ژ عشقا تە

by فەقێ تەیران

ژ عشقا تە  (1650)  by فەقێ تەیران

ژ عشقا تە ئەزێ دینم؛ شەڤ و رۆژێ د خیالێدا	هەڕۆ جارەک تە نابینم؛ وەکو گەڕیام د مالێدا
وەکو گەڕیام شرین کاری؛ ژ دەڤ و لێڤا شەکر باری	ل من رۆن کر شەڤا تاری؛ وەکو شەمعە شەمالێدا
وەکو شەمعە شەمال هەلکر؛ دل و مێلاک ل من کەر کر	تەژی نار و تەژی پەل کر؛ د دەستێ وێ شەپالێدا
یەقین تە ژ من هەبوو کەربەک؛ ب دەستێ خۆ هەژاند حەربەک	ل من دا دلبەرێ زەربەک؛ وەکو بزمار د نالێدا
ب چاکۆچان، ب بزماران؛ ل من دابوو ب هەر چاران	د سوبحێ و د ئێڤاران؛ موقیم مابوو د قتالێدا
قیتالا عشق و جانانم؛ ژ ڤێ عشقێ ئەز حەیرانم	ب ڤێ خەمرێ ئەز سوکرانم؛ فنجانا من شەراب تێدا
شەراب دا من ب فنجانێ؛ کرم ساقی ل مەیخانێ	وەکی گۆکم ل مەیدانێ؛ ل دەستێ وێ شەپالێدا
ل مەیدانێ وەکی گۆمە؛ ب زەربا کاشووێ چوومە	گەلی خەلقا مەکن لۆمە؛ ژ دەرحەق وێ دەلالێدا
دەلالێ ئەز کرم عەردە؛ بسکێن سیاهـ و ماوەردە	ژ قەوسان جەزمەیا بەردە؛ تە دێم بۆشن د هولالێدا
ژ وا قەوسا غەدەنگ هاتن؛ ژ وا بورجا تڤەنگ هاتن	ل من رووم و فرەنگ هاتن؛ مرن من دی د فالێدا
ئەلف نائێ د فالا من؛ قەبوول نابی دوعایا من	نە مەجمووعە خیالا من؛ بەلاڤبووم ژ سەودائێدا
ژ سەودائێ ئەزێ دینم؛ ل سەر عەقلێ خۆ نامینم	ئەبو سەینا ژ کۆ بینم؛ ل مەجنوونی ببی پەیدا
ئەزم مەجنوون ل دونیائێ؛ من سوند خواری ب تاهائێ	تو حوریکی ل دونیائێ؛ تە دێم گەشبوون د هولالێدا
توی بەدرا شرین عەینێ؛ ژ تورا قابە قەوسەینێ	ژ وا حەرفا تو مابەینێ؛ چ بێ غش بوو د فەسالێدا