| یاران کەردەن ڕێش، یاران کەردەن ڕێش
|
یە جەرگ منەن خاران کەردەن ڕێش
|
| یە دیدەی منەن نوور نەمەندەن تێش
|
یە زام منەن زوخاو مەیۆ لێش
|
| یە دوود منەن دنیا گرت نەوەر
|
یە سۆز منەن سۆزان دەشت و دەر
|
| یە ئاهـ منەن وە ئاسمان یاوا
|
سەقف سەراچە گەردوون شکاوا
|
| یە سەدای منەن نەفخ سوور بێزان
|
وەختەن قیامەت مەحشەر ئەنگێزان
|
| یە ناڵەی منەن چون نەی مەدۆ دەنگ
|
مەیۆ وە قانوون مەتاونۆ سەنگ
|
| یە زاری منەن پۆسە زگارەن
|
عاڵەم جە زاری من بێ قەرارەن
|
| یە شین منەن شەوان تا بە ڕۆ
|
چون «قەیس» مەجنوون هام نە بێد و کۆ
|
| یە وێڵی منەن جە سوب تا ئێوار
|
دەور مەدۆ نە دەور سارا و سەردیار
|
| یە داخ منەن داخان جە داخان
|
داخ کەردەن لالەی هەرد ئێڵاخان
|
| هامسەران وەختەن وادەی مەرگم بۆ
|
من جە دووری دۆس گوڵگۆن بەرگم بۆ
|
