یا شێخ سەنعانم
Jump to navigation
Jump to search
| یا شێخ سەنعانم، یا شێخ سەنعانم | عاشق پەی تەرسا، من چوون سەنعانم |
| بێ باک جە تانەی مەناو مەنعانم | چوون «یەعقوب» داغدار پەی مای «کەنعان»م |
| وامق پەی عوزار زوڵف عەنبەرینم | فەرهاد جە حەسرەت خاڵی شیرینم |
| جە بەهرام بەدتەر من نمەد پۆشم | گوڵ ئەندام سەندەن فام چەنی هۆشم |
| مەجنوونی لەیلم، بیابان گێڵم | عالەم مەزانان پەی لەیلێ وێڵم |
| زەدەی گوڵ جەمین وەنەوشە خاڵم | ها جەلاش هۆشم، فیکرم، خەیاڵم |
| من چوون سالکان ڕای عەشقم دایم | یا شێخ لاقەیدم جە لۆمەی لایم |
| نەواچان پی دەرد هەر من موبتەلام | سەد کەس ها چوون من بە ئایەی کەلام |
| هەزار کەس وەی تەور شێوەش ئی بازین | نیم بە حەقیقەت، نیم بە مەجازین |
| تا مەجاز نەبۆ حەقیق نمەبۆ | حەقیق بێ مەجاز تەحقیق نمەبۆ |
| ئەر حەقیقەتەن، ئەر مەجازییەن | دڵو من بە ئەو بەخوا ڕازییەن |
| گشت جە من فێشتەر حاڵشان فەنان | داخم هەر ئێدەن، هەر پەی من مەنان |
| گرد جە هام دەردی من حاشا کەران | سا خەڵقان بەیان تەماشا کەران |
| ئەر عاشق نەبان یەکسەر مەڵڵاو شێخ | فتوا بۆ سەیدی سەربڕان بە تێخ |
This work was published before January 1, 1929, and is in the public domain worldwide because the author died at least 100 years ago.
Public domainPublic domainfalsefalse