| یا حەیی بێ چوون، یا حەیی بێ چوون
|
یا «حَیّ» بێ میسل، بێ هەمتای بێ چوون
|
| یا فەرمان فەرمای ئەمری «کاف»و «نوون»
|
کەریمی کار ساز بە «كُنْ فَيَكُن»
|
| چوون تۆ نادر سونع کەسێوتەر چکۆن
|
«قادر» هەر تۆنی نادر سونعی تۆن
|
| هەفت ئاسمانان چەنی ستاران
|
بەرزی بێ ستوون وەپات و ناران
|
| «مُعَلَّق» وەبان ئەوان «کورسی»و «عەرش»
|
زەمینت بە دەست قودرەت کەردەن فەرش
|
| کێ دارۆ قودرەت سازۆ غەیر جەتۆ
|
ڕۆشنی زوڵمات شەوان چەنی رٌۆ؟!
|
| یا کێ قودرەتش جە «لەیل»ی «دەیجوور»
|
سوب کەرۆ سفید بە ڕۆ بدۆ نوور؟!
|
| یا خۆ کێ تاوان هەر شام و سەحەر
|
شەوق بدۆ بە مانگ، یا نوور دۆ بە خۆر؟!
|
| یا کێ بەرمارۆ حەیی بێ زەواڵ...
|
جە سەنگی خارا سەرچەشمەی زوڵاڵ؟!
|
| کێ جە نافی خار بەر ماوەرۆ گوڵ
|
کێ مەوزۆ عەشقش نە کەللەی بوڵبوڵ
|
| یە گشت کەردەی تۆن فەردی بێ شەریک
|
ئەگەر بۆ یۆتەر مەمانۆ خەریک
|
| مەزانۆ هەرکەس تۆش بە حەق ناسان
|
کاران گشت بە دەست تۆ مەیان ئاسان
|
| ئۆستای سنعەت خاس هەرکەس تۆش یادەن
|
حەق ناسی دڵ پاک، «مُؤْمِن» هەر ئادەن
|
| یادی تۆن ڕفێق شەو زیندە داران
|
تۆنی یارشان شەو بە ڕۆ ماران
|
| کانی «سەخا»و «جود»، کەرەمدار تۆنی
|
ڕەززاق پەی مەخلوق هەر ڕۆ هەر تۆنی
|
| تۆ جە خوانی «جود» ڕۆزیت دان قەرار
|
«ئینس»و «جین»و «تەیر»، «مەل»و «مۆر»و «مار»
|
| هەرچەندە زی ڕۆح رۆش نە حەیاتەن
|
یەکسەر تەسبیحی گۆیای سەناتەن
|
| «بوڵبوڵ» بە نەغمەی هەزار داستانش
|
زکری نامی تۆن ویردی زوبانش
|
| «کەبک»ی کۆکوان جە کۆسارەوە
|
کۆکۆی «قومرییان» وە جۆبارەوە
|
| حەمدەن، تەسبیحەن، سەنای زاتی تۆن
|
نامی تۆشان ویرد شەوان تا وە ڕۆن
|
| زاتی تۆ بەیتەور زاتێو نادرەن
|
بێ شک پەی ئیجاد گردچێو قادرەن
|
| ئیللا هەر پەی ئەو قودرەت نەدارۆ
|
یۆێو تەر چوون وێش بە ئیجاد بارۆ
|
| زاتت عەزیمەن، بێ حەد فراوان
|
عەقڵی کەس بە «کونە» ماناش نەیاوان
|
| ئەر عالم، ئەر شێخ، وەر پوڕ کەماڵەن
|
زوانش جە وەسف سەنای تۆ لاڵەن
|
| فەردی بێ شەرێک تەنیای تاکەنی
|
باک جە کێ داری تۆ بێ باکەنی
|
| جەلای تۆ کارخاس «حَیّ»ی بێ نەزیر
|
«شا» چێشەن، یا «خان» یا «میر» یا «وەزیر»
|
| دونیاو مافیها ئەر بۆ وێرانە
|
نە دارۆ میقدار باڵە تۆفانە
|
| یەک «طُرْفَةُ العَين» ئەر تۆ کەری قین
|
کۆ چوون قەترەی ئاو مەشۆ وە زەمین
|
| خەشمت عەزیمەن، کەرەم بێ سامان
|
کەس تەوانای قەهر تۆش نیەن ئامان
|
| ئێمە گرد بەندێ خەتاکارینمێ
|
جە خەتاباری گران بارێنمێ
|
| ئومیدمان بە عەفوو بێ سامانی تۆن
|
وەرنە کەردەی نیک جەلای ئێمە کۆن؟!
|
| غەرقی گێجی بەحر دەریای مەعاسی
|
نە ئەفعالی نیک، نە کەردەی خاسی
|
| بەد واچ و بەد گۆ، بەد کردارێنمێ
|
لایق بە عەزاب دەرگەی نارێنمێ
|
| جە هەزاراندا یەکێ خاس نیەن
|
چەنی خاسانمان هامسایی نیەن
|
| ئەر بە بەدکاری بگێری پێمان
|
قەت بەرنمەشۆ دەیاری لێمان
|
| بەڵێ تۆ کەریم کەرەم دارەنی
|
«سَتّارُ العُيوب»، هەم «غَفّار»ەنی
|
| ئەو ڕۆ عەفووت کەرد پێمان بە خەڵات
|
«قُلْ يا عِبادي لا تَقْنَطُو»ت وات
|
| تۆ خەتا ئامورز، گوناهـ بەخشەنی
|
بەخشەندەی بێ باک، دڵ نە لەخشەنی
|
| هەرچەند گوناهکار گوناش فێشتەرەن
|
تێغی عەفووی تۆ بەڕڕاو تێژ تەرەن
|
| پەرێ بەدیمان عەفووت تەلافین
|
لوتفی عامی تۆ پەی گشتین کافین
|
| خسوس پەرێ من گوناهکار تەرم
|
جە مایەی عوسیان سەنگینبار تەرم
|
| نامەی ئەعماڵم جە «عصيان» سیان
|
داغمەی بەدبەختیم بە دڵ دانیان
|
| «يا غافر الذَّنب» سڕ پۆشی «سَتّار»
|
بویەر جە جورمی سەیدی خەتاکار
|
