کۆنە شاری نەوێ و بەدەبەل
Jump to navigation
Jump to search
| یاران فانییە، یاران فانییە | شادی و بەشارەت دنیا فانییە |
| ڕۆژێ دەستەیی ساداتی تەمیز | بە سەرکردەیی شێخ عەبدولعەزیز |
| سواری ئەسپ بووین ڕۆیین بۆ شکار | ئەم شیو و ئەو شیو بە ڕوژ و نزار |
| ڕاوگەی ئەوەڵ ڕۆژ، دۆڵی دۆڵە سوور | ئەمجا بناری دەشتی شارەزوور |
| کولوس و چواڵە تا دوازدە برا | دەشتی «توتاخاج» هەموو ڕاو کرا |
| دەشتی «وەلەسمت» تا توی «بەردەبەل» | داپۆشرا بە سوار، لە دەشت تا بە کەل |
| خوڕین لە تانجی و هەی هەیی سوار | وەک ڕیزی سەرباز لە سەر تا بە خوار |
| لەبەر «بەردەبەل» ڕوانیم ئاسارە | دیارە کە جێگەی یەک گەورە شارە |
| قەیسەری و بازاڕ، سەرا و دوکانە | بنچینەی خانووی هەروا عەیانە |
| بەکورتی سێ ڕۆژ بە کەروێشکەڕاو | کەلاوەی شارمان بۆ نەکرا تەواو |
| لە ڕۆژی چوارەم کەروێشکێکمان کوشت | کە سەرمانبڕی و خوێنەکەمان ڕشت |
| خوێن ڕژا بەسەر بەردێکی پانا | کە خوێنی لێکەوت، لێم هات بە زمانا |
| وشەی بەرد | |
| وتی: ئەی سوار لاوی پەسەندم | پەترۆی زامانی کۆنت هەڵکەندم |
| وەنیە ئەم خوێنە، هەوەڵ جارم بێ | زووخی دەروونی پڕ جەخارم بێ |
| چەن خوێنی پیادە، چەن خوێنی سوار | ڕژا بە سەرما، هەزاران هەزار |
| کە بەرد ئەمەی وت، ساتێ هەبەسام | پشووم لێ بڕا، تەواو تەواسام |
| وەرامی قانع: | |
| وەرامم داوە ڕووم کرد لە ئەو بەرد | وتم ئەی بەردی وەکوو من ڕەنگ زەرد |
| من سوێندت ئەدەم بە خوای لامەکان | بە ئافەریدەی دەورانی جیهان |
| بۆم بەیان بکە ڕازی نیهانی | هەوەڵ تا ئاخر، هەرچی ئەزانی |
| لە مەولا و لە شێخ، لە بەگ و لە میر | لە ئاغا و مسکێن، لە پاشا و وەزیر |
| لە کۆشک و خانوو، لە شار و دێهات | ئەم شارە گەورە بۆچی وای لێهات؟ |
| وەرامی بەرد: | |
| وتی ئەی قانع تۆ خوێندەواری | من وامئەزانی زرنگ و هۆشیاری |
| سەیری مێژووکە ئەزانی چۆنە | دەسکاری کێیە ئەم شارە کۆنە |
| لە پێش میلاددا، لە قەڕنی حەوتەم | هۆزی مادەکان لە زۆر تا بەکەم |
| لە ئەورووپاوە هاتنە ئاسیا | کردیان بە مەڵبەند گشت دەشت و چیا |
| کۆ بوونۆ لە یەک زۆر و بێ شومار | دەوڵەتی مادیان هێنایە سەرکار |
| شاری پایتەختیان ناونا ئەکباتان | ئێستە پێی ئەڵێن شاری «هەمەدان» |
| یەکەم شا، دیوکس، دانیشت لەسەر تەخت | بۆ خۆشی و شادی، کوتای تەپڵی بەخت |
| سوپای دروست کرد لە پیادە ولە سوار | مەردی ڕووی مەیدان پاڵەوانی کار |
| مامۆستای ڕاگرت بۆ خوێندەواری | شاری ڕازانۆ فەنی میعماری |
| سوارەی سەربازی خستە ناو ڕێگا | هەتاکوو هیچ کەس ماڵی کەس نەبا |
| مسکین نەواز و هەژار پەروەر بوو | بۆ باقی شاهان، چەشنی سەروەر بوو |
| بەبێ ئاژاوە و بێ شەڕ و هەرا | لەسەر شارانا والی دانرا |
| پەیدای کرد بۆ کورد ناو و ئابڕوو | بنچینەی مادی خستە ناو مێژوو |
| جێگەداری ئەو «فرەفرتیش» بوو | پاش باوکی، ئەویش کەوتە هات وچوو |
| لە شوێنی باوکی عیزەتی نوان | چاکتر لە باوکی کوردی پێگەیان |
| سنووری خاکی بڵاو کردەوە | گۆی هونەرمەندی تەواو بردەوە |
| دەرەجەی سەرباز، لە پیادە و سوار | چەپەر بوو بەرید، لەم شار بۆ ئەو شار |
| ئاڵ و گۆڕ لەگەڵ دراوسێکانی | پێویستی هۆزی چاک بەدەس هانی |
| زۆر زۆر تێکۆشا بە هوشیاری | هەتا پێشی خست پیشەی جوتیاری |
| لەپاش چەند ساڵێ بەبێ دەردی سەر | وڵاتی جێهێشت لەبۆ «هۆخشتەر» |
| هۆخشتەر کوڕی هاتە ڕووی مەیدان | چاکتر تێکۆشا، بۆ هۆزی کوردان |
| سوپای پێکۆنا زوو بە دەست و برد | دوژمنی دەوری هەموو لەناو برد |
| کەمەر بەستە بوو تا ڕۆژی مردن | دایم ئامادە بۆ خزمەت کردن |
| شاهی دڵنەواز، هەژار پەروەر بوو | لەناو شاهانا، چەشنی سەروەر بوو |
| بۆ دەرکردنی دەوڵەتی ئاشوور | لە ئەکباتانۆ، هاتە شارەزوور |
| زانی ئاشووری مەردی دلێرن | شەڕکەر و وریا، بە کوشتن فێرن |
| ئەمجا هۆخشتەر پادشای عادڵ | خوشکی خۆی بەخشی بە پاشای بابل |
| بەهۆی زاوایی ئەم پاشا گەورە | ئاشووریان دەرکرد، نەمان لە دەورە |
| ئەمجا ئایتەختی هێنا شارەزوور | شاری دروست کرد بە «نەوێ» مەشوور |
| «نەوێ» و «بەردەبەل» هەتاکوو خولمار | ئەو دەشتە گەورەی هەموو کرد بە شار |
| بڕوانە ئیستەش بنچینەی ماوە | تا چاو بڕ ئەکا، لەهەر چوار لاوە |
| کوڕی هۆخشتەر ناوی ئاژدیهاک | کە مێژوو نووسان پێی ئەڵێن زوحاک |
| هەر چەن مێژوونووس ئەڵێن خوێنمژ بوو | بۆ قازانجی خۆی شاهێ پیاوکوژ بوو |
| بەڵام تەماشای مێژووی یونان کە | سەیری ڕابوردووی تەواو جیهان کە |
| بۆت دەرئەکەوێ کە خوێنمژ نەبووە | گشتی درۆیە و هیچ پیاوکوژ نەبووە |
| بڕوانە وشەی هێرۆدۆت یونانی | ئیسپاتی ئەکا، زۆر بە جوانی |
| لە پاش ئاژدیهاک نۆرە هاتە «زوور» | ئێستەش بەو خاکە ئەڵێن، شارەزوور |
| ئاخر پادشای مادەکان زوورە | لەناو مێژوودا تەواو مەشوورە |
| لە دەوری زووردا، دەوریان دوایی هات | حوکمیان نەما لە خاک و وڵات |
| پاشماوەی ئەوان بۆ هۆزی کوردان | تەپلەی نەوگینە و فەقێیانەیی پان |
| کە بەرد ئەم ڕازەی بۆ گێڕامەوە | کڕنووشم بۆ برد، بە سەلامەوە |
| وتم مەمنوون بووم ئەی بەردی کۆنە | شارەزات کردم، کە میدیا چۆنە |
| منیش دووبارە زامم کولاوە | خواحافیزیم کرد گەڕامە دواوە |
This work is first published in Iraq and is now in the public domain because its copyright protection has expired by virtue of the Law No. 3 of 1971 on Copyright, amended 2004 by Order No. 83, Amendment to the Copyright Law. The work meets one of the following criteria:
- It is an anonymous work or pseudonymous work and 50 years have passed since the year of its publication
- It is a work where the copyright holder is a legal entity or a work of applied art and 50 years have passed since the year of its publication
- It is a photographic or cinematic work that is not compositive (artistic in nature) first published before 1 January 1999
- It is work published in Iraq before 1 January 1954, and the author died before 1 January 1979
- It is another kind of work, and 50 years have passed since the year of death of the author (or last-surviving author)
- It is one of "collections of official documents, such as texts of international laws, regulations and agreements, judicial judgements and various official documents."
- It is the work of a body corporate, public or private, published by January 1st, 1980 (Article 20, 1971 law).
Public domainPublic domainfalsefalse