི་མིང་དང་འཛིན་པ་སྟོངས
སྟོང་པ་ལམ་གྱི་སྒྲོན་མ་སྟོངས
ཡང་དག་ཤེས་པའི་ངོ་བོ་ལ
བྱ་བ་བྱེད་པའི་རིག་པ་མེད
འཛིན་པ་གོལ་བའི་རྒྱུ་ཉིད་ལས
བྱང་ཆུབ་ལམ་གྱི་སྒྲོན་མ་ཉིད
ལམ་ལ་དགག་དང་བསྒྲུབ་པ་མེད
སྟོང་པའི་རིག་པ་གང་ཡང་མེད
རྒྱ་ཆད་ཕྱོགས་ཆར་འཛིན་པ་སྤང
སྣང་བ་དངོས་པོའི་ཆོས་ཀྱིས་སྟོང
སྟོང་པ་མཚན་མའི་ཆོས་ལས་འདས
འདས་པ་ཉིད་ལ་བརྗོད་དུ་མེད
ལྟ་བ་ཞེ་འདོད་འཛིན་པ་ཡང
མཚན་མའི་ཆོས་མེད་རང་སར་གྲོལ
རང་བྱུང་སྒྲ་ཡི་ཐ་སྙད་ཉིད
ཡོད་པའི་ཕྱོགས་དང་མེད་པའི་ཕྱོགས
ཐ་སྙད་གཉིས་ཀྱི་ཆོས་རྣམས་ཀུན
ཡང་དག་ཉིད་ལ་ལྟ་དང་བྲལ
འཛིན་པའི་གོལ་ས་ཆོས་ཉིད་མེད
ཐ་དད་དངོས་པོའི་ཡུལ་ལས་འདས
མཚན་མའི་ཚིག་དང་དངོས་པོའི་ཚིག
ཡུལ་ལ་ལྟོས་པ་ཉིད་དུ་བཤད
བྱ་བ་རྫོགས་པའི་ཡེ་ཤེས་ཉིད
དངོས་པོར་བརྗོད་པའི་ཚིག་དང་བྲལ
གསང་སྔགས་རྡོ་རྗེ་སྲ་མ་ཁྲེགས་པ་ཉིད
ཡེ་ཤེས་རྡོ་རྗེ་ཐབས་ལ་རོལ
༤༣
འབྱུང་བའི་རྡོ་རྗེ་ཡེ་ཤེས་ཀུན
སྟོང་པའི་རྡོ་རྗེ་ཐབས་ལ་རོལ
དཀྱིལ་འཁོར་རྡོ་རྗེ་མཐའ་ཡས་ཤིང
བསྐྱེད་པའི་རྡོ་རྗེ་ཀུན་སྣང་ཞིང
འཁོར་བའི་དོན་ལ་རྡོ་རྗེའི་སྒྲ
མཚན་མའི་རྡོ་རྗེ་མིང་དང་བྲལ
མཐའ་ཡས་རྡོ་རྗེ་ཡུལ་ལ་འཇུག
གཉིས་མེད་རྡོ་རྗེ་སྟོང་པའི་ངང
གསང་སྔགས་རྡོ་རྗེ་ཡུལ་ལས་འདས
རང་བྱུང་རྡོ་རྗེ་བརྗོད་དུ་མེད
ཡོད་མེད་རྡོ་རྗེ་ཀུན་ལས་འདས
གསང་སྔགས་རྡོ་རྗེ་མཉམ་པ་ཆེ
མཁའ་དབྱིངས་རྡོ་རྗེ་སྟོང་པ་ཆེ
ཡོན་ཏན་རྡོ་རྗེ་ངོ་མཚར་ཆེ
ཕྲིན་ལས་རྡོ་རྗེ་གྲུབ་པ་ཆེ
གསལ་བའི་རྡོ་རྗེ་ཡངས་པ་ཆེ
སྣ་ཚོགས་རྡོ་རྗེ་སྡུད་པ་ཆེ
ཡང་དག་རྡོ་རྗེ་མཉམ་པ་ཆེ
རིག་པའི་རྡོ་རྗེ་གསལ་བ་ཆེ
སེམས་ཀྱི་རྡོ་རྗེ་འཕྲོ་བ་ཆེ
མ་རིག་རྡོ་རྗེ་རྨུགས་པ་ཆེ
ཡིད་ཀྱི་རྡོ་རྗེ་འཁྲུགས་པ་ཆེ
གཏི་མུག་རྡོ་རྗེ་འཐིབ་པ་ཆེ
ཞེ་སྡང་རྡོ་རྗེ་འབར་བ་ཆེ
འདོད་ཆགས་རྡོ་རྗེ་འཛིན་པ་ཆེ
ང་རྒྱལ་རྡོ་རྗེ་ང་རོ་ཆེ
ཕྲག་དོག་རྡོ་རྗེ་འདུད་པ་ཆེ
ཁོང་ཁྲོ་རྡོ་རྗེ་གདུག་པ་ཆེ
རྐྱེན་གྱི་རྡོ་རྗེ་གཅོད་པ་ཆེ
འཁོར་བའི་རྡོ་རྗེ་ཞེན་པ་ཆེ
ཆགས་པའི་རྡོ་རྗེ་མཚན་མ་ཆེ
ཞེན་པའི་རྡོ་རྗེ་འདོད་པ་ཆེ
༤༤
འདུས་པའི་རྡོ་རྗེ་སྡུད་པ་ཆེ
ཉོན་མོངས་རྡོ་རྗེ་གཅོད་པ་ཆེ
ང་ཡི་ཆགས་འཛིན་ཆེ
གཞན་གྱི་རྡོ་རྗེ་དང་པ་ཆེ
འཁྲུལ་པའི་རྡོ་རྗེ་ཆགས་པ་ཆེའོ
དེ་ནས་ཡང་དག་རིགས་ཆེན་རྣམས
བཤད་ཅིང་བཀྲོལ་ནས་དོན་ལ་སྤྱོད
བྱང་ཆུབ་འཁྲུལ་པའི་རྣམ་པ་ཀུན
ཡུལ་དུ་མི་གནས་སྤང་བྱ་སྟེ
མྱ་ངན་འདའ་བར་འདོད་པ་ཡིས
ཡེ་ཤེས་དོན་ལ་ཐུག་པ་མེད
འོན་ཀྱང་དོན་འདི་བླང་བར་གྱིས
དོན་ལས་གོལ་ན་བྱང་ཆུབ་རིང
དོན་ལ་གནས་ན་བྱང་ཆུབ་ཉེ
འཁྲུལ་པ་ཟད་པར་བྱ་ཕྱིར་ཡེ་ཤེས་ཉིད
རབ་ཏུ་འབར་བའི་འོད་ཟེར་ཀུན་ནས་འབྱུང
སྡོམ་པའི་མདོ་ལས་ཡེ་ཤེས་ཉིད
རབ་ཏུ་བསྟན་ཕྱིར་བཤད་པར་བྱ
རབ་ཏུ་བཤད་པའི་གཞི་ལམ་ནི
གོང་དུ་བསྟན་ཅིང་བཤད་ཟིན་ཏོ
དེ་ལྟར་གནས་པའི་སྐྱེས་བུ་དམ་པ་དེ
དངོས་པོའི་ཆོས་ཉིད་ཟད་ནས་རང་བྱུང་ཐོབ
རང་བྱུང་དངོས་བྲལ་ཡེ་ཤེས་ཉིད
གང་ལ་འཛིན་པ་མ་སྐྱེས་པའོ
ཞེས་རིག་པ་རང་གྲོལ་ཆེན་པོའི་རྒྱུད་ལས
མཚན་མ་དངོས་བྲལ་གྱི་ལེའུ་སྟེ་ལྔ་པའོ
༄༦
དེ་ནས་ཡང་འཇམ་དཔལ་གཞོན་ནུར་གྱུར་པའི་སྐྱེས་བུ་དམ་པ་དེས་འདི་སྐད་ཅེས་གསོལ་ཏོ
༤༥
ཀྱེ་མ་བཅོམ་ལྡན་ལེ་ལག་བདག
དངོས་པོ་སྟོང་པ་དེ་ལྟར་ན
བདག་ཅག་མོས་པའི་འཁོར་རྣམས་ལ
རྒྱུད་ཀྱི་རྒྱལ་པོའི་ལེ་ལག་རྣམས
མ་ནོར་ལེགས་པར་གསུང་དུ་གསོལ
ཞེས་ཞུས་སོ
དེ་ནས་ཡང་དག་བཀའ་སྩལ་པ
ཀྱེ་མ་གཞོན་ནུར་གྱུར་པ་ཉོན
རྒྱུད་ཆེན་རྒྱལ་པོ་བཤད་ལུགས་ལ
གྲངས་མེད་བསམ་གྱིས་མི་ཁྱབ་སྟེ
མདོར་བསྟན་ལེགས་པར་ཡིད་ལ་ཟུང
ལེ་ལག་མཚན་དང་དཔེར་བརྗོད་དང
རབ་ཏུ་བཤད་པར་བྱ་བ་དང
ཚིག་དང་སྦྱར་ཏེ་སྟོན་བྱེད་དང
རབ་ཏུ་བསྔགས་པའི་རིམ་པ་དང
བསྟན་པར་བྱ་ཕྱིར་མངོན་སྣང་ཕྱིར
ལེའུ་རེ་ལ་སོ་སོར་དབྱེ
བསམ་གྱིས་མི་ཁྱབ་བསྟན་པ་ཡང
བརྗོད་ཅིང་གྲངས་ལས་འདས་བྱའི་ཕྱིར
རྒྱུད་ཆེན་མཚན་ལྡན་འདི་གསུངས་པས
ཐམས་ཅད་མིག་དང་འདྲ་བར་འགྱུར
ལམ་ལ་ཡུན་རིང་གནས་པ་རྣམས
འདི་ཐོས་པ་ཡིས་ཉེ་བར་འགྱུར
གཞུང་བཤད་ལེའུའི་མཚན་བཤད་བྱ
དེ་ནས་དང་པོ་ལེའུ་བརྗོད་བྱ་སྟེ
རྒྱུད་ཆེན་གླེང་གཞིའི་ལེའུ་བསྟན
༤༦
དོན་ནི་གོང་དུ་བསྟན་པའོ
ཡང་དག་ཆེན་པོའི་གླེང་བ་དང
འདས་པའི་ཚིག་དོན་གླེང་བ་དང
གྲངས་ཀྱི་སྒོ་ནས་བླེང་བ་བསྟན
ལེའུ་གཉིས་པའི་དོན་བསྟན་ནི
གླེང་སློང་ཡན་ལག་རྒྱས་བསྟན་པ
དོན་ནི་གོང་དུ་ཡང་དག་བསྟན
མཚན་མའི་ཚིག་ལ་དོན་གསུམ་སྟོན
སྔོན་བྱུང་རྒྱས་པའི་གླེང་སློང་དང
རྗེས་འཇུག་ཡུལ་ལ་གླེང་སློང་དང
ཚིག་དོན་གཏན་ཚིགས་གླེང་སློང་བསྟན
ལེའུ་གསུམ་པས་སྤྱོད་པ་བསྟན
རྒྱས་པར་བསྟན་པ་ཉིད་ལས་གསུངས
མདོར་བསྟན་དོན་ལ་དོན་གསུམ་སྟེ
རང་བྱུང་ཐབས་ཀྱི་སྤྱོད་པ་དང
གཏན་ཚིགས་ཚིག་གི་སྤྱོད་ཡུལ་དང
མཚན་མ་མིང་གི་སྤྱོད་ཡུལ་བསྟན
ལེའུ་བཞི་པས་བསྒོམ་པ་བསྟན
དེ་ལ་བཤད་ལུགས་འདི་ལྟ་སྟེ
དོན་གསུམ་ཐེ་ཚོམ་མེད་པར་བསྟན
དམིགས་པ་གཅོད་པའི་སྒོམ་པ་དང
སྟོང་པ་རང་བྱུང་སྒོམ་པ་དང
མཚན་མ་ཟིལ་གནོན་སྒོམ་པ་བསྟན
ལེའུ་སྔ་བས་ལྟ་བ་བསྟན
ལྟ་བའི་དོན་ལ་དོན་གསུམ་སྟེ
རང་བྱུང་ཁོག་འགྲོལ་ལྟ་བ་དང
བཏང་སྙོམས་ཚིག་གི་ལྟ་བ་དང
ཡོད་མེད་དུས་མཚོན་ལྟ་བ་བསྟན
ལེའུ་དྲུག་པས་དབང་དོན་བསྟན
༤༧
དབང་ཉིད་ལ་ཡང་དོན་གསུམ་མོ
གསང་སྔགས་འབྲས་བུའི་དབང་དང་ནི
ལྟ་བ་རིག་པའི་དབང་བསྐུར་དང
མཚན་མ་རྫད་ཀྱི་དབང་བསྐུར་བསྟན
བདུན་པ་དབང་གི་ཡོན་ཏན་བསྟན
ཡོན་ཏན་ལ་ཡང་དོན་གསུམ་སྟེ
ཕྱི་ཡི་འབྱུང་པོ་ཚར་གཅོད་དང
ནང་གི་ཡེ་ཤེས་དྲོད་བསྐྱེད་དང
གསང་བ་རྟོགས་ཚད་ཡོན་ཏན་ནོ
བརྒྱད་པ་དབང་མ་ཐོབ་པའི་སྐྱོན
དེ་ཡང་དོན་གསུམ་བསྟན་པའོ
ཡེ་ཤེས་སྣང་བ་ཉིད་ལ་ཐུག
གདམས་ངག་དྲན་བཞིན་ཉམས་པ་དང
ཕུང་པོའི་བདུད་ལ་སོགས་པ་མང
དགུ་པ་དཔོན་སློབ་འབྲེལ་བ་བསྟན
དེ་ཉིད་ལ་ཡང་དོན་གསུམ་མོ
བཅུད་ལྡན་ཡེ་ཤེས་དོན་སྦྱོར་དང
སྣོད་ལྡན་གསང་བ་ཐུབ་པ་དང
གཉིས་ཀ་གདུང་སེམས་གཅེས་པར་བསྟན
བཅུ་པ་དམ་ཚིག་སྡོམ་པ་བསྟན
དེ་ལ་ཡང་ནི་དོན་གསུམ་མོ
བསྲུངས་པའི་ཡོན་ཏན་བསྟན་པ་དང
མ་བསྲུངས་སྐྱོན་ཉིད་བསྟན་པ་དང
བསྲུང་དེ་མེད་པར་བསྟན་པའོ
བཅུ་གཅིག་ཆོས་སྐུའི་མཚན་ཉིད་བསྟན
དེ་ཉིད་ལ་ཡང་དོན་གསུམ་མོ
རང་བཞིན་ཆོས་ཀྱི་སྐུ་དང་ནི
༤༨
ངོ་བོ་ཆོས་སྐུ་ཆེན་པོ་དང
ས་བོན་ཆོས་སྐུ་གསུམ་དུ་གསུངས
བཅུ་གཉིས་ལོངས་སྐུའི་མཚན་ཉིད་བསྟན
དེ་ཉིད་ལ་ཡང་དོན་གསུམ་མོ
གནས་པ་ལོངས་སྤྱོད་རྫོགས་སྐུ་དང
ཞིང་ཁམས་ལོངས་སྤྱོད་རྫོགས་པའི་སྐུ
སྣང་ཚུལ་ལོངས་སྤྱོད་རྫོགས་པའི་སྐུ
བཅུ་གསུམ་སྤྲུལ་སྐུའི་མཚན་ཉིད་བསྟན
དེ་ལ་ཡང་ནི་དོན་གསུམ་སྟེ
དོན་དང་མཐུན་སྣང་སྤྲུལ་སྐུ་དང
ཕྱེད་སྣང་ཞིང་ཁམས་སྤྲུལ་སྐུ་དང
ཐུགས་རྗེ་རང་བྱུང་སྤྲུལ་སྐུའོ
བཅུ་བཞི་སྐུ་གསུམ་དགོངས་པ་བསྟན
དེ་ཡང་རྣམ་པ་གསུམ་གྱིས་བསྟན
སྐུ་གསུམ་དྲིལ་བའི་དགོངས་པ་དང
སྐུ་གསུམ་རྫོགས་པའི་དགོངས་པ་དང
འབྲས་བུ་སྐུ་གསུམ་དགོངས་པར་བཤད
བཅོ་ལྔ་པ་ཉིད་སྐུ་ལྔ་སྟེ
དེ་ཡང་རྣམ་དོན་གསུམ་གྱིས་བསྟན
མཚན་མ་རང་གྲོལ་སྐུ་ལྔ་དང
གཞི་ལ་གནས་པའི་སྐུ་ལྔ་དང
མཐའ་ལ་སྐྱོལ་བའི་སྐུ་ལྔའོ
བཅུ་དྲུག་ཡེ་ཤེས་རྣམ་ལྔ་བསྟན
དེ་ཡང་དོན་གསུམ་དག་གིས་བསྟན
འཛིན་མེད་ཡུལ་གྱི་ཡེ་ཤེས་དང
བར་དོ་སྣང་བའི་ཡེ་ཤེས་དང
དོན་མཚོན་ནང་གི་ཡེ་ཤེས་སོ
བཅུ་བདུན་ཡེ་ཤེས་ཉི་ཤུ་བསྟན
༤༩
དེ་ཉིད་ལ་ཡང་དོན་གསུམ་སྟེ
ཕྱེ་སྟེ་རབ་ཏུ་རྒྱས་པ་དང
ཤིན་ཏུ་རྣམ་རིག་ཙམ་བསྟན་དང
རབ་ཏུ་སྒྲ་དང་ཕྱེ་བར་བསྟན
བཅོ་བརྒྱད་པ་ཉིད་འོད་ལྔ་སྐུ་དང་སྦྱར་བར་བསྟན
དེ་ཡང་རྣམ་པ་གསུམ་གྱིས་བསྟན
སྐུ་ལས་འོད་ཟེར་འབྱུང་བར་བསྟན
འོད་ལས་སྐུ་ཉིད་གྲུབ་པ་དང
གཉིས་ཀ་ཐབས་ཀྱི་རོལ་པར་བསྟན
བཅུ་དགུ་ཕྱི་འབྱུང་མཚན་ཉིད་བསྟན
དེ་ཉིད་ལ་ཡང་དོན་གསུམ་སྟེ
སོ་སོའི་མཚན་ཉིད་བསྟན་པ་དང
རང་གི་དོན་ཉིད་རྒྱས་བསྟན་དང
མཚན་མའི་མཚན་ཉིད་བསྟན་པའོ
ཉི་ཤུ་ནང་གི་འབྱུང་བ་བསྟན
དེ་ཡང་རྣམ་གསུམ་དག་གིས་བསྟན
ཡེ་ཤེས་དོན་ལ་སྦྱར་བ་དང
འབྱུང་བ་རྩ་ལ་སྦྱར་བ་དང
ནང་གི་དྲོད་ལ་སྦྱར་བའོ
རྩ་གཅིག་དུས་གསུམ་སངས་རྒྱས་ཀྱི
དགོངས་པའི་དོན་ཉིད་མ་ནོར་བསྟན
དེ་ཉིད་ལ་ཡང་དོན་གསུམ་སྟེ
རྒྱལ་བ་རང་བྱུང་དགོངས་པ་དང
ཚིག་ལ་བསྟན་པའི་དགོངས་པ་དང
མཚན་མ་རང་གྲོལ་དགོངས་པ་དང
རྩ་གཉིས་སེམས་ཅན་གྲོལ་ལུགས་བསྟན
དེ་ཡང་རྣམ་གསུམ་དོན་གྱི་བསྟན
སྣང་བ་ཡུལ་གྱི་གྲོལ་ལུགས་དང
༥༠
རྡོ་རྗེའི་སྐུ་ཡིས་གྲོལ་བ་དང
སྒྲོན་མ་ཉིད་ཀྱིས་གྲོལ་བར་བསྟན
རྩ་གསུམ་ཡི་གེ་འབྲུ་བཤད་བསྟན
དེ་ཡང་རྣམ་དོན་གསུམ་གྱིས་བསྟན
དང་པོ་ལ་ཡང་བཤད་ལུགས་དང
འདོགས་དང་ཡན་ལག་བཤད་ལུགས་དང
འདོགས་ཡིག་བསྡེབས་ཏེ་བཤད་ལུགས་བསྟན
རྩ་བཞིས་རིམ་པའི་གཞག་ཐབས་བསྟན
དེ་ཉིད་ལ་ཡང་དོན་གསུམ་སྟེ
སྣང་བ་ཡུལ་ལ་གཞག་ཐབས་དང
ནམ་མཁའི་དཀྱིལ་དུ་གཞག་ཐབས་དང
རང་གི་མིག་ལ་གཞག་ཐབས་སོ
རྩ་ལྔ་འཇིག་ཚོགས་རྐང་གྲངས་བསྟན
དེ་ཉིད་ལ་ཡང་དོན་གསུམ་སྟེ
སེམས་ལས་ལོག་པ་དག་དང་ནི
སྤྱོད་པ་དག་ལས་ལོག་པ་དང
དེ་བཞིན་ཚིག་ལས་ལོག་པའོ
རྩ་དྲུག་འཇིག་ཚོགས་འགྲེལ་བ་བསྟན
དེ་ཉིད་ལ་ཡང་དོན་གསུམ་བསྟན
བཤད་ལུགས་དོན་གྱི་འགྲེལ་བཤད་དང
རྒྱུད་ལ་ལྟོས་པའི་འགྲེལ་བཤད་དང
སྤྱོད་པ་ལོག་པའི་འགྲེལ་བཤད་དོ
དེས་ནི་སྡོམ་ཚིག་རྒྱས་པར་བསྟན
ལམ་བསྟན་ཚིག་ལ་གྲུབ་པ་མེད
ལམ་སྤྱིར་གསང་བ་དེ་ཉིད་ལས
སྡོམ་བྱང་ལྷ་དང་བཅས་པ་བསྟན
༥༡
ལེའུའི་མཚན་ཉིད་བསྟན་པའོ
དེ་ནི་མཚན་གྱིས་ལེགས་པར་བཤད་ཅིང་བཀྲོལ་བའོ
ཞེས་རིག་པ་རང་གྲོལ་ཆེན་པོའི་རྒྱུད་ལས
ལེའུའི་མཚན་གྱི་སྡོམ་བྱད་བསྟན་པའི་ལེའུ་སྟེ་དྲུག་པའོ
༄༧
དེ་ནས་འཇམ་དཔལ་གཞོན་ནུར་གྱུར་པ་དེ་ཉིད་ཀྱིས་འདི་སྐད་ཅེས་གསོལ་ཏོ
ཀྱེ་ཀྱེ་བཅོམ་ལྡན་རྡོ་རྗེ་འཆང
ལེའུའི་སྡོམ་བྱང་དེ་ལྟར་ན
བདག་ཅག་མོས་པའི་འཁོར་རྣམས་ལ
རྩ་ཚིག་ལེའུ་གསུང་དུ་གསོལ
ཞེས་ཞུས་སོ
ཀྱེ་མ་གཞོན་ནུར་གྱུར་པ་ཉོན
མ་ནོར་པ་ཡི་དོན་ཉིད་ནི
ངས་བསྟན་ཁྱོད་ཀྱིས་ལེགས་པར་ཉོན
ལེའུའི་མཚན་དང་སྡོམ་བྱང་རྣམས
རབ་ཏུ་བཤད་ཅིང་བསྟན་པར་བྱའོ
དེ་ལ་རྩ་བའི་ཚིག་ཉིད་དང
རབ་ཏུ་བསྟུན་ཏེ་བཤད་པར་བྱ
དེ་ཡང་ལེའུའི་མཚན་ཉིད་ལས
རབ་ཏུ་གསང་བའི་ཚིག་རྣམས་ཀྱང
འདི་རུ་གསང་བ་མེད་པར་བསྟན
ལེགས་པར་དགའ་མགུའི་སེམས་ཀྱིས་ཉོན
དོན་ལ་ཡེ་ཤེས་ཐུག་པ་མེད
འདས་པ་ཀུན་གྱི་སྣང་བ་ཡང
གང་དག་འཛིན་པའི་སེམས་དང་བྲལ
༥༢
དེ་ཕྱིར་ལེའུའི་རྩ་ཚིག་བསྟན་པར་བྱ
ཨེ་མ་ཧོ
རྩ་བདུན་ཡང་དག་ཐེག་པ་བསྟན
དེ་དོན་རྣམ་པ་གཉིས་ཀྱིས་བསྟན
མཚན་ཉིད་པ་དང་གསང་སྔགས་སོ
རྩ་བརྒྱད་འཁྲུལ་པའི་རྩ་བ་བསྟན
དེ་ལ་རྣམ་པ་བདུན་གྱིས་བསྟན
རང་ཉིད་རང་གིས་འཁྲུལ་པ་དང
རྒྱུ་ཉིད་རྐྱེན་གྱིས་འཁྲུལ་པ་དང
འདྲ་གཞི་གཉིས་ལས་འཁྲུལ་པ་དང
ཡུལ་དང་ཤེས་པས་འཁྲུལ་པ་དང
མཚན་མ་བརྡ་ཡིས་འཁྲུལ་པ་དང
སྟོང་པའི་འོད་ལས་འཁྲུལ་པ་དང
སྒྲིབ་པ་མཐའ་བཞིས་འཁྲུལ་པའོ
དེ་ནི་འཁྲུལ་ལུགས་རྒྱས་པར་བསྟན་པའོ
རྩ་དགུ་སེམས་ཅན་རང་རྒྱུད་བསྟན
དེ་ཉིད་ལ་ནི་དོན་བཞི་སྟེ
མངོན་པ་སྒུ་ཡི་རྒྱུད་དང་ནི
ཁྱབ་པ་འོད་ཀྱི་རྒྱུད་ཉིད་དང
ཤེས་རབ་རིག་པའི་རང་རྒྱུད་དང
རྣམ་དག་རིག་པའི་རང་རྒྱུད་བསྟན
སུམ་ཅུ་གཞི་ཡི་གནས་ལུགས་བསྟན
དེ་ཉིད་ལ་ཡང་དོན་བརྒྱད་དེ
ངོ་བོ་མི་འགྱུར་གནས་ལུགས་དང
རང་བཞིན་ཀུན་ཁྱབ་གནས་ལུགས་དང
ཐུགས་རྗེ་ཡུལ་ཁྱབ་གནས་ལུགས་དང
སྟོན་བྱེད་འོད་ཀྱི་གནས་ལུགས་དང
སྟོང་པ་མཁའ་ཁྱབ་གནས་ལུགས་དང
༥༣
གཉིས་མེད་རང་སྣང་གནས་ལུགས་དང
རིག་པ་ལུས་ལ་གནས་ལུགས་དང
ཤེས་རབ་མཁའ་ལ་གནས་ལུགས་སོ
སོ་གཅིག་རིག་པ་རང་གིས་རྟོགས་ཚུལ་སྟོན
དེ་ཉིད་ལ་ཡང་དོན་གསུམ་སྟེ
ཉི་ཤུ་རྩ་གཅིག་རྟོགས་ལུགས་དང
ཤེས་པ་གཅིག་ཆོད་རྟོགས་ལུགས་དང
སྣང་བ་མཐོང་བའི་རྟོགས་པའི
སོ་གཉིས་རིག་པའི་མཚོན་དཔེ་བསྟན
དེ་ཉིད་ལ་ཡང་དོན་གསུམ་སྟེ
གཞི་ཉིད་མཚོན་པའི་མཚོན་དཔེ་དང
ལམ་ལྔ་མཚོན་པའི་མཚོན་དཔེ་དང
ངོ་བོའི་མཚོན་དཔེ་བཤད་པའོ
སོ་གསུམ་རིག་པ་འཛིན་མེད་བསྟན
དེ་ཉིད་རྣམ་དོན་གཉིས་སུ་བསྟན
ཡེ་ཤེས་ཉིད་ཀྱི་འཛིན་མེད་དང
ཁྱད་པར་ལམ་གྱིས་འཛིན་མེད་དོ
སོ་བཞི་བར་དོའི་འཁྲུལ་ལུགས་བསྟན
དེ་ལ་ཡང་ནི་དོན་བཞི་སྟེ
སྣང་སེམས་ཀྱི་འཁྲུལ་ལུགས་དང
དཔྱོད་པ་ཡིད་ཀྱི་འཁྲུལ་ལུགས་དང
སྣང་བ་འོད་ལས་འཁྲུལ་ལུགས་དང
ཉི་ཤུ་རྩ་གཅིག་འཁྲུལ་ལུགས་སོ
དེ་ནི་འཁྲུལ་པའི་ཚིག་ཏུ་བསྟན
སོ་ལྔ་རྫོགས་ཆེན་ལ་བཟླ་བསྟན
༥༤
དེ་ལ་དོན་ནི་དྲུག་གིས་བསྟན
མཚན་མའི་ཚིག་གི་ལ་བཟླ་དང
རང་བྱུང་གཏན་ཚིགས་ལ་བཟླ་དང
གོལ་སྒྲིབ་སྒྲོ་འདོགས་ལ་བཟླ་དང
མངོན་སྣང་ཡུལ་ལ་ལ་བཟླ་དང
ལྡེམ་པོར་དགོངས་ཏེ་ལ་བཟླ་དང
དམིགས་པ་ལམ་གྱི་ལ་བཟླའོ
སོ་དྲུག་དཀྱིལ་འཁོར་མཚན་ཉིད་སྟོན
དཀྱིལ་འཁོར་དོན་ལ་རྣམ་གསུམ་སྟེ
རྩ་བའི་དཀྱིལ་འཁོར་ཆེན་པོ་དང
རང་བཞིན་གསང་བའི་དཀྱིལ་འཁོར་དང
གཟུགས་བརྙན་ཡོངས་བཀོད་དཀྱིལ་འཁོར་རོ
སོ་བདུན་རང་རང་དོན་ཆེན་བསྟན
དེ་ལ་རྣམ་དོན་གཅིག་གིས་བསྟན
རང་གི་ཙིཏ་ཏའི་དཀྱིལ་འཁོར་དུ
རང་རང་ཡེ་ཤེས་དོན་འདུས་པའོ
སོ་བརྒྱད་གོམས་པའི་རྟོགས་ཚུལ་བསྟན
དེ་ཉིད་ལ་ནི་རྣམ་གཉིས་སོ
ཉམས་སུ་བླང་བའི་རིམ་པ་དང
གོམས་པའི་ཚད་ཀྱིས་གདམས་ངག་བསྟན་པའོ
སོ་དགུ་རྟོགས་ཚུལ་བརྡའ་ལྔ་བསྟན
དེ་ཉིད་ལ་ཡང་དོན་ལྔ་སྟེ
རང་བཞིན་སྣང་བའི་བརྡ་རྣམས་དང
འཛིན་མེད་སེམས་ཀྱི་བརྡའ་དང་ནི
རང་དོན་རིག་པའི་བརྡ་ཆེན་དང
རང་བཞིན་ལུང་གི་བརྡ་དང་ནི
གོ་འབྱེད་སྒྲུབ་རྒྱུད་བརྡ་རྣམས་བཤད
༥༥
བཞི་བཅུ་ཡོངས་སུ་བསྟོད་བརྡ་བསྟན
དེ་ནི་ཡང་དག་དོན་བཞི་བསྟན
མཚན་གྱིས་སྒོ་ནས་བསྟོད་པ་དང
ཕྱག་མཚན་སྒོ་ནས་བསྟོད་པ་དང
སྐུ་གསུམ་ཉིད་ལ་བསྟོད་པ་དང
ཁྲོ་བོ་ཉིད་ལ་བསྟོད་པའོ
ཞེ་གཅིག་འཁྲུལ་པའི་བརྡའ་ཉིད་བསྟན
དེ་ཉིད་ལ་ཡང་དོན་གཉིས་ཏེ
འཛིན་པ་རང་གྲོལ་རྒྱུད་ཀྱི་བརྡ་དང་ནི
སྣང་བ་ཡུལ་གྱི་བརྡ་ལྔ་བསྟན
ཞེ་གཉིས་བསྟན་པའི་འཇིག་དུས་བསྟན
དེ་ཉིད་ལ་ཡང་དོན་གཉིས་ཏེ
རྟགས་རྣམས་འབྱུང་བར་བསྟན་པ་དང
བསྐལ་པའི་འབྱུང་དུས་བསྟན་པའོ
ཞེ་གསུམ་བརྡའ་ལྔའི་སྒྲ་བསྒྱུར་བསྟན
དེ་ཉིད་ལ་ཡང་དོན་གཉིས་ཏེ
ཐམས་ཅད་བརྡའ་རུ་བསྟན་པ་དང
ཐམས་ཅད་བརྡའ་ལ་བསྡུས་བའོ
དེ་བཞིན་སྒྲ་དོན་མན་ངག་རྣམས
རབ་ཏུ་བསྡུ་བ་འདིར་གསུངས་སོ
མཚན་མ་ལས་གྲོལ་ཡེ་ཤེས་ལས
བསྐྱེད་དང་རྫོགས་པ་མེད་པར་གསུངས
ཡང་དག་ལེའུའི་རྩ་བ་རྣམས
གང་ཞིག་གནས་པར་འདོད་པ་རྣམས
ལེའུ་འདི་ལས་བཙལ་བར་བྱའོ
ཞེས་རིག་པ་རང་གྲོལ་ཆེན་པོའི་རྒྱུད་ལས
ལེའུའི་རྩ་བའི་དོན་གསལ་བར་བཤད་པའི་ལེའུ་སྟེ་བདུན་པའོ
༥༦
དེ་ནས་འཇམ་དཔལ་གཞོན་ནུར་གྱུར་པ་སྐྱེས་བུ་དམ་པ་དེས་འདི་སྐད་ཅེས་གསོལ་ཏོ
ཀྱེ་ཀྱེ་བཅོམ་ལྡན་རྡོ་རྗེ་འཆང
ལེའུའི་རྩ་བཤད་དེ་ལྟར་ན
བདག་ཅག་རྗེས་སུ་ཞུགས་རྣམས་ལ
ལེའུའི་དོན་རྣམས་བཤད་དུ་གསོལ
ཞེས་ཞུས་སོ
དེ་ནས་བདག་ཉིད་ཆེན་པོ་དེས་བཀའ་སྩལ་པ
ཀྱེ་ཀྱེ་འཇམ་དཔལ་གཞོན་ནུར་གྱུར་པ་ཉོན
ང་ཡིས་ལེགས་པར་བཤད་ཀྱིས་བརྟན་པར་ཟུང
དོན་དང་མཐུན་ཚིག་བསམ་ཡས་ཀྱང
ལེའུ་ཉིད་ཀྱི་དོན་ཉིད་ལས
རབ་ཏུ་བཤད་ཅིང་ཤིན་ཏུ་གསལ
མཚན་མས་བཅིངས་པའི་སེམས་ཅན་ཀུན
གྲོལ་བའི་ཐབས་ཆེན་ངས་བསྟན་གྱིས
རབ་ཏུ་གུས་པའི་སེམས་ཀྱིས་ཉོན
ལེའུའི་དོན་སྦྱར་འདི་ལྟ་སྟེ
ཞེ་བཞི་དོན་གྱི་ཡེ་ཤེས་བསྟན
དེ་ཉིད་ལ་ཡང་དོན་ལྔ་སྟེ
ཁྱད་པར་ཡེ་ཤེས་ལ་མངོན་དང
ཐུན་མོང་ཀུན་ཁྱབ་རང་དོན་དང
བརྡལ་བ་ཆོས་ཉིད་སེམས་དོན་དང
རང་བྱུང་སྒྲ་ཡི་སེམས་དོན་དང
རོལ་པ་སྣ་ཚོགས་སེམས་དོན་ནོ
ཞེ་ལྔ་སྒྲ་ཡི་གྲངས་ཡིག་བསྟན
༥༧
དེ་ཉིད་ལ་ཡང་དོན་གསུམ་སྟེ
ཕོ་ཡིག་ཐབས་ཀྱི་ཡི་གེ་དང
མོ་ཡིག་ཤེས་རབ་ཡི་གེ་དང
མ་ནིང་ཐུགས་རྗེའི་ཡི་གེར་བཤད
ཞེ་དྲུག་མཁའ་འགྲོའི་རང་སྒྲ་བསྟན
དེ་ཉིད་ལ་ཡང་དོན་གསུམ་བསྟན
སོ་སོའི་མཚན་མས་སྨྲ་བ་དང
གཅིག་པའི་དོན་དུ་སྨྲ་བ་དང
སྟོན་པ་ཉིད་ཀྱིས་རྗེས་སུ་བསྟན
ཞེ་བདུན་སྟོན་པའི་བྱོན་ལུགས་བསྟན
དེ་ཉིད་ལ་ཡང་དོན་བཞི་བསྟན
པད་མར་བརྫུས་ཏེ་བྱོན་པ་དང
ཡུམ་གྱི་ལྷུམས་སུ་བྱོན་པ་དང
འོད་དང་སྒྲ་དང་བཅས་པ་དང
ཤིན་ཏུ་དམན་པའི་གཟུགས་སུ་བསྟན
ཞེ་བརྒྱད་ཐིག་ལེ་རྒྱས་པར་བསྟན
དེ་ཉིད་ལ་ནི་དོན་གསུམ་མོ
གཞི་ཡི་ཐིག་ལེ་བཟང་པོའི་རབ
ལམ་གྱི་ཐིག་ལེ་སྣ་ཚོགས་དང
འབྲས་བུ་ཡོངས་རྫོགས་ཐིག་ལེར་བསྟན
ཞེ་དགུ་སྒྲ་ཡི་གཏན་ཚིགས་བསྟན
གོང་དུ་རྒྱས་པར་བཤད་པའོ
འདི་ཉིད་ལ་ཡང་དོན་གསུམ་མོ
མཚན་མ་སྒྲ་ཡི་ཡི་གེ་དང
མཚོན་པ་སྒྲ་ཡི་ཡི་གེ་དང
སྡུད་པ་སྒྲ་ཡི་ཡི་གེར་བསྟན
ལྔ་བཅུ་གཞི་ལམ་འབྲས་བུར་བསྟན
དེ་ཉིད་ལ་ཡང་དོན་དྲུག་གོ
ངོ་བོ་རྟོགས་པའི་གཞི་དང་ནི
༥༨
རང་བཞིན་ཐབས་ཀྱི་གཞི་རུ་བསྟན
མངོན་སྣང་ཡུལ་གྱི་ལམ་དང་ནི
གོམས་པའི་ཚད་ཀྱི་ལམ་དུ་བསྟན
ཡང་དག་གཅིག་ཆོད་འབྲས་བུ་དང
རྟོགས་པ་རྒྱུར་མི་ལྡོག་པར་བསྟན
ང་གཅིག་སྔགས་ཀྱི་གཏན་ཚིགས་བསྟན
དེ་ཉིད་ལ་ཡང་དོན་ལྔ་སྟེ
འབྲས་བུ་ལམ་གྱི་གཏན་ཚིགས་དང
མངོན་སྣང་ཡུལ་གྱི་གཏན་ཚིགས་དང
རང་བཞིན་རིག་པའི་གཏན་ཚིགས་དང
སྔགས་ཀྱི་གཏན་ཚིགས་བསྟན
ང་གཉིས་ཡོངས་སུ་རྣལ་འབྱོར་བསྟན
དེ་ཉིད་ལ་ཡང་དོན་གཉིས་ཏེ
འབྲས་བུ་ཚད་ཕྱིན་རྣལ་འབྱོར་དང
ལམ་ལ་གནས་པ་ཉིད་དུ་བསྟན
ང་གསུམ་ཕྲིན་ལས་གསང་བར་བསྟན
དེ་ཉིད་ལ་ཡང་དོན་བཞིའོ
ཞི་བ་ཡོངས་སུ་རྫོགས་པ་དང
རྒྱས་པ་ཡང་དག་དོན་བསྟན་དང
དབང་གིས་འགྲོ་བ་དྲངས་པ་དང
དྲག་པོས་གདུག་པ་ཚར་གཅོད་དོ
ང་བཞི་རི་བོ་སྤྱི་བ་ཅིངས་བསྟན
དེ་ཉིད་ལ་ཡང་དོན་གསུམ་སྟེ
མཚན་མ་ཡུལ་གྱི་སྤྱི་བཅིངས་དང
སྒྲོན་མ་ཉིད་ཀྱི་སྤྱི་བཅིངས་དང
རྟོགས་པ་དོན་གྱི་སྤྱི་བཅིངས་སོ
ང་ལྔ་རྒྱ་མཚོ་ཀློང་རྡོལ་བསྟན
༥༩
དེ་ཉིད་ལ་ཡང་དོན་གསུམ་སྟེ
ཡུལ་གྱི་ཡེ་ཤེས་ཀློང་རྡོལ་དང
སྐུ་ཡི་ཡོན་ཏན་ཀློང་རྡོལ་དང
སྒྲོན་མ་དབྱིངས་ཀྱི་ཀློང་རྡོལ་བའོ
ང་དྲུག་ཉི་ཟླ་གྲངས་མཉམ་བསྟན
དེ་ཉིད་རྣམ་དོན་གཉིས་ཀྱིས་བསྟན
ཐབས་ཀྱིས་འགྲོ་བ་སྒྲོལ་བྱ་དང
ཤེས་རབ་ཡུལ་རྣམས་བཅད་པར་བསྟན
ང་བདུན་ནམ་མཁའ་ཁད་མཉམ་བསྟན
དེ་ཉིད་ལ་ཡང་དོན་བཞིས་བསྟན
གཉིས་མེད་མཐའ་ལས་འདས་པ་དང
མཐར་ཕྱིན་ཡུལ་ལ་མི་གནས་དང
འགྲོལ་བའི་དབྱིངས་ཉིད་མཉམ་པ་དང
ཡང་དག་དོན་ལ་མཉམ་པར་བསྟན
ང་བརྒྱད་དཔེ་ཡི་ངོ་སྤྲོད་བསྟན
དེ་ཉིད་ལ་ཡང་དོན་གསུམ་སྟེ
མཚན་མ་ཡུལ་གྱི་དཔེ་དང་ནི
དག་པ་ཕྱོགས་མཚོན་དཔེར་བསྟན་དང
སྣང་བ་བརྡ་ཡི་དཔེ་རུ་བསྟན་པའོ
ང་དགུ་སྤྲུལ་པ་མཛད་ལུགས་བསྟན
དེ་ལ་རྣམ་དོན་གཉིས་ཀྱིས་བསྟན
ཆོས་ཉིད་ངང་ལས་སྤྲུལ་པ་དང
གང་འདུལ་ཆས་སུ་ཞུགས་པ་བསྟན
དྲུག་ཅུ་རྟོགས་པའི་ཚད་རྣམས་བསྟན
དེ་ཉིད་ལ་ཡང་དོན་གསུམ་མོ
སྣང་བ་ཉིད་ཀྱི་རྟོགས་ཚད་དང
༦༠
འབྲས་བུའི་ལམ་གྱི་རྟོགས་ཚད་དང
མངོན་སྣང་ཡུལ་གྱི་རྟོགས་ཚད་དོ
རེ་གཅིག་མ་རིག་སེམས་ཉིད་བསྟན
དེ་ལ་ཡང་ནི་དོན་བཞིས་བསྟན
འཛིན་པ་མ་རིག་རྩ་བར་བསྟན
སྡུད་པས་སེམས་ཉིད་སྐྱབས་སུ་བསྟན
འཁྲུལ་བྱེད་ཡིད་རྣམས་བསྟན་པ་དང
རྣམ་ལྔ་གྲོགས་སུ་བསྟན་པའོ
རེ་གཉིས་རིག་པའི་ཡེ་ཤེས་བསྟན
དེ་ཉིད་ལ་ཡང་དོན་བཞིས་བསྟན
རང་བྱུང་རྟོགས་པའི་རིག་པ་དང
མངོན་སྣང་ཡུལ་གྱི་ཡེ་ཤེས་སོ
རེ་གསུམ་རང་བཞིན་གསལ་བར་བསྟན
དེ་ཉིད་ལ་ནི་དོན་གསུམ་སྟེ
དངོས་པོའི་རང་བཞིན་གསལ་བ་དང
སྐྱེ་མེད་རང་བཞིན་གསལ་བ་དང
ཀུན་ཁྱབ་རང་བཞིན་གསལ་བར་བསྟན
རེ་བཞི་དབང་པོའི་བྱེ་བྲག་བསྟན
དེ་ཉིད་ལ་ཡང་དོན་ལྔ་སྟེ
རབ་ཏུ་དབྱེ་སྟེ་བསྟན་པ་དང
ཚིག་ཙམ་དག་ཏུ་བསྟན་པ་དང
དབང་པོ་ཤིན་ཏུ་རྣོ་བར་བསྟན
རྟུལ་བ་དག་ཏུ་བསྟན་པ་དང
རབ་ཏུ་རྒྱས་པར་བསྟན་པའོ
དེ་བཞིན་ཚིག་དོན་གསང་བ་རྣམས
རབ་ཏུ་བཤད་ཅིང་མཚམས་སྦྱར་དང
༦༡
མིང་དང་མཚན་མའི་དངོས་པོ་རྣམས
རབ་ཏུ་བཤད་ཅིང་སྦྱར་བར་བྱ
མཚན་མ་ཉིད་ལ་ལྟོས་གྱུར་ན
ཡེ་ཤེས་སྟང་བ་འཆར་མི་འགྱུར
ཡེ་ཤེས་སྣང་བ་ཆེན་པོ་ཉིད
རབ་ཏུ་བཤད་ཅིང་བརྗོད་པར་བྱ
དེ་ཡང་རབ་བསྟན་འདི་ལྟ་སྟེ
མིང་དང་དངོས་པོ་འཛིན་པ་ཡིས
ལམ་ལ་ལྟོས་ན་ཡེ་ཤེས་མེད
སྣང་བ་མེད་པའི་ཆོས་ཉིད་ནི
རབ་ཏུ་བཤད་ནས་མཚན་བརྗོད་བྱ
ལེའུ་གསང་བ་འདི་ཉིད་ལས
གབ་དང་སྤས་པའི་ཚིག་ཉིད་བསྟན
ཡང་དག་ལམ་གྱི་ཚིག་ཉིད་བསྟན
མཚན་མ་རྡོ་རྗེའི་རྒྱས་གདབ་ཕྱིར
རབ་ཏུ་བཤད་པའི་རྒྱུད་ཆེན་འདི
བཤད་ནས་རྡོ་རྗེའི་དོན་དུ་གསུངས
དེ་ཉིད་ཡུལ་དང་སྤྲད་པའི་ཕྱིར
དཔེ་དང་དོན་ལ་སོགས་པ་ཡིས
གླེང་བསླང་དོན་ཉིད་བསྟན་པར་བཤད
དེ་ཕྱིར་མཚན་དོན་རྒྱས་པར་བསྟན
ཡང་དག་དོན་གྱི་དཀྱིལ་འཁོར་ཉིད
རྒྱས་པར་བསྟན་ཅིང་བཀྲལ་བའི་ཕྱིར
ལེའུ་འདི་ཉིད་གསུངས་པའོ
ཞེས་རིག་པ་རང་གྲོལ་ཆེན་པོའི་རྒྱུད་ཡས
ལེའུའི་དོན་བསྡུས་བསྟན་པའི་ལེའུ་སྟེ་བརྒྱད་པའོ
༄༩
དེ་ནས་འཇམ་དཔལ་གཞོན་ནུར་གྱུར་པ་སྐྱེས་བུ་དམ་པ་དེས
༦༢
འདི་སྐད་ཅེས་གསོལ་ཏོ
ཀྱེ་ཀྱེ་སྟོན་པ་ཡེ་ཤེས་སྐུ
ལེའུའི་དོན་བསྡུས་དེ་ལྟར་ན
བདག་ཅག་མོས་པའི་འཁོར་རྣམས་ལ
ལེའུའི་དོན་སྦྱར་བསྟན་དུ་གསོལ
ཞེས་ཞུས་སོ
དེ་ནས་ཡང་བཀའ་སྩལ་པ
ཀྱེ་མ་གཞོན་ནུར་གྱུར་པ་ཁྱོད་ཉོན་ཅིག
ངས་བསྟན་ལེགས་པར་ཡིད་ལ་ཟུང
དགོངས་པ་རང་གནས་ཡེ་ཤེས་དོན
ལེའུ་ཉིད་ལས་བཙལ་བར་བྱ
ང་ཡིས་རྣམ་བཤད་ལེགས་པར་བསྟན
ཁྱོད་ཀྱིས་མ་ཡེངས་གུས་པར་ཉོན
ལེའུའི་མཚན་རྣམས་འདི་ལྟ་སྟེ
རེ་ལྔ་རྗེས་སུ་ལུང་བསྟན་པ
དེ་ཉིད་ལ་ཡང་དོན་གསུམ་སྟེ
དཀྱིལ་འཁོར་ལྷ་ཡི་ལུང་བསྟན་དང
སྣང་བ་ཡུལ་གྱི་ལུང་བསྟན་དང
རིག་པ་སྟོང་པའི་ལུང་བསྟན་པའོ
རེ་དྲུག་སྦུབས་ཀྱི་འཕོ་ཚུལ་བསྟན
དེ་ཉིད་རྣམ་དོན་ལྔ་ཡིས་བསྟན
སྣང་བ་ཡུལ་གྱི་འཕོ་ལུགས་དང
རྟོགས་པ་ལམ་གྱི་འཕོ་ལུགས་དང
ཡེ་ཤེས་མིག་གི་འཕོ་ལུགས་དང
བག་ཆགས་སྣང་བའི་འཕོ་ལུགས་དང
སེམས་དང་ཡེ་ཤེས་འཕོ་ལུགས་སོ
རེ་བདུན་རྫོགས་ཆེན་གཏན་ཚིགས་བསྟན
དེ་ཉིད་ལ་ཡང་དོན་དྲུག་སྟེ
༦༣
གཉིས་མེད་རིག་པའི་གཏན་ཚིགས་དང
སྣང་བ་སེམས་ཀྱི་གཏན་ཚིགས་དང
རང་སྣང་ལམ་གྱི་གཏན་ཚིགས་དང
ཕྱིར་རྒོལ་སུན་འབྱིན་གཏན་ཚིགས་དང
སྟོང་པ་ཡེ་ཤེས་གཏན་ཚིགས་དང
རྣལ་འབྱོར་སྤྱོད་པའི་གཏན་ཚིགས་སོ
རེ་བརྒྱད་རྒྱུད་ཀྱི་སྡོམ་བྱང་བསྟན
དེ་ཉིད་རྣམ་དོན་བདུན་གྱིས་བསྟན
རིག་པ་ཡེ་ཤེས་སྡོམ་བྱང་དང
རྣལ་འབྱོར་སྟོང་པའི་སྡོམ་བྱང་དང
རྒྱུད་ཀྱི་ལོ་རྒྱུས་སྡོམ་བྱང་དང
ཀུན་གཞི་སེམས་ཀྱི་སྡོམ་བྱང་དང
གཏན་ཚིགས་ལུང་གི་སྡོམ་བྱང་དང
བདེ་ཆེན་ཐུགས་རྗེའི་སྡོམ་བྱང་དང
སྟོང་པ་ཚིག་གི་སྡོམ་བྱང་ངོ
རེ་དགུ་ཕྱིར་རྒོལ་ཚིག་གིས་སུན་འབྱིན་བསྟན
དེ་ཉིད་རྣམ་དོན་བཅུ་ཡིས་བསྟན
ལོག་ལྟ་ཚར་གཅོད་སུན་འབྱིན་དང
རང་གི་གྲུབ་མཐའ་བསྐྱང་ཕྱིར་དང
རང་གི་ཆེ་བ་ཁྱད་འཕགས་དང
སྣང་བའི་སེམས་རྫོགས་སུན་འབྱིན་དང
སྣང་བའི་དྲག་པ་སུན་འབྱིན་དང
ཡེ་ཤེས་ལམ་ཉིད་སྐྱབས་པ་དང
རིག་པའི་ལམ་ལ་སུན་འབྱིན་དང
སྣང་བ་རྟོག་པ་སུན་འབྱིན་དང
སྟོང་པ་སྟོང་པའི་སུན་འབྱིན་དང
ལམ་གྱིས་ཡེ་ཤེས་སུན་འབྱིན་པའོ
༦༤
བདུན་ཅུ་ཤེས་རབ་ཡེ་ཤེས་དབྱེ་བ་བསྟན
དེ་དོན་རྣམ་དོན་ཉི་ཤུ་སྟེ
དྲག་པོའི་ཤེས་རབ་ཁྱད་པར་དང
ལམ་སྟོན་སྟོང་པའི་ཤེས་རབ་དང
འཇུག་པ་ལམ་གྱི་ཤེས་རབ་དང
དེ་ཡི་མཚན་མའི་ཤེས་རབ་དང
རྟོགས་བྱེད་ཉེར་ཐབས་ཀྱི་ཤེས་རབ་དང
སྦྱོར་བ་ཡུམ་གྱི་ཤེས་རབ་དང
གསང་བ་ཡུལ་གྱི་ཤེས་རབ་དང
ཁྱད་པར་རྟགས་ཀྱི་ཤེས་རབ་དང
གོམས་པ་ཚད་ཀྱི་ཤེས་རབ་དང
སྣང་བ་སྐུ་ཡི་ཤེས་རབ་དང
རིག་པ་ལམ་གྱི་ཤེས་རབ་དང
ཤིན་ཏུ་མ་ཡེངས་ཤེས་རབ་དང
འཁོར་བ་འཁྲུལ་པའི་ཤེས་རབ་དང
ཚིག་མེད་སྟོང་པའི་ཤེས་རབ་དང
རྒྱལ་བ་རྟགས་ཀྱི་ཤེས་རབ་དང
མངོན་སྣང་ཡུལ་གྱི་ཤེས་རབ་དང
བསྒོམ་པ་འཛིན་པའི་ཤེས་རབ་དང
མཐའ་དབུས་མེད་པའི་ཤེས་རབ་དང
ལམ་བསྟན་འབྲས་བུའི་ཤེས་རབ་དང
གཏན་ཚིགས་སྟོང་པའི་ཤེས་རབ་དང
གཏན་ཚིགས་གཅིག་གི་ཤེས་རབ་པོ
དོན་གཅིག་རྒྱལ་བའི་རང་རྟགས་བསྟན
དེ་ཉིད་རྣམ་དོན་བཅུ་དགུ་བསྟན
རྒྱལ་བ་མྱ་ངན་འདས་རྟགས་དང
ཡེ་ཤེས་རྟོགས་པའི་དྲོད་རྟགས་དང
༦༥
སྣང་བ་མཐོང་བའི་རང་རྟགས་དང
ཡུལ་ལ་སྣང་བའི་མངོན་རྟགས་དང
ལམ་སྣ་ཟིན་པའི་མཚན་རྟགས་དང
བདེན་པ་མཐོང་བའི་དཔེ་རྟགས་དང
ཡང་དག་རྙེད་པའི་ཡུལ་རྟགས་དང
ཏིང་འཛིན་གོམས་པའི་སྟོབས་རྟགས་དང
འཇུག་པ་ཡུལ་གྱི་དུས་རྟགས་དང
རྣལ་འབྱོར་ལམ་གྱི་བསྒོམ་རྟགས་དང
མཚན་མ་མེད་པའི་སངས་རྟགས་དང
རྟགས་ལ་དཔེ་ཡི་རང་རྟགས་དང
མཐར་ཕྱིན་གྲོལ་བའི་དུས་རྟགས་དང
ཡུལ་དང་དབང་པོའི་བྱིང་རྟགས་དང
འདས་པའི་དུས་ཀྱི་མངོན་རྟགས་དང
རྗེས་འཇུག་དྲང་ཕྱིར་མངོན་རྟགས་དང
དོན་དམ་ཡུལ་གྱི་འབྲལ་རྟགས་དང
སེམས་ཉིད་དོན་གྱི་རང་རྟགས་དང
སྣང་བ་རྒྱས་འདེབས་རྟགས་སུ་བསྟན
དོན་གཉིས་ཐབས་ཀྱི་འཇུག་སྒོ་བསྟན
དེ་ཉིད་རྣམ་དོན་བཅུ་ཡིས་བསྟན
གསང་སྔགས་ལམ་གྱི་ཐབས་བསྟན་དང
སྟོང་པ་སྙིང་པོའི་ཐབས་བསྟན་དང
རྟོགས་པ་ཚད་ཀྱི་ཐབས་བསྟན་དང
གསང་སྔགས་འབྲས་བུའི་ཐབས་བསྟན་དང
ཤེས་རབ་ཡུལ་གྱི་ཐབས་བསྟན་དང
ཡན་ལག་བཞི་ཡི་ཐབས་བསྟན་དང
༦༦
དཀྱིལ་འཁོར་དབང་གི་ཐབས་བསྟན་དང
མཉམ་ཉིད་ལམ་གྱི་ཐབས་བསྟན་དང
རྟོག་མེད་ཡུལ་གྱི་ཐབས་བསྟན་དང
དག་པ་དོན་གྱི་ཐབས་བསྟན་པའོ
དོན་གསུམ་ཕྲ་རགས་གསལ་བ་བསྟན
དེ་ཉིད་ལ་ཡང་དོན་གསུམ་སྟེ
མཚན་མ་དག་པའི་དྲི་མ་དང
འཛིན་པ་ཡུལ་གྱི་དྲི་མ་དང
ཤེས་བྱ་ནང་གི་དྲི་མའོ
དོན་བཞི་སྐུ་གསུམ་དབྱེ་བ་བསྟན
དེ་ཉིད་ལ་ཡང་དོན་གཉིས་ཏེ
མཚན་མ་མིང་གི་སྐུ་གསུམ་དང
ཡང་དག་དོན་གྱི་སྐུ་གསུམ་མོ
དོན་ལྔ་དབང་གི་སྡོམ་བྱང་བསྟན
དེ་ལ་རྣམ་དོན་གསུམ་གྱིས་བསྟན
གདམས་ངག་དོན་གྱིས་བསྟན་པ་དང
ཡང་དག་ཐོབ་ཕྱིར་བསྟན་པ་དང
རྫས་ལྔ་དག་གིས་བསྟན་པའོ
དོན་དྲུག་རང་གྲོལ་དགོངས་པ་བསྟན
དེ་ལ་རྣམ་དོན་བཅུ་ཡིས་བསྟན
སྣང་བ་ཡུལ་ལ་གྲོལ་བ་དང
རང་སྣང་མཁའ་ལ་གྲོལ་བ་དང
ཏིང་འཛིན་སེམས་ལ་གྲོལ་བ་དང
འབྱུང་བ་རྐྱེན་གྱིས་གྲོལ་བ་དང
རང་དོན་ལམ་གྱིས་གྲོལ་བ་དང
སྣང་བ་དྲུག་གིས་གྲོལ་བ་དང
ལྟ་བ་ཉིད་ལས་གྲོལ་བ་དང
རྒྱུ་རྐྱེན་ཆོས་ལས་གྲོལ་བ་དང
རྟོག་འཛིན་མཐའ་ལས་གྲོལ་བ་དང
༦༧
མཐའ་བཞི་དང་ལས་གྲོལ་བར་བསྟན
དོན་བདུན་ས་ལམ་བསྒྲུབ་མེད་བསྟན
དེ་ཉིད་ལ་ནི་དོན་བཞིས་བསྟན
སྦྱང་བའི་ཡུལ་དུ་མེད་པ་དང
དུ་མར་བགྲང་དུ་མེད་པ་དང
གནས་དང་འགྲོ་འོང་མེད་པ་དང
ས་ལམ་རིམ་པ་མེད་པའོ
དོན་བརྒྱད་རྫོགས་ཆེན་རང་སྐད་བསྟན
དེ་ལ་ཡང་ནི་དོན་གསུམ་སྟེ
ལྟ་བ་དོན་གྱིས་སྨྲས་པ་དང
སྤྱོད་པ་དོན་གྱིས་སྨྲས་པ་དང
སྒོམ་པ་དོན་གྱིས་སྨྲས་པའོ
དོན་དགུ་མི་གཡོ་མཉམ་གཞག་བསྟན
དེ་ཉིད་ལ་ཡང་དོན་གསུམ་སྟེ
རང་སྣང་ཉིད་ལས་མི་གཡོ་དང
རྣམ་གསུམ་དོན་ལས་མི་གཡོ་དང
སྒྲོན་མ་ཉིད་ལས་མི་གཡོའོ
བརྒྱད་ཅུ་འཇམ་དཔལ་སྨྲ་བཞི་བསྟན
དེ་ཉིད་ལ་ཡང་དོན་གསུམ་སྟེ
ཐབས་ཀྱི་སྒོ་ནས་སྨྲ་བ་དང
ཤེས་རབ་ཉིད་ཀྱིས་སྨྲ་བ་དང
ཕ་རོལ་སྒྲོལ་ཕྱིར་སྨྲ་བའོ
གྱ་གཅིག་གཤེགས་པ་རང་བྱུང་བསྟན
དེ་ཉིད་ལ་ཡང་དོན་གཉིས་ཏེ
རང་རང་ཚིག་གིས་སྨྲ་བ་དང
མཐུ་སྟོབས་སྒོ་ནས་སྨྲ་བའོ
གྱ་གཉིས་སྙིང་པོ་ཕུལ་བ་བསྟན
དེ་ཉིད་ལ་ཡང་དོ་གསུམ་སྟེ
རང་གིས་ཞུས་ཏེ་ཕུལ་བ་དང
༦༨
སྟོན་པས་བསྐུལ་ཏེ་ཕུལ་བ་དང
གསང་སྔགས་བྲིས་ཏེ་ཕུལ་བའོ
གྱ་གསུམ་མཚན་མ་ཟིལ་གནོན་བསྟན
དེ་ཉིད་རྣམ་དོན་བཅུ་གཅིག་གོ
མཚན་མའི་ཡུལ་ལ་གནོན་པ་དང
གཞན་དོན་སེམས་ཀྱིས་གནོན་པ་དང
ཡུལ་དང་ཤེས་པ་གནོན་པ་དང
སྒྲོན་མ་ཉིད་ཀྱིས་གནོན་པ་དང
རྣལ་འབྱོར་ལུས་ཀྱིས་གནོན་པ་དང
སྤྱོད་པ་རྒྱུན་གྱིས་གནོན་པ་དང
རང་དོན་རིག་པས་གནོན་པ་དང
ཡེ་ཤེས་ངོ་བོས་གནོན་པ་དང
ལམ་ཉིད་འབྲས་བུས་གནོན་པ་དང
གསང་སྔགས་དོན་གྱིས་གནོན་པ་དང
རིག་པ་སྟོབས་ཀྱིས་གནོན་པའོ
གྱ་བཞི་དགོངས་པ་ལུང་བསྟན་ནོ
དེ་ལ་རྣམ་དོན་གཉིས་ཀྱིས་བསྟན
ཚིག་ལ་བརྟེན་ཏེ་ལུང་བསྟན་དང
རྒྱུ་མཚན་བརྟགས་ཏེ་ལུང་བསྟན་པའོ
གྱ་ལྔ་རྒྱལ་བའི་རྟེན་བཞུག་བསྟན
དེ་ཉིད་རྣམ་དོན་དྲུག་གིས་བསྟན
སྐུ་ཡི་ཚད་དུ་བསྟན་པ་དང
གསུང་གི་ཚད་དུ་བསྟན་པ་དང
ཐུགས་ཀྱི་ཚད་དུ་བསྟན་པ་དང
ཐམས་ཅད་འདུས་པར་བསྟན་པ་དང
མོས་པ་བསྐྱེད་ཕྱིར་བསྟན་པ་དང
ཡང་དག་ཉིད་དུ་བསྟན་པའོ
གྱ་དྲུག་ཡོངས་སུ་གཏད་པ་བསྟན
༦༩
དེ་ཉིད་ལ་ཡང་དོན་བཞིས་བསྟན
སྟོན་པས་གཏད་པ་ཉིད་དང་ནི
དེ་ནས་ཞུ་བ་པོ་ཡིས་གཏད་པ་དང
སྡུད་པ་པོ་ཡིས་གཏད་པ་དང
དེ་ནས་ཡོངས་ལ་གཏད་པའོ
དེ་བཞིན་ལེའུའི་མཚན་སྦྱོར་རྣམས
རབ་ཏུ་མེད་ཅིང་སྤང་པའོ
ལེའུ་གཉིས་ཀྱིས་མཚན་བསྟན་པ
ལེགས་པར་བཀྲོལ་ཞིང་བཤད་པར་ཟང
རབ་ཏུ་རྒྱས་པར་བསྟན་པའོ
ཞེས་རིག་པ་རང་གྲོལ་ཆེན་པོའི་རྒྱུད་ལས
ལེ་ལག་དོན་བསྡུས་ཀྱི་ལེའུ་སྟེ་དགུ་པའོ
༄༡༠
དེ་ནས་ཡང་འཇམ་དཔལ་གཞོན་ནུར་གྱུར་པས་འདི་སྐད་ཅེས་གསོལ་ཏོ
ཀྱེ་ཀྱེ་བཅོམ་ལྡན་འདས་ཐུགས་རྗེ་ཆེན་པོ་དང་ལྡན་པ
ལེའུའི་དོན་དང་མཚན་བཤད་དེ་ལྟར་ལགས་ན
ཡོངས་སུ་བཟུང་བའི་ཐབས་གསུང་དུ་གསོལ
ཞེས་ཞུས་སོ
དེ་ནས་ཡང་བཀའ་སྩལ་པ
ཀྱེ་རིགས་ཀྱི་བུ་རྣམས་ཉོན་ཅིག
ངས་ཐབས་དམ་པ་བསྟན་གྱིས་ལེགས་པར་ཉོན་ཅིག
ཡང་དག་པའི་ཡེ་ཤེས་ལ་འཕེལ་འགྲིབ་མེད་དོ
ཡེ་ཤེས་ཀྱི་ལུས་ལ་ཡང་ཞིང་གཡོ་བ་མེད་དོ
ཡེ་ཤེས་ཀྱི་སྣང་བ་ལ་གསལ་བ་དང་མི་གསལ་བ་མེད་དོ
གསང་སྔགས་ཀྱི་ལམ་ལ་ཉེ་བ་དང་རིང་བ་མེད་དོ
༧༠
རང་གི་སྣང་བ་ལ་ཆེ་ཆུང་མེད་དོ
སེམས་ཅན་གྱི་དབང་པོ་ལ་རྣོ་བརྟུལ་མེད་དོ
དེ་ཅིའི་ཕྱིར་ཞེ་ན
སྣང་བ་ལ་བསྟན་དུ་ཡོད་པའི་ཕྱིར་ཐབས་ལ་ཆེ་ཆུང་མེད་དོ
དེ་ཅིའི་ཕྱིར་ཞེ་ན
གདམས་ངག་བསྟན་པས་ཐམས་ཅད་གྲོལ་བའི་ཕྱིར་རོ
སེམས་ཅན་གྱི་དབང་པོ་ལ་རྣོ་བརྟུལ་མེད་དོ
དེ་ཅིའི་ཕྱིར་ཞེ་ན
ངོ་སྤྲད་པས་ཆོག་པའི་ཕྱིར་རོ
དེའི་ཕྱིར་ན
སངས་རྒྱས་ཀྱི་ལམ་ལ་མཁས་པར་གྱིས་ཤིག
སངས་རྒྱས་ཀྱི་བདེན་པ་ཉི་ཤུ་རྩ་གཅིག་ངོ་ཤེས་པར་གྱིས་ཤིག
འབྲས་བུ་སྨིན་པའི་ཚད་ཤེས་པར་གྱིས་ཤིག
ཀྱེ་མ་རིགས་ཀྱི་བུ་སངས་རྒྱས་ཀྱི་དགོངས་པ་ལ་བར་མཚམས་མེད
རང་གི་དེ་བཞིན་ཉིད་ལ་ཟད་ཅིང་སྟོངས་པ་མེད་དོ
ལྟ་བ་རང་བྱུང་གི་ཡེ་ཤེས་ཉིད
གཟུང་འཛིན་གཉིས་ཀྱི་མཐའ་དང་བྲལ་བ་ཉིད་དོ
དག་པ་ཡེ་ཤེས་ཀྱི་ཡུལ་ལ་ཡངས་དོག་གི་མཐའ་དང་བྲལ་བའོ
དེ་ནས་བཅོམ་ལྡན་འདས་ཀྱིས་ཚིགས་སུ་བཅད་དེ་བཀའ་སྩལ་པ
ཨེ་མ་ཧོ་རང་བྱུང་བདེ་བ་ཉིད
ཕྱོགས་སུ་བལྟས་པས་གྲུབ་པ་མེད
བདེ་བའི་ཡུལ་ལ་བདག་ཏུ་རྟོག་པ་མེད
༧༡
གསང་བའི་ཡེ་ཤེས་མཛོད་རྣམས་རབ་ཏུ་བསྟན
ཡེ་ཤེས་ཀྱི་ནི་ཕྱོགས་འཛིན་སྤང
ལམ་རབ་བསམ་པ་མེད་པ་ཡི
འདས་པའི་ལམ་ལ་ཐུག་པ་མེད
རྒྱུད་ཀྱི་རྒྱལ་པོ་འདི་ཉིད་ལ
བཤད་ལུགས་བསམ་གྱིས་མི་ཁྱབ་ཀྱང
མདོར་བསྡུས་བཤད་ཀྱིས་འདི་བསྟན་ནོ
རྒྱུ་དང་ཡེ་ཤེས་མཚན་བཤད་བྱ
གསང་སྔགས་ལམ་དང་ཡེ་ཤེས་ཉིད
བཤད་པར་བྱ་བའི་རིམ་པར་གསུངས
ཐ་དད་ཉིད་ལས་གྲོལ་བ་ཉིད
ལམ་ཉིད་གསལ་བར་བྱ་བའི་ཕྱིར
གཏན་ཚིགས་ལམ་ལ་རབ་ཏུ་བཤད
ཡོངས་སུ་གཏད་པའི་ལེའུ་འདི
བཤད་པ་ཐམས་ཅད་མིག་ཏུ་འགྱུར
སྤང་བྱའི་ཡུལ་ལས་ཐར་བྱའི་ཕྱིར
ཐེ་ཚོམ་སོམ་ཉི་སྤང་ཕྱིར་འདི་བཤད་དོ
ཐེ་ཚོམ་དག་གིས་སེམས་ཅན་ལ
འདི་བཤད་པ་ཡིས་རྟོག་པ་སེལ
གསང་བསྔགས་ཀྱི་བཅུད་དག་ལ
འདས་པའི་རྗེས་སུ་གནང་བའོ
ཡོངས་སུ་གཏད་ཕྱིར་གསང་བ་བཤད
གཏད་པ་ལ་ནི་རྣམ་གཉིས་ཏེ
ཡོངས་སུ་གཏད་དང་རྗེས་སུ་གཏད
རྣམ་པ་གཉིས་སུ་འདོད་པ་དེ
དེ་ཉིད་ཡོངས་སུ་གཏད་པའི་ལེའུ་ལས
བཤད་པའི་རིམ་པ་མདོར་བསྟན་བྱ
༧༢
རྒྱལ་བ་རྟགས་དང་འདོད་པ་རྣམས
རབ་ཏུ་བཤད་ཅིང་གཏད་པའི་ཕྱིར
དེ་ཕྱིར་ཡོངས་སུ་བཤད་པ་བསྟན
བཤད་ལུགས་བསམ་གྱིས་མི་ཁྱབ་པའོ
འདི་ནི་གསང་བ་ཉིད་དུ་བསྟན
གསང་སྔགས་དགོངས་པའི་མཐར་ཐུག་ནི
ཚད་མ་འདི་ལས་ཤེས་པར་བྱ
གཞུང་དོན་གཏན་ཚིགས་རྒྱས་པའི་ཕྱིར
དེ་ཕྱིར་འདི་ཉིད་རྒྱས་པར་བསྟན
རྒྱུད་འདི་ཉིད་ནི་བཤད་བྱས་པས
ཐམས་ཅད་ཟིལ་གྱིས་གནོན་པར་འགྱུར
བྱ་བ་བྱེད་པ་ཐམས་ཅད་ཀུན
མཚན་མ་བཞི་ལས་གྲོལ་བར་འགྱུར
ཞེས་རིག་པ་རང་གྲོལ་ཆེན་པོའི་རྒྱུད་ལས
ཡོངས་སུ་བཟུང་བར་གཏད་པའི་ལེའུ་སྟེ་བཅུ་པའོ
རྒྱུད་ཆེན་པོའི་ལྡེ་མིག་ཏུ་བསྟན་པ
སྟོན་པ་སྟོབས་ལྡན་ཆེན་པོས
དུར་ཁྲོད་མེ་རི་འབར་བར
འཁོར་རྣམས་ཀྱི་རྟོག་པ་བསལ་བ
རྒྱུད་ཀྱི་ལྡེ་མིག་དུ་གསུངས་པའི་རྒྱུད
རིག་པ་རང་གྲོལ་ཆེན་པོ་རྒྱུད་ཅེས་བྱ་བ
རྫོགས་པ་ཆེན་པོའི་དོན་བསྟན་པ་རྫོགས་སོ
རྒྱ་རྒྱ་རྒྱ
སྔགས་གྱི་སྲུང་མས་སྲུངས་ཤིག
ས་མ་ཡ
རིག་པ་རང་གྲོལ་རྒྱུད་པ་མ་བུ་བཞི
དགེའོ
དགེའོ
དགེའོ