کۆساڵان وەشەن
Jump to navigation
Jump to search
| کۆساڵان وەشەن، کۆساڵان وەشەن | میرزام سەیری هەرد کۆساڵان وەشەن |
| تەماشای جەرگەی «گوڵاڵان» وەشەن | سەیری سەربەرزان «عەوداڵان» وەشەن |
| پەی لانساران خاڵ خاڵش وەشەن | وەرواوی شیرین لاپاڵش وەشەن |
| شنۆی شاخەی ساز شەتاوش وەشەن | ڕۆ بێداریش وەش، شەو خاوش وەشەن |
| تەماشای نەورۆز خاڵماویش وەشەن | کافووریش، نیلیش، سیاویش وەشەن |
| چۆپی کۆساڵان سەیرانش وەشەن | سەدای «قاقبۆ»ی کەبکانش وەشەن |
| چە خاس جای گەشتەن، عوبوورش وەشەن | بۆی عەترو عەبیر «چنوور»ش وەشەن |
| «شەوبۆ»ی نازەنین، ئەشەد بۆش وەشەن | ساراو دەرودەشت، کەش و کۆش وەشەن |
| وەشەن بۆی «سۆسەن» سەر کڵاوانش | وەشەن سەوزی فەرش پای گڵاوانش |
| وەشەن خرپەی پای پۆلی ڕەندانش | وەشەن شیرین خاو سای سەهندانش |
| وەشەن چەنی دۆس ڕۆ گێڵیش پێدا | وەشەن بیش هامڕاز شەوان جە جێدا |
| وەشەن چوون بەهەشت ڕووی سەر بیساتش | وەشەن، شیرینەن، عەیش و نیشاتش |
| وەشەن، خاس وەشەن سەیری وەهارش | فەسڵی نیسانش، مانگی ئەیارش |
| پەی کەسێ خاسەن میرزام کۆساڵان | چەنی یار کەرۆ سەیری گوڵاڵان! |
| هەرکەس چوون سەیدی جە هیجران خەستەن | سەیری کۆساڵان کەی ئاوات واستەن؟ |
This work was published before January 1, 1929, and is in the public domain worldwide because the author died at least 100 years ago.
Public domainPublic domainfalsefalse