རིན་ཆེན་སྤུངས་པ་ཡོན་ཏན་ཆེན་པོ་སྟོན་པ་རྒྱུད་ཀྱི་རྒྱལ་པོ

རིན་ཆེན་སྤུངས་པ་ཡོན་ཏན་ཆེན་པོ་སྟོན་པ་རྒྱུད་ཀྱི་རྒྱལ་པོ Piled Gems 珠寶堆積密續

珠寶堆積密續,解釋了所有顯現的品質如何都是空間和意識的本質。

5 Piled Gems རིན་ཆེན་སྤུངས་པ་ཡོན་ཏན་ཆེན་པོ་སྟོན་པ་རྒྱུད་ཀྱི་རྒྱལ་པོ(Tib. rinpoche pungwa, རིན་པོ་ཆེ་སྤུང་བ་ , rin po che spung ba) 珠寶堆積密續

༄༡
༧༤
བོད་སྐད་དུ
རིན་ཆེན་སྤུངས་པ་ཡོན་ཏན་ཆེན་པོ་སྟོན་པ་རྒྱུད་ཀྱི་རྒྱལ་པོ་ཞེས་བྱ་བ
བཅོམ་ལྡན་འདས་དཔལ་ཀུན་ཏུ་བཟང་པོ་མཉམ་པ་ཉིད་དུ་ཤེས་པ་ཀུན་གྱི་རྗེ་ལ་ཕྱག་འཚལ་ལོ
འདི་སྐད་བདག་གིས་བསྟན་པའི་དུས་གཅིག་ན
སྣང་བ་རྣམ་པར་དག་པ་སྣ་ཚོགས་པ་དང་ཡོན་ཏན་ཐམས་ཅད་ཀྱི་འབྱུང་ཁུངས
གཉིས་སུ་མེད་པ་རིན་པོ་ཆེའི་གཞི་གསལ་བ་ཚད་མེད་ཅིང
གཞལ་དུ་མེད
དཔག་ཏུ་མེད
དམིགས་སུ་མེད
༧༥
བལྟར་མེད་པའི་དཀྱིལ་འཁོར་ཆེན་པོ་རང་ཤར
མི་འགྱུར་བའི་ཡེ་ཤེས་ལྔའི་རོལ་པར་རང་ཤར་ནས
ཐེག་པ་སྤྱི་དང་རང་གི་ལྟ་བ་གཅིག་མ་ཡིན
ཐ་དད་མ་ཡིན
མཉམ་པ་མ་ཡིན
མི་མཉམ་པ་མ་ཡིན
སོ་སོ་མ་ཡིན་གཅིག་ཏུ་མི་གནས་པའི་གཞི་ཚད་མེད་པ་འདི་ནི
ཆོས་ཐམས་ཅད་ཀྱི་བྱུང་ཁུངས་སུ་ཡེ་ནས་གནས་པའོ
དེ་སྐད་དུ་རང་གིས་རང་དོམས་པའི་ཚིག་ཏུ་རང་ཤར་རོ
འདི་སྐད་བདག་གིས་ཐོས་པའི་དུས་གཅིག་ན
བཅོམ་ལྡན་འདས་ཀུན་ཏུ་བཟང་པོ་རིན་པོ་ཆེ་འབར་བ་རྒྱན་སྤུངས་པ་ཞེས་བྱ་བ་ཉིད
༧༦
བཀོད་པ་རྣམ་པར་བརྒྱན་པ་རིན་པོ་ཆེ་འོད་འབར་བ་ཞེས་བྱ་བའི་ནམ་མཁའ་ལ
སངས་རྒྱས་ཐམས་ཅད་ཀྱི་སྐུ་རྡོ་རྗེ་དང
གསུང་རྡོ་རྗེ་དང
ཐུགས་རྡོ་རྗེ་དང
གནས་པ་ཆོས་ཀྱི་སྐུ་དང
སྣང་བ་ལོངས་སྤྱོད་རྫོགས་པའི་སྐུ་དང
ཤར་བ་སྤྲུལ་པའི་སྐུ་དང
དེ་དག་གི་ཁྱད་པར་གྱིས་སྣང་བ་རྣམས་དང
འཇིག་རྟེན་པ་དང
འཇིག་རྟེན་ལས་འདས་པའི་གཟུགས་འཛིན་པ་བསམ་གྱིས་མི་ཁྱབ་པ་ཐམས་ཅད་དང
ཆོས་ཀུན་རོ་གཅིག་པ་ཡེ་ཤེས་ཆེན་པོའི་རོལ་པ་ལ་ཐབས་གཅིག་ཏུ་བཞུགས་སོ
དེ་ནས་སངས་རྒྱས་ཐམས་ཅད་ཀྱི་ཆེ་བ་རང་བྱུང་གི་ཚིག་འདི་དག་རྣམས་སུས་ཀྱང་བཤད་པ་མེད་པར་རང་བྱུང་ངོ
ཨེ་མ་ཧོ
ངོ་མཚར་ཆེན་པོ་རྨད་ཀྱི་ཆོས
བྱས་པ་མེད་པའི་ངང་བཟང་ནས
སྐྱེ་མ་མྱོང་བའི་གཟུགས་ཀྱི་སྐུ
ཐོབ་པ་མེད་པའི་རང་ལུས་ཀྱི
མ་བསྒྲུབས་ཆེན་པོའི་སྐུ་ཐོབ་ནས
ཐོས་མ་མྱོང་བའི་ཆོས་ཀྱི་གཏམ
མ་བསྒྲགས་གྲགས་པའི་ཚུལ་གྱིས་ནི
ཡེ་ནས་གླེང་བའི་དོན་རྣམས་ཀུན
འདི་ཡི་ཚུལ་དུ་རང་ཤར་ཏེ
སྤྲོས་མེད་སྤྲོས་པའི་རྒྱུ་མེད་པས
༧༧
ཆོས་ཀུན་མཉམ་པ་ཆེན་པོ་ནི
ང་ཡིས་བཤད་ཀྱིས་ང་ལ་ཉོན
འདུས་པ་མེད་པའི་ངང་ཉིད་ནས
འབྲལ་བ་མེད་པའི་སེམས་སངས་པས
མ་ཕྱིན་རང་སར་འདུག་པའི་གནས
མི་སྣང་ཡེ་ཤེས་མེད་སྟོན་པ
མི་འབྱེད་ཤེས་རབ་ཆེན་པོའི་འཁོར
གཅིག་པས་ཐ་མི་དད་པ་ལ
གླེང་བྲལ་བརྗོད་པ་མེད་པ་ཡི
ཚིག་གི་རྒྱལ་པོ་འདི་དག་ཀུན
མིག་གི་མཐོང་བྱེད་མེད་པ་ཡིས
མ་བལྟས་མེད་པའི་ཡུལ་གཟིགས་ནས
ལུས་མེད་བསམ་བྲལ་ཐུགས་ལས་ནི
མ་གྲུབ་པ་ཡི་མགུར་ནས་དྲངས
སྨ་མེད་མི་སྣང་ལྗགས་ལ་ཡང
སྤྲོས་མེད་མི་འཛད་ཚུལ་དུ་བཀྲམ
ཡེ་མེད་སྟོང་ཞལ་ནས་ནི
འགྲོ་དང་འོང་མེད་དབུགས་ལས་བྱུང
མ་བསྒྲིབས་དངོས་མེད་ཚིམས་ལ་ཡང
བརྗོད་ཅིང་བཤད་པའི་རྟེན་མེད་པར
མ་གསུངས་ཐོས་པའི་ཚུལ་དུ་ཤར
༧༨
དུས་གསུམ་དུས་མེད་ཁྱད་པར་ལས
བར་དང་མཚམས་མེད་རྟག་རྒྱུན་གྱིས
ཐོག་མ་བར་དང་མཐའ་མེད་པར
དུས་ཚོད་གྲངས་རྣམས་ཡེ་ཟད་པར
མཉམ་པ་ཆེན་པོའི་སྒྲ་ལས་ནི
ཡེངས་པ་མེད་པའི་སྣང་བ་ཡང
རྣམ་རྟོག་རང་ལ་ཆ་མེད་པར
རང་བཞིན་རྫོགས་པ་ཆེན་པོ་ཡི
དོན་ཀུན་བློ་ཡི་དཀྱིལ་དུ་ཚུད
མི་སྣང་ཡུལ་ཀུན་རྟོག་པ་ཡང
མ་བཅད་རང་ས་ཉིད་དུ་ཆོད
འཁྲུལ་མ་མྱོང་བས་མ་རིག་རྩད
མ་བརྟགས་ཡེ་ནས་ཆོད་ནས་འདུག
གང་དུ་འདི་ཀུན་སུས་མ་ཚོར
རགས་པའི་འབྱུང་བ་བཞི་ཀུན་ཡང
ཐོག་མ་ཉིད་ནས་རང་དེངས་པར
འགྲོ་བའི་གནས་མེད་རང་སངས་པས
རང་ལུས་ཡེ་ནས་མེད་པར་ནི
སྔ་ཕྱི་མེད་པར་འདིར་ཡང་རིག
འདི་ཀུན་དུས་མེད་ཡེ་དུས་པས
གཅིག་དང་གཉིས་དང་དྲུག་གསུམ་གྱིས
སྣང་མེད་སྣང་དང་སྣང་ཕྱེད་སྣང
མི་སྣང་མཛད་པའི་སྒྲ་རང་སངས
ས་འཛིན་ས་ལ་གནས་པར་ནི
༧༩
ཡེ་ནས་འདུག་པ་སུས་མ་ཚོར
བགྲོད་དུ་ཡེ་ནས་མེད་པ་ཡི
ལམ་འདི་ཡེ་ནས་རང་ཉེ་བར
འདི་ནི་རང་ལ་ཡེ་འདུག་པས
སྔར་མ་མཐོང་སྟེ་རང་རིག་རྟུལ
མི་གནས་བསམ་འདས་དགོངས་པ་ནི
བསྒོམ་པ་མེད་པར་ཡེ་འདུག་པས
འདི་ཡང་ཨང་གིས་སྔར་མ་རིག
ཆགས་དང་འཛིན་པའི་ཞེན་ཡུལ་ནི
དང་པོ་ཉིད་ནས་ཆོས་ཉིད་ལས
འདི་ཀུན་རང་གི་རང་སྣང་བར
ཡེ་ནས་སྣང་བ་སྔར་མ་རིག
བདག་རྟོག་བཅིངས་པ་ཉོན་མོངས་ལྔ
ཡེ་ནས་རིག་པ་རང་ཤར་བས
ལྷན་ཅིག་གནས་པ་ཞལ་མ་འཚོ
ས་ཆུ་མེ་རླུང་འབྱུང་བ་བཞི
ཡེ་ནས་རང་གི་ལུས་ཡིན་པར
སུས་མ་མཐོང་བའི་མིག་དེ་བརྟུལ
ཡང་གསང་བསྡུས་པའི་མན་ངག་བཅུད
བར་མཚམས་མེད་པར་རང་རགས་པ
གང་གིས་འདི་ཉིད་མ་ཐོས་པར
རྣ་བའི་དབང་པོ་མེད་དམ་ཅི
རང་གནས་དབྱིངས་དང་རིག་པའི་དྲི
བྲལ་བའི་སྐབས་མེད་རང་འཁོར་བ
ཚོར་མ་མྱོང་བ་སྣ་འགགས་སམ
བཅུད་གསུམ་མན་ངག་གིག་དྲིལ་ལོ
ཡེ་ནས་ལུས་སེམས་བཅུད་ཡིན་པས
འདི་ཉིད་མ་མྱོང་ལྕེ་ཆད་དམ
༨༠
སྣང་བ་རང་འོད་ཁ་དོག་རྒྱན
རང་གི་ལུས་དང་འབྲལ་མེད་པར
ལུས་དང་གྲིབ་མ་བཞིན་དུ་ནི
ཉིན་དང་མཚན་མོ་མེད་འདུག་པ
སུས་ཀྱང་མ་རིག་ལུས་བེམ་མ་མ
སྡུག་བསྔལ་ཕྱག་འདེད་བདེ་བའི་ཆོས
བརྗོད་པ་མེད་པར་རང་གནས་པ
སུས་མ་ཤེས་པ་བློ་རི་བརྟུལ
འཁོར་བའི་བག་ཆགས་ཡང་བརྩེགས་པ
ཡེ་ནས་ཆོས་ཀྱི་སྐུར་འདུག་པས
གང་གིས་མ་མཐོང་སྙིང་རྗེའི་གནས
དབང་པོ་བདག་རྟོག་ཡུལ་ཤར་ནས
དྲན་བསམ་འགྱུ་བ་སྣ་ཚོགས་རྣམས
ཡེ་ནས་ལོངས་སྐུར་རང་ཤར་བས
འདི་ཀུན་མ་དྲན་བརྗེད་རི་ངས
བྱ་བྱེད་ཐ་དད་རྩོལ་བསྒྲུབ་དང
སྐྱེ་བོ་འདུས་པའི་ཅ་ཅོ་ཀུན
ཡེ་ནས་སྤྲུལ་པའི་སྐུ་ཡིན་པས
སུས་མ་ཤེས་པ་ངོ་རེ་བརྟུལ
ཅི་ལྟར་བསམ་དང་དྲན་འགྱུས་པ
ཆུ་ཡི་རྒྱུན་བཞིན་བར་མེད་པར
རྟག་ཏུ་རང་གི་ཡིད་འཕྲོག་པར
རྩོལ་མེད་རང་བཞག་བསྒོམ་པར་ནི
ཉམས་སུ་མ་ཚུད་སེམས་རེ་ཡེངས
སྣོད་བཅུད་ཡོད་ཐོས་སྣང་བ་འདི
བརྟགས་པས་རང་བཞིན་མེད་པ་ཡང
གྲོང་ཁྱེར་རྒྱུན་གཅོད་ལྟ་བ་ནི
ཡེ་ནས་འདུག་པ་མ་མཐོང་བར
༨༡
དབང་པོ་རྣམས་ཀྱི་སྒོ་འགགས་སམ
འདི་ཀུན་མ་ཕྱེད་འབྱེད་མེད་པར
མི་སྣང་མེད་པའི་ཡུལ་ཉིད་དུ
མ་ལུས་ཡོད་པའི་འཁོར་རྣམས་ལ
མ་བཤད་གསུངས་པ་མེད་པ་ཡི
ཚིག་གི་རྒྱལ་པོ་རྣམས་སུ་ནི
མི་སྣང་གཅིག་པའི་འཁོར་རྣམས་ཀྱིས
སུ་ལ་ཞུས་པ་མེད་པར་ནི
རྣ་བའི་དབང་པོས་མ་ཉན་པར
མ་གླེངས་བསྒྲགས་པའི་ཚུལ་དུ་སྣང
མ་གཏད་རང་སོར་བཞག་པ་ཡི
སེམས་ཀྱིས་འདི་ཡི་ཚིག་ཀུན་ཀྱང
སུས་ཀྱང་བསླབ་པ་མེད་པར་ནི
སོ་སོའི་བློ་ལ་གོ་བར་སྣང
འདི་ཉིད་རང་གི་བློར་གོ་བས
མི་སྣང་རྟོག་པ་མེད་པ་ཡིས
སྣང་བ་ཐམས་ཅད་རང་དག་ནས
ཐམས་ཅད་ཟང་མ་ཐལ་བྱུང་དུ
སྟོང་གསལ་ཆེན་པོའི་རིགས་སུ་འགྱུར
ས་ཆུ་མེ་རླུང་འབྱུང་བ་བཞི
སོ་སོའི་ནུས་པ་མི་སྣང་བར
ན་བུན་བཞིན་དུ་མཁའ་ལ་དེངས
འཁྲུལ་པའི་ཞེན་པ་སྣ་ཚོགས་ནི
ཅི་ལྟར་བསམ་ཀྱང་སྐྱེ་མེད་པར
གཟུང་འཛིན་ཆ་རྣམས་རང་འགགས་ནས
གང་མི་སྣང་སྟེ་རང་ཟད་ནས
གསལ་བྱེད་རང་གི་ཉམས་མྱོངས་པས
ལུས་ཅན་ཀུན་ཀྱང་དེ་བཞིན་སོང
༨༢
ལུས་མེད་རྣམས་ནི་སྨོས་ཅི་དགོས
སུས་ཀྱང་གླེང་བ་མེད་པ་ཡི
ངོ་མཚར་ཚིག་ནི་འདི་ཀུན་གྱིས
སྟོན་པ་འཁོར་དང་སྡུད་པ་ཀུན
རང་བཞིན་གྱིས་ནི་དལ་བ་ཐོབ
དེ་སྐད་སུས་ཀྱང་མ་གསུངས་པའི་རང་ཤར་བའི་ཚིག་ཏུ་རང་བྱུང་བས
སྟོན་པ་ཀུན་ཏུ་བཟང་པོ་དང་སངས་རྒྱས་ཐམས་ཅད་ཀྱི་སྐུ་གསུང་ཐུགས་ཀྱི་འཁོར་ལོ་ལ་སོགས་ཏེ
འཇིག་རྟེན་པ་དང་འཇིག་རྟེན་ལས་འདས་པའི་འཁོར་དང་བཅས་པ་རང་བྱུང་གི་ཡེ་ཤེས་དང་ལྡན་པར་གྱུར་ནས
རང་རྟོག་གི་ཞེན་པ་རྣམས་ལས་གྲོལ་ལོ
ཞེས་རིན་ཆེན་སྤུངས་པ་ཆེན་པོའི་རྒྱུད་ཀྱི་རྒྱལ་པོ་ལས
རང་བྱུང་གི་ཡེ་ཤེས་རང་གིས་རང་རྙེད་པ་ཞེས་བྱ་བ་སྟེ
གླེང་གཞི་རང་གྲགས་ཀྱི་ལེའུ་སྟེ་དང་པོའོ
༄༢
དེ་ནས་སྟོན་པ་ཀུན་ཏུ་བཟང་པོ་རིན་པོ་ཆེ་སྤུངས་པའི་རྒྱན་ཞེས་བྱ་བ་དེས
འཁོར་དེ་དག་ལ་བོས་ནས་འདི་སྐད་དུ་ཚིག་གི་དོན་རྣམས་རྣམ་པར་བསྐུལ་ལོ
ཀྱེ་མ་ཕྱོགས་བཅུའི་འཇིག་རྟེན་སྟེང་དང་འོག་གི་ཡང
ཁམས་གསུམ་ནས་ནི་སུས་ཀྱང་མ་གསུངས་པའི
གསང་བ་ངོ་མཚར་ཆེན་པོ་རྨད་ཀྱི་ཆོས
འདི་ལྟར་བདག་སོགས་རྣམས་ཀྱི་བློ་གཏིང་ཡིད་ཆེས་བྱ
༨༣
འདི་དོན་སངས་རྒྱས་སྟོང་གིས་བྱིན་བརླབས་པས
འཁོར་བའི་བག་ཆགས་རྣམས་ནི་གཏན་ནས་སྦྱངས
གསང་ཆེན་ངེས་པའི་ཚིག་འདི་སུས་ཐོབ་པ
བླ་མེད་མཆོག་རྣམས་འདི་ཡིས་ངང་དུ་ལོངས
དེ་ཕྱིར་ངེས་པའི་སྙིང་པོ་འདིར་འཇུག་བྱ
ཞེས་གསུངས་པས
འཁོར་དེ་དག་གི་ནང་ནས
སངས་རྒྱས་ཐམས་ཅད་ཀྱི་གསུང་རྡོ་རྗེ་ཞེས་བྱ་བས་འདི་སྐད་ཅེས་གསོལ་ཏོ
ཀྱེ་ཀྱེ་རིན་ཆེན་སྤུངས་པ་ཡི
སྟོན་པ་ཀུན་ཏུ་བཟང་པོ་ཉིད
སྔར་ཡང་སྟོན་པས་མ་གསུངས་པའི
ཚིག་གི་རྒྱལ་པོ་དེ་དག་ཀུན
སྟོན་པ་གང་གིས་གསུངས་པ་ལགས
དེ་ཡི་འཁོར་ནི་སུ་ཞིག་ཡིན
གནས་ནི་གང་ན་ཚིག་དེ་གསུང
འདི་ཀུན་བདག་གིས་མ་རིག་ན
སྟོན་པ་ཉིད་ཀྱི་ཐུགས་རྗེ་ཡིས
ཐུགས་ཀྱི་དཀྱིལ་ནས་བཅུད་ཕྱུང་ལ
བདག་ལ་འདི་ཀུན་གསུང་བར་ཞུ
དེ་ནས་སྟོན་པའི་གསུང་གིས་ཡང
རྡོ་རྗེ་འཆང་ཆེན་ཁྱོད་ཉོན་ཅིག
ངས་བསྟན་པ་ལ་ནོར་བ་མེད
མ་འཁྲུལ་ནོར་མེད་སེམས་ཀྱིས་ཀྱང
ཁྱོད་ཀྱིས་འདི་ཀུན་བློ་ལ་ཞོག
༨༤
གསང་མཆོག་ངེས་པའི་ཚིག་འདི་ཀུན
སྟོན་པ་སུས་ཀྱང་གསུངས་པ་མེད
རང་བྱུང་ཆེན་པོའི་ནམ་མཁའ་ལ
རང་རྩལ་རིག་པ་མ་འགགས་པས
སྤྲོས་མེད་ཆོས་ཉིད་རང་སྒྲ་ནི
མ་བསྟན་རང་བྱུང་ཆེན་པོ་ཡང
ཐོག་མ་ཉིད་ལས་རང་གྲགས་པར
རྒྱུན་མ་ཆད་པའི་ཆོས་ཀུན་གྱིས
རང་གི་སྒྲར་ནི་ཡེ་ནས་གྲགས
དེ་ཕྱིར་རང་བྱུང་ཆེན་པོ་ཞེས
ཚིག་གིས་མཚོན་པ་ཀུན་ཏུ་འབྱུང
དེ་ཕྱིར་རང་བྱུང་ཡེ་ཤེས་ཞེས་བྱ་བ
རང་གི་རང་བྱུང་རང་ཤར་བ
ཆོས་ཉིད་སྟོང་པའི་རང་སྒྲར་ནི
ཡེ་ནས་ཆོས་ཀྱི་འཁོར་ལོ་བསྐོར
རང་བྱུང་ཆེན་པོའི་ཚིག་ཏུའོ
དེ་ལ་འཁོར་དུ་སྣང་བ་མེད
སྣང་བྱེད་འཛིན་པའི་ཆ་དག་ལས
ཕྱི་ཡི་ཡུལ་རྣམས་འཁོར་ལྟར་སྣང
ལས་དང་སེམས་གཉིས་འདུས་པ་ཡི
འབྱུང་བ་འདུས་པའི་གཟུགས་མེད་པས
འཁོར་དུ་སྣང་བ་ཙམ་དུ་མེད
རིག་དང་ཡེ་ཤེས་ཁྱད་པར་ལས
དག་པ་རང་ངོ་མཚོན་པ་ཡིས
༨༥
སྣང་བ་རགས་པའི་ཕུང་པོ་ནི
སྣང་བྱེད་འཛིན་པའི་འཁོར་གྱི་ཚུལ
འདི་ནི་རྣལ་འབྱོར་གསང་བའི་མཆོག
འདི་ཡི་གནས་ནི་འདི་ཞེས་བྱ
མིང་དུ་གྲགས་པའི་མཚན་བཅས་ཡུལ
རྣམ་པ་གང་དུ་མི་སྣང་བས
མེད་པའི་སྟོང་པ་ཆོས་འབྱུང་ལས
གསང་བ་ཆེན་པོའི་ངང་དབྱིངས་སུ
ཡེ་ཉིད་ནས་ནི་གནས་པས་ན
མ་བཟུང་གནས་ཀྱི་ཚུལ་ཅན་དུ
རོལ་པ་ཆེན་པོར་ཐོག་མར་བྱུང
འདི་ལ་སུས་ཀྱང་གནས་པ་མེད
གང་གིས་གནས་སུ་བྱས་པ་མེད
འདི་ལ་ཕུན་སུམ་ཚོགས་པ་མེད
འདུག་ཅིང་འོང་བ་ཉིད་དང་བྲལ
དེ་བཞིན་ཡེ་སྟོང་ཆེན་པོར་གནས
མེད་པ་ལས་ནི་དབྱིངས་ཀྱི་ཚུལ
འདི་ལ་ཕྱི་དང་ནང་ཡང་མེད
སྟེང་དང་འོག་ཏུ་བལྟ་བ་མེད
ཕྱོགས་དང་མཚམས་སུ་སུས་ཀྱང་ཡང
འདི་ལ་བཟུང་བ་ཅུང་ཟད་མེད
ལེན་མེད་དོན་འདི་སུས་རིག་པ
ཀུན་བཟང་ང་བས་སྔར་སངས་རྒྱས
ཡེ་ཐོག་དང་པོའི་སངས་རྒྱས་ཀྱི
མི་གནས་ཡེ་ཤེས་ཆེན་པོའི་གནས
སྔོན་ཐོག་ཉིད་ཀྱི་གཞི་རུ་ཡང
མ་བཞག་ཡེ་ནས་གནས་པའི་ཚུལ
འདི་ལ་གནས་སུ་འཛིན་པའི་མི
༨༦
སངས་རྒྱས་ཀུན་གྱི་གསང་བའི་གནས
འདི་ཡིས་སྙིང་པོ་བྱང་ཆུབ་པར
འཛིན་པ་ཉིད་དུ་འགྱུར་བ་ཡིན
ཞེས་གསུངས་པས
ངོ་མཚར་ཆེན་པོའི་སྤྲུལ་པ་རྣམས་རང་སྤྲུལ་ཏེ་ཐམས་ཅད་དུ་སྣང་བར་བྱས་སོ
དེ་ནས་གསུང་གི་རྡོ་རྗེས
བཅོམ་ལྡན་རིན་ཆེན་སྤུངས་པའི་རྒྱན་ཀུན་ཏུ་བཟང་པོ་ལ་འདི་སྐད་ཅེས་ཞུས་སོ
ཀྱེ་སྟོན་པ་ཆེན་པོ་ལགས
ངོ་མཚར་བ་ཞེས་བྱ་བའི་ཚིག་དེ་ཅི་ལྟ་བུ་ལགས
འདི་བདག་ལ་བསྟན་དུ་གསོལ
ཞེས་ཞུས་སོ
དེ་ནས་སྟོན་པ་ཀུན་ཏུ་བཟང་པོ་རིན་ཆེན་སྤུངས་པའི་རྒྱན་གྱིས་ཆོས་ཐམས་ཅད་ཡོན་ཏན་གྱི་འཆར་ཚུལ་ཅིར་ཡང་མ་འགགས་པར་གཟིགས་པས
རང་ལ་རང་ངོ་མཚར་ཏེ
རང་གིས་གད་མོ་ཆེན་པོའི་རྣམ་པ་ཉིད་ཀྱིས་ཉིད་ལ་རང་དགོད་པའི་འོད་དག་ལྗགས་ཀྱི་དབང་པོ་ལས་རང་ཤར་རོ
ཀྱེ་སངས་རྒྱས་ཐམས་ཅད་ཀྱི་གསུང་གི་རྡོ་རྗེ་སྙིང་པོ
ལྟ་བ་རང་བྱུང་གི་ཡེ་ཤེས་ལ་ལྟོས་དང
དགེ་སྡིག་དང་ལྟ་སྒོམ་ལས་འདས་པ་ངོ་མཚར
གཞི་མ་བསྐྱོད་པས་ལུས་ངག་གི་བྱ་བ་ཅི་བྱས་ཀྱང་ཕན་གནོད་དང་བྲལ་བ་ཧ་ཧ
ཀྱེ་གསུང་གི་རྡོ་རྗེ་དངོས་པོ་གཤིས་ཀྱི་གནས་ཚུལ་ལ་ལྟོས་དང
༨༧
སྣང་བ་འདི་སྤུ་མ་རྗེས་མདོག་མ་བསྒྱུར་བ་ངོ་མཚར
བདེ་སྡུག་ཅི་ལྟར་བསམས་ཀྱང་དོན་ལ་འགྱུར་བ་མེད་པ་ཧ་ཧ
ཀྱེ་གསུང་གི་རྡོ་རྗེ་སྟོང་པ་ཆེན་པོ་ཀུན་འབྱུང་གི་ཡེ་ཤེས་ཉིད་ལ་ཕར་ལྟོས་དང
དྲན་བསམ་གྱི་སྤྱོད་པ་སྣ་ཚོགས་ཅི་བྱས་ཀྱང་རོལ་པར་རང་ཤར་ཏེ་ངོ་མཚར
ཅི་ལྟར་བྱས་ཀྱང་སྐྱེ་མེད་ཀྱི་ཀློང་དུ་འགག་མེད་གྲོལ་བ་ཧ་ཧ
ཀྱེ་གསུང་གི་རྡོ་རྗེ་ཉིད་ཀྱང་ཉོན་དང
ཆོས་ཉིད་སྟོང་པ་ཀུན་ཁྱབ་ཀྱི་ཡེ་ཤེས་ལ་ལྟོས་དང
སྐྱེ་བ་མེད་པ་དང་ཡེ་ནས་ལྷན་ཅིག་ཏུ་གནས་པ་ངོ་མཚར
སྐྱེས་བུས་མཚོན་རྣོན་པོ་ཐོགས་ནས་འགྲོ་བ་རྣམས་དུས་གཅིག་ལ་བསྒྲལ་ཀྱང
གང་ཟག་དེའི་རྒྱུད་ལ་ཕན་གནོད་དང་བྲལ་བ་ཧ་ཧ
གསུང་གི་རྡོ་རྗེ་རང་གི་ཤེས་པ་སྟོང་པ་ཀུན་སྣང་གི་ཡེ་ཤེས་ལ་ལྟོས་དང
གང་ལྟར་སྣང་བ་ཐམས་ཅད་རང་གི་གྲོགས་སུ་ཤར་བ་ངོ་མཚར
ཅི་ལྟར་སྣང་ཡང་རང་བཞིན་ལས་མ་གཡོས་པ་ཧ་ཧ
ཀྱེ་གསུང་གི་རྡོ་རྗེ་རིག་པ་སྟོང་པ་ཀུན་གྲོལ་གྱི་སྣང་བ་ལ་ལྟོས་དང
རང་གི་གཉེན་པོར་རང་ཆེ་བ་ངོ་མཚར
ཉོན་མོངས་པ་རྣམས་རང་གིས་རང་གྲོལ་བ་ཧ་ཧ
ཀྱེ་གསུང་གི་རྡོ་རྗེ་རིག་པ་སྟོང་པ་ཀུན་དག་གི་ངོ་བོ་ལ་ལྟོས་དང
༨༨
འབད་རྩོལ་མེད་པར་འབྲས་བུ་རང་ལ་རྙེད་པ་ངོ་མཚར
གཅིག་ཟིན་པས་འཁོར་འདས་ཐམས་ཅད་གཉིས་མེད་དུ་དག་པ་ཧ་ཧ
ཀྱེ་གསུང་གི་རྡོ་རྗེ་ངོ་བོ་སྟོང་པ་ཆེན་པོ་ཀུན་བཞག་གི་ཚད་ལ་ལྟོས་དང
འགྲོ་དྲུག་སྐུ་གསུམ་དུ་སྣང་བ་ངོ་མཚར
འགྲོ་བ་རྣམས་ཀྱིས་བསྒོམ་པ་རྡུལ་ཙམ་གྱི་ཆ་ཡང་མ་བྱས་པར་དུས་གཅིག་ལ་སངས་རྒྱས་པ་ཧ་ཧ
ཀྱེ་གསུང་གི་རྡོ་རྗེ་སྐུ་གསུམ་སྟོང་པ་ཆེན་པོ་ཡི་རྫོགས་ཀྱི་འབྲས་བུ་ལ་ལྟོས་དང
དུས་གསུམ་འདུ་འབྲལ་མེད་པའི་ཆོས་ཉིད་ངོ་མཚར
ཕ་རོལ་ཏུ་ཕྱིན་པ་དྲུག་མ་སྤྱད་པར་ཚོགས་རྣམས་དུས་གཅིག་ལ་རྫོགས་པ་ཧ་ཧ
ཀྱེ་གསུང་གི་རྡོ་རྗེ་རིག་པ་ཅེར་བཞག་སྟོང་པ་ཆེན་པོ་ཀུན་མཉམ་གྱི་ཡེ་ཤེས་ལ་ལྟོས་དང
བྱ་བྱེད་ཐམས་ཅད་རྒྱན་དུ་ཤར་བ་ངོ་མཚར
སྤང་ལེན་ཐམས་ཅད་ལྟ་བར་གྲོལ་བ་ཧ་ཧ
ཀྱེ་གསུང་གི་རྡོ་རྗེ་སྟོང་པའི་སྟོང་པ་ཡེ་སྟོང་ཆེན་པོ་ལ་ལྟོས་དང
སངས་རྒྱས་ཐམས་ཅད་གཡང་སར་འདུག་པ་ངོ་མཚར
བྱ་བྱེད་བསྒོམས་པས་ལྟུང་བར་འགྱུར་བ་ཧ་ཧ
ཀྱེ་གསུང་གི་རྡོ་རྗེ་མི་སྟོང་པའི་སྟོང་པ་དངོས་ཅན་ལ་ལྟོས་དང
༨༩
མེད་པ་ལ་བདག་ཏུ་འཛིན་པའི་ཐེག་པ་ངོ་མཚར
སྐྱེས་པས་སྐྱེ་མེད་ཐོབ་པ་ཧ་ཧ
ཞེས་གསུངས་པས
གསུང་གི་རྡོ་རྗེ་ལ་སོགས་པའི་འཁོར་དེ་དག་རྣམས་ངོ་མཚར་ཆེན་པོའི་ཚིག་གིས་རབ་ཏུ་ཚིམས་ནས
སྣང་བ་ཐམས་ཅད་ངོ་མཚར་ཆེན་པོར་ཤར་ནས
རང་སྣང་རང་གྲོལ་རང་ཐོབ་ནས
སྐུ་རྡོ་རྗེ་དང་གཉིས་སུ་མེད་པར་གྱུར་ཏོ
སྟོན་པ་ཉིད་ཀྱིས་མ་གསུངས་པའི་གད་མོ་ཆེན་པོ་རང་ལ་བརྒད་པས
རང་ལ་རང་ངོ་མཚར་སྐྱེས་སོ
ཞེས་རིན་པོ་ཆེ་སྤུངས་པའི་རྒྱན་ཞེས་བྱ་བ་རྒྱུད་ཀྱི་རྒྱལ་པོ་ལས་ངོ་མཚར་མཆོག་གི་ལེའུ་སྟེ་གཉིས་པའོ
༄༣
དེ་ནས་སངས་རྒྱས་ཐམས་ཅད་ཀྱི་གསུང་གི་རྡོ་རྗེས་འདི་སྐད་ཅེས་གསོལ་ཏོ
ཀྱེ་མ་སྟོན་པ་ཀུན་ཏུ་བཟང
གཞི་ཞེས་འཆར་ཚུལ་ཇི་ལྟ་བུ
ཡོན་ཏན་འཆར་ཚུལ་ཇི་ལྟ་བུ
ཡོན་ཏན་འཆར་སྒོ་གང་ཙམ་ལགས
སྟོང་པ་ཉིད་ལ་ཇི་ལྟ་བུའི
ཡོན་ཏན་རྫོགས་ཚུལ་བདག་ལ་གསུངས
དེ་ནས་ཉིད་ཀྱིས་བཀའ་སྩལ་པ
སྐྱེ་བ་མེད་པའི་ཆོ་འཕྲུལ་ལས
སངས་རྒྱས་རྣམས་ཀྱི་མཛད་པ་རུ
༩༠
ཡེ་ནས་འབྱེད་པ་མེད་པར་ནི
མ་འགགས་འགག་པ་མེད་པར་ཡང
སྣང་བ་ཉིད་ནི་ཡེ་དག་པར
རང་གི་ངོ་བོ་གནས་པ་སྟེ
མི་མཇེད་ཐུགས་རྗེ་ཆེན་པོ་ལས
ལྷུན་གྲུབ་དག་ལ་མ་ངེས་པར
འཆར་བྱེད་བརྒྱད་ཀྱི་ཚུལ་དུ་བྱུང
དེ་ནི་སྣང་ཚུལ་མ་འགགས་པས
ཐུགས་རྗེ་ལྷ་བུའི་འཆར་ཚུལ་ལས
སེམས་ཅན་ཀུན་གྱི་སྐྱོབ་པའི་གནས
སྣང་བ་རང་གསལ་འགག་མེད་པས
འོད་ལྔའི་གསལ་བྱེད་ཚུལ་དུ་སྣང
མཁྱེན་པའི་སྣང་ཆ་མ་འགགས་པས
ཡེ་ཤེས་དག་པའི་སྒོ་ཉིད་དུ
སྣང་བ་འགག་མེད་ལམ་ལྟར་ཤར
རང་སྣང་ལུས་ཀུན་མཐའ་རྫོགས་ཕྱིར
ཆོས་རྣམས་ཀུན་གྱི་སྐུ་ལྟར་སྣང
ཤེས་པའི་ངོ་བོ་གཅིག་ཡིན་པས
གཉིས་སུ་མེད་པ་ལྟར་ཡང་ཤར
དེ་ཉིད་རང་སར་གནས་པ་མེད
མཐའ་གྲོལ་ཆེན་པོའི་སྣང་བ་ནི
ངེས་མེད་ལྷུན་གྲུབ་གཞི་ལ་སྣང
རིག་པ་ཟང་ཐལ་གཅིག་རྫོགས་ཕྱིར
དག་པ་ཡེ་ཤེས་ཉིད་ཀྱི་སྒོར
ངོ་བོ་ཉིད་དང་འབྲེལ་བའོ
འབྱུང་ཚུལ་འགག་པ་མེད་པའི་ཕྱིར
སེམས་ཅན་རྣམས་ཀྱི་འབྱུང་ཁུངས་སུ
མ་དག་འཁོར་བའི་སྒོ་ལྟར་ཡང
༩༡
ཁྱབ་བྱེད་སྣང་བའི་ཆ་ལ་ཤར
འདི་ཀུན་འཆར་བྱེད་བརྒྱད་དུ་སྣང
འབྱུང་བའི་ཚུལ་དུ་རང་ཤར་བས
ལྷུན་གྱིས་གྲུབ་པའི་སྣང་བ་ཞེས
རིན་པོ་ཆེ་ཡི་ཚུལ་དུ་སྣང
དེ་ལྟར་སྟོང་གསལ་ཆེན་པོ་ལས
ཅི་མེད་ཅིར་ཡང་སྣང་བའི་ཚུལ
བྱུང་ཚུལ་ཡོན་ཏན་མ་འགགས་ཏེ
ལྷུན་གྲུབ་འཆར་བྱེད་མ་འགགས་པས
སྣ་ཚོགས་སྣང་བའི་རང་བཞིན་དུ
ཡོན་ཏན་ཆེན་པོ་རྣམས་སུ་སྣང
འཆར་བྱེད་སྒོ་རྣམས་བརྒྱད་ལ་ཡང
ཡོན་ཏན་བརྒྱད་ཀྱི་ཚུལ་དུ་ཤར
རིག་དྲུག་འབྲོས་ཁུང་རང་བཅད་ནས
འཁོར་བའི་དཔྱད་ཐག་ཆད་པ་རྣམས
སྙིང་རྗེའི་ཞགས་པས་བཟུང་བའི་ཕྱིར
སྐྱེ་ཤིའི་གཟུགས་ཀྱི་སྨེས་ཅན་ལ
ཐུགས་རྗེ་ཆེན་པོ་ཉིད་དུ་སྣང
འཁོར་འདས་རང་འབྲེལ་ཡོན་ཏན་དུ
གཉིས་ཆ་འདྲེས་པའི་ཚུལ་དུ་སྣང
འདི་མེད་འཁོར་འདས་ལྟེ་ཆད་པའི
རྟོག་པ་མེད་པའི་སྐྱོན་འགྱུར་བས
ཡོན་ཏན་བྱུང་ཚུལ་འདི་ཙམ་མོ
སངས་རྒྱས་ཀུན་གྱི་རང་ཡུལ་ལ
ལུས་དང་གྲིབ་མ་ཅི་བཞིན་དུ
སྣང་བའི་འོད་ལྔས་ཁྱབ་པའི་ཕྱིར
༩༢
ནང་གི་སྣང་ཆ་རང་གསལ་བས
འོད་ལྔའི་ཚུལ་གྱི་འཆར་སྒོ་ལས
ཡོན་ཏན་གསལ་བྱེད་ཕྱིར་མ་ཤོར
འདི་མེད་སེམས་ཅན་རང་འོང་ལ
རྒྱ་ཆད་ཀུན་ཏུ་ཆད་པར་འགྱུར
ཟུང་འཇུག་འཆར་བྱེད་འབྲེལ་པའི་ཕྱིར
རང་སྣང་ཡོན་ཏན་ཆེན་པོ་འབྱུང
ལུས་ཀུན་གཅིག་ཏུ་འདྲིལ་བའི་ཕྱིར
སྐུ་གསུམ་གཅིག་ཏུ་གནས་པས་ན
ངོ་བོ་སྐུ་ཡི་རང་བཞིན་དུ
རང་སྣང་ནང་དུ་མི་འབྱེད་པས
ངོ་བོ་གསལ་བྱེད་སྐུ་ལྔར་ཤར
འདི་མེད་ངོ་བོ་མི་རྙེད་པར
ལུས་ཀུན་རྫོགས་པའི་སྐུ་ལྟར་སྣང
དེ་ཀུན་ཐ་དད་མ་ཡིན་པར
གཉིས་མེད་མཉམ་པར་གནས་པས་ན
འབྱེད་མེད་གཉིས་སུ་མེད་པ་ཡི
སྣང་བས་ཕྱི་དང་ནང་ཀུན་དུ
ཁྱབ་བྱེད་ཆེན་པོའི་ཚུལ་དུ་ཤར
འདི་མེད་རང་ངོ་ཐ་དད་པས
འཁོར་འདས་འདྲེས་པའི་མཚམས་མི་སྦྱོར
རང་ས་ཉིད་ལས་མི་གྲོལ་བས
བསྒྱུར་བཟློག་མེད་པའི་སྐྱོད་འགྱུར་བས
སྣང་བྱེད་ཡོན་ཏན་ཚུལ་དུ་ཤར
ཤེས་བྱ་ཀུན་ལ་རབ་ཁྱབ་པས
བཞི་སྦྱོར་ཆེན་པོའི་སྣང་བ་ནི
འཁོར་འདས་འབྲེལ་པའི་ལམ་དུ་སྣང
༩༣
འདི་མེད་གཞི་ལམ་མི་འབྱོར་བས
ཡེ་ཤེས་བཞི་ཡི་ལམ་ཉིད་དུ
སེམས་ཅན་རྣམས་ཀྱི་གསང་ལམ་དུ
སྣང་བ་བཞི་ཡི་ཚུལ་དུ་ཡང
ཅིག་ཆར་པ་དང་རིམ་གྱིས་སུ
དབང་པོའི་སྒོ་རྣམས་ཡིད་བཞིན་སྣང
མཐའ་བཞིའི་དྲི་མ་ལས་འདས་པའི
འཆར་བྱེད་ཡོན་ཏན་མ་འགགས་པས
མཐའ་གྲོལ་ཆེན་པོའི་སྣང་ཚུལ་དུ
ལྷུན་གྲུབ་རང་རྫོགས་ཆེན་པོ་ལས
ངེས་པའི་ཀ་དག་ལ་སྦྱོར་ཕྱིར
མཐའ་དང་བྲལ་བའི་ཡེ་ཤེས་སུ
འདི་ཉིད་རང་བྱུང་རང་ཤར་བས
མཐའ་ལས་གྲོལ་བའི་སྣང་བས་ན
ངོ་བོ་ཉིད་དང་འབྲེལ་བར་སྣང
འདི་མེད་ངེས་པ་མི་ཐོབ་པས
རྒྱུ་འབྲས་ལྡོག་པའི་སྐྱོན་འགྱུར་བས
མཐའ་གྲོལ་ཉིད་དུ་ཡང་དག་སྣང
ཡོན་ཏན་འཆར་ཚུལ་མ་འགགས་པས
འཁོར་བ་སྐྱེད་པའི་བྱུང་ཁུངས་ནི
མ་དག་པ་ཡི་འཆར་སྒོ་ལྟར
བྱུང་ཚུལ་འགག་པ་མེད་པར་ཤར
འདི་མེད་འཁྲུལ་པའི་མིང་མེད་པས
དེ་ཕྱིར་མ་དག་འཁོར་བའི་སྒོ
སྲིད་པ་རྣམས་ཀྱི་རྒྱུ་སྲིད་དུ
སྣང་བ་འགག་མེད་ཚུལ་དུ་ཤར
མ་དག་འཁོར་བའི་སྒོ་ཞེས་བསྟན
ཐོད་རྒལ་ཡེ་ཤེས་ཡོད་པས་ན
དག་པ་ཉིད་ཀྱིས་དག་པ་མཚོན
༩༤
འཆར་བྱེད་སྣང་བ་སོ་སོ་ལས
དག་པའི་ཡེ་ཤེས་ཆེན་པོའི་སྒོ
ཟང་ཐལ་རྣམ་པ་གསུམ་དུ་འཆར
འདི་མེད་རང་རྩལ་མི་རྫོགས་པས
དག་པའི་ཡེ་ཤེས་ཆེན་པོའི་སྒོར
ངོ་བོ་ཀ་དག་རྟོགས་ཕྱིར་ཤར
ཀྱེ་མ་གསུང་གི་རྡོ་རྗེ་ཉོན
དེ་ཀུན་སྐྱོན་ཡོན་འཆར་ཚུལ་ཏེ
རིག་པ་ཉིད་ཀྱི་ཡོན་ཏན་ནམ
རོལ་པའི་རྩལ་དུ་ཐིམ་ལུགས་བརྒྱད
ལྷུན་གྲུབ་ངེས་པ་མེད་པའི་གཞི
ཡོན་ཏན་ཚུལ་དུ་འདི་ལྟ་བུ
ཐུགས་རྗེ་ཉིད་དུ་ཐུགས་རྗེ་ལས
རང་གིས་ངོ་བོར་རང་ཐིམ་པས
མ་བཞག་ཐོབ་པའི་ཚུལ་གྱིས་ནི
མཛད་པ་མེད་པའི་ཀློང་དུ་འདས
མི་མཛད་ཅིར་ཡང་མ་ཡིན་པས
བྱེད་སྤྱོད་ཐམས་ཅད་མྱ་ངན་འདས
མ་བྱས་བྱེད་པར་སང་མེད་པས
འདུས་བྱས་རྣམས་ནི་དག་པའི་ཀློང
དེ་ཉིད་རང་ལ་རང་ཐིམ་པས
གཞན་དུ་སོང་བ་མ་ཡིན་ནོ
དཔེར་ན་ཉི་མའི་སྙིང་པོ་ལ
རང་གི་ཟེར་རྣམས་རང་ཐིམ་ལྟར
རང་གི་གདངས་དང་བཅས་པ་ཡིས
གཟིགས་སྣང་ཐམས་ཅད་མྱ་ངན་འདས
འདི་ཀུན་ཡོན་ཏན་རིན་པོ་ཆེ
སྐྱོན་ལ་མི་གནས་རང་སའོ
རང་འོད་རང་ལ་ཐིམ་པ་ནི
༩༥
འདི་ཡང་ཡོན་ཏན་ཆེན་པོར་བཤད
རང་གི་ངོ་བོ་རྣམ་དག་པར
མཚན་མར་འཛིན་པའི་ཞེན་ཡུལ་འགགས
འབྱུང་བ་བཞི་ཡི་རགས་པ་ཡང
འདིར་མི་སྣང་སྟེ་ཞེན་པ་ལོག
རང་དག་སྟོང་པ་ཆེན་པོ་ལས
ཁ་དོག་བདག་འཛིན་མྱ་ངན་འདས
འདི་ཡང་གཞན་དུ་སོང་བ་མེད
རང་གི་ངོ་བོར་རང་ཐིམ་པས
སྣང་བ་ཐམས་ཅད་མྱ་ངན་འདས
འོད་ཀྱི་དཀྱིལ་འཁོར་རང་ཐིམ་པས
དཔེར་ན་ནམ་མཁའ་འཇའ་ཚོན་ཉིད
ནམ་མཁའ་ཉིད་ལས་རང་ཡལ་ལྟར
མི་འབྱེད་ཆེན་པོའི་ཀློང་ཡངས་སུ
འཛིན་ཆགས་ཐམས་ཅད་མྱ་ངན་འདས
འདི་ཡང་ཡོན་ཏན་རིན་པོ་ཆེའི
ཡོན་ཏན་འཆར་ཚུལ་འདི་ལྟ་བུ
ཡེ་ཤེས་ཉིད་ལ་ཡེ་ཤེས་ཉིད
རང་གི་ངོ་བོར་རང་ཐིམ་པས
ཤེས་པ་འཛིན་རྟོག་དྲན་བསམ་ནི
རང་གནས་མཉམ་པ་ཉིད་ཀློང་དུ
ཐམས་ཅད་གཉིས་མེད་མྱ་ངན་འདས
སོ་སོའི་ཡེ་ཤེས་སྣང་ཆ་ཡང
བྱས་པ་མེད་པའི་ཀློང་དཀྱིལ་དུ
ནུབ་པ་མེད་པར་མྱ་ངན་འདས
དེ་ཉིད་རང་ལ་རང་ཐིམ་པས
ཡེ་ཤེས་རོལ་པ་སྣ་ཚོགས་ཀུན
༩༦
རང་ངོ་རང་ལ་ཐིམ་པ་ནི
དཔེར་ན་མ་པང་བུ་འཇུག་བཞིན
རང་གི་ཡེ་ཤེས་རང་ཡིད་ཆེས
རང་གི་རང་བཞིན་མྱ་ངན་འདས
འདི་ཡང་ཡོན་ཏན་རིན་པོ་ཆེན
ཡང་ནི་ཡོན་ཏན་ཐིམ་པའི་ཚུལ
སྐུ་ཉིད་སྐུ་ལ་རང་ཐིམ་པས
གཟུགས་སྐུ་མི་རྟོག་ཆེན་པོར་ན
སྣང་བ་མེད་པར་མྱ་ངན་འདས
རགས་པས་བསྡུས་པའི་འབྱུང་བ་དང
ཕྲ་བས་གཟུང་བའི་མ་རིག་སོགས
འབྱེད་པ་མེད་པར་མྱ་ངན་འདས
སྐུ་རྣམས་རང་ངོར་ཐིམ་པས་ནི
ཤེས་པའི་གཟུང་ཆ་ཕྱིར་མ་ཤོར
དཔེར་ན་བུམ་པའི་སྐུ་གཟུགས་བཞིན
ནང་གསལ་ཕྱི་ཡི་འགྱུ་བ་རྣམས
རང་བཞིན་མེད་པར་གནས་སུ་དག
འདི་ཡང་ཡོན་ཏན་རིན་པོ་ཆེ
ཡང་ནི་ཡོན་ཏན་འདི་ལྟ་བུ
གཉིས་མེད་གཉིས་མེད་རང་ཐིམ་པས
གྲངས་སུ་འཛིན་པའི་ཞེན་པ་རྣམས
ཉག་གཅིག་སྤྲོས་དང་བྲལ་བར་ནི
མི་གཉིས་གཅིག་པའི་ཚུལ་དུ་ཡང
རང་ཐིམ་ཉིད་དུ་མྱ་ངན་འདས
གཉིས་སུ་སྣང་བ་རང་ཐིམ་པས
དཔེར་ན་ཆུ་བོ་ཆུ་བོ་ལ
ཐིམ་པ་བཞིན་དུ་དབྱེར་མི་ཕྱེད
དབྱར་མེད་ཆེན་པོར་མྱ་ངན་འདས
འདི་ཡང་ཡོན་ཏན་རིན་པོ་ཆེ
༩༧
མ་འགགས་ཡོན་ཏན་འདི་ལྟ་བུ
མཐའ་གྲོལ་ཉིད་ནི་མཐའ་གྲོལ་ལ
རང་གི་ངོ་བོར་རང་ཐིམ་པས
སྐུ་གསུམ་འཛིན་པའི་རང་རྒྱུད་ཀུན
ཡུལ་རྣམས་ཟད་པར་མྱ་ངན་འདས
མཐའ་གཉིས་རང་དག་རང་ཐིམ་པས
དཔེར་ན་ནམ་མཁའ་ནམ་མཁའ་ལ
ཐིམ་པ་བཞིན་དུ་ངོས་བཟུང་མེད
མུ་བཞིའི་རྟོག་ཞེན་རང་འགགས་ནས
མི་གནས་ཆེན་པོར་མྱ་ངན་འདས
འདི་ཡང་ཡོན་ཏན་རིན་པོ་ཆེ
སྣང་བའི་ཡོན་ཏན་འདི་ལྟ་བུ
མ་དག་འཁོར་བར་རང་འཇུག་སྒོ
ངོ་བོ་ཉིད་ཀྱིས་དག་སྒོ་ལ
སོང་བ་མེད་པའི་ཚུལ་དུ་ཐིམ
དཔེར་ན་སྦྲ་ཡི་ཆོན་ཐག་རྣམས
བསྡུས་པས་དབུས་སུ་རང་འདུས་ལྟར
དབང་པོའི་སྤྱོད་ཡུལ་མྱ་ངན་འདས
འདི་ཡང་ཡོན་ཏན་རིན་པོ་ཆེན
འདི་ལྟར་ཡོན་ཏན་ཆ་རྫོགས་པར
དག་པའི་ཡེ་ཤེས་ཉིད་ཀྱི་སྒོ
ངོ་བོ་ཉིད་ལ་རང་ཐིམ་པས
སྐུ་དང་ཡེ་ཤེས་མྱ་ངན་འདས
དཔེར་ན་སེང་གེས་གངས་ཟིན་བཞིན
མི་ལྡོག་འཇིགས་མེད་གདིང་རྣམས་རྙེད
འདི་ཡང་ཡོན་ཏན་རིན་པོ་ཆེ
འདི་ལྟར་ཡོན་ཏན་འབྱུང་ཚུལ་གྱིས
གཅིག་པར་གནས་པའི་ཡེ་ཤེས་སོ
༩༨
མ་བཙལ་རང་གིས་རང་རྙེད་པས
སྔོན་ནས་དེ་ཡི་རང་བཞིན་ནོ
ཞེས་རིན་པོ་ཆེ་སྤུངས་པའི་རྒྱན་ཞེས་བྱ་བའི་རྒྱུད་ཀྱི་རྒྱལ་པོལ་ལས
ལྷུན་གྱིས་གྲུབ་པ་ངེས་པ་མེད་པའི་གཞིའི་བྱུང་ཚུལ་བསྟན་པའི་ལེའུ་སྟེ་གསུམ་པའོ
༄༤
དེ་ནས་སྔོན་པ་ཀུན་ཏུ་བཟང་པོ་རིན་པོ་ཆེ་སྤུངས་པའི་རྒྱན་ཞེས་བྱ་བ
དེ་ཉིད་ཆོས་ཉིད་རྣམ་པར་དག་པ་མཉམ་པ་ཉིད་གཉིས་སུ་མེད་པའི་རྡོ་རྗེ་ཞེས་བྱ་བའི་ཏིང་ངེ་འཛིན་ལ་བཞུགས་བཞིན་དུ
སངས་རྒྱས་ཐམས་ཅད་ཀྱི་གསུང་གི་རྡོ་རྗེ་སྙིང་པོ་ལ་འདི་སྐད་ཅེས་བཀའ་སྩལ་ཏོ
ཀྱེ་མ་གསུང་གི་རྡོ་རྗེ་ཉོན
ངས་བསྟན་ཚིག་ལ་འཁྲུལ་པ་མེད
མ་འཁྲུལ་ཡེ་ཤེས་ཆེན་པོའི་ལུང
ང་ཡིས་བསྟན་གྱིས་ཁྱོད་ཀྱིས་ཟུང
གནས་པ་མེད་པའི་སེམས་ཉིད་འདི
འགྲོ་ས་མེད་པ་ཡ་རེ་ཆ
ཀུན་ཏུ་འཇུག་པའི་ཡིད་དྲུག་ལ
བསྟན་པའི་ས་མེད་ཡ་རེ་ཆ
ཐམས་ཅད་བསྡུས་པའི་ཀུན་གཞི་ལ
བཞག་པའི་ས་མེད་ཡ་རེ་ཆ
འཁོར་ཞིང་འཁྲུལ་པའི་མ་རིག་ལ
འགྱུར་བའི་དབང་མེད་ཡ་རེ་ཆ
ཐམས་ཅད་ཡུལ་ཞེན་ཉོན་མོངས་ལ
གཞི་རྩ་མེད་པ་ཡ་རེ་ཆ
ཕྲ་དང་རགས་པའི་དྲི་མ་ལ
༩༩
ཆགས་པ་མེད་པ་ཡ་རེ་ཆ
འབྱུང་བ་རགས་པའི་གཟུགས་རྣམས་ལ
གཏད་པའི་ས་མེད་ཡ་རེ་ཆ
སྐྱེས་བུ་བརྟེན་པའི་ཚེ་སྲོག་ལ
དུས་བཏབ་མེད་པ་ཡ་རེ་ཆ
ཚོགས་དྲུག་ཡུལ་གྱི་སྣང་བ་ལ
རྟག་པ་མེད་པ་ཡ་རེ་ཆ
སྐྱེས་བུའི་དྲན་བསམ་བྱུང་ཚོར་ལ
ཟད་པ་མེད་པར་ཡ་རེ་ཆ
ལུས་ལས་འབྱུང་བའི་སྡུག་བསྔལ་ལ
དྭང་བ་མེད་པ་ཡ་རེ་ཆ
ཀྱེ་མ་གསུང་གི་བདག་ཉིད་ཉོན
གཞི་རྩ་མེད་པའི་སེམས་ཉིད་འདི
མ་བཙལ་བཞག་པ་ངོ་མཚར་ཆེ
འགྲོ་དང་འོང་བའི་རིག་པ་ལ
ཐུག་པ་མེད་པ་ངོ་མཚར་ཆེ
ཡེ་གནས་ཆེན་པོའི་ཡེ་ཤེས་ལ
གཉེན་པོ་མེད་པ་ངོ་མཚར་ཆེ
རང་སྣང་དག་པའི་འོད་ལྔ་ལ
ཤར་ནུབ་མེད་པ་ངོ་མཚར་ཆེ
ཤར་བ་མེད་པའི་སྒྲོན་མ་ལ
ནུབ་པ་མེད་པ་ངོ་མཚར་ཆེ
མ་བཀོད་གསལ་བའི་དག་དབྱིངས་ལ
ཕྱི་དང་ནང་མེད་ངོ་མཚར་ཆེ
ཆ་ཕྲ་སྤྲོས་མེད་ཐིག་ལེ་ལ
ལྔ་ལྔས་བརྒྱན་པོ་ངོ་མཚར་ཆེ
མི་འགྱུར་རིག་པའི་རང་སྐུ་ལ
འགྲོ་འོང་མེད་པ་ངོ་མཚར་ཆེ
སྣང་བ་རང་དག་ཆེན་པོ་ལ
མཐའ་མེད་རྒྱ་ཆེ་ངོ་མཚར་ཆེ
༡༠༠
དབྱིངས་དང་རིག་པ་རང་འབྲེལ་ལ
འགྲོ་བ་མེད་པ་ངོ་མཚར་ཆེ
སྟོང་པ་ཆེན་པོའི་འབྱུང་གནས་ལ
མཐའ་དབུས་མེད་པ་ངོ་མཚར་ཆེ
ཐོག་མའི་མགོན་པོ་དྲི་མེད་ལ
འགྲན་པའི་ཟླ་མེད་ངོ་མཚར་ཆེ
ཉག་གཅིག་རང་གནས་དགོངས་པ་ལ
བར་མཚམས་མེད་པ་ངོ་མཚར་ཆེ
ཨེ་མ་གསུང་གི་རྡོ་རྗེ་ཉོན
ཡང་ནི་ཡ་མཚན་འདི་ལྟ་བུ
འདི་ཀུན་སུ་ཡིས་འཛིན་པའི་མི
སངས་རྒྱས་སྟོང་གི་ཡོན་ཏན་འཆང
དེ་ཕྱིར་འདི་ཀུན་བསླབ་བྱའི་ཡུལ
རྩོལ་བསྒྲུབ་རང་དག་སྤྱོད་པ་ལ
དགག་བསྒྲུབ་མེད་པ་ཡ་མཚན་ཆེ
རང་བཞིན་བསམ་གཏན་པར་མེད་ལ
བྱིང་རྒོད་མེད་པ་ཡ་མཚན་ཆེ
གཏད་པ་མངོན་གསུམ་བལྟ་བ་ལ
རང་སྣང་རྫོགས་པ་ཡ་མཚན་ཆེ
ཡེ་ཡོད་འབྲས་བུ་རང་ཐོབ་ལ
དམིགས་གཏད་མེད་པ་ཡ་མཚན་ཆེ
མ་བཅོས་ཆོས་ཉིད་ཅོག་བཞག་ལ
ཐམས་ཅད་གསལ་བ་ཡ་མཚན་ཆེ
རང་འཛིན་ལོག་པའི་སྐུ་གསུམ་ལ
ཅིག་ཆར་རྫོགས་པ་ཡ་མཚན་ཆེ
བརྡལ་བ་ཆེན་པོའི་ནང་དབྱིངས་ལ
མཐའ་ལ་ཐུག་མེད་ཡ་མཚན་ཆེ
སྟོང་པ་ཆེན་པོའི་ཤེས་རབ་ལ
རྡུགས་པ་མེད་པ་ཡ་མཚན་ཆེ
༡༠༡
འབྲས་བུ་ཆོས་སྐུ་སྟོང་ཉིད་ལ
དངོས་པོ་ཟད་པ་ཡ་མཚན་ཆེ
དངོས་མེད་ཡེ་ཤེས་ཟང་ཐལ་ལ
གཟུང་བ་མེད་པ་ཡ་མཚན་ཆེ
རང་བཞིན་བབས་ཀྱིས་སྣང་བ་ལ
མཐོང་བ་མེད་པ་ཡ་མཚན་ཆེ
ཀྱེ་མ་གསུང་གི་རྡོ་རྗེ་ཉོན
འཛིན་པ་རང་དག་ཆོས་སྐུ་ཡིས
སྤྲོས་མེད་རང་དག་གཞལ་ཡས་སུ
ཉིད་དང་དབྱེར་མེད་སྣང་འཁོར་ལ
མཚན་མ་མེད་པའི་གསུང་གིས་ནི
སྤྲོས་པ་མེད་པའི་ཆོས་རྣམས་ནི
མི་གནས་རང་ཟད་ཐུགས་ལས་ཕྱུང
མ་གསུངས་གསུངས་པ་མེད་པར་ནི
མཉམ་པ་ཆེན་པོའི་ངང་དུ་བསྟན
རང་གསལ་དག་པའི་ལོངས་སྐུ་ཡིས
འོད་ལྔ་རྣམ་དག་གཞལ་ཡས་ནས
སྤྲོས་མེད་བདེ་ཆེན་གསུང་གིས་ནི
སྐུ་ལྔའི་རིགས་ཀྱི་འཁོར་རྣམས་ལ
དངོས་མེད་དག་པའི་ཆོས་རྣམས་ནི
ཡེ་ཤེས་ལྔ་འདུས་ཐུགས་ལས་ཕྱུང
རྣམ་དག་འོད་ཟེར་ལྗགས་ལ་བཀྲམ
རང་བྱུང་ཡི་གེ་དྲུག་ཏུ་ཡང
མ་གསུངས་རང་བྱུང་ཆེན་པོར་བསྟན
སྤྲུལ་སྐུ་དངོས་ཞེན་མེད་པ་ཡིས
ཆོས་འབྱུང་གདུལ་བྱའི་རྣག་གནས་ནས
༡༠༢
རིགས་དྲུག་ལས་སད་སྐལ་ལྡན་ལ
སྤྲོས་བཅས་ཚིག་གི་གསུང་གིས་ནི
དབང་པོར་གད་མོས་ཆོས་རྣམས་ཀྱང
དྲན་པ་རང་གསལ་ཐུགས་ལས་ནི
དབང་པོ་དོན་མེད་ལྗགས་ལ་བཀྲམ
ཐེག་པ་གྲངས་ཀྱི་ཆོས་སུ་བསྟན
ཨེ་མ་ཧོ་གསུང་གི་རྡོ་རྗེ་སྙིང
དེ་ལྟར་སྐུ་གསུམ་རང་ཤར་བས
སེམས་ཅན་བྱང་ཆུབ་སེམས་དཔའ་དང
སངས་རྒྱས་ཀུན་གྱི་ཐུགས་ཀྱང་ཚིམས
དེ་བཞིན་འགྲོ་རྣམས་རེ་བ་བསྐངས
དེ་ནས་གསུང་གི་རྡོ་རྗེ་ཡིས
སྟོན་པ་ཀུན་ཏུ་བཟང་པོ་ལ
ཚིག་འདིས་ཞུ་བ་ཉིད་ནི་ཞུས
ཀྱེ་ཀྱེ་སྟོན་པ་ཀུན་ཏུ་བཟང
དེ་ལྟར་སྐུ་གསུམ་བདག་མེད་ཚིག
ཆོས་ཀུན་རོ་གཅིག་ཉིད་གསུངས་པ
དེ་ལྟར་གསུངས་པའི་དོན་དེ་ཀུན
མ་འོངས་སེམས་ཅན་ཉིད་ཀྱིས་ཀྱང
ཉམས་སུ་ཇི་ལྟར་བླང་བར་བགྱི
འདི་ཀུན་རིམ་པས་མ་འཚལ་ན
འདི་རྣམས་སྟོན་པས་གསུང་བར་ཞུ
དེ་ནས་སྟོན་པས་འདི་སྐད་གསུངས
ཀྱེ་མ་སངས་རྒྱས་ཀུན་གྱི་ཡང
གསུང་གི་རྡོ་རྗེ་ཁྱོད་ཉོན་ཅིག
ངས་བསྟན་སྤྲོས་པའི་ཚིག་རྣམས་ལ
དོན་ནི་ཆེ་ལ་གྲངས་མང་སྟེ
འདི་ཀུན་བསྡུས་ནས་ཁྱོད་ལ་བསྟན
༡༠༣
འགྱུར་བ་མེད་པའི་སེམས་ཀྱིས་ཟུང
ཡིད་ལ་རབ་ཏུ་འཇུག་པ་ཡིས
དང་པོ་དབང་མཆོག་ཉིད་ཐོབ་ནས
བསྐུར་རྒྱུ་འབད་བཅས་ཉིད་དང་ནི
རྫས་མེད་བརྡའ་ཡི་དབང་གིས་ནི
མི་འགྱུར་གཞི་ཉིད་གཟུང་བར་བྱ
དེ་ཉིད་བརྟན་པའི་ཡན་ལག་ཏུ
དམ་ཚིག་རྣམ་གཉིས་བསྲུང་བར་བྱ
འདི་ཀུན་སྔོན་དུ་བྱས་པ་ཡིས
ཐེག་མཆོག་རྒྱལ་པོའི་ནང་དུ་གཞུག
དེ་ཀུན་དངོས་གཞི་འདི་ལྟ་བུ
འདི་དག་བློ་རིམ་རྣམ་གཉིས་ཀྱིས
དོན་གྱི་ངོ་བོ་ཉམས་སུ་བླང
དམིགས་པ་ཡུལ་ཅན་བློ་རྣམས་ལ
སྒོམ་དང་བསྒོམ་བྱའི་ཐབས་ཀུན་བསྟན
རིག་པ་རང་སྣང་བློ་ཅན་ལ
ལྟ་བའི་ཐབས་རྣམས་གཅིག་ཏུ་བསྟན
དེ་ཀུན་སྡོམ་ཚིག་རྣམ་གཉིས་ཀྱིས
རིམ་པ་བྱེ་བྲག་རྣམ་ཕྱེས་ནས
སྐྱེས་བུ་རྣམས་ཀྱི་བློ་ལ་འཇུག
འདི་ཀུན་སྣང་བ་རང་དེངས་སོ
དེ་རིམ་བྱེ་བྲག་འདི་ལྟ་བུ
ཁྲིགས་ཆགས་ཉིད་དུ་ཉམས་སུ་བླང
བདག་པོ་བཞི་ཡི་ཚུལ་གྱིས་ནི
དོན་གྱི་ངོ་བོ་བཞི་ཡང་ཟུང
༡༠༤
དེ་ཡི་ཡུལ་རིག་རྣམ་བཞི་ཡིས
འདི་ལྟར་སྣང་བའི་སྐྱེ་རྒྱུན་གཅོད
བཞག་ཐབས་མན་ངག་རྣམ་བཞི་ཡིས
རིག་པ་གཏན་མེད་གནས་སུ་བཞག
དེ་དོན་དགོངས་པ་རྣམ་བཞི་ཡིས
སྣང་སྲིད་ཆོས་རྣམས་བདར་ཤ་བཅད
དུས་ཚོད་གདམས་ངག་རྣམ་བཞི་ཡི
ཆོས་རྣམས་ཀུན་ལ་རང་ཕྱ་ན་བྱས
དག་ལུགས་གྲོལ་བའི་གནད་བཞི་ཡི
ཉོན་མོངས་རྣམས་ལ་དབང་བསྒྱུར་རོ
དེ་ཡི་རང་གི་ཚད་འབེབས་པས
དཔེ་བཞིས་ཡིད་ཆེས་རང་ངོ་བསྟན
མི་འགྱུར་ལྟ་བའི་གདིང་ཆེན་བཞིའི
མི་ལྡོག་ཡེ་ཤེས་ཚད་ཀྱང་བཟུང
འདི་ལ་གོམས་པར་སུས་བྱས་པ
རང་བཞིན་རྫོགས་པ་ཆེན་པོ་ལ
འདི་ཡིས་རེག་གོ་ས་མ་ཡ
༡༠༥
འདི་ལྟར་གང་ལ་སྣང་གྱུར་པ
ཡེ་ཤེས་ཀུན་ཀྱང་ཕུགས་སུ་ཟིན
གསང་ཆེན་ཕྱག་རྒྱ་ཆེན་པོ་འཐོབ
སངས་རྒྱས་ཀུན་གྱིས་ངེས་པར་བཟུང
འཁོར་བའི་དོང་རྣམས་དུས་གཅིག་སྤྲུག
འཁྲུལ་པའི་སྣང་བ་བདར་ཤ་ཆོད
དེས་ན་འདི་ལ་བརྩོན་པར་བྱའོ
གསུང་གི་རྡོ་རྗེས་ཡང་གསོལ་པ
ཀྱེ་མ་སྟོན་པ་ཀུན་ཏུ་བཟང
སྟོན་པ་ཉིད་ཀྱིས་སྔར་གསུངས་པའི
དབང་དང་དམ་ཚིག་གཉིས་གསུངས་པ
འདི་ལ་བདག་ནི་ཐེ་ཚོམ་སྐྱེས
བདག་གི་ཐེ་ཚོམ་བསལ་བའི་ཕྱིར
སྟོན་པ་ཐུགས་རྗེ་ཆེན་པོ་ཡིས
རིམ་པས་ཕྱེ་ལ་བདག་ལ་གསུངས
དེ་ནས་ཉིད་ཀྱིས་ཡང་གསུངས་པ
ཀྱེ་མ་གསུང་གི་རྡོ་རྗེ་ཉོན
ངས་བསྟན་པ་ལ་ཐེ་ཚོམ་མེད
ཁྱོད་ཀྱིས་ཡིད་གཉིས་སྤོངས་ལ་ཟུང
གང་གིས་དབང་བསྐུར་འཛིན་པ་ཡི
སངས་རྒྱས་ཀུན་ལ་འདི་ཡིས་རིག
འདི་ལ་སྐྱེས་བུས་དབང་ཐོབ་ནས
རིག་པའི་སྐུ་ལ་རང་དབང་ཐོབ
དེ་བཞིན་ཕྱག་རྒྱ་ཆེན་པོ་ཐོབ
འདི་ལ་སྔགས་དང་ཕྱག་རྒྱ་མེད
དཀྱིལ་འཁོར་ལྷ་བཅས་མཆོད་པ་དང
འདི་ལ་དགོས་དོན་གང་ཡང་མེད
རྫས་དང་ཚོག་བཤམ་མི་དགོས
༡༠༦
འཇུག་དང་ཡེ་ཤེས་དབབ་ཏུ་མེད
འོན་ཀྱང་བླ་མའི་གསུང་དག་གིས
གདམས་པའི་འདི་ལ་གོམས་བྱའི་ཕྱིར
འདི་དོན་འཇུག་པའི་བརྡ་དོན་གྱིས
རང་གི་ངོ་བོའི་ཚིག་འདི་ཉོན
ཨ་ཧོ་གསུང་གི་རྡོ་རྗེ་ཉོན
ཤར་ཕྱོགས་ནམ་མཁའི་ཁམས་སུ་ཡང
ཁྱོད་ཀྱིས་གོམ་པ་ཀམ་ཀམ་བོར
ལྷོ་ཡི་ཕྱོགས་སུ་ཁ་ལྟོས་ལ
སོང་ལ་གོམ་པ་ཀམ་ཀམ་བོར
བོར་ལ་དེ་ཉིད་ཉམས་མྱོང་སྤྱོད
དེ་བཞིན་ནུབ་དང་བྱང་དུ་ཡང
ཁ་ལྟོས་གོམ་པ་ཀམ་ཀམ་བོར
དེས་ནི་རང་སེམས་གཉུག་མ་ཡིས
དཀྱིལ་འཁོར་ནང་དུ་ཞུགས་པ་ཡིན
ཡང་ནི་གསུང་གི་རྡོ་རྗེ་ཉོན
ནམ་མཁའི་དབྱིངས་སུ་ཡར་ལྟོས་དང
སྟེང་གི་ཉི་མ་རྣམ་པ་ལྔ
ཁྱོད་ཀྱི་མིག་གིས་འདི་ལ་ལྟོས
ལྷེང་ལྷེང་འོད་ཟེར་རྣམ་ལྔ་ལྟོས
དེས་ནི་རང་གི་རིག་ལྷའི་ངོ
ཐོག་མ་ནས་ནི་རང་གནས་བསྟན
ཡང་ནི་གསུང་གི་རྡོ་རྗེ་ཉོན
ཡང་ནི་བར་སྣང་སྟོང་པ་ལ
ཇེ་མཐོ་ཇེ་མཐོ་ཡར་སོང་དང
སོང་ཞིག་སོང་ཞིག་སླར་མ་ལྡོག
དེས་ནི་རྡོ་རྗེ་ལུ་གུ་རྒྱུད
༡༠༧
རང་གི་དབང་དུ་རང་དབང་གྱུར
ཉོན་ཅིག་གསུང་གི་རྡོ་རྗེ་ཉོན
དེ་དག་ཀུན་གྱི་དུས་ཉིད་དུ
ཕྱིན་པས་འགྲོ་བའི་ས་འདུག་གམ
འོན་ཏེ་འོང་བའི་ས་འདུག་གམ
མེད་པར་ཤེས་པ་དེ་བཞིན་དུ
མ་བཙལ་དོན་ཀྱང་དེ་བཞིན་ནོ
དེ་དུས་བསྲུང་བའི་མཚམས་འདས་པས
མེད་དང་གཅིག་པུ་ཕྱལ་བའི་ས
སེམས་ཉིད་མ་རྟོགས་ཞེན་མེད་པས
རང་སེམས་རྟོག་པས་བསྲུང་བྱ་བྲལ
དེ་ཡི་གྲོགས་སུ་དེ་འགྱུར་རོ
ཞེས་རིན་པོ་ཆེ་སྤུངས་པའི་རྒྱུད་ཀྱི་རྒྱལ་པོ་ལས་ངོ་མཚར་ཆེན་པོ་མཆོག་གི་བརྡའ
རྫོགས་པ་ཆེན་པོའི་རྣལ་འབྱོར་པ་རྣམས་ལ
བརྡའ་དབང་དུ་བསྐུར་བར་བསྟན་པའི་ལེའུ་སྟེ་བཞི་པའོ
༄༥
དེ་ནས་ཡང་སྟོན་པ་ཀུན་བཟང་གིས
རང་གི་དམ་ཚིག་འདི་སྐད་གསུངས
ཀྱེ་མ་གསུང་གི་རྡོ་རྗེ་ཡང
ཉོན་ཅིག་ང་ཡིས་འདི་སྐད་དུ
དག་པ་ཆེན་པོའི་ཚིག་ཉིད་དུ
འདི་སྐད་བཤད་ཀྱིས་ཁྱོད་ཀྱིས་ཟུང
ང་ནི་སྒྲ་ཚད་རང་རིག་ལ
ཡོན་ཏན་རིན་ཆེན་གཏེར་ཆེན་འཆང
འདི་ནི་བཅངས་པ་ཙམ་གྱིས་ཀྱང
ཟད་པ་མེད་པའི་ལོངས་སྤྱོད་ཐོབ
༡༠༨
ཟད་མེད་འདི་ལ་གང་གནས་པ
ནུབ་པ་མེད་པའི་གཏེར་ཆེན་རྙེད
གཏེར་འདི་གང་གིས་རྙེད་པའི་མི
ང་ཡི་ཡོན་ཏན་འདི་ལ་རྫོགས
ཆོས་ཅན་མཚན་མ་སྣང་དུས་སུ
ང་ཡི་ཡོན་ཏན་རང་སྣང་བས
འདི་ལ་བླང་དང་དོང་མི་བྱ
འགྲོ་བའི་སྡུག་བསྔལ་མྱོང་བའི་ཚེ
ང་ཡི་བདེ་བ་རང་ཤར་ཡིན
དེ་དུས་བདེ་སྡུག་དབྱེར་མེད་ན
ང་ཡི་ཡོན་ཏན་འདི་ལ་རྫོགས
དམྱལ་བ་བྱོལ་སོང་ཡི་དྭགས་ཀྱི
གཟུགས་སུ་ཡུལ་དུ་སྣག་བའི་ཚེ
ང་ཡི་སྐུ་ལ་རོལ་པ་ཡིན
འདི་ལ་ཡང་མེད་པའི་མི
ང་ཡི་སྐུ་ལ་འདི་ཡིས་རེག
གཏི་མུག་ཞེ་སྡང་འདོ་ཆགས་ནི
ཞེ་སྡང་དག་པོ་ནམ་སྐྱེས་ན
ང་ཡི་རིག་པ་རྟོག་མེད་ཡིན
འདི་ཉིད་རང་གིས་རང་གྲོལ་བས
ང་ཡི་དམིགས་པ་འདི་ཡིས་མཐོང
ཡིད་ཀྱི་དྲན་པ་ཕྱིར་སྣང་ཚེ
ང་ཡི་ཤེས་རབ་རང་དག་ཡིན
འདི་ལ་རྗེས་སུ་བཅོས་མེད་ན
ང་ཡི་སྒྲ་རྣམས་འདི་ཡིས་ཐོས
བསམ་པའི་རྟོག་ཚོགས་འདུས་པའི་ཚེ
ང་ཡི་ཏིང་འཛིན་མི་རྟོག་བཟང
འདི་ལ་ཞེན་པའི་བློ་མེད་ན
ང་ཡི་དྲི་རྣམས་འདི་ཡིས་ཚོར
རགས་པའི་ཚིག་ལ་བློ་ཞུགས་ཚེ
༡༠༩
ང་ཡི་ཉམས་མྱོང་ཤར་བ་ཡིན
འདི་ལ་གཅིག་དང་གཉིས་ཟད་ན
འདིས་ནི་ང་ཡི་རོ་ལ་མྱོང
འདི་ལྟར་སྣ་འཚད་ཐོས་ཚད་ཀུན
ཀུན་བཟང་ང་ཡི་རོལ་པར་ཤར
རོལ་པའི་འཆར་བྱེད་མ་འགགས་པས
ང་ཡི་ཡོན་ཏན་ཉིད་དུ་འབྱུང
ཡོན་ཏན་སྣང་བྱེད་ངས་བརྩམས་པས
ཟད་པར་མི་འགྱུར་ཟད་པ་མེད
དེ་ཕྱིར་སྐུ་གསུམ་ཕྱག་རྒྱའི་ཞིང
དེ་ནས་སྟོན་པ་ཉིད་རང་ལ་རང་ངོ་མཚར་བའི་ཚིག་གི་རྒྱལ་པོ་འདི་རང་བྱུང་དུ་གསུངས་སོ
ཨེ་མ་ཧོ་གསུང་གི་རྡོ་རྗེ་སྙིང་པོ་ཁྱོད་ཉོན་ཅིག
རང་གི་རིག་པ་ཉིད་སྐྱེ་ཤི་དང་བྲལ་བའི་གནད་ཀྱིས
སེམས་ཅན་བྱེ་བའི་སྲོག་བཅད་པ་དང
ཕ་རོལ་དུ་ཕྱིན་པ་བཅུ་རྟག་ཏུ་སྤྱོད་པའི་གང་ཟག་ལ་ཁྱད་པར་རྡུལ་ཙམ་ཡང་མེད་པར་ཀུན་ཏུ་བཟང་པོ་ངས་བསྟན་པའོ
ཀྱེ་སངས་རྒྱས་ཀུན་གྱི་གསུང་གི་རྡོ་རྗེ
ཆོས་ཉིད་ལ་སྤྲོས་པ་མེད་པའི་གནད་ཀྱིས
རྟག་ཏུ་སྟོང་པ་ཉིད་ལ་གོམས་པར་བསྒོམས་པའི་སྐྱེས་བུ་དང
སྟོང་པ་ཉིད་སྐད་ཅིག་ཙམ་ཡང་ཡིད་ལ་མ་བྱས་པའི་གང་ཟག་གཉིས
འཚང་རྒྱ་བ་ལ་ཁྱད་པར་རྡུལ་ཙམ་ཡང་མེད་པར་ཀུན་ཏུ་བཟང་པོ་ང་ཉིད་ཀྱིས་བསྟན་པའོ
༡༡༠
ཀྱེ་གསུང་གི་རྡོ་རྗེ་རིག་པ་ཉིད་འདུས་མ་བྱས་པའི་གནད་ཀྱིས
འདུས་བྱས་ཀྱི་དགེ་རྩ་དཔག་ཏུ་མེད་པ་བྱས་པའི་དད་པ་ཅན་དང
སྲོག་གཅོད་པ་ལ་རྟག་ཏུ་བརྩོན་པའི་མི་གཉིས་ལ
ཚོགས་རྫོགས་པའི་སྒོ་ལ་ཁྱད་པར་རྡུལ་ཙམ་ཡང་མེད་པར་ཀུན་ཏུ་བཟང་པོ་ངས་བསྟན་པའོ
ཀྱེ་གསུང་གི་རྡོ་རྗེ་རིག་པའི་ཡེ་ཤེས་ལ་འགྲོ་འོང་མེད་པའི་གནད་ཀྱིས
ཆོས་ཉིད་ཀྱི་རྟགས་སྣ་ཚོགས་ལུས་ངག་ལ་བྱུང་བའི་སྐྱེས་བུ་དང
ཐོས་བསམ་ལ་བློ་སྐད་ཅིག་ཀྱང་མ་སྤྱངས་པའི་གང་ཟག་གཉིས་ངོ་བོ་མཐོང་བ་ལ་ཁྱད་པར་རྡུལ་ཙམ་ཡང་མེད་པར་ཀུན་ཏུ་བཟང་པོ་ངས་བསྟན་པའོ
ཀྱེ་གསུང་གི་རྡོ་རྗེ་ཆོས་ཉིད་ལ་སྐྱེ་འགག་མེད་པའི་གནད་ཀྱིས
དམྱལ་བ་ཚ་གྲང་ཉམས་སུ་མྱོང་བའི་སྐྱེས་བུ་དང
སངས་རྒྱས་རྣམས་ཀྱི་བདེ་བ་ཉམས་སུ་མྱོང་བའི་སྐྱེས་བུ་གཉིས་ལ
རྟོགས་པའི་སྐྱེ་སྒོ་ཐོབ་པ་ལ་ཁྱད་པར་རྡུལ་ཙམ་ཡང་མེད་པར་ཀུན་ཏུ་བཟང་པོ་ངས་བསྟན་པའོ
ཀྱེ་གསུང་གི་རྡོ་རྗེ་རིག་པ་ལ་འགྱུར་བ་མེད་པའི་གནད་ཀྱིས
ཡིད་ཆེས་ཀྱི་སྤྲོས་པ་ཆོད་པའི་སྐྱེས་བུ་དང
བདག་རྟག་པར་ལྟ་བ་གཉིས་ལ་ཀྱད་པར་རྡུལ་ཙམ་ཡང་མེད་པར་ཀུན་ཏུ་བཟང་པོ་ངས་བསྟན་པའོ
༡༡༡
ཀྱེ་གསུང་གི་རྡོ་རྗེ་ཆོས་སྐུ་རང་ལ་ཡོད་པའི་གནད་ཀྱིས
ཕྱི་རོལ་དུ་མཆོད་པ་དང
བསྟོད་པ་དང
གསོལ་བ་སྣ་ཚོགས་བཏབ་པའི་སྐྱེས་བུ་དང
ལས་བྱ་བྱེད་དང་བྲལ་བར་འདུག་པའི་སྐྱེས་བུ་གཉིས་ལ་འབྲས་བུ་ཐོབ་པ་ལ་ཁྱད་པར་རྡུལ་ཙམ་ཡང་མེད་པར་ཀུན་ཏུ་བཟང་པོ་ངས་བསྟན་པའོ
ཀྱེ་གསུང་གི་རྡོ་རྗེ
དེའི་ཕྱིར་ན་རང་བྱུང་ཆེན་པོའི་ཚིག་འདི་དག་ལ་སྤྱོད་པའི་སྐྱེས་བུ་ནི་འབད་པ་མེད་པར་ཉམས་སུ་ལོངས་པའི་གདིང་རྙེད་ནས
སྣང་བ་དང་སྐུ་གསུམ་དབྱེར་མེད་དུ་སངས་རྒྱ་བ་ཡིན་ནོ
ཚིག་འདི་དག་ཉན་ཐོས་དང
རང་སངས་རྒྱས་ལ་སོགས་པའི་ནང་དུ་རྡུལ་ཙམ་ཡང་བརྗོད་པར་མ་བྱེད་ཅིག
དེ་ཅིའི་ཕྱིར་ཞེ་ན
དེ་དག་རྣམས་ཀྱིས་ཚིག་འདི་ཀུན་ཐོས་པས་སྐྲག་པ་དང
སྡངས་པ་དང་བརྒྱལ་བར་འགྱུར་ཏེ་གསང་སྔགས་རྣམས་ལ་མི་མོས་ཏེ
ཡིད་བྱུང་དས་དེའི་རྣམ་པར་སྨིན་པས་སེམས་ཅན་དམྱལ་བ་ཆེན་པོ་ཉམས་སུ་མྱོང་བར་འགྱུར་བས་ན
བསྟན་ཅིང་ཐོས་པ་དག་ལྟ་ཅི་སྨོས་ཏེ
རླུང་ཕྱོགས་ཙམ་དུ་ཡང་བརྗོད་པར་མི་བྱའོ
༡༡༢
གསུང་གི་རྡོ་རྗེས་གསོལ་པ
ཀྱེ་བཅོམ་ལྡན་འདས་ཉན་ཐོས་ལ་སོགས་དེ་དག་ཀུན
དེ་ལྟར་འབྱུང་བ་ཅིའི་རྒྱུ་ལགས
ཞེས་ཞུས་སོ
བཀའ་སྩལ་པ
ཉན་ཐོས་དང་རང་རྒྱལ་རྣམས་ནི
སྐལ་བ་མེད་པས
གསང་སྔགས་རྣམས་ཀྱི་སྣོད་དུ་མ་གྱུར་བས་ན
བློ་ཆུང་བའི་ཕྱིར་ཏེ
དཔེར་ན་ཁབ་ཀྱི་མིག་ཏུ་རས་ཡུག་བརྫངས་པས་འགྲོ་ས་མེད་ཅིང
ཤོང་བའི་སྐབས་མེད་པ་དང་འདྲའོ
དེ་ནས་སྟོན་པ་ཉིད་ཀྱིས་ཀྱང
རང་གི་ཆེ་བའི་ཚིག་རྣམས་འདི་སྐད་ཅེས་ནི་རྣམ་པར་བསྒྲགས
ཆོས་སྐུ་རོ་གཅིག་མ་ཤེས་པས
ཐ་སྙད་ཚིག་ལ་བདེན་འཛིན་པར
ལུས་ཀྱིས་མི་ཐེག་ཁུར་ཁུར་འདྲ
དབྱིངས་རིག་གཉིས་མེད་མ་ཤེས་པར
མི་རྟོག་ལྟེང་པོ་སུས་བསྒོམ་པ
རི་བོ་སྐེད་པ་བསྙེག་དང་འདྲ
ཤུགས་འབྱུང་རང་ཤར་མི་ཤེས་པས
བྱ་བྱེད་རྩོལ་བ་སུས་འཛིན་པ
རི་མོ་མཁན་གྱི་ཚོགས་འཛིན་འདྲ
རང་བྱུང་འགག་མེད་མ་ཤེས་པར
སྣང་བ་བདེན་གཅིག་ངེས་འཇོག་པ
ལྷོན་ཤིང་སྲོག་དང་བྲལ་བ་འདྲ
སྐུ་གསུམ་ཡེ་རྫོགས་མ་ཤེས་པར
དེས་ལུང་གཞན་ནས་འཚོལ་བ་ནི
༡༡༣
གླང་པོའི་རྗེས་བཅད་མ་རྙེད་འདྲ
སྙིང་པོ་བཅུད་ཐིགས་མ་ཤེས་པར
རིག་པའི་རང་གདངས་སྟོན་པ་ནི
མཁའ་འགྲོ་སྙིང་ལ་ཟིན་པ་འདྲ
ཅོག་བཞག་རང་གྲོལ་མ་ཤེས་པར
ལྟ་བ་རྟོགས་པར་ཁས་འཆེ་བ
དབུལ་པོ་རྒྱལ་པོར་བརྫུས་བ་འདྲ
ལུས་ངག་དྲོད་རྟགས་མ་རྒྱས་པར
སྐྱེ་མེད་རྟོགས་པར་ཁས་འཆེ་བ
ལུང་པ་སྟོང་པའི་རླུང་དང་འདྲ
ལུ་གུ་རྒྱུད་ལ་མ་གོམས་པར
འཁྲུལ་སྣང་འགགས་པར་ཁས་ལེན་པ
མུན་ཁང་ནད་གི་མཛུབ་བཅུག་འདྲ
བླ་མེད་རྒྱུད་འདི་མ་ཤེས་པར
ཉམས་སུ་ལེན་པར་འདོད་པ་ནི
ཁ་བྲག་ལམ་དུ་ཞུགས་པ་འདྲ
གསུང་གི་རྡོ་རྗེ་སྙིང་པོ་ཁྱོད
དེ་ཡི་ཕྱིར་ན་གསང་བའི་རྒྱུད
འདི་ཉིད་འཛིན་པའི་སྐྱེས་བུ་ནི
རང་རིག་རྣམས་ཀྱི་དབང་ཐོབ་སྟེ
རྒྱུད་འདི་བཅང་བ་ཙམ་གྱིས་ནི
རྡོ་རྗེ་འཆང་གི་སྤྲུལ་པར་འགྱུར
རྒྱུད་འདི་སུ་ཡིས་བཀླག་པའི་མི
ལྟ་བའི་དོན་ཀུན་སེམས་ལ་འཆར
འདི་ཉིད་སུ་ཡིས་བྲིས་བ་དེ
སངས་རྒྱས་ཀུན་གྱི་གསུང་ལ་རོལ
དེ་ཡི་ཕྱིར་ན་དམ་པར་བྱའོ
ཞེས་རིན་ཆེན་སྤུངས་པའི་རྒྱུད་ཀྱི་རྒྱལ་པོ་ཆེན་པོ་ལས
༡༡༤
ཁྱད་མེད་མཉམ་པ་ཆེན་པོའི་ལེའུ་སྟེ་ལྔ་པའོ
དེ་སྐད་ཅེས་གསུངས་པས
སྐུ་གསུང་ཐུགས་རྡོ་རྗེ་ལ་སོགས་པའི་འཁོར་རྣམས་རྗེས་སུ་ཡི་རངས་ནས
བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ
རིན་པོ་ཆེ་སྤུངས་པའི་རྒྱུད་ཀྱི་རྒྱལ་པོ་ཞེས་བྱ་བ
འབུམ་ཕྲག་དྲུག་ཅུ་རྩ་བཞིའི་བཅུད་ཕྱུང་བ་རྫོགས་སོ
རྒྱ་གར་གྱི་མཁན་པོ་བི་མ་ལ་མི་ཏྲ་དང
བོད་ཀྱི་ལོ་ཙ་བ་སྐ་བ་དཔལ་བརྩེགས་ཀྱིས་བསྒྱུར་ཅིང་གཏན་ལ་ཕབ་པའོ
དཔལ་སྔགས་ཀྱི་སྲུང་མས་བཀའ་འདི་སྲུངས་ཤིག
དམ་ཚིག་ཉམས་པའི་སྙིང་ཁྲག་འཇིབས་ཤིག
ས་མ་ཡ
རྒྱ་རྒྱ་རྒྱ
ཨུ་ཡ་ཨ་ག་ཐ་མ
རིན་ཆེན་སྤུངས་པའི་?་མ་བུ་དྲུག
དགེའོ་དགེའོ་དགེའོ